រាជរដ្ឋាភិបាលកម្ពុជាកំណត់យកថ្ងៃអាទិត្យ ទី២៣ ខែកក្កដា ឆ្នាំ២០២៣ ជាថ្ងៃបោះឆ្នោតជ្រើសតាំងតំណាងរាស្ត្រសម្រាប់នីតិកាលទី៧ នៃរដ្ឋសភាកម្ពុជា បន្ទាប់ពីកម្ពុជាបានបញ្ចប់នូវការបោះឆ្នោតជ្រើសរើសសមាជិកក្រុមប្រឹក្សាឃុំ-សង្កាត់កាលដើមខែមិថុនា ឆ្នាំ២០២២ កន្លងទៅនេះ។
បុរសខ្លាំងកម្ពុជា លោក ហ៊ុន សែន បានចេញអនុក្រឹត្យកាលពីថ្ងៃទី២៩ ខែមិថុនា ឆ្នាំ២០២២ ថា កម្ពុជានឹងអនុវត្តដំណើរការនៃការបោះឆ្នោតជ្រើសតាំងតំណាងរាស្ត្រទៅតាមអាណត្តិរបស់ខ្លួនដែលមានរយៈពេល ៥ឆ្នាំម្តង នៅថ្ងៃអាទិត្យ ទី២៣ ខែកក្កដា ឆ្នាំ២០២៣ ខាងមុខនេះ។
ក្នុងសេចក្តីសម្រេចនៃអនុក្រឹត្យនេះ បានសម្រេចឱ្យរដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី រដ្ឋមន្ត្រីក្រសួងមហាផ្ទៃ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងរដ្ឋមន្ត្រីគ្រប់ក្រសួង រួមជាមួយស្ថាប័នពាក់ព័ន្ធទាំងអស់ ត្រូវនាំគ្នាអនុវត្តសេចក្តីសម្រេចនេះឱ្យមានប្រសិទ្ធភាពខ្ពស់រហូតដល់ការបោះឆ្នោតឆ្នាំ២០២៣ ចប់សព្វគ្រប់។
មាត្រា៣ នៃច្បាប់ស្ដីពីការបោះឆ្នោតជ្រើសតាំងតំណាងរាស្ត្រ បានចែងថា កាលបរិច្ឆេទនៃការបោះឆ្នោតត្រូវកំណត់ និងប្រកាសដោយនាយករដ្ឋមន្ត្រីតាមសំណើរបស់រដ្ឋមន្ត្រីក្រសួងមហាផ្ទៃ។
នាយកប្រតិបត្តិអង្គការអភិវឌ្ឍន៍ផ្នត់គំនិត លោក សេក សុជាតិ បានប្រាប់សារព័ត៌មាន The Cambodia Daily នៅថ្ងៃទី៣០ មិថុនា នេះថា ដំណើរការនៃការបោះឆ្នោតនៅកម្ពុជាអាចឱ្យមានការចូលរួម និងទទួលស្គាល់ពីសហគមន៍អន្តរជាតិ ទាល់តែរដ្ឋាភិបាលកម្ពុជាកែសម្រួលសមាសភាពគណៈកម្មាធិការជាតិរៀបចំការបោះឆ្នោត (គ.ជ.ប) ឲ្យមានតម្លាភាព និងអាចទទួលយកបានសម្រាប់ភាពឯករាជ្យរបស់គណៈកម្មការនេះ។
លោក សេក សុជាតិ លើកឡើងថា ប្រសិនបើរដ្ឋាភិបាលកម្ពុជានៅតែប្រើប្រាស់ គ.ជ.ប សព្វថ្ងៃនេះបន្តទៀត នោះសហគមន៍អន្តរជាតិក៏មិនទទួលស្គាល់ការបោះឆ្នោតក្នុងឆ្នាំ២០២៣ ខាងមុខនេះដូចការបោះឆ្នោតឃុំ-សង្កាត់កាលពីពេលកន្លងទៅនេះដែរ ព្រោះថាសមាសភាពទាំង ៩រូបរបស់ គ.ជ.ប ដែលមកពីបក្សកាន់អំណាចទាំងអស់ដូចពេលបច្ចុប្បន្ននេះ ពិតជាពិបាកឲ្យមជ្ឈដ្ឋានអន្តរជាតិ និងប្រជាពលរដ្ឋម្ចាស់ឆ្នោតទទួលស្គាល់ពីតម្លាភាព និងភាពឯករាជ្យរបស់គណៈកម្មការនេះខ្លាំងណាស់។
ចំណែកមន្ត្រីជាន់ខ្ពស់របស់គណបក្សសង្គ្រោះជាតិ និងជាអតីតអ្នកទោសនយោបាយ លោក មាជ សុវណ្ណារ៉ា បានប្រាប់ The Cambodia Daily នៅថ្ងៃទី៣០ មិថុនា នេះដែរថា ពាក្យថាសេរីពហុបក្ស មិនមែនគ្រាន់តែមានគណបក្សនយោបាយច្រើនចូលរួមការបោះឆ្នោតប៉ុណ្ណោះទេ ប៉ុន្តែគណបក្សទាំងអស់ត្រូវតែការពារដោយច្បាប់ និងគ្មានការគំរាមកំហែងពីបក្សកាន់អំណាចជាដាច់ខាត។ ជាក់ស្តែង គណបក្សសង្គ្រោះជាតិដែលត្រូវបានរំលាយក្នុងពេលបច្ចុប្បន្ននេះ គឺជាការគំរាមកំហែង និងការបិទសិទ្ធិនយោបាយរបស់ក្រុមប្រឆាំងយ៉ាងធ្ងន់ធ្ងរ ដូច្នោះពាក្យថាសេរីពហុបក្ស គឺមានតែនៅលើក្រដាសប៉ុណ្ណោះ។
លោក មាជ សុវណ្ណារ៉ា បញ្ជាក់ថា ប្រសិនបើរដ្ឋាភិបាលកម្ពុជានៅតែបន្តបិទសិទ្ធិសេរីភាពនយោបាយរបស់មេដឹកនាំបក្សប្រឆាំង លោក កឹម សុខា និងមិនបើកឱ្យមានបក្សប្រឆាំងដែលសហគមន៍អន្តរជាតិអាចទុកចិត្តបាននោះ ការបោះឆ្នោតជាតិឆ្នាំ២០២៣ ខាងមុខនេះក៏នឹងមិនបង្ហាញពីការលើកកម្ពស់លទ្ធិប្រជាធិបតេយ្យនៅកម្ពុជានោះដែរ ប៉ុន្តែបង្ហាញនូវការជាន់ឈ្លីលទ្ធិប្រជាធិបតេយ្យយ៉ាងធ្ងន់ធ្ងរទៅវិញ។
ចាប់តាំងពីឆ្នាំ១៩៩៣ មក កម្ពុជាបានបោះឆ្នោតជ្រើសតំណាងរបស់ខ្លួននៅថ្នាក់ជាតិ ឬជ្រើសរើសតំណាងរាស្ត្របាន ៦លើករួចមកហើយ។ ការបោះឆ្នោតជ្រើសតាំងតំណាងរាស្ត្រជាលើកដំបូងនៅឆ្នាំ១៩៩៣ ក្រោមការឃ្លាំមើលរបស់អង្គការសហប្រជាជាតិ ឬអ៊ុនតាក់ បន្ទាប់ពីមានកិច្ចព្រមព្រៀងសន្តិភាពទីក្រុងប៉ារីស នៅឆ្នាំ១៩៩១។ ការបោះឆ្នោតនៅក្នុងអាណត្តិទី១ នោះ ត្រូវបានសហគមន៍អន្តរជាតិចាត់ទុកជាការបោះឆ្នោតដែលមានលក្ខណៈសេរី ត្រឹមត្រូវ និងយុត្តិធម៌ជាងគេសម្រាប់ការបោះឆ្នោតនៅក្នុងប្រទេសកម្ពុជា៕