សង្គ្រាមរុស្ស៊ី ឈ្លានពានអ៊ុយក្រែន បានឈានចូលដល់ ១៣១ថ្ងៃហើយបើគិតត្រឹមថ្ងៃទី៤ ខែកក្កដា នេះ។ ដំបូងឡើយ របបលោក ពូទីន បានអួតថា យ៉ាងយូរ ៧២ម៉ោងប៉ុណ្ណោះនឹងអាចផ្ដួលរំលំរដ្ឋាភិបាលរបស់លោក វូឡូឌីមៀរ ហ្សេឡេនស្គី បានហើយ។
ជាមួយនឹងការលើកទ័ពដល់ជាង ២០ម៉ឺននាក់អន្តរាគមន៍ដោយទ័ពអាកាស និងទ័ពមីស៊ីល ឃើញថារថក្រោះរថពាសដែករាប់រយគ្រឿងបើកយ៉ាងសង្ហាចូលទៅវាយលុកបាញ់ផ្លោងទៅលើទឹកដីអ៊ុយក្រែន។
នៅខណៈគ្រាប់មីស៊ីលធ្លាក់យ៉ាងច្រើននៅលើតំបន់រដ្ឋធានីគៀវ ដោយបាញ់កម្ទេចទីតាំងសំខាន់ៗរបស់រដ្ឋាភិបាលអ៊ុយក្រែន តាមរយៈការបាញ់ប្រហារដោយកងយន្តហោះចម្បាំងទៀតផង គឺកងទ័ពថ្មើរជើង ឬទ័ពរថក្រោះរបស់រុស្ស៊ី បានបើកលើដងផ្លូវរាប់រយគ្រឿងសំដៅវាយកាន់កាប់រដ្ឋធានីមួយនេះដើម្បីផ្ដួលរំលំរដ្ឋាភិបាលលោក ហ្សេឡេនស្គី។
តែមិនដូចការរំពឹងនោះទេ រថក្រោះរបស់រុស្ស៊ីរាប់សិបគ្រឿងត្រូវបានកងទ័ពអ៊ុយក្រែនពួនបាញ់ឆេះពេញផ្លូវដោយកាំភ្លើងរបស់អង់គ្លេស និងអាមេរិក។ ទីបំផុត កងទ័ពរុស្ស៊ីមួយភាគធំបានទម្លាក់អាវុធនៅចំពោះមុខទ័ពអ៊ុយក្រែន ក្រោយពីពួកគេអស់ស្បៀង និងគ្រាប់ដើម្បីប្រយុទ្ធ ព្រោះតែកងទ័ពអ៊ុយក្រែនវាយឡោមព័ទ្ធជាប់នៅភាគខាងជើងរដ្ឋធានីគៀវ។
របបក្រុងមូស្គូ ក៏បានសម្រេចដកទ័ពចេញពីភាគខាងជើងក្រុងគៀវ ដែលសល់តែ ៦០គីឡូម៉ែត្រទៀតពីទីក្រុងគៀវ។ ការដកទ័ពរបស់រុស្ស៊ីទៅវិញ គឺធ្វើឡើងតាមរយៈការចរចា។ តែការពិត អ្នកជំនាញយោធាថា រុស្ស៊ីបាក់ទ័ពទើបរកល្បិចថាដកទ័ពដើម្បីបន្ធូរបន្ថយកម្ដៅសង្គ្រាម។
តើជាការពិតដែរឬទេដែលរុស្ស៊ីជាមហាអំណាចយោធាលំដាប់ទី២ នៃពិភពលោក បែរជាបាក់ទ័ពពុំអាចវាយកាន់កាប់បានរដ្ឋធានីគៀវ ដើម្បីបញ្ចប់រដ្ឋាភិបាលលោក ហ្សេឡេនស្គី ហើយរហូតបាក់ទ័ពទៀតផងនោះ?
ការពិត រុស្ស៊ីមានព្រំដែនជាប់នឹងអ៊ុយក្រែន គឺនៅភាគខាងកើត និងភាគខាងត្បូង។ កងទ័ពរុស្ស៊ីដែលចូលវាយលុករដ្ឋធានីគៀវ គឺវាយចូលតាមព្រំដែនភាគខាងកើត គឺតំបន់ដុនបាស និងតំបន់គ្រីមៀរ នៅភាគខាងត្បូង។
ចំណែកឯភាគខាងជើង និងខាងលិច គឺអ៊ុយក្រែន មានព្រំដែនជាប់នឹងប្រទេសបេឡារុស ប៉ូឡូញ ហុងគ្រី មុលហ្គារី មុលដាវី និងរូម៉ានី។ ដោយពុំអាចចល័តទ័ពចូលមកភាគខាងជើង និងខាងលិចបាន គឺកងទ័ពរុស្ស៊ីបានត្រឹមវាយប្រហារលើភាគខាងជើង និងខាងលិច ឬរដ្ឋធានីគៀវ គឺដោយទ័ពអាកាស និងការបាញ់ដោយគ្រាប់មីស៊ីលប៉ុណ្ណោះ។
តែយ៉ាងនេះក្ដី ក្នុងចំណោមប្រទេសដែលមានព្រំដែនជាប់នឹងអ៊ុយក្រែននៅភាគខាងជើង គឺមានបេឡារុសមួយដែរ។ បេឡារុស គឺជាប្រទេសសម្ពន្ធភាពយោធាជាមួយរុស្ស៊ី ហើយបើតាមដំណឹងមកថា ប្រទេសនេះនឹងអនុញ្ញាតឱ្យរុស្ស៊ីដាក់ពង្រាយប្រព័ន្ធមីស៊ីល Inskander ដែលជាមីស៊ីលអាចបំពាក់ដោយគ្រាប់នុយក្លេអ៊ែរទៀតផង។
ចំណែកប្រព័ន្ធមីស៊ីល S-400 ជាមីស៊ីលបាញ់ទម្លាក់យន្តហោះ ត្រូវបានរុស្ស៊ីដាក់ពង្រាយរួចហើយនៅលើទឹកដីប្រទេសបេឡារុស។ នៅដំណាក់កាលចុងក្រោយនេះ រុស្ស៊ីបានបាញ់មីស៊ីលចូលទៅតំបន់ភាគខាងលិច និងទីក្រុងគៀវ គឺបាញ់ចេញពីទឹកដីបេឡារុស ដែលនាំឱ្យអ៊ុយក្រែនប្រកាសថ្កោលទោសបេឡារុសយ៉ាងខ្លាំង។
មិនតែប៉ុណ្ណោះ អ៊ុយក្រែនប្រកាសចោទបេឡារុស ថាប្រទេសនេះនឹងលើកទ័ពជួយទ័ពរុស្ស៊ី ដោយប្រើទង់ជាតិរុស្ស៊ី ស្លៀកពាក់ឯកសណ្ឋានទ័ពរុស្ស៊ី ហើយវាយចូលទឹកដីអ៊ុយក្រែន។
ក្រសួងការពារជាតិអ៊ុយក្រែន ប្រកាសឱ្យក្រុមបស្ចិមដឹងថា មិនយូរនោះទេ រុស្ស៊ីនឹងវាយចូលទឹកដីអ៊ុយក្រែន តាមរយៈប្រទេសបេឡារុស ដោយមានទ័ពបេឡារុស ប្រើទង់ជាតិរុស្ស៊ីជួយអន្តរាគមន៍ទៀតផង។
ករណីនេះ បេឡារុសបានបដិសេធដោយព្រមានថា បេឡារុសមិនចាំបាច់ប្រើទង់ជាតិរុស្ស៊ីនោះទេ បើអ៊ុយក្រែននៅបន្តបាញ់មីស៊ីលមកលើទឹកដីបេឡារុសម្ដងទៀតនោះ គឺបេឡារុសនឹងលើកទ័ពចូលទឹកដីអ៊ុយក្រែន។
ដូចនេះហើយបានជាមានការចោទសួរថា តើបេឡារុសអាចទាញសង្គ្រាមរុស្ស៊ី-អ៊ុយក្រែនកាន់តែរីករាលដាលនៅភាគខាងជើង និងភាគខាងលិចឬទេ?
តើអ៊ុយក្រែនពិតជាបានបាញ់មីស៊ីលលើបេឡារុសមែនឬទេ?
អ្នកដែលផ្ដើមចោទថាអ៊ុយក្រែនបានបាញ់មីស៊ីលចូលទឹកដីបេឡារុស គឺលោកប្រធានាធិបតី Aleksandr Lukashenko។ លោក Lukashenko ជាប្រធានាធិបតីបេឡារុស។ លោកអះអាងថា ប្រព័ន្ធមីស៊ីលរបស់បេឡារុសបានបាញ់ទម្លាក់មីស៊ីលរបស់អ៊ុយក្រែនជាច្រើនគ្រាប់ដែលបានបាញ់មកលើដែនដីបេឡារុសនៅរយៈពេលថ្មីៗនេះ។
ការលើកឡើងរបស់លោក Lukashenko បាននាំឱ្យអ៊ុយក្រែនទាមទារឱ្យបេឡារុសផ្ដល់ភស្តុតាង។ នេះជាចំណោទមួយដែលនាំឱ្យមានការបារម្ភថា មិនយូរនោះទេ គឺសង្គ្រាមបេឡារុសលើកទ័ពជួយទ័ពរុស្ស៊ី វាយចេញពីទឹកដីបេឡារុស អាចនឹងកើតមាននៅភាគខាងជើងអ៊ុយក្រែន។
ប្រធានាធិបតីបេឡារុស លោក Aleksandr Lukashenko និងប្រធានាធិបតីរុស្ស៊ី លោក វ៉្លាឌីមៀរ ពូទីន គឺជាមិត្តនឹងគ្នា។
របបនៅបេឡារុសសព្វថ្ងៃស្ថិតនៅក្រោមការដឹកនាំរបស់លោក Aleksandr Lukashenko ដែលក្រុមបស្ចិមប្រទេសហៅថាជាជនផ្ដាច់ការ។ លោក Lukashenko ជាមិត្តលោក ពូទីន ផង ហើយក៏ជាអាយ៉ងរបស់លោក ពូទីន ផង។
តាំងពីថ្ងៃដែលរុស្ស៊ីឈ្លានពានអ៊ុយក្រែន លោក Lukashenko បានឈរខាងរុស្ស៊ីជានិច្ចដោយបានគាំទ្រលោក ពូទីន ក្នុងការលើកទ័ពវាយចូលទឹកដីអ៊ុយក្រែន។ លោក Lukashenko មិនដែលពោលពាក្យថាបានបញ្ជូនទ័ពទៅជួយច្បាំងទ័ពរុស្ស៊ីនៅអ៊ុយក្រែនម្ដងណានោះទេ។ តែលោក Lukashenko បានប្រគល់ទឹកដីបេឡារុសឱ្យលោក ពូទីន បញ្ជូនទ័ពរុស្ស៊ីមកដាក់ពង្រាយរួចហើយ គឺនៅប៉ុន្មានថ្ងៃមកនេះ។ គេរំពឹងថា ប្រព័ន្ធមីស៊ីល Inskander ដែលជាមីស៊ីលអាចបំពាក់ដោយគ្រាប់នុយក្លេអ៊ែរនឹងត្រូវរុស្ស៊ីដឹកមកដាក់ពង្រាយលើទឹកដីបេឡារុសនៅប៉ុន្មានសប្ដាហ៍ទៀតនេះ ខណៈប្រព័ន្ធមីស៊ីល S-400 មាននៅលើទឹកដីបេឡារុស ហើយនោះ។
ការដាក់ពង្រាយមីស៊ីល S-400 នេះ គឺក្រោយពីលោក Lukashenko បានទៅជួបលោក ពូទីន កាលថ្ងៃទី២៥ មិថុនា។ លោក Lukashenko បានទៅជួបលោក ពូទីន នៅក្នុងទីក្រុង Saint-Pétersbourg នៃទឹកដីប្រទេសរុស្ស៊ី។ របបលោក Lukashenko ក៏កំពុងរងទណ្ឌកម្មសេដ្ឋកិច្ចពីក្រុមបស្ចិមប្រទេសផងដែរ ព្រោះតែមេដឹកនាំប្រទេសនេះគាំទ្រលោក ពូទីន លើកទ័ពឈ្លានពានអ៊ុយក្រែន។
តាមការបង្ហាញខាងលើនេះ មើលទៅជៀសពុំរួចនោះទេដែលថា បេឡារុសអាចទាញសង្គ្រាមរុស្ស៊ី-អ៊ុយក្រែន កាន់តែរីករាលដាលនៅភាគខាងជើង និងភាគខាងលិចប្រទេសអ៊ុយក្រែន ប្រសិនបើតំបន់ភាគខាងកើតប្រទេស គឺតំបន់ដុនបាស ត្រូវបានកងទ័ពរុស្ស៊ីវាយកាន់កាប់បានទាំងស្រុង៕