បញ្ញវន្តខ្មែរនៅក្រៅស្រុករិះគន់ថា ការស្នើរបស់ប្រេសិតពិសេសនៃប្រធានអាស៊ានទៅកាន់របបសឹកភូមា ឲ្យយកអ្នកស្រី អ៊ុងសាន ស៊ូជី មកឃុំខ្លួនក្នុងផ្ទះ គឺកាន់តែបង្ហាញពីល្បិចកលរបស់លោក ហ៊ុន សែន ដែលបានធ្វើលើមេដឹកនាំបក្សប្រឆាំងលោក កឹម សុខា សព្វថ្ងៃនេះ។
ប្រធានវេទិកាពលរដ្ឋ និងជាអ្នកវិភាគនយោបាយ និងសង្គម លោក គឹម សុខ បានលើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីរាត្រីថ្ងៃទី២៧ មិថុនា ថា ប្រសិនបើមេដឹកនាំកម្ពុជា លោក ហ៊ុន សែន ក្នុងនាមប្រធានអាស៊ាននៅឆ្នាំ២០២២ នេះ ពិតជាយកចិត្តទុកដាក់ក្នុងការរកដំណោះស្រាយលើវិបត្តិភូមា និងចង់ជួយឲ្យអ្នកស្រី អ៊ុងសាន ស៊ូជី រួចផុតពីការបិទសិទ្ធិសេរីភាពមែននោះ លោក ហ៊ុន សែន ត្រូវតែស្នើឲ្យមានការដោះលែងអ្នកស្រី អ៊ុងសាន ស៊ូជី ឱ្យមានសេរីភាពពេញលេញតែម្តង មិនមែនគ្រាន់តែស្នើពីការឃុំខ្លួនក្នុងពន្ធនាគារឱ្យមកឃុំខ្លួនក្នុងផ្ទះបែបនេះទេ។
លោក គឹម សុខ អះអាងថា ជារឿងដ៏អាម៉ាស់របស់មេដឹកនាំកម្ពុជាក្នុងនាមជាប្រធានអាស៊ាន ដែលមិនហ៊ានទាមទារឲ្យរបបសឹកភូមា បើកសិទ្ធិសេរីភាពឲ្យអ្នកស្រី អ៊ុងសាន ស៊ូជី ឡើងវិញ ដែលបានត្រឹមតែស្នើឲ្យឃុំខ្លួនក្នុងផ្ទះជំនួសឲ្យការឃុំខ្លួនក្នុងពន្ធនាគារ។ ការស្នើបែបនេះក៏ទំនងជាលោក ហ៊ុន សែន ព្យាយាមយករួចខ្លួនតាមវិធីនៃការពន្យារពេលឲ្យចប់អាណត្តិរបស់ខ្លួនក្នុងនាមជាប្រធានអាស៊ានឆ្នាំ២០២២ នេះដែរ។
លោកបន្ថែមថា ការស្នើឱ្យយកអ្នកស្រី អ៊ុងសាន ស៊ូជី មកឃុំខ្លួនក្នុងផ្ទះបែបនេះ ទំនងជាលទ្ធភាពដែលលោក ហ៊ុន សែន អាចធ្វើបានខ្ពស់បំផុតក្នុងនាមលោកជាប្រធានអាស៊ានប្តូរវេននៅឆ្នាំនេះ ព្រោះលោក ហ៊ុន សែន ខ្លួនឯងក៏កំពុងប្រឡូកប្រឡាក់ទៅដោយការរំលោភសិទ្ធិមនុស្សធ្ងន់ធ្ងរមិនចាញ់របបសឹកភូមាប៉ុន្មានដែរ ដូចជាការបិទសិទ្ធិសេរីភាពមេដឹកនាំបក្សប្រឆាំង លោក កឹម សុខា និងការចាប់បញ្ជូនខ្លួនសកម្មជនសិទ្ធិមនុស្ស កញ្ញា សេង ធារី ទៅដាក់ពន្ធនាគារនៅខេត្តជាប់ព្រំប្រទល់ប្រទេសថៃ នៅពេលនេះ ជាដើម។
ប្រធានវេទិកាពលរដ្ឋរូបនេះបញ្ជាក់ថា ការរំលោភសិទ្ធិមនុស្សក្រោមអំណាចមេរដ្ឋប្រហារបង្ហូរឈាមភូមា លើពលរដ្ឋខ្លួនឯងសព្វថ្ងៃនេះ គឺមិនខុសគ្នាទៅនឹងការអនុវត្តអំណាចទំនើងចិត្តរបស់បុរសខ្លាំងដើរបញ្ច្រាសទិសកម្ពុជា លោក ហ៊ុន សែន ដែលកំពុងគាបសង្កត់សិទ្ធិពលរដ្ឋនៅកម្ពុជាយ៉ាងអានាធិបតេយ្យ ដែលជាប្រធានអាស៊ានប្តូរវេនក្នុងពេលបច្ចុប្បន្ននេះប៉ុន្មាននោះទេ។
កាលពីថ្ងៃទី២៧ ខែមិថុនា ឆ្នាំ២០២២ រដ្ឋមន្ត្រីការបរទេសកម្ពុជាដែលជាប្រេសិតពិសេសរបស់ប្រធានអាស៊ាន លោក ប្រាក់ សុខុន បានផ្ញើលិខិតទៅកាន់រដ្ឋមន្ត្រីរបបសឹកភូមា លោក Wunna Maung Lwin ដោយសុំឱ្យផ្ទេរអ្នកស្រី អ៊ុងសាន ស៊ូជី ពីការឃុំខ្លួននៅពន្ធនាគារដែលបានប្រកាសឡើងដោយរបបសឹកភូមា កាលពីពាក់កណ្តាលខែមិថុនា កន្លងទៅ ឲ្យបន្តការឃុំខ្លួននៅក្នុងលំនៅឋានរបស់អ្នកស្រីក្នុងទីក្រុងរ៉ុងហ្គូន ដូចកាលពីមុនវិញ។
ទាក់ទិននឹងវិបត្តិនៅភូមា នេះ កាលពីដើមខែមករា ឆ្នាំ២០២២ មេដឹកនាំបក្សកាន់អំណាច លោក ហ៊ុន សែន ក្រោយទទួលបានសិទ្ធិធ្វើជាប្រធានអាស៊ានប្តូរវេនឆ្នាំ២០២២ ភ្លាមៗ បានអះអាងថា លោកនឹងធ្វើដំណើរទស្សនកិច្ចទៅកាន់ប្រទេសភូមា ជាឯកតោភាគីជួបគ្នាជាមួយមេយោធាភូមា លោក មីន អ៊ុងឡាំង ដោយផ្ទាល់ ដើម្បីដោះស្រាយវិបត្តិនៅភូមា ឲ្យបានតាមបទពិសោធន៍របស់លោកដែលបានដឹកនាំកម្ពុជាជាង ៤០ឆ្នាំមកនេះ ប៉ុន្តែដំណើរទស្សនកិច្ចនោះត្រូវបរាជ័យទាំងស្រុង និងរងនូវភាពអាម៉ាស់ចំពោះការអួតអាងរបស់ខ្លួនយ៉ាងធ្ងន់ធ្ងរផងដែរ។
ក្រោយដំណើរទស្សនកិច្ចរបស់លោក ហ៊ុន សែន កាលពីដើមខែមករា ឆ្នាំ២០២២ មក ត្រូវគេមើលឃើញថា របបសឹកភូមាកាន់តែប្រើអំណាចធ្វើទុក្ខបុកម្នេញទៅលើពលរដ្ឋភូមា និងគូប្រជែងនយោបាយរបស់ខ្លួនកាន់តែខ្លាំងឡើងៗ។ ជាក់ស្តែង របបសឹកបានប្រកាសកែប្រែរដ្ឋធម្មនុញ្ញរបស់ប្រទេសភូមា ដោយអនុវត្តទោសប្រហារជីវិតឡើងវិញ បន្ទាប់ពីទោសប្រហារជីវិតនេះត្រូវបានលុបចោលចាប់តាំងពីឆ្នាំ១៩៩០ មក។
ក្រោយប្រកាសឲ្យមានទោសប្រហារជីវិត មេយោធាផ្ដាច់ការភូមា បានប្រកាសកាលពីថ្ងៃទី៣ ខែមិថុនា ឆ្នាំ២០២២ ដោយកាត់ទោសប្រហារជីវិតមនុស្ស ៤នាក់ដោយការព្យួរក ក្នុងនោះក៏មានអតីតសមាជិកសភាមកពីគណបក្សសម្ព័ន្ធជាតិប្រជាធិបតេយ្យរបស់អ្នកស្រី អ៊ុងសាន ស៊ូជី ផងដែរ៕