ក្រុមអ្នកឃ្លាំមើលសង្គមរស់នៅក្រៅស្រុក ច្រានចោលការលើកឡើងរបស់រដ្ឋមន្ត្រីការពារជាតិកម្ពុជា លោក ទៀ បាញ់ ដែលថាក្តីបារម្ភរបស់សហរដ្ឋអាមេរិកជុំវិញការសង្ស័យពីវត្តមានកងទ័ពចិននៅមូលដ្ឋានទ័ពជើងទឹករាមជារឿងតូចតាច ខណៈសហរដ្ឋអាមេរិកថាមូលដ្ឋានទ័ពជើងទឹករាមរបស់កម្ពុជា គឺជាចំណុចដែលបង្កហានិភ័យធំដល់សន្តិសុខក្នុងតំបន់ទាំងមូល។
អនុប្រធានវេទិកាពលរដ្ឋ លោក ម៉ែន ណាត បានប្រាប់សារព័ត៌មាន The Cambodia Daily នៅថ្ងៃទី២៤ វិច្ឆិកា នេះថា ចម្លើយរបស់លោក ទៀ បាញ់ ជុំវិញកំពង់ផែរាមនេះនឹងធ្វើឱ្យសម្ពន្ធមិត្តរបស់ខ្លួន គឺសហរដ្ឋអាមេរិកមានការអាក់អន់ស្រពន់ចិត្តកាន់តែខ្លាំងបន្ថែមទៀត ព្រោះថាការផ្តល់មូលដ្ឋានជើងទឹករាមរបស់ខ្លួនឱ្យកងទ័ពចិនឈរជើង គឺជាទង្វើរំលោភកិច្ចសហប្រតិបត្តិការយ៉ាងធ្ងន់ធ្ងរជាមួយអាមេរិក ក្នុងនាមជាប្រទេសដែលធ្លាប់ចុះកិច្ចសន្យានានាជុំវិញមូលដ្ឋានជើងទឹករាមរហូតដល់មានការសាងសង់អគារមួយចំនួននៅទីនោះនាពេលកន្លងមក។
លោក ម៉ែន ណាត ត្អូញត្អែរថា ទង្វើរបស់មេដឹកនាំកម្ពុជាបែបនេះ គឺបង្ហាញពីសកម្មភាពបំផ្លាញផលប្រយោជន៍ជាតិទាំងស្រុង ព្រោះថាការផ្តល់មូលដ្ឋានយោធារបស់ខ្លួនឱ្យកងទ័ពចិនកាន់កាប់ គឺជាការដុតបញ្ឆេះភ្លើងលើទឹកដីរបស់ខ្លួន បំផ្ទុះសង្គ្រាមក្នុងតំបន់ដែលគួរឱ្យភ័យព្រួយ ហើយអ្នកដែលទទួលរងគ្រោះពីរឿងនេះ គឺកម្ពុជាខ្លួនឯងប៉ុណ្ណោះ។
លោកបន្ថែមថា កម្ពុជានឹងជាន់ដានប្រវត្តិសាស្ត្ររបស់ខ្លួនដូចអំឡុងទសវត្សឆ្នាំ១៩៧០ ដែលបានផ្តល់ទឹកដីរបស់ខ្លួនឱ្យវៀតណាមជ្រកកោនដូច្នោះដែរ។
អនុប្រធានវេទិកាពលរដ្ឋរូបនេះព្រមានថា បើកម្ពុជាមិនធ្វើឱ្យជាក់ច្បាស់អំពីមូលដ្ឋានជើងទឹករាម អំពីឯករាជភាពរបស់ខ្លួនដូចមានចែងក្នុងរដ្ឋធម្មនុញ្ញ និងកិច្ចព្រមព្រៀងសន្តិភាពទីក្រុងប៉ារីសទេ កម្ពុជានឹងខាតបង់ផលប្រយោជន៍ជាតិគ្រប់យ៉ាងលើឆាកអន្តរជាតិ ទាំងនយោបាយការទូត ទាំងសេដ្ឋកិច្ច និងមុខមាត់របស់ខ្លួនក្នុងនាមជារដ្ឋឯករាជ្យមួយ។
កាលពីថ្ងៃទី២៣ ខែវិច្ឆិកា ឆ្នាំ២០២២ ក្នុងសន្និសីទសារព័ត៌មានស្ដីពីលទ្ធផលនៃកិច្ចប្រជុំរដ្ឋមន្ត្រីការពារជាតិអាស៊ាន លោក ទៀ បាញ់ ដែលជារដ្ឋមន្ត្រីការពារជាតិកម្ពុជា បានឆ្លើយតបនឹងសំណួររបស់អ្នកសារព័ត៌មានជុំវិញការសង្ស័យអំពីវត្តមានកងទ័ពចិនក្នុងមូលដ្ឋានជើងទឹករាមថា នៅកម្ពុជាគ្មានកងទ័ពបរទេសទេ ហើយរដ្ឋធម្មនុញ្ញកម្ពុជាក៏ពុំអនុញ្ញាតឲ្យមានកងទ័ពបរទេសដែរ។
លោក ទៀ បាញ់ បញ្ជាក់ថា ការអភិវឌ្ឍនៅមូលដ្ឋានជើងទឹករាម មិនបង្កការគំរាមកំហែងដល់សន្តិសុខរបស់អ្នកដទៃនោះឡើយ ដូច្នេះអាមេរិកក៏មិនគួរខ្វល់ខ្វាយពីរឿងនេះពេកដែរ ព្រោះថាមូលដ្ឋានជើងទឹករាមគ្រាន់តែជាទីតាំងកងទ័ពតូចមួយដែលមានទំហំប៉ុននឹងផែនេសាទប៉ុណ្ណោះ។
ក្នុងកិច្ចពិភាក្សាអំឡុងពេលកិច្ចប្រជុំរដ្ឋមន្ត្រីការពារជាតិអាស៊ានជាមួយរដ្ឋមន្ត្រីក្រសួងការពារជាតិកម្ពុជា លោក ទៀ បាញ់ កាលពីថ្ងៃទី២២ ខែវិច្ឆិកា ឆ្នាំ២០២២ រដ្ឋមន្ត្រីការពារជាតិសហរដ្ឋអាមេរិក លោក ឡយ អូសស្ទីន បានលើកឡើងថា វត្តមានកងទ័ពចិនលើមូលដ្ឋានជើងទឹករាមរបស់កម្ពុជា ថាជាការគំរាមកំហែងធ្ងន់ធ្ងរដល់ផលប្រយោជន៍ សន្តិសុខសហរដ្ឋអាមេរិក និងសន្តិសុខសម្ពន្ធមិត្តរបស់ខ្លួននៅក្នុងតំបន់។
ទាក់ទិននឹងក្តីបារម្ភនេះ កាលពីដើមខែកញ្ញា ឆ្នាំ២០២០ កន្លងទៅនេះ រដ្ឋាភិបាលកម្ពុជាបានសម្រេចវាយកម្ទេចអគារមួយក្នុងចំណោមអគារជាច្រើននៅក្នុងមូលដ្ឋានទ័ពរាម ដែលសាងសង់ដោយថវិកាជំនួយរបស់សហរដ្ឋអាមេរិក កាលពីអំឡុងខែសីហា ឆ្នាំ២០១២ កន្លងទៅ។ បញ្ហានេះ សហរដ្ឋអាមេរិកបានសម្ដែងការខកចិត្តយ៉ាងខ្លាំងចំពោះការវាយកម្ទេចអគារដែលជានិមិត្តសញ្ញានៃទំនាក់ទំនងរវាងប្រទេសទាំងពីរ។
ការវាយកម្ទេចអគារដែលសង់ដោយថវិកាជំនួយរបស់សហរដ្ឋអាមេរិកនេះ ធ្វើឡើងបន្ទាប់ពីមានការសង្ស័យថា កម្ពុជាបានចុះហត្ថលេខាសម្ងាត់ជាមួយចិន ដើម្បីអនុញ្ញាតឲ្យយោធាចិនប្រើប្រាស់មូលដ្ឋានរាម សម្រាប់ធ្វើជាមូលដ្ឋានយោធាជើងទឹករបស់ពួកគេ ប៉ុន្តែបញ្ហានេះត្រូវរដ្ឋាភិបាលកម្ពុជាបដិសេធចោលទាំងស្រុង ដោយអះអាងថា គ្រាន់តែដើម្បីកែលំអនូវមូលដ្ឋានជើងទឹករបស់ខ្លួនឡើងវិញប៉ុណ្ណោះ។
កាលពីឆ្នាំ២០១៩ កាសែតអាមេរិក The Wall Street Journal បានចុះផ្សាយថា កម្ពុជា និងចិនបានចុះហត្ថលេខាជាសម្ងាត់លើកិច្ចព្រមព្រៀងមួយដែលអនុញ្ញាតឱ្យចិន មានសិទ្ធិផ្ដាច់មុខចូលទៅប្រើប្រាស់មូលដ្ឋានកងទ័ពជើងទឹករាមក្នុងរយៈពេល ៣០ឆ្នាំ ដោយអាចបន្តឡើងវិញនៅរៀងរាល់ ១០ឆ្នាំម្ដង។
ជុំវិញការសង្ស័យពីវត្តមានកងទ័ពចិនក្នុងមូលដ្ឋានជើងទឹករាមនេះ ទាំងព្រឹទ្ធសភា ទាំងរដ្ឋមន្ត្រី និងអនុរដ្ឋមន្ត្រីការបរទេស និងទាំងប្រធានាធិបតីសហរដ្ឋអាមេរិក លោក ចូ បៃដិន សុទ្ធតែព្រួយបារម្ភ និងបានរំឭកកម្ពុជាជានិច្ចជុំវិញការសង្ស័យអំពីវត្តមានកងទ័ពចិននៅមូលដ្ឋានជើងទឹករាមនេះ ប៉ុន្តែខាងភាគីកម្ពុជាតែងបដិសេធរហូត។
គួរបញ្ជាក់ផងដែរថា កម្ពុជាបានអនុញ្ញាតឲ្យអនុព័ន្ធយោធាអាមេរិកបានធ្វើដំណើរទស្សនកិច្ចខ្លីមួយនៅកំពង់ផែរាម កាលពីថ្ងៃទី១១ ខែមិថុនា ឆ្នាំ២០២១។ ដំណើរទស្សនកិច្ចដែលលោកនាយករដ្ឋមន្ត្រី ហ៊ុន សែន បានបើកភ្លើងខៀវក្រោយមានការទទូចដោយផ្ទាល់ពីអនុរដ្ឋមន្ត្រីការបរទេសអាមេរិក លោកស្រី Wendy Sherman ក៏ប៉ុន្តែភាគីអាមេរិកបានចាត់ទុកដំណើរទស្សនកិច្ចនោះថាមិនពេញលេញ ដ្បិតខ្លួនមិនអាចដើរមើលគ្រប់កន្លែង ហើយទាមទារការបំពេញទស្សនកិច្ចជាថ្មី។
កាលពីថ្ងៃទី២ ខែធ្នូ ឆ្នាំ២០២១ លោកនាយករដ្ឋមន្ត្រី ហ៊ុន សែន បានប្រតិកម្មធ្ងន់ៗថា លោកនឹងបិទចោលលែងឲ្យមានការបំពេញទស្សនកិច្ចណាមួយនៅកំពង់ផែរាមទៀតឡើយ។ លោកថា កំពង់ផែរាមមិនមែនជាកន្លែងចោរលួចចោរប្លន់ដែលចង់ឆែកឆេរស្រេចតែចិត្តនោះទេ៕