ព្រឹទ្ធសភាអាមេរិក យល់ព្រមជាឯកច្ឆន្ទអនុម័តសេចក្តីស្នើច្បាប់ស្តីអំពីប្រជាធិបតេយ្យ និងសិទ្ធិមនុស្សនៅកម្ពុជា ដើម្បីជំរុញឲ្យរដ្ឋាភិបាលកម្ពុជាគោរពតាមការប្ដេជ្ញាចិត្តរបស់ខ្លួន ដូចដែលមានចែងក្នុងស្មារតីនៃកិច្ចព្រមព្រៀងសន្តិភាពទីក្រុងប៉ារីសឆ្នាំ១៩៩១។
សមាជិកព្រឹទ្ធសភាអាមេរិកាំង លោក អិត ម៉ាកឃី (Ed Markey) ដែលជាប្រធានអនុគណៈកម្មាធិការទំនាក់ទំនងបរទេស ទទួលបន្ទុកតំបន់អាស៊ីបូព៌ា និងប៉ាស៊ីហ្វិក បានលើកឡើងក្នុងវីដេអូឃ្លីបរបស់លោកកាលពីថ្ងៃទី២៥ ខែតុលា ឆ្នាំ២០២២ ថា សេចក្តីស្នើច្បាប់ស្តីអំពីប្រជាធិបតេយ្យ និងសិទ្ធិមនុស្សនៅកម្ពុជានេះមានគោលដៅរារាំងមេដឹកនាំបក្សកាន់អំណាច លោក ហ៊ុន សែន និងរដ្ឋាភិបាលឯកបក្សរបស់លោក មិនឲ្យជិះសេះលែងដៃដើម្បីប្រល័យសិទ្ធិសេរីភាពរបស់ពលរដ្ឋដូចសព្វថ្ងៃ។
លោកអះអាងថា ស្ថាប័នរដ្ឋសភាសហរដ្ឋអាមេរិកគាំទ្រជានិច្ចនូវជំហរដើម្បីទាមទារសិទ្ធិមនុស្ស និងប្រជាធិបតេយ្យរបស់ពលរដ្ឋខ្មែរគ្រប់រូប ហើយខ្លួនលោកផ្ទាល់តែងតែឈរនៅខាងពលរដ្ឋខ្មែរ ដើម្បីបុព្វហេតុប្រជាធិបតេយ្យ និងសិទ្ធិមនុស្សនៅកម្ពុជាជារៀងរហូត ក្នុងបំណងជំរុញឱ្យរដ្ឋាភិបាលលោក ហ៊ុន សែន គោរពកិច្ចព្រមព្រៀងសន្តិភាពទីក្រុងប៉ារីស ដើម្បីកុំឱ្យពួកគេបំផ្លាញប្រជាធិបតេយ្យ និងធ្វើអ្វីៗបានស្រេចតែអំពើចិត្តបន្តទៀត។
លោក អិត ម៉ាកឃី (Ed Markey) បញ្ជាក់ថា សព្វថ្ងៃនេះ សិទ្ធិទាំងអស់នៅកម្ពុជាបានរងនូវការវាយប្រហារពីសំណាក់មេដឹកនាំបក្សកាន់អំណាច លោក ហ៊ុន សែន និងគណបក្សប្រជាជនកម្ពុជាយ៉ាងធ្ងន់ធ្ងរ ដូច្នេះលោកប្ដេជ្ញាថា នឹងខិតខំប្រឹងប្រែងធ្វើយ៉ាងណាឲ្យសេចក្តីស្នើច្បាប់នេះក្លាយជាច្បាប់មានរូបរាងពិតប្រាកដ ដើម្បីបញ្ឈប់ទង្វើរំលោភបំពានរបស់ពួកគេឱ្យបាន។
សមាជិកព្រឹទ្ធសភារូបនេះអំពាវនាវឱ្យពលរដ្ឋខ្មែរអាមេរិកាំង និងពលរដ្ឋខ្មែរគ្រប់រូបពួតដៃគ្នាបន្តទៀត ដើម្បីអនាគតកម្ពុជា ក្នុងការទាមទារឲ្យរដ្ឋាភិបាលឯកបក្សរបស់លោក ហ៊ុន សែន បន្តគោរព និងរក្សាស្មារតីនៃកិច្ចព្រមព្រៀងសន្តិភាពទីក្រុងប៉ារីសឆ្នាំ១៩៩១ ឱ្យបានត្រឹមត្រូវដូចបំណងនៃកិច្ចព្រមព្រៀងនេះចង់បាន។
កិច្ចព្រមព្រៀងសន្តិភាពទីក្រុងប៉ារីស (Paris Peace Accords) គឺជាកិច្ចព្រមព្រៀងមួយស្ដីពីដំណោះស្រាយនយោបាយដើម្បីបញ្ចប់ជម្លោះនៅកម្ពុជា ធ្វើឡើងនៅទីក្រុងប៉ារីស ប្រទេសបារាំង កាលពីថ្ងៃទី២៣ ខែតុលា ឆ្នាំ១៩៩១ ក្នុងគោលបំណងឈានទៅរកការរៀបចំឲ្យមានសន្តិភាពឡើងវិញនៅកម្ពុជា ជំរុញឱ្យកម្ពុជាដឹកនាំតាមបែបលទ្ធិប្រជាធិបតេយ្យ ការពារអធិបតេយ្យជាតិ ធានាឯករាជ្យ បូរណភាពទឹកដី ឯកភាពជាតិរបស់កម្ពុជា និងការធានានូវការអនុវត្តសិទ្ធិរបស់ពលរដ្ឋឱ្យបានពេញលេញ។
អស់រយៈពេល ៣១ឆ្នាំនូវការចាប់បដិសន្ធិនៃកិច្ចព្រមព្រៀងសន្តិភាពទីក្រុងប៉ារីស តាំងពីឆ្នាំ១៩៩១ មក ត្រូវគេមើលឃើញថា រដ្ឋាភិបាលឯកបក្សរបស់លោក ហ៊ុន សែន មិនត្រឹមតែមិនអនុវត្តតាមខ្លឹមសារនៃកិច្ចព្រមព្រៀងអន្តរជាតិនេះប៉ុណ្ណោះទេ ថែមទាំងរំលោភលើវត្ថុបំណងនៃកិច្ចព្រមព្រៀងនេះយ៉ាងធ្ងន់ថែមទៀតជុំវិញការធានានូវសិទ្ធិជាមូលដ្ឋានរបស់ពលរដ្ឋ ការការពារបូរណភាពទឹកដីពីការឈ្លានពានរបស់បរទេសជិតខាង និងការធានាឱ្យបាននូវការដឹកនាំតាមបែបលទ្ធិប្រជាធិបតេយ្យ ជាដើម។
ក្នុងនោះ លោក ហ៊ុន សែន បានគំរាមកម្ទេចក្រុមប្រឆាំងគ្រប់រូបភាព និងព្រមានចាប់ឃុំខ្លួនសកម្មជននានាជុំវិញការការពារបរិស្ថាន ជាដើម។ ជាងនេះទៀត លោកក៏បានធ្វើសន្ធិសញ្ញាខុសច្បាប់ឆ្នាំ២០០៥ ជាមួយវៀតណាម ដើម្បីបើកផ្លូវឱ្យបរទេសជិតខាងមួយនេះអាចឈ្លានពានកម្ពុជាដោយស្របច្បាប់បន្តទៀតទៅថ្ងៃអនាគត។
លើសពីនេះ បុរសខ្លាំងកម្ពុជារូបនេះក៏រៀបចំការផ្ទេរអំណាចទៅកូនប្រុសបង្កើតរបស់ខ្លួនតាមរបៀបសន្តតិវង្ស ដែលប្រទេសកុម្មុយនីស្តតែងតែអនុវត្តផងដែរ ដែលប្រាសចាកពីខ្លឹមសារនៃកិច្ចព្រមព្រៀងសន្តិភាពទីក្រុងប៉ារីស ដែលមានបំណងជំរុញឱ្យកម្ពុជាអនុវត្តតាមគន្លងប្រជាធិបតេយ្យយ៉ាងធ្ងន់ធ្ងរ។
កាលពីថ្ងៃទី១១ ខែឧសភា ឆ្នាំ២០២២ សភាជាន់ខ្ពស់របស់សហរដ្ឋអាមេរិកបានធ្វើសេចក្តីសម្រេចចិត្តមួយដែលបានកំណត់ឱ្យរដ្ឋាភិបាលកម្ពុជារក្សាអព្យាក្រឹត ដូចមានចែងក្នុងរដ្ឋធម្មនុញ្ញរបស់ខ្លួន ធម្មនុញ្ញអង្គការសហប្រជាជាតិ និងតាមគោលការណ៍នៃកិច្ចព្រមព្រៀងសន្តិភាពទីក្រុងប៉ារីសឆ្នាំ១៩៩១ ដើម្បីធានានូវដំណើរការប្រជាធិបតេយ្យនៅកម្ពុជា ការគោរពសិទ្ធិមនុស្ស និងធ្វើឱ្យជាក់ច្បាស់ពីមូលដ្ឋានជើងទឹករាមដែលគេសង្ស័យពីវត្តមានកងទ័ពចិននៅទីនោះផងដែរ៕