ប្រធានសម្ព័ន្ធសហជីពចលនាកម្មករ ហៅកាត់ថា CUMW ស្នើទៅក្រសួងសុខាភិបាលឲ្យចុះស៊ើបអង្កេតនៅមន្ទីរសម្រាកព្យាបាល និងសម្ភព «ដើមអង្ក្រង» ផ្សារព្រៃទទឹង ក្រោយពីកម្មករស្ត្រីម្នាក់បានរងគ្រោះបន្ទាប់ពីវះកាត់យកទារកអាយុប្រហែល ៥ខែដែលខូចចេញពីផ្ទៃម្តាយ។
ការអំពាវនាវរបស់ប្រធានសម្ព័ន្ធសហជីពចលនាកម្មករ បន្ទាប់ពីគ្រួសារជនរងគ្រោះបានសរសេរលើទំព័រហ្វេសប៊ុក ដោយរៀបរាប់អំពីស្ថានភាពប្អូនស្រីរបស់ខ្លួនអំឡុងពេលទៅវះកាត់ និងសម្រាកព្យាបាលនៅមន្ទីរសម្រាកព្យាបាល និងសម្ភព ដើមអង្ក្រង ផ្សារព្រៃទទឹង។
ឈ្មោះ សាវឿន បានសរសេរសារបង្ហោះលើហ្វេសប៊ុកដោយអមជាមួយនឹងរូបភាព និងវីដេអូប្អូនស្រីដោយដៃព្យួរសេរ៉ូម បានសរសេររៀបរាប់ថា ប្អូនរបស់គាត់មានផ្ទៃពោះ ៥ខែ ដោយសារកូនខូចក្នុងពោះម្ដាយ ពួកគេក៏សម្រេចទៅគ្លីនិកមួយកន្លែងនៅផ្លូវជាតិលេខ៣ គីឡូទី២៧ ដើម្បីយកទារកដែលខូចនោះចេញ។
ប្រភពដដែលថា នៅពេលយកលើកទីមួយ ប្អូនរបស់គាត់មិនទាន់អីឡើយ ប៉ុន្តែពេលទៅដាក់សេរ៉ូមកម្លាំងនោះ ប្អូនគាត់ក៏ជួបគ្រោះថ្នាក់ដោយពេទ្យឆ្មបបានយកពោះវៀនប្អូនគាត់ចេញ ហើយក៏ប្រាប់ប្ដីថាជាទងសុករបស់គាត់ទៅវិញ។ ចំណែកប្ដីបានបដិសេធចំពោះការលើកឡើងរបស់ពេទ្យឆ្មប ដែលថាគ្រូពេទ្យយកចេញពីពោះរបស់ប្រពន្ធនោះ មិនមែនជាទងសុកឡើយ ផ្ទុយទៅវិញជាពោះវៀនតាន់។
ក្រោយពីមានបញ្ហានេះកើតឡើង រដ្ឋលេខាធិការក្រសួងសុខាភិបាល លោកស្រី ឱ វណ្ណឌីន សម្រេចបិទមន្ទីរសម្រាកព្យាបាលឯកជន «ដើមអង្ក្រង» ដែលមានទីតាំងនៅផ្ទះលេខ៣ ឃុំអង្គពពេល ស្រុកគងពិសី ខេត្តកំពង់ស្ពឺ របស់អ្នកស្រី សួស ច័ន្ទរស្មី បណ្ដោះអាសន្ន ដោយថាដើម្បីធ្វើការស្រាវជ្រាវឲ្យបានច្បាស់លាស់ពីហេតុការណ៍ដែលបានបណ្ដាលមកពីករណីរំលូតកូនស្លាប់ក្នុងផ្ទៃតាមច្បាប់ជាធរមាន។
ប្រធានសម្ព័ន្ធសហជីពចលនាកម្មករ លោក ប៉ាវ ស៊ីណា ស្នើទៅក្រសួងសុខាភិបាលឲ្យចុះស៊ើបអង្កេតនៅមន្ទីរសម្រាកព្យាបាល និងសម្ភព ដើមអង្ក្រង ផ្សារព្រៃទទឹង ឲ្យបានឆាប់តាមដែលអាចធ្វើទៅបាន។
បើតាមទំព័រហ្វេសប៊ុករបស់សម្ព័ន្ធសហជីពចលនាកម្មករ ដកស្រង់សម្ដីរបស់លោក ប៉ាវ ស៊ីណា នៅថ្ងៃទី២៩ ខែវិច្ឆិកា ដោយចាត់ទុកករណីស្លាប់កម្មករស្ត្រីដែលពពោះ ៥ខែ ដោយសារតែការធ្វេសប្រហែសរបស់បុគ្គលិកឆ្មប។ លោកស្នើទៅក្រសួងសុខាភិបាល ឲ្យស៊ើបអង្កេតនៅមន្ទីរសម្រាកព្យាបាលមួយនេះ ដើម្បីផ្ដល់យុត្តិធម៌សម្រាប់ជនរងគ្រោះ និងគ្រួសារ។
ឆ្លើយតបនឹងសំណើ ក្រសួងសុខាភិបាលថាខ្លួនបានចាត់ក្រុមការងារចុះស្រាវជ្រាវពិនិត្យករណីនេះរួចហើយ។
ស្ត្រីដែលទទួលមរណភាពបន្ទាប់ពីវះកាត់ និងសម្រាកព្យាបាលនិងសម្ភពដើមអង្ក្រង ផ្សារព្រៃទទឹង ជាកម្មការិនីរោងចក្រកាត់ដេរសម្លៀកបំពាក់ដោយរស់នៅស្រុកជុំគីរី ខេត្តកំពត៕