មហាសន្និបាតលើកទី៧៧ សម្រាប់ឆ្នាំនេះ ប្រព្រឹត្តទៅដោយភាពចម្រូងចម្រាស និងពោរពេញទៅដោយការឈឺចាប់។ សំណុំរឿងដ៏ក្ដៅគគុកនៅក្នុងវេទិកាពិភពលោកនេះ គឺករណីមហាអំណាចរុស្ស៊ីលើកទ័ពឈ្លានពានប្រទេសអ៊ុយក្រែន។
ការឈ្លានពានរបស់រុស្ស៊ី បាននាំឲ្យអ៊ុយក្រែន ក្លាយជាប្រទេសទីមួយដែលរងការបំផ្លាញ និងសោកនាដកម្មបំផុតចាប់តាំងពីសង្គ្រាមលោកលើកទី២។
នៅឯមហាសន្និបាត គឺប្រមុខរដ្ឋ និងប្រមុខរដ្ឋាភិបាលប្រទេសខ្លះដែលមានទំនោរទៅរករុស្ស៊ី នឹកស្មានមិនដល់ថា ប្រទេសមហាអំណាចមួយនេះបាត់បង់កិត្តិយសយ៉ាងអាម៉ាស់ដែលត្រូវគេព្រួតគ្នាវាយប្រហារ។ នៅឯមហាសន្និបាតនេះ សូម្បីប្រទេសចិន ដែលតែងគាំទ្ររុស្ស៊ី ក៏បានងាករេជំហររបស់ខ្លួន ដោយសម្រេចប្រាប់ទៅរុស្ស៊ី ថា កុំពង្រីកសង្គ្រាមនៅលើទឹកដីអ៊ុយក្រែនឲ្យហួសព្រំដែន។
លោក វ៉ាង យី ប្រមុខការទូតចិន បានថ្លែងទៅកាន់មហាសន្និបាតអង្គការសហប្រជាជាតិ កាលពីថ្ងៃទី២៤ ខែកញ្ញា ដែលលោកថា ក្រុងប៉េកាំងមានការព្រួយបារម្ភអំពីការរីករាលដាលសង្គ្រាមនៅលើទឹកដីអ៊ុយក្រែន។
លោក វ៉ាង យី មិនបានថ្លែងចំៗអំពីរុស្ស៊ីបោះឆ្នោតប្រជាមតិប្លន់ទឹកដីអ៊ុយក្រែននោះទេ ប៉ុន្តែលោកសម្ដែងការខកចិត្តនៅពេលលោក ពូទីន បង្កសង្គ្រាមនុយក្លេអ៊ែរ។
ចំណែកឯប្រទេសឥណ្ឌា ដែលជាប្រទេសដ៏ធំ ហើយដូចប្រទេសចិនដែរ មិនបានដាក់ទណ្ឌកម្មទៅលើរុស្ស៊ី បានចេញមុខព្រមានចិន កុំបង្កសង្គ្រាមប្រល័យលោក។ រដ្ឋមន្ត្រីការបរទេសប្រទេសឥណ្ឌា Jaishankar ព្រមានថា ឥណ្ឌាមើលឃើញសង្គ្រាមនៅលើទឹកដីអ៊ុយក្រែន ដែលបង្កឡើងដោយរុស្ស៊ី គឺជារឿងដែលមិនសមឱ្យផ្ទុះឡើងនោះទេ។ លោកថា ការឈ្លានពានប្រទេសមួយ ហើយព្យាយាមធ្វើឲ្យស្របច្បាប់ដោយការបោះឆ្នោតប្រជាមតិ គឺកាន់តែហួសសម័យទៅទៀត។ នេះជាការកត់សម្គាល់របស់អ្នកសារព័ត៌មាន។ តែអ្វីដែលអ្នកសារព័ត៌មានចាប់អារម្មណ៍ខ្លាំង គឺការថ្លែងរបស់ប្រមុខការទូតចិន លោក វ៉ាង យី ដែលគាំទ្រចំពោះប្រទេសមួយចំនួនស្នើឱ្យសន្និបាតសម្រេចកែទម្រង់ស្ថាប័នក្រុមប្រឹក្សាសន្តិសុខ។
នៅក្នុងមហាសន្និបាតនោះ យ៉ាងតិច ៣២ប្រទេស បានធ្វើញត្តិរួមគ្នាស្នើឲ្យពិនិត្យឡើងវិញនូវប្រទេសរុស្ស៊ី ដែលជាសមាជិកអចិន្ត្រៃយ៍មួយនៃក្រុមប្រឹក្សាសន្តិសុខ បានប្រើសិទ្ធវេតូរាំងខ្ទប់ដំណោះស្រាយ ដើម្បីថ្កោលទោសករណីឈ្លានពានអ៊ុយក្រែន និងការរាំងខ្ទប់ដំណោះស្រាយផ្សេងៗទៀត។
ជាមួយគ្នានេះ ប្រធានក្រុមប្រឹក្សាសហភាពអឺរ៉ុប តំណាង ២៧ប្រទេស គឺលោក Charles Michel បានទាមទារឲ្យព្យួរ ឬដកហូតសិទ្ធិវេតូរបស់ប្រទេសរុស្ស៊ី ឬក៏ត្រូវដកសមាជិកភាពរបស់ប្រទេសនេះចេញពីក្រុមប្រឹក្សាសន្តិសុខនេះតែម្ដង។ តែយ៉ាងណា ប្រទេសដែលឈានមុខគេស្នើឱ្យមហាសន្និបាតពិនិត្យសមាសភាពប្រទេសរុស្ស៊ីឡើងវិញជាសមាជិកអចិន្ត្រៃយ៍នៃក្រុមប្រឹក្សាសន្តិសុខ គឺនាយករដ្ឋមន្ត្រីជប៉ុន នាយករដ្ឋមន្ត្រីអង់គ្លេស អធិការបតីអាល្លឺម៉ង់ និងប្រធានាធិបតីសហរដ្ឋអាមេរិក លោក ចូ បៃដិន។
ចំណែកប្រទេសចិន ដោយមើលឃើញសំឡេងភាគច្រើនទាមទារធ្វើវិសោធនកម្មធម្មនុញ្ញអង្គការសហប្រជាជាតិអំពីប្រទេសមានបុព្វសិទ្ធិវេតូនៅក្នុងក្រុមប្រឹក្សាសន្តិសុខ គឺអាចរហូតជាង ៦០ប្រទេសដែលចេញមុខជាចំហ គេសង្កេតឃើញចិនចាប់ផ្ដើមដូរឥរិយាបថដោយយល់ព្រមតាមការទាមទាររបស់ប្រទេសទាំងនោះ។
នៅថ្ងៃទី២៦ កញ្ញា នេះ ទីភ្នាក់ងារសារព័ត៌មានចិន ស៊ីនហួរ បានចុះផ្សាយដោយស្រង់សម្ដីលោករដ្ឋមន្ត្រីការបរទេសចិន លោក វ៉ាង យី ដែលអះអាងថា ចិនគាំទ្រសំណើ និងគោលការណ៍ទាំងឡាយដែលសុំឲ្យមានការពិនិត្យឡើងវិញធម្មនុញ្ញអង្គការសហប្រជាជាតិដែលចាត់ទុកថា ច្បាប់នេះមានតួនាទីស្នូលនៅក្នុងកិច្ចការអន្តរជាតិរបស់អង្គការសហប្រជាជាតិ។
បើតាមប្រភពដដែលនេះឲ្យដឹងថា លោក វ៉ាង យី បានថ្លែងដូចនេះនៅពេលដែលលោកជួបដាច់ដោយឡែកជាមួយប្រធានគណៈកម្មការកិច្ចការមហាសន្និបាតលើកទី៧៧ នៃអង្គការសហប្រជាជាតិ គឺលោក Csaba Korosi។ នៅក្នុងជំនួបនេះ លោក វ៉ាង យី បានបញ្ជាក់ជំហររបស់ចិនក្នុងការយល់ឃើញអំពីការចង់ធ្វើវិសោធនកម្មរដ្ឋធម្មនុញ្ញអង្គការសហប្រជាជាតិ ដោយចាត់ទុកថាមានសារសំខាន់នៅពេលនេះ។
លោកបន្ថែមថា ចិនចង់ឃើញមតិភាគច្រើនដែលទាមទារឱ្យមានការធ្វើវិសោធនកម្ម។ ដូច្នេះចិនក៏ជាផ្នែកមួយដែលចង់ពិនិត្យឡើងវិញធម្មនុញ្ញអង្គការសហប្រជាជាតិផងដែរ។ លោក វ៉ាង យី បញ្ជាក់ថា ចិនគាំទ្រយ៉ាងខ្លាំងតួនាទីរបស់មហាសន្និបាតអង្គការសហប្រជាជាតិ និងការខិតខំប្រឹងប្រែងរបស់ប្រធានមហាសន្និបាត។
លោកបន្តថា លោកប្រធានាធិបតី ស៊ី ជីនពីង ក៏បានគាំទ្រគំនិតផ្ដួចផ្ដើមដូចនេះដែរដោយចាត់ទុកថា វាជាផ្នត់គំនិតមួយជឿនលឿន ហើយធ្វើឱ្យពិភពលោកមានសន្តិភាពមួយរឹងមាំ ហើយអាចជួយដោះស្រាយបញ្ហាដែលកើតមាន។
ឆ្លើយតបនឹងការលើកឡើងរបស់លោក វ៉ាង យី ប្រធានគណៈកម្មាធិការមហាសន្និបាតអង្គការសហប្រជាជាតិ បានថ្លែងថា ចិនក៏ជាផ្នែកមួយនៃយន្តការពហុនិយម និងជាដៃគូដ៏មានសារសំខាន់របស់អង្គការសហប្រជាជាតិ។ លោកសម្ដែងការសរសើរចំពោះប្រទេសចិន ដែលតែងតែផ្ដល់ការគាំទ្រនៅពេលដែលគណៈកម្មការមហាសន្និបាតមានភាពចម្រូងចម្រាសនៅក្នុងការលើករបៀបវារៈសម្រាប់បើកសម័យប្រជុំរបស់ខ្លួន។
ទោះជាយ៉ាងណាក៏ដោយ ប្រសិនបើចិនដើរដល់ចំណុចតាមការចង់បានរបស់ពួកបស្ចិមប្រទេសទៅហើយ នេះគេអាចគិតថា ចិនអាចរកផ្លូវចំណេញឃើញនៅក្នុងការធ្វើវិសោធនកម្មធម្មនុញ្ញអង្គការសហប្រជាជាតិ ឬក៏រុះរើសិទ្ធិអំណាចរបស់ប្រទេសជាសមាជិកអចិន្ត្រយ៍នៃក្រុមប្រឹក្សាសន្តិសុខ។
បើទោះជាចិនតែងតែជំទាស់ ឬបោះឆ្នោតអនុប្បវាទចំពោះសេចក្ដីសម្រេចណាមួយដែលប៉ះពាល់ដល់សម្ពន្ធភាពរបស់ខ្លួន គឺនៅក្នុងពេលនេះ យ៉ាងហោចណាស់មហាអំណាចមួយនេះក៏អាចដើរដល់ចំណុចទាល់ច្រកផងដែរ នៅពេលដែលរុស្ស៊ីជាសម្ពន្ធមិត្តរបស់ខ្លួនត្រូវបានគេរុញខ្ទប់ដល់ជញ្ជាំងនៅឯមហាសន្និបាតអង្គការសហប្រជាជាតិ ដែលបានបិទបញ្ចប់នៅថ្ងៃទី២៧ កញ្ញា នេះ៕