កាលពីថ្ងៃទី២០ កញ្ញា ជាថ្ងៃទីពីរនៃមហាសន្និបាតអង្គការសហប្រជាជាតិដែលមានរយៈពេលមួយសប្ដាហ៍ មេដឹកនាំប្រទេសដ៏មានឥទ្ធិពលចំនួនពីរ គឺអាល្លឺម៉ង់ និងជប៉ុន វាយប្រហារលើរបបប្រធានាធិបតីរុស្ស៊ី វ៉្លាឌីមៀរ ពូទីន យ៉ាងខ្លាំង ដោយសារលើកទ័ពឈ្លានពានប្រទេសអ៊ុយក្រែន។
មេដឹកនាំប្រទេសពីរនេះវាយចំអកថា រុស្ស៊ីលែងសមជាសមាជិកអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិទៅហើយ។
មេដឹកនាំប្រទេសពីរនេះបានទាមទារឱ្យមានការពិនិត្យធម្មនុញ្ញរបស់អង្គការពិភពលោកនេះឡើងវិញ។
កាលពីថ្ងៃទី២១ ខែកញ្ញា ជាថ្ងៃទី៣ នៃដំណើរការប្រជុំនៃមេដឹកនាំ ១៩៣ប្រទេស គេសង្កេតឃើញមេដឹកនាំប្រទេសដ៏មានឥទ្ធិពលយ៉ាងតិច ២ប្រទេសទៀត បានថ្លែងវាយប្រហារធ្ងន់ៗថែមទៀតទៅលើរបបលោក ពូទីន។ គ្រាន់តែចាប់កាន់ក្បាលមេក្រូភ្លាម ប្រធានាធិបតីសហរដ្ឋអាមេរិក លោក ចូ បៃដិន បានចោទប្រកាន់មេដឹកនាំរុស្ស៊ី ថាគ្មានការទទួលខុសត្រូវទាល់តែសោះជុំវិញការគំរាមជាថ្មីពីការប្រើប្រាស់អាវុធនុយក្លេអ៊ែរ។
លោកថា ទីក្រុងមូស្គូបានបំពានគោលការណ៍ស្នូលនៃសមាជិកភាពរបស់អង្គការសហប្រជាជាតិ គឺរំលោភធ្ងន់ធ្ងរធម្មនុញ្ញរបស់ស្ថាប័នពិភពលោកមួយនេះ ដោយធ្វើការឈ្លានពានប្រទេសអ៊ុយក្រែនដែលជារដ្ឋអធិបតេយ្យមួយ។
ថ្លែងទៅកាន់អង្គមហាសន្និបាត លោក បៃដិន បានថ្កោលទោសប្រធានាធិបតីរុស្ស៊ី លោក វ្ល៉ាឌីមៀរ ពូទីន ចំពោះការបង្កសង្គ្រាមដោយគ្មានហេតុផល។
លោក បៃដិន បានគាំទ្រសេចក្តីថ្លែងការណ៍របស់អង្គការណាតូ (NATO) ដែលចេញមុខគំរាមលោក ពូទីន ដែលចង់បង្កាត់ភ្នក់ភ្លើងសង្គ្រាមនុយក្លេអ៊ែរ។ ប្រធានាធិបតីប្រទេសមហាអំណាចមួយនេះបានថ្លែងថា៖ «ជាថ្មីម្តងទៀត លោកប្រធានាធិបតី ពូទីន បានធ្វើការគំរាមប្រើអាវុធនុយក្លេអ៊ែរប្រឆាំងនឹងអឺរ៉ុប ដោយមិនខ្វល់អំពីទំនួលខុសត្រូវចំពោះកិច្ចព្រមព្រៀងមិនសាយភាយនុយក្លេអ៊ែរ»។
លោកថា សង្គ្រាមនុយក្លេអ៊ែរនឹងមិនអាចមានអ្នកឈ្នះឡើយ ហើយវាក៏មិនត្រូវឲ្យកើតមានឡើងដាច់ខាត។
បើតាមទីភ្នាក់ងារសារព័ត៌មាន Reuters លោក បៃដិន បានប្រាប់ទៅគណៈប្រតិភូមហាសន្និបាតថា ដំណាក់កាលនេះហើយ គេមិនត្រូវអនុញ្ញាតឱ្យប្រទេសជាសមាជិកអចិន្ត្រៃយ៍នៃក្រុមប្រឹក្សាសន្តិសុខដែលបំពានធ្ងន់ធ្ងរទៅលើធម្មនុញ្ញអង្គការសហប្រជាជាតិ មានសិទ្ធិធ្វើសេចក្ដីសម្រេចដោយប្រើសិទ្ធិវេតូនោះទេ។ លោកស្នើឱ្យស្ថាប័នពិភពលោកកែទម្រង់ស្ថាប័នក្រុមប្រឹក្សាសន្តិសុខមួយនេះជាបន្ទាន់។
លោក បៃដិន បានហៅទង្វើរបស់កងទ័ព និងរបបលោក ពូទីន ថាបានប្រព្រឹត្តឧក្រិដ្ឋកម្មដ៏ធ្ងន់ធ្ងរទៅលើប្រជាជន និងដែនដីអ៊ុយក្រែន។
សម្រាប់សហរដ្ឋអាមេរិក គឺជាប្រទេសមួយដែលគាំទ្រជាខ្លាំងការបង្កើតសាលាជំនុំជម្រះក្ដីពិសេស ដើម្បីបើកដំណើរការកាត់ក្ដីរបបលោក ពូទីន ករណីឧក្រិដ្ឋកម្មសង្គ្រាម។
នៅក្នុងថ្ងៃទី៣ នៃដំណើរការមហាសន្និបាតនេះ គេសង្កេតឃើញនាយករដ្ឋមន្ត្រីចក្រភពអង់គ្លេស អ្នកស្រី លីស ត្រាស បានសន្យាថា អង់គ្លេសនឹងបន្តផ្ដល់ជំនួយយោធាដល់អ៊ុយក្រែនរហូតទាល់តែអ៊ុយក្រែនយកឈ្នះនៅក្នុងសង្គ្រាមប្រឆាំងការឈ្លានពានរបស់រុស្ស៊ី។
ថ្លែងនៅចំពោះមុខមហាសន្និបាតលើកទី៧៧ នេះ អ្នកស្រី ត្រាស បានបញ្ជាក់ថា អង់គ្លេសនឹងមិនបញ្ឈប់ដាច់ខាតការជួយអ៊ុយក្រែន ហើយនៅក្នុងខណៈពេលនៃសង្គ្រាមនេះ អង់គ្លេសសន្យាថានៅតែបន្តបង្កើនជំនួយយោធាសម្រាប់អ៊ុយក្រែន ដរាបណាសង្គ្រាមនៅតែបន្តកើតឡើង។
អ្នកស្រី ត្រាស ប្រកាសអំពីកញ្ចប់ថវិកាជំនួយយោធាទៅឱ្យអ៊ុយក្រែន សម្រាប់ឆ្នាំ២០២៣ នេះ គឺមានការកើនឡើងជាងឆ្នាំ២០២២។ នៅឆ្នាំ២០២២ កញ្ចប់ថវិកាជំនួយយោធាទៅឱ្យអ៊ុយក្រែនមាន ២២០០លានដុល្លារ ហើយសម្រាប់ឆ្នាំ២០២៣ គឺ ២៦៣០លានដុល្លារ។
បើតាមទីភ្នាក់ងារ Reuters នៅពេលអ្នកស្រី លីស ត្រាស កំពុងថ្លែងសុន្ទរកថានៅចំពោះមុខមហាសន្និបាតអង្គការសហប្រជាជាតិ គឺជំនួយសព្វាវុធបន្ថែមទៀតរបស់ចក្រភពអង់គ្លេស កំពុងបញ្ជូនទៅឱ្យអ៊ុយក្រែន។
ចំណែកសាររបស់លោកប្រធានាធិបតីអ៊ុយក្រែនវិញ ដែលបានថ្លែងតាមវីដេអូអ៊ីនធឺណិត លោក វូឡូឌីមៀ ហ្សេឡេនស្គី បានទាមទារឲ្យមានតុលាការពិសេសមួយរបស់អង្គការសហប្រជាជាតិដើម្បីផ្ដន្ទាទោសលើរបបនៅរុស្ស៊ី ចំពោះការឈ្លានពានប្រទេសរបស់លោក។ លោកបន្តទទូចឱ្យមានការដាក់ទណ្ឌកម្មសេដ្ឋកិច្ច និងដកហូតអំណាចវេតូរបស់រុស្ស៊ី នៅក្នុងក្រុមប្រឹក្សាសន្តិសុខ។
លោក ហ្សេឡេនស្គី បានថ្លែងទៅកាន់អង្គមហាសន្និបាតថា៖ «ឧក្រិដ្ឋកម្មមួយត្រូវបានប្រព្រឹត្តប្រឆាំងនឹងអ៊ុយក្រែន គឺទាមទារឲ្យមានការផ្ដន្ទាទោសជាមួយនឹងយុត្តាធិការរបស់សាលាក្ដីពិសេសមួយ»។
ជាមួយគ្នានេះ លោក ហ្សេឡេនស្គី ក៏បានជំរុញជាថ្មីឱ្យអង្គការសហប្រជាជាតិ ដកសិទ្ធិវេតូរបស់រុស្ស៊ីពីសមាជិកអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិ។ លោកវាយប្រហាររុស្ស៊ីថា ប្រទេសមួយនេះជាប់ឈ្មោះជារដ្ឋភេរវកម្មទៅហើយ។ លោកក៏បានទទូចសុំទៅពិភពលោកបន្តជួយផ្ដល់អាវុធទៅឲ្យប្រទេសរបស់លោក ដើម្បីឲ្យកងទ័ពរបស់លោកមានសមត្ថភាពវាយយកទឹកដីពីរុស្ស៊ីមកវិញ។
កាលពីថ្ងៃទី២ នៃដំណើរការមហាសន្និបាតអង្គការសហប្រជាជាតិ អធិការបតីអាល្លឺម៉ង់ លោក Olaf Scholz បានថ្លែងចំអកទៅលោក ពូទីន ថារុស្ស៊ីគ្មានផ្លូវឈ្នះសង្គ្រាមដាច់ខាត។
មកដល់ពេលនេះ សង្គ្រាមរបស់មហាអំណាចរុស្ស៊ីឈ្លានពានអ៊ុយក្រែន ចូលខែទី៨ ហើយ។ សង្គ្រាមកំពុងផ្ទុះពេញទំហឹងនៅភាគខាងត្បូង និងភាគខាងកើតប្រទេសអ៊ុយក្រែន។ ក្នុងសង្គ្រាមជាង ២១១ថ្ងៃមកនេះ មហាអំណាចយោធាលំដាប់ទីពីរពិភពលោកនេះបានបាក់ទ័ពក្នុងទ្រង់ទ្រាយធំពីរលើកមកហើយ ដោយកងទ័ពអ៊ុយក្រែនវាយរុញច្រានរត់ប្រាសអាយុ។
កាលពីថ្ងៃទី១០ កញ្ញា ទ័ពរុស្ស៊ីបានរត់ចោលអាវុធធុនធ្ងន់ជាង ១២០គ្រឿង ក្នុងនោះរថក្រោះ ២៥គ្រឿង៕