រដ្ឋមន្ត្រីក្រសួងមហាផ្ទៃ លោក ស ខេង ថាប្រទេសកម្ពុជាត្រូវបានគេដាក់ក្នុងបញ្ជីប្រផេះនៃក្រុមប្រទេសដែលមានហានិភ័យខ្ពស់ខាងលាងលុយកខ្វក់ និងចំណាត់ថ្នាក់ទី៣ ក្នុងបញ្ជីខ្មៅនៃក្រុមប្រទេសជួញដូរមនុស្ស។
រដ្ឋមន្ត្រីក្រសួងមហាផ្ទៃ លោក ស ខេង បានលើកឡើងក្នុងពិធីសម្ពោធអគាររដ្ឋបាល និងអគារសាលប្រជុំរបស់ស្នងការដ្ឋាននគរបាលរាជធានីភ្នំពេញកាលពីថ្ងៃទី៨ ខែកញ្ញា ឆ្នាំ២០២២ ថា មានបញ្ហាប្រឈមពីរសម្រាប់មុខមាត់ប្រទេសកម្ពុជាសព្វថ្ងៃនេះ ដែលត្រូវរំដោះខ្លួនចេញពីការចាត់ថ្នាក់ប្រទេសនេះទៅក្នុងបញ្ជីប្រផេះនៅក្នុងវិស័យធនាគារ ដោយគេចាត់ទុកថា ប្រទេសកម្ពុជាបានធ្វើចរាចរណ៍លុយខ្មៅ និងការទម្លាក់ប្រទេសនេះទៅក្នុងចំណាត់ថ្នាក់ទី៣ក្នុងបញ្ជីខ្មៅនៃការជួញដូរមនុស្ស។
លោក ស ខេង អះអាងថា ប្រសិនបើយើងមិនខិតខំប្រឹងប្រែងរំដោះខ្លួនចេញពីបញ្ជីប្រផេះទេ ថ្ងៃណាមួយអាចនឹងត្រូវបានគេទម្លាក់ចូលក្នុងបញ្ជីខ្មៅនៃការចរាចរលុយកខ្វក់បន្ថែមទៀតជាមិនខាន ដែលអាចឲ្យការប្រើថវិកាទាំងរដ្ឋ ទាំងឯកជនមានការលំបាក។ ដូច្នេះហើយ បានជារាជរដ្ឋាភិបាលបង្កើតគណៈកម្មាធិការប្រឆាំង និងសម្អាតប្រាក់ និងហិរញ្ញប្បទានភេរវកម្មដើម្បីដោះស្រាយបញ្ហាទាំងនេះ។
រដ្ឋមន្ត្រីក្រសួងមហាផ្ទៃ លោក ស ខេង អំពាវនាវឱ្យអាជ្ញាធរមានសមត្ថកិច្ចដែលស្ថិតក្រោមឱវាទរបស់ខ្លួនទាំងអស់ ចូលរួមគាំទ្រឱ្យកាន់តែខ្លាំងក្លាបន្ថែមទៀត ជាពិសេសក្រសួងស្ថាប័នពាក់ព័ន្ធនានា ដើម្បីដោះស្រាយបញ្ហាប្រឈមទាំងពីរឱ្យកាន់តែមានប្រសិទ្ធភាពខ្ពស់ និងដើម្បីមុខមាត់ប្រទេសកម្ពុជាលើឆាកអន្តរជាតិផងដែរ។
ការអះអាងនេះ ធ្វើឡើងបន្ទាប់ពីរាជាណាចក្រកម្ពុជាត្រូវបានចាត់ថ្នាក់ចូលទៅក្រុមប្រទេសដែលធ្វើចរាចរណ៍លុយកខ្វក់ និងជួញដូរមនុស្សធ្ងន់ធ្ងរសម្រាប់ឆ្នាំ២០២២ នេះ។ វិស័យដែលរងហានិភ័យខ្ពស់ខាងអំពើលាងលុយកខ្វក់បច្ចុប្បន្ននេះ មានដូចជាវិស័យធនាគារ ហិរញ្ញវត្ថុ វិស័យសំណង់ វិស័យអចលនទ្រព្យ និងវិស័យកាស៊ីណូ ជាដើម។
ទាក់ទិននឹងបញ្ហានេះ រាជរដ្ឋាភិបាលកម្ពុជាក៏បានចេញសេចក្ដីព្រាងច្បាប់ស្ដីពីការប្រឆាំង និងការសម្អាតប្រាក់ និងហិរញ្ញប្បទានភេរវកម្ម ឬការលាងលុយកខ្វក់ដែលត្រូវបានអនុម័តដោយគណៈរដ្ឋមន្ត្រីកម្ពុជាកាលពីចុងឆ្នាំ២០២០ ផងដែរ។
ការចេញសេចក្តីព្រាងច្បាប់នេះ ធ្វើឡើងបន្ទាប់ពីគណៈកម្មការអឺរ៉ុបបានស្នើដាក់ប្រទេសកម្ពុជា និងប្រទេសចំនួន១១ ទៀតទៅក្នុង «បញ្ជីខ្មៅ» ដែលសហភាពអឺរ៉ុបត្រូវបង្កើនការតាមដានកាន់តែខ្លាំងក្រោយពីប្រទេសកម្ពុជាស្ថិតក្នុងបញ្ជីពណ៌ «ប្រផេះ» នៃការលាងលុយកខ្វក់ និងហិរញ្ញប្បទានភេរវកម្មកាលពីឆ្នាំ២០១៩ កន្លងទៅ។
កាលពីថ្ងៃទី៤ ខែមីនា ឆ្នាំ២០២២ ក្រុមការងារហិរញ្ញវត្ថុដែលមានមូលដ្ឋាននៅទីក្រុងប៉ារីស ប្រទេសបារាំង (Financial Action Task Force) ហៅកាត់ថា FATF បានសម្រេចបន្តដាក់ប្រទេសកម្ពុជាឱ្យនៅក្នុង «បញ្ជីប្រផេះ» នៃក្រុមប្រទេសដែលមានហានិភ័យខាងលាងលុយកខ្វក់អស់រយៈពេលជាង ៣ឆ្នាំជាប់ៗគ្នាតាំងពីឆ្នាំ២០១៩ មក ដែលពិភពលោកត្រូវបង្កើនការតាមដានកាន់តែខ្លាំងជាងមុនក្នុងឆ្នាំ២០២២ នេះ។
កាលពីខែមករា ឆ្នាំ២០២១ ក្រុមការងារហិរញ្ញវត្ថុ FATF បានជំរុញឱ្យរាជរដ្ឋាភិបាលកម្ពុជាចាត់វិធានការឱ្យបានឆាប់រហ័ស ដើម្បីបំពេញតាមផែនការសកម្មភាពឱ្យបានមុនខែកុម្ភៈ ឆ្នាំ២០២២ កន្លងទៅ បើមិនដូច្នោះទេ ក្រុមការងារហិរញ្ញវត្ថុនឹងសម្រេចចិត្តរឹតត្បិតប្រទេសកម្ពុជាបន្ថែមទៀតពីលើចំណាត់ថ្នាក់បញ្ជីប្រផេះនេះ។
ក្រោយពីប្រទេសកម្ពុជាជាប់ឈ្មោះក្នុង «បញ្ជីប្រផេះ» នៃក្រុមប្រទេសលាងលុយកខ្វក់ ទាំងសហភាពអឺរ៉ុបក្តី ទាំងស្ថាប័នពង្រឹងការអនុវត្តច្បាប់ប្រឆាំងឧក្រិដ្ឋកម្មហិរញ្ញវត្ថុ ឬហៅកាត់ថា FinCEN នៃក្រសួងហិរញ្ញវត្ថុសហរដ្ឋអាមេរិកក្តី សុទ្ធតែបង្កើនការឃ្លាំមើលប្រភពលុយចេញចូលប្រទេសកម្ពុជាទាំងអស់។
ក្រសួងការបរទេសអាមេរិក កាលពីថ្ងៃទី១៩ ខែកក្កដា ក៏បានបញ្ចេញសេចក្តីរាយការណ៍ប្រចាំឆ្នាំ២០២២ ស្ដីពីការជួញដូរមនុស្សរបស់ខ្លួនផងដែរដែលទម្លាក់ប្រទេសកម្ពុជា វៀតណាម តំបន់ម៉ាកាវ និងប្រទេសផ្សេងទៀតពីបញ្ជីខ្មៅស្ថិតក្រោមការឃ្លាំមើលនៅកម្រិតពីរ (Tier 2 Watch List) ទៅកម្រិត៣ (Tier 3 Watch List) ដែលធ្វើឲ្យប្រទេសកម្ពុជាស្ថិតនៅក្នុងបញ្ជីខ្មៅនៃការជួញដូរមនុស្សធ្ងន់ធ្ងរសព្វថ្ងៃនេះ៕