មន្ត្រីជាន់ខ្ពស់គណបក្សប្រជាធិបតេយ្យមូលដ្ឋាន អះអាងថា ការសហការចងសម្ពន្ធភាពគ្នារវាងគណបក្សក្រៅរដ្ឋាភិបាលមុនពេលបោះឆ្នោត គឺមានផលប្រយោជន៍សម្រាប់គណបក្សនីមួយៗ និងស្ដារប្រជាធិបតេយ្យសេរីពហុបក្សនៅកម្ពុជាដើម្បីការពារផលប្រយោជន៍ជូនពលរដ្ឋ។
ប្រធានគណៈកម្មាធិការនាយកនៃគណបក្សប្រជាធិបតេយ្យមូលដ្ឋាន បណ្ឌិត យ៉ង សាំងកុមារ បានប្រាប់ The Cambodia Daily នៅថ្ងៃទី២៥ កក្កដា នេះថា តាមបទពិសោធន៍ គណបក្ស សម រង្ស៊ី ដែលបានប្តូរឈ្មោះមកជាគណបក្សភ្លើងទៀនក្នុងពេលបច្ចុប្បន្ននេះ ធ្លាប់ទទួលបានជាង ២ពាន់អាសនៈឃុំ-សង្កាត់ និងទទួល ២៦អាសនៈរដ្ឋសភាជាតិក្នុងឆ្នាំ២០០៨ ហើយចំណែកគណបក្សសិទ្ធិមនុស្សរបស់លោក កឹម សុខា ធ្លាប់ទទួលបានសំឡេងឆ្នោតជិត ៤០ម៉ឺនសំឡេង និងមានសមាជិករដ្ឋសភា ៣អាសនៈក្នុងរដ្ឋសភាជាតិនៅពេលនោះផងដែរ។
បណ្ឌិត យ៉ង សាំងកុមារ អះអាងថា ក្រោយពីគណបក្ស សម រង្ស៊ី និងគណបក្សសិទ្ធិមនុស្សចងសម្ពន្ធភាពនៅឆ្នាំ២០១២ ដែលសង្ឃឹមថានឹងកើនអាសនៈត្រឹមតែ ៣០អាសនៈ ដែលជាចំនួនមួយអាចឱ្យតំណាងរាស្ត្របក្សប្រឆាំងអាចដាក់ញត្តិបន្ទោសរាជរដ្ឋាភិបាលតាមមាត្រា៩៨ នៃរដ្ឋធម្មនុញ្ញ ប៉ុន្តែសម្ពន្ធភាពនេះបានធ្វើឱ្យកើនសំឡេងអ្នកគាំទ្ររហូតដល់ទៅ ៥៥អាសនៈ ដែលនេះគឺជាការបង្ហាញពីលទ្ធផលដ៏ត្រចះត្រចង់នៃការរួបរួមនេះយ៉ាងខ្លាំង។
មន្ត្រីជាន់ខ្ពស់គណបក្សក្រៅរដ្ឋាភិបាលរូបនេះបញ្ជាក់ថា មានតែការរួបរួមគ្នារវាងក្រុមគណបក្សក្រៅរដ្ឋាភិបាលដែលមាននិន្នាការសេរីភាពនិយមដូចគ្នាប៉ុណ្ណោះ ទើបអាចទទួលបានសំឡេងគ្រប់គ្រាន់ក្នុងការចូលរួមតម្រង់ទិសនូវការដឹកនាំប្រទេសតាមគោលការណ៍ និងយន្តការប្រជាធិបតេយ្យសេរីពហុបក្សបែបសភានិយម ដែលកម្ពុជាប្រកាន់យកនៅពេលនេះ។
កាលពីថ្ងៃទី១១ ខែកក្កដា ឆ្នាំ២០២២ គណបក្សក្រៅរដ្ឋាភិបាលចំនួន៤ រួមមានគណបក្សភ្លើងទៀន គណបក្សឆន្ទៈខ្មែរ គណបក្សកែទម្រង់កម្ពុជា និងគណបក្សប្រជាធិបតេយ្យមូលដ្ឋាន បានធ្វើសន្និសីទសារព័ត៌មានរួមគ្នាដើម្បីរួបរួមប្រមូលកម្លាំងអ្នកប្រជាធិបតេយ្យចូលរួមការបោះឆ្នោត ដើម្បីប្រកួតប្រជែងជាមួយបក្សកាន់អំណាចក្នុងឆ្នាំ២០២៣ ខាងមុខនេះ។
ក្រុមមន្ត្រីនៃគណបក្សទាំងបួននេះអះអាងថា ដំណើរការនៃការរួបរួមនេះកំពុងស្ថិតនៅលើផ្លូវនៃការពិភាក្សាគ្នានៅឡើយ ដូច្នេះដំណើរការនេះនឹងសម្រេចថាត្រូវរៀបចំឱ្យទៅជាការច្របាច់បញ្ចូលគ្នា ឬគ្រាន់តែចូលរួមគ្នាដោយរក្សាគណបក្សឱ្យស្ថិតក្នុងការដឹកនាំរៀងៗខ្លួនដដែល ឬយ៉ាងណានោះ គឺនៅមិនទាន់ជជែកគ្នាដាច់ស្រេចនៅឡើយទេ ខណៈការបោះឆ្នោតជាតិឆ្នាំ២០២៣ ត្រូវបានរដ្ឋាភិបាលកម្ពុជាសម្រេចថានឹងប្រព្រឹត្តទៅនៅចុងខែកក្កដា ឆ្នាំ២០២៣ ទៅហើយនោះ។
គណបក្សនយោបាយនៅកម្ពុជាមានជាង ៤០គណបក្សនយោបាយដែលបានចុះបញ្ជីនៅក្រសួងមហាផ្ទៃ ប៉ុន្តែគណបក្សដែលបានចូលរួមការបោះឆ្នោតកាលពីពេលថ្មីៗនេះមានត្រឹមតែចំនួន ១៧គណបក្សប៉ុណ្ណោះ៕