ប្រទេសហ្វាំងឡង់ និងស៊ុយអែត បានដាក់ពាក្យសុំចូលជាសមាជិកអង្គការណាតូ (NATO) តាំងពីខែកក្កដា ហើយភ្លាមៗនោះនាំឲ្យមេដឹកនាំកំពូលៗរបស់ណាតូ មានដូចជាសហរដ្ឋអាមេរិក អង់គ្លេស អាល្លឺម៉ង់ បារាំង កាណាដា ហុឡង់ដ៍ អ៊ីតាលី អេស្ប៉ាញ បែលហ្សិក ប្រកាសស្វាគមន៍ទទួលយកប្រទេសពីរនេះជាសមាជិកណាតូ។
មកដល់ពេលនេះ សមាជិកសភានៃប្រទេសចំនួន២៨ បានផ្ដល់សច្ចាប័នរួចហើយដើម្បីឱ្យណាតូ ទទួលយកហ្វាំងឡង់ និងស៊ុយអែត ជាសមាជិករបស់ខ្លួន។ ប្រទេសពីរក្នុងចំណោម ៣០ប្រទេសនេះដែលសភារបស់ពួកគេមិនព្រមអនុម័តនោះ គឺប្រទេសតួកគី និងហុងគ្រី។
ប៉ុន្តែមានតែតួកគី ទេដែលជំទាស់ខ្លាំងបំផុត ខណៈប្រទេសនេះស្ថិតនៅក្រោមការដឹកនាំរបស់ប្រធានាធិបតី Tayyip Erdogan ដែលមានភាពទោរទន់ខ្លាំងទៅលើលោក វ៉្លាឌីមៀរ ពូទីន ប្រធានាធិបតីរុស្ស៊ី។
ក្នុងស្ថានភាពនេះ សភាបក្សកាន់អំណាចនៅតួកគី ក៏ដើរតាមលោក Tayyip Erdogan មិនបានផ្ដល់បត្យាប័នឲ្យហ្វាំងឡង់ និងស៊ុយអែត ក្លាយជាសមាជិកណាតូនោះទេ។
យ៉ាងណាក៏ដោយ ចំណែកប្រទេសហុងគ្រី វិញ គឺនាយករដ្ឋមន្ដ្រីរបស់ប្រទេសនេះរួមនឹងសមាជិកសភារបស់លោក ក៏មិនទាន់ផ្តល់សច្ចាប័ននោះដែរ ប៉ុន្តែមិនមានភាពជំទាស់ខ្លាំងក្លាដូចតួកគី នោះទេ។
ហ្វាំងឡង់ និងស៊ុយអែត សម្រេចដាក់ពាក្យសុំជាសមាជិកអង្គការយោធាណាតូ គឺដោយសារតែប្រទេសទាំងពីរនេះមានព្រំដែនជាប់នឹងរុស្ស៊ី ភ័យព្រួយខ្លាចរុស្ស៊ីលើកទ័ពឈ្លានពានប្រទេសរបស់ពួកគេដូចករណីអ៊ុយក្រែន បច្ចុប្បន្ននេះ។
ដូច្នេះហើយ មេដឹកនាំប្រទេសទាំងពីរនេះក៏សម្រេចថា ត្រូវក្លាយជាសមាជិកណាតូឱ្យទាន់ស្ថានការណ៍ជាក់ស្ដែងតែម្ដង។ ស្ថានភាពនេះ វាកើតឡើងបួនខែមកហើយ គឺនៅទើរត្រឹមប្រទេសតួកគី មិនព្រមអនុម័តឱ្យសច្ចាប័នលើពាក្យសុំចូលជាសមាជិកណាតូរបស់ប្រទេសពីរនេះ។
នៅដំណាក់កាលចុងក្រោយនេះ អគ្គលេខាធិការយោធាណាតូ លោក Jens Stoltenberg បានសម្រេចធ្វើដំណើរទៅកាន់ប្រទេសតួកគី សាជាថ្មីម្ដងទៀត ដើម្បីសម្របសម្រួលឱ្យលោក Tayyip Erdogan ទទួលស្គាល់ថា កាលៈទេសៈនេះជាការចាំបាច់បំផុតត្រូវតែយល់ព្រមឱ្យហ្វាំងឡង់ និងស៊ុយអែត ជាសមាជិកណាតូ។
បើតាមទីភ្នាក់ងារព័ត៌មាន DW របស់អាល្លឺម៉ង់ បានដកស្រង់សម្ដីលោក Stoltenberg ចុះផ្សាយនៅថ្ងៃសុក្រ ទី៤ ខែវិច្ឆិកា នេះថា លក្ខខណ្ឌដែលហ្វាំងឡង់ និងស៊ុយអែត ត្រូវចូលសមាជិកណាតូ គឺគ្រប់គ្រាន់អស់ហើយ ទាំងកម្លាំងយោធា ទាំងកម្លាំងនយោបាយ និងសេដ្ឋកិច្ច។ លោកបានប្រាប់លោក Tayyip Erdogan ថា ពេលវេលានេះមិនត្រូវបណ្ដោយឱ្យប្រទេសពីរនេះខកខានក្នុងការចូលរួមជាមួយណាតូនោះទេ។
លោក Stoltenberg បន្តថា ប្រទេសផ្សេងៗទៀត គឺភាគច្រើនលើសលប់គេបានត្រួសត្រាយផ្លូវឱ្យប្រទេសពីរនេះចូលជាសមាជិកណាតូរួចអស់ទៅហើយ។
លោកបានប្រាប់ទៅរដ្ឋមន្ត្រីការបរទេសតួកគី ថា ឧបសគ្គដែលតួកគីចេះតែលើកឡើងដូចជាអស់ន័យទៅហើយ អស់តម្លៃទៅហើយក្នុងការរារាំងស៊ុយអែត និងហ្វាំងឡង់ ហើយពេលខ្លះ តួកគីព្យាយាមបង្កើតឧបសគ្គទៅវិញនោះទេ។ ជាមួយនឹងការធ្វើជាមិនយល់ ធ្វើជាមិនដឹងមិនឮ នៅពេលដែលស្ថានភាពមកដល់ទៅហើយនេះ លោកព្រមានថា តួកគីត្រូវតែពិនិត្យមើលគោលជំហររបស់ខ្លួនឡើងវិញ។
តែជាមួយគ្នានេះ រដ្ឋមន្ត្រីការបរទេសតួកគី Mevlut Cavusoglu ដែលបានជួបលោក Stoltenberg នៅក្នុងប្រទេសតួកគី កាលពីថ្ងៃព្រហស្បតិ៍ ព្រមានថា ការដោះដូរលក្ខខណ្ឌណាមួយក្នុងអង្គការណាតូ គឺជាការរុញឱ្យណាតូបាត់បង់សាមគ្គីគ្នាតែប៉ុណ្ណោះ។
លោកថា តួកគីមិនមានបំណងរាំងស្ទះប្រទេសពីរនេះទេ តែពេលវេលាវាមិនទាន់មកដល់តែប៉ុណ្ណោះ។
ប៉ុន្តែលោក Stoltenberg ទទួលស្គាល់ថា ការបារម្ភរបស់តួកគី ដែលយករឿងអតីតកាលមកបូកឡូកឡំនៅពេលនេះ គឺមិនត្រឹមត្រូវនោះទេ។ លោកថា តួកគីគួរតែបន្ថយជំហរ និងបន្ទន់ឥរិយាបថរបស់ខ្លួនឡើងវិញ ព្រោះប្រទេសចំនួន ២៨ គេយល់ស្របទទួលយកហ្វាំងឡង់ និងស៊ុយអែត ទៅហើយ។
យោងតាមធម្មនុញ្ញរបស់ណាតូ ប្រទេសណាមួយដែលសុំជាសមាជិកថ្មីរបស់ណាតូ គឺត្រូវឆ្លងកាត់ការយល់ព្រមទាំងអស់ពីសមាជិកសភានៃប្រទេសទាំង ៣០ប្រទេសនេះជាមុនសិន។
ក្រុមអ្នកជំនាញផ្នែកច្បាប់អះអាងថា ណាតូពេលនេះកំពុងតែសិក្សាគួរកែប្រែចំណុចទាំងនេះ។
យ៉ាងណា ណាតូ និងស៊ុយអែតដែលមានព្រំដែនធំល្វឹងល្វើយជាប់ជាមួយនឹងរុស្ស៊ី គឺពួកគេក្លាយជាដៃគូយុទ្ធសាស្ត្រផ្នែកយោធាត្រីភាគីជាមួយអង់គ្លេស និងសហរដ្ឋអាមេរិករួចទៅហើយ។
មាត្រា៥ នៃធម្មនុញ្ញរបស់ណាតូ ចែងថា បើអង់គ្លេស ឬអាមេរិកធ្លាក់ក្នុងសង្គ្រាមដោយសារតែជួយហ្វាំងឡង់ និងស៊ុយអែត គឺណាតូទាំងអស់ត្រូវតែជួយអាមេរិក និងអង់គ្លេស។ ដូច្នេះ ហ្វាំងឡង់ និងស៊ុយអែត បើទោះជាមិនទាន់ក្លាយជាសមាជិកណាតូក៏ដោយ គឺបានក្លាយជាដៃគូយុទ្ធសាស្ត្រយោធាជាមួយនឹងណាតូរួចទៅហើយ៕