ព្រះមហាក្សត្របញ្ចប់មុខតំណែងលោក វេង សាខុន ពីរដ្ឋមន្ត្រីក្រសួងកសិកម្ម ក្រោយពីលោក ហ៊ុន សែន បានដាក់លិខិតថ្វាយព្រះមហាក្សត្រ ខណៈលោក អូន ព័ន្ធមុនីរ័ត្ន ត្រូវបានលោក ហ៊ុន សែន ចាត់តាំងជារដ្ឋមន្ត្រីស្តីទីនៃក្រសួងកសិកម្ម។
ក្នុងព្រះរាជក្រឹត្យចុះថ្ងៃទី៨ ខែតុលា ឆ្នាំ២០២២ ដែលឡាយព្រះហស្ដលេខាដោយព្រះករុណា ព្រះបាទសម្តេច ព្រះបរមនាថ នរោត្តម សីហមុនី បានត្រាស់បង្គាប់បញ្ចប់មុខតំណែងលោក វេង សាខុន ពីរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ចាប់ពីថ្ងៃទី៨ ខែតុលា នេះតទៅ។
ក្រោយពីបញ្ចប់តំណែងលោក វេង សាខុន នៅថ្ងៃទី៨ ខែតុលា ឆ្នាំ២០២២ លោកនាយករដ្ឋមន្ត្រី ហ៊ុន សែន បានចេញសេចក្តីសម្រេចមួយចាត់តាំងរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន ជារដ្ឋមន្ត្រីស្តីទីនៃក្រសួងកសិកម្ម រុក្ខាប្រមាញ់ និងនេសាទ បន្ថែមលើមុខងារបច្ចុប្បន្ន។
យ៉ាងណាក៏ដោយ កាលពីខែកុម្ភៈ ឆ្នាំ២០២២ កន្លងទៅ លោក វេង សាខុន ក៏ធ្លាប់ត្រូវបានលោក ហ៊ុន សែន ស្ដីបន្ទោសខ្លាំងៗថាជារដ្ឋមន្ត្រីដែលមិនចេះធ្វើការងារសហការជាមួយក្រសួងស្ថាប័នផ្សេងៗ ព្រមទាំងព្រមានថា បើលោកដករដ្ឋមន្ត្រីណាមួយចេញពីតំណែងនោះ ប្រើពេលត្រឹម ២៤ម៉ោងប៉ុណ្ណោះ។
ក្រៅពីព្រមានហើយ លោក ហ៊ុន សែន ថាលោក វេង សាខុន ធ្វើការងារខ្ជិលច្រអូស ដោយសារតែក្រសួងសេដ្ឋកិច្ច និងហិរញ្ញវត្ថុ បានអញ្ជើញលោក វេង សាខុន ឱ្យទៅចូលរួមប្រជុំរៀបចំនីតិវិធីដាក់ដេញថ្លៃនាំចូលជ្រូករស់ដើម្បីដោះស្រាយបញ្ហា ប៉ុន្តែរដ្ឋមន្ត្រីកសិកម្មមិនព្រមទៅចូលរួមប្រជុំ៕