ក្រុមអ្នកឃ្លាំមើលសង្គមរិះគន់ថា ការប្រើយុទ្ធសាស្ត្រអួតអាងរបស់មន្ត្រីរដ្ឋាភិបាល និងកូនៗរបស់លោក ហ៊ុន សែន ដែលសរសើរឪពុកខ្លួនឯងថាដឹកនាំប្រជុំអាស៊ានទទួលបានជោគជ័យដោយសារមេដឹកនាំពិភពលោកទៅចូលរួម គឺជារឿងភូតកុហកទាំងស្រុង ព្រោះមេដឹកនាំពិភពលោកទាំងនោះមកក្រើនរំឭកកម្ពុជាឲ្យបើកលំហប្រជាធិបតេយ្យ និងការគោរពសិទ្ធិមនុស្ស។
អនុប្រធានវេទិកាពលរដ្ឋ លោក ម៉ែន ណាត បានប្រាប់សារព័ត៌មាន The Cambodia Daily នៅថ្ងៃទី១៤ វិច្ឆិកា នេះថា កូនៗរបស់លោក ហ៊ុន សែន ដែលសរសើរឪពុកខ្លួនឯងថាដឹកនាំប្រជុំអាស៊ានទទួលបានជោគជ័យដោយសារមេដឹកនាំពិភពលោកទៅចូលរួមកាលពីពេលថ្មីៗនេះ ជារឿងភូតកុហកទាំងស្រុង ព្រោះថាពិតមែនតែមេដឹកនាំពិភពលោកទាំងនោះទៅកម្ពុជា ប៉ុន្តែវត្តមានរបស់អ្នកទាំងនោះវាជាកាតព្វកិច្ចរបស់ពួកគេដែលផ្សារភ្ជាប់ជាមួយអាស៊ានប៉ុណ្ណោះ។ លើសពីនេះ ពួកគេទៅក៏មានគោលបំណងដើម្បីក្រើនរំឭកកម្ពុជាពីការគោរពសិទ្ធិមនុស្ស និងលទ្ធិប្រជាធិបតេយ្យផងដែរ ជាពិសេសគឺសហរដ្ឋអាមេរិកតែម្តង។
លោក ម៉ែន ណាត លើកឡើងថា បើចង់ដឹងថាកិច្ចប្រជុំអាស៊ាននេះកម្ពុជាទទួលបានជោគជ័យឬអត់ គួរពិនិត្យទៅលទ្ធិប្រជាធិបតេយ្យ ពិនិត្យលើសិទ្ធិមូលដ្ឋានរបស់ពលរដ្ឋ ពិនិត្យលើអធិបតេយ្យភាពរបស់កម្ពុជានៅពេលនេះ ថាតើវាមានភាពល្អប្រសើរកម្រិតណាហើយ ស្របពេលដែលអាមេរិកបានដាស់តឿនកម្ពុជាបន្ថែមទៀតជុំវិញអធិបតេយ្យភាពជាតិរបស់ខ្លួន ដែលពាក់ព័ន្ធនឹងមូលដ្ឋានទ័ពជើងទឹករាម ដែលកម្ពុជានៅតែបង្កភាពមិនច្បាស់លាស់ពីឯករាជ្យរបស់ខ្លួនជាមួយចិនសព្វថ្ងៃនេះ។
អនុប្រធានវេទិកាពលរដ្ឋរូបនេះបញ្ជាក់ថា ការលើកសរសើរពីការដឹកនាំរបស់លោក ហ៊ុន សែន ពីកូនប្រុសរបស់គាត់ រួមទាំងមន្ត្រីរដ្ឋាភិបាលផងនោះ មិនមែនជារឿងថ្មី និងចម្លែកនោះទេ ព្រោះថាបើទោះបីជាលោក ហ៊ុន សែន ដឹកនាំនយោបាយដោយដាក់អធិបតេយ្យភាពជាតិក្រោមប្រទេសដទៃ ដូចជាវៀតណាម និងចិន ឬរំលោភសិទ្ធិមនុស្សដោយការចាប់ឃុំខ្លួនអ្នកនយោបាយ និងសកម្មជននានាកន្លងមកក៏ដោយ ក៏ពួកគេនៅតែសរសើរថា លោក ហ៊ុន សែន ដឹកនាំបានល្អដែរ។
កាលពីថ្ងៃទី១៣ ខែវិច្ឆិកា ឆ្នាំ២០២២ បេក្ខជនអនាគតនាយករដ្ឋមន្ត្រីរបស់បក្សកាន់អំណាច លោក ហ៊ុន ម៉ាណែត ដែលជាកូនប្រុសច្បងរបស់លោក ហ៊ុន សែន បានលើកឡើងថា ជាមោទកភាពរបស់កម្ពុជានៅក្រោមការដឹកនាំរបស់លោក ហ៊ុន សែន ក្នុងនាមជាប្រធានអាស៊ាន បានដឹកនាំសម្របសម្រួលការងាររហូតបានសម្រេចលទ្ធផលធំៗជាច្រើន ទោះបីជាត្រូវប្រឈមបញ្ហាស្មុគស្មាញជាច្រើននៅក្នុងតំបន់ និងនៅលើសកលលោកក៏ដោយ។
ចំណែកកូនប្រុសពៅរបស់លោក ហ៊ុន សែន គឺលោក ហ៊ុន ម៉ានី ក៏បានសរសេរលើទំព័រហ្វេសប៊ុករបស់ខ្លួនកាលពីថ្ងៃអាទិត្យ ទី១៣ វិច្ឆិកា នេះដែរថា ការអញ្ជើញចូលរួមពីបណ្តាប្រមុខថ្នាក់ដឹកនាំកំពូលៗលើពិភពលោកក្នុងកិច្ចប្រជុំកំពូលអាស៊ាននៅពេលនេះ បានឆ្លុះបញ្ចាំងយ៉ាងច្បាស់ពីតួនាទីដ៏សំខាន់របស់កម្ពុជា ការជឿទុកចិត្តលើកម្ពុជា និងការឲ្យតម្លៃដល់កម្ពុជា។
កូនប្រុសបុរសខ្លាំងកម្ពុជារូបនេះបញ្ជាក់ថា ភាពជោគជ័យនៅថ្ងៃនេះមិនមែនជារឿងចៃដន្យឡើយ ហើយក៏មិនមែនជាអ្វីដែលបរទេសណាម្នាក់បានផ្តល់ឲ្យកម្ពុជាដែរ ប៉ុន្តែវាជាញើសជាឈាមរបស់កម្ពុជាសុទ្ធសាធ ក្រោមការដឹកនាំដ៏ប៉ិនប្រសព្វរបស់ឪពុកលោកក្នុងមាគ៌ាដ៏ត្រឹមត្រូវនេះ។
ស្ថាបនិកអង្គការអភិវឌ្ឍន៍ផ្នត់គំនិត លោក សេក សុជាតិ បានប្រាប់សារព័ត៌មាន The Cambodia Daily នៅថ្ងៃទី១៤ វិច្ឆិកា នេះថា លោកទទួលស្គាល់ថាការរៀបចំអាស៊ាននៅឆ្នាំនេះមានភាពរលូនជាងមុន ប៉ុន្តែក៏មិនអាចចាត់ទុកថាជាមុខមាត់របស់កម្ពុជាទាំងស្រុងនោះដែរ ព្រោះអ្វីដែលមេដឹកនាំពិភពលោកបានលើកឡើងទៅកាន់មេដឹកនាំកម្ពុជា លោក ហ៊ុន សែន គឺការស្ដារលទ្ធិប្រជាធិបតេយ្យ ការគោរពសិទ្ធិមនុស្ស និងការបញ្ជាក់ពីមូលដ្ឋានទ័ពជើងទឹករាមប៉ុណ្ណោះ មិនមែនរឿងរៀបចំប្រជុំអាស៊ានបានល្អ ឬមិនបានល្អនោះទេ។
លោក សេក សុជាតិ លើកឡើងថា បើកម្ពុជានៅតែរឹតត្បិតសេរីភាពបញ្ចេញមតិ រាំងខ្ទប់ដំណើរការប្រជាធិបតេយ្យ បង្រួមសិទ្ធិមនុស្ស ជាពិសេសការមិនអាចធ្វើឲ្យមានភាពប្រសើរឡើងនូវការបោះឆ្នោតជាតិឆ្នាំ២០២៣ ខាងមុខនេះ នោះកម្ពុជាក៏នៅតែរងនូវការរិះគន់ពីមជ្ឈដ្ឋានជាតិ និងអន្តរជាតិដដែល។
កាលពីថ្ងៃទី១០ ដល់ថ្ងៃទី១៣ ខែវិច្ឆិកា ឆ្នាំ២០២២ កម្ពុជាបានដឹកនាំកិច្ចប្រជុំអាស៊ាន និងកិច្ចប្រជុំពាក់ព័ន្ធដទៃទៀត ដូចជាកិច្ចប្រជុំកំពូលអាស៊ាន-ចិន កិច្ចប្រជុំកំពូលអាស៊ាន-ជប៉ុន និងកិច្ចប្រជុំកំពូលអាស៊ាន-សាធារណរដ្ឋកូរ៉េ ជាដើម ដែលមានមេដឹកនាំធំៗរបស់ប្រទេសជាច្រើនទៅចូលរួម។
ក្រោយបិទបញ្ចប់កិច្ចប្រជុំ មេដឹកនាំកម្ពុជា លោក ហ៊ុន សែន បានប្រគល់ញញួរអាស៊ានឱ្យទៅប្រធានាធិបតីឥណ្ឌូនេស៊ី គឺលោក ចូកូ វីដូដូ ដែលនឹងត្រូវដល់វេនដឹកនាំអាស៊ាន ១០ឆ្នាំម្តងក្នុងឆ្នាំ២០២៣ ខាងមុខនេះ៕