បុរសខ្លាំងខាងការដឹកនាំបែបលុបបឹង និងលុបទន្លេ លោក ហ៊ុន សែន បានសម្រេចកាត់ផ្ទៃដីទំហំជាង ១០ហិកតារចេញពីផ្ទៃបឹងជើងឯក ដែលជាទ្រព្យសម្បត្តិសាធារណៈរបស់រដ្ឋឱ្យទៅឧកញ៉ា ឡោក ហ៊ួរ ធ្វើជាកម្មសិទ្ធិស្របច្បាប់ និងដីទំហំជិត ២ហិកតារបន្ថែមទៀតឱ្យទៅក្រសួងមហាផ្ទៃ ដោយពន្ធ និងអាករផ្សេងទៀតគឺជាបន្ទុករបស់រដ្ឋ។
បុរសខ្លាំងរូបនេះបានចេញអនុក្រឹត្យស្ដីពីការកែសម្រួលផ្ទៃដីបឹងជើងឯក ស្ថិតនៅខណ្ឌមានជ័យ និងខណ្ឌដង្កោ រាជធានីភ្នំពេញ កាលពីដើមខែមីនា ឆ្នាំ២០២២ ដែលមានចំនួន ២ទីតាំងសរុបជាង ១០ម៉ឺនម៉ែត្រក្រឡា ឬស្មើនឹងទំហំជាង ១០ហិកតារ ដែលត្រូវបានផ្សព្វផ្សាយនៅថ្ងៃទី២៥ កក្កដា នេះ គឺត្រូវធ្វើអនុបយោគពីទ្រព្យសម្បត្តិសាធារណៈរបស់រដ្ឋទៅជាទ្រព្យសម្បត្តិឯកជនរបស់រដ្ឋ ដើម្បីឱ្យក្លាយទៅជាកម្មសិទ្ធិឯកជនស្របទៅតាមច្បាប់របស់កម្ពុជា។
លោក ហ៊ុន សែន ក៏បានចេញអនុក្រឹត្យមួយផ្សេងទៀតផងដែរកាលពីថ្ងៃទី៩ ខែមីនា ឆ្នាំ២០២២ នេះ ដោយកាត់ផ្ទៃដីបឹងជើងឯកចំនួនជាង ១ម៉ឺន ៨ពាន់ម៉ែត្រក្រឡាដែលស្មើនឹង ១ហិកតារ ៨អារ ស្ថិតក្នុងភូមិទួលរកា៣ សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ដើម្បីធ្វើអនុបយោគពីទ្រព្យសម្បត្តិសាធារណៈរបស់រដ្ឋទៅជាទ្រព្យសម្បត្តិឯកជនរបស់រដ្ឋ ដើម្បីផ្តល់ជូនក្រសួងមហាផ្ទៃ កាន់កាប់ដោយស្របច្បាប់។
លោក ហ៊ុន សែន បញ្ជាក់ក្នុងអនុក្រឹត្យនេះថា ផ្ទៃដីទាំងពីរទីតាំងដែលមានទំហំជាង ១០ហិកតារនេះ ប្រគល់ជាកម្មសិទ្ធិឱ្យទៅឧកញ៉ា ឡោក ហ៊ួរ ប្រធានក្រុមប្រឹក្សាជំនួយការលោក ជា ស៊ីម ប្រធានព្រឹទ្ធសភា ដោយពន្ធ និងអាករផ្សេងទៀតគឺជាបន្ទុករបស់រដ្ឋ។
លោក ឡោក ហ៊ួរ គឺជាឧត្តមសេនីយ៍ឯក (ផ្កាយ៣) នៃនគរបាលជាតិក្រសួងមហាផ្ទៃ ប៉ុន្តែលោកបានព្យួរមុខងារនេះដើម្បីទៅបំពេញតួនាទីជាអ្នកតំណាងរាស្ត្រមណ្ឌលខេត្តបាត់ដំបង របស់គណបក្សប្រជាជនកម្ពុជា។ ក្រោយពីរដ្ឋាភិបាលទទួលស្គាល់ថាលោក ឡោក ហ៊ួរ ពិតជាមានទំនាស់ដីធ្លីច្រើនកន្លែងជាមួយពលរដ្ឋរស់នៅខេត្តកណ្ដាល រដ្ឋាភិបាលបានចេញលិខិតតម្រូវឲ្យលោក ឡោក ហ៊ួរ ចូលដោះស្រាយទំនាស់ដីធ្លីទាំងនេះ។ នៅឆ្នាំ២០១៧ រាជរដ្ឋាភិបាលសម្រេចដកហូតដីដែលលោក ឡោក ហ៊ួរ បានរំលោភដីពីពលរដ្ឋចំនួនជិត ៣ពាន់ហិកតារប្រគល់ទៅឲ្យពលរដ្ឋវិញ។
គួរបញ្ជាក់ថា កាលពីខែកញ្ញា ឆ្នាំ២០១២ លោក ឡោក ហ៊ួរ ដែលតែងតែទៅមើលដីនៅក្នុងភូមិជើងឯក សង្កាត់ជើងឯក ខណ្ឌដង្កោ ត្រូវបានជនសង្ស័យ ២នាក់ជិះម៉ូតូមួយគ្រឿងទៅឈប់ក្បែរ ហើយប៉ុនប៉ងបាញ់សម្លាប់រូបលោក ប៉ុន្តែពេលជនដៃដល់ភ្ជង់កាំភ្លើង ក៏ត្រូវបានអង្គរក្សដែលទៅជាមួយលោកស្ទុះទៅពាំងពីមុខវាយតប ក៏ត្រូវជនដៃដល់បាញ់ ២គ្រាប់បណ្តាលឲ្យដេកដួលស្លាប់ក្នុងថ្លុកឈាម។
ផ្ទៃដីបឹងជើងឯក និងប្រឡាយស្ថិតនៅក្នុងខណ្ឌមានជ័យ និងខណ្ឌដង្កោ រាជធានីភ្នំពេញ និងក្រុងតាខ្មៅ ខេត្តកណ្តាល មានទំហំសរុបចំនួន ៥២០ហិកតារ ត្រូវបានរដ្ឋាភិបាលកម្ពុជាកំណត់ជាសម្បត្តិសាធារណៈរបស់រដ្ឋ កាលពីថ្ងៃទី០៣ ខែកញ្ញា ឆ្នាំ២០០៨ កន្លងទៅ។
កាលពីថ្ងៃទី០៧ ខែកុម្ភៈ ឆ្នាំ២០១៨ រដ្ឋាភិបាលកម្ពុជាបានសម្រេចកាត់ផ្ទៃដីទំហំជិត ៤០ហិកតារឱ្យទៅក្រុមហ៊ុន អ័រគីដេ វីឡា (Orkide Villa) ដែលជាក្រុមហ៊ុនឯកជនរបស់កូនស្រីបង្កើតរបស់លោក ហ៊ុន សែន គឺអ្នកស្រី ហ៊ុន ម៉ាណា ដើម្បីកាន់កាប់ជាកម្មសិទ្ធិ។
ក្រៅពីកាត់ផ្ទៃដីបឹងជើងឯកនេះឱ្យទៅកូនស្រីខ្លួនឯង លោក ហ៊ុន សែន ក៏បានកាត់ផ្ទៃដីបឹងនេះឱ្យទៅឈ្មួញដែលជាឧកញ៉ាធំៗជាច្រើនទៀតផងដែរ ដូចជាឧកញ៉ា ខូវ គឹមបាក់ ទទួលបានផ្ទៃដីបឹងនេះជាង ១០ហិកតារ។ លើសពីនេះ រដ្ឋាភិបាលក៏បានកាត់ផ្ទៃដីបឹងនេះឱ្យទៅឧកញ៉ា អ៊ឹង ប៊ុនហ៊ូវ ឧកញ៉ា លឹម រស់ និងឧកញ៉ា លឹម ប៊ុនសួរ ជាដើម ដល់ទៅ ១៩០ហិកតារឯណោះកាលពីចុងឆ្នាំ២០១៨។ បន្ថែមពីនេះ លោក ហ៊ុន សែន ក៏បានកាត់ផ្ទៃដីបឹងនេះឱ្យទៅឧកញ៉ាជាច្រើនទៀតអស់រាប់រយហិកតារថែមទៀត។
គិតត្រឹមខែមីនា ឆ្នាំ២០២២ នេះ ផ្ទៃដីបឹងជើងឯក ដែលមានទំហំសរុបចំនួន ៥២០ហិកតារដែលជាទ្រព្យសម្បត្តិសាធារណៈរបស់រដ្ឋនោះ ត្រូវបានរដ្ឋាភិបាលលោក ហ៊ុន សែន កាត់ចេញធ្វើអនុបយោគជាទ្រព្យសម្បត្តិឯកជនរបស់រដ្ឋ និងប្រទានកម្មជាកម្មសិទ្ធិជូនទៅស្ថាប័នរដ្ឋមួយចំនួន ក្រុមហ៊ុន ឈ្មួញជាអ្នកឧកញ៉ា ឧកញ៉ា និងមន្ត្រីមានអំណាចគ្រាក់ៗអស់ចំនួនយ៉ាងតិចប្រមាណជាង ៤៧០ហិកតារទៅហើយ៕