30 C
Phnom Penh

បទ​យកការណ៍៖ តើ​ឧកញ៉ា ពុង ឃាវសែ ជាប់​ពាក់ព័ន្ធ​អ្វី​ខ្លះ​ក្នុង​ការ​លក់​ដី​កោះ​នរា?

ដោយ ឌឹ ខេមបូឌា ដេលី

បទវិភាគ

ក្រុមហ៊ុន Overseas Cambodian Investment Corporation អូ.ស៊ី.អាយ.ស៊ី (OCIC) របស់​អ្នក​ឧកញ៉ា ពុង ឃាវសែ ដែល​ជា​ឈ្មួញ​ឈរ​ឈ្មោះ​រកស៊ី​ឲ្យ​គ្រួសារ​ត្រកូល «ហ៊ុន» គ្រប់​វិស័យ ដូចជា​ធនាគារ អចលនទ្រព្យ សមាគម​អ្នក​សាងសង់​កម្ពុជា និង​ក្រុមហ៊ុន​ធានារ៉ាប់រង​អាយុជីវិត បាន​លក់​ដី​ទំហំ ៣,៥​ហិកតារ​នៅ​ក្នុង​គម្រោង​អភិវឌ្ឍ​កោះនរា ឱ្យ​ទៅ​ក្រុមហ៊ុន​អចលនទ្រព្យ​សិង្ហបុរី ឈ្មោះ AKRAM Development Co., Ltd ក្នុង​តម្លៃ​បោះ​ទុន​ជាង ១៥០​លាន​ដុល្លារ​អាមេរិក។

គេ​ព្យាករ​ថា ដី​គម្រោង​អភិវឌ្ឍន៍​កោះ​ចំនួន​ជាង ១០០​ហិកតារ​នោះ​មាន​តម្លៃ​ជាង ៥​ពាន់​លាន​ដុល្លារ​សហរដ្ឋ​អាមេរិក កំពុង​តែ​ប្រើ​ឲ្យ​វិស័យ​ឯកជន​សុទ្ធសាធ ផ្ទុយ​ទៅ​នឹង​ច្បាប់​ដែល​បាន​កំណត់ និង​កំពុង​ធ្វើ​ឲ្យ​មាន​ហានិភ័យ​នៃ​ទឹកជំនន់ និង​ការ​បាក់​ច្រាំងទន្លេ​កាន់តែ​កើនឡើង។

តើ​លោក​ឧកញ៉ា​រូប​នេះ​ចង់​ប្រែ​ក្លាយ​អ្វី​ខ្លះ​នៅ​ក្នុង​កូន​កោះ​សិប្បនិម្មិត​នេះ? លោក តាំង សារ៉ាដា សូម​ជូន​សេចក្តី​រាយការណ៍​អំពី​រឿង​នេះ​ពិស្ដារ។

ក្រុមហ៊ុន Overseas Cambodian Investment Corporation អូ.ស៊ី.អាយ.ស៊ី (OCIC) របស់​អ្នក​ឧកញ៉ា ពុង ឃាវសែ ស្ថាបនិក​ធនាគារ​កាណាឌីយ៉ា ដែល​ពលរដ្ឋ​ទូទៅ​ដឹង​ថា​ជា​ឈ្មួញ​ឈរ​ឈ្មោះ​រកស៊ី​ឲ្យ​គ្រួសារ​ត្រកូល «ហ៊ុន» លើ​គ្រប់​វិស័យ ទទួល​បាន​សិទ្ធិ​អភិវឌ្ឍន៍​កោះនរា​ដើម្បី​ពង្រីក​ទំហំ​កោះ​ធម្មជាតិ​ដ៏​តូច​មួយ។

កោះ​នេះ​ជា​ចំណុច​ប្រសព្វ​នៃ​ទន្លេមេគង្គ និង​ទន្លេបាសាក់ បាន​សម្រេច​លក់​ក្នុង​ទំហំ ៣,៥​ហិកតារ​ឱ្យ​ទៅ​ក្រុមហ៊ុន​អចលនទ្រព្យ​សិង្ហបុរី ឈ្មោះ AKRAM Development Co., Ltd ក្នុង​តម្លៃ​បោះ​ទុន​ជាង ១៥០​លាន​ដុល្លារ​អាមេរិក ប៉ុន្តែ​តម្លៃ​ដី​កោះ​ទំហំ​ជាង ១០០​ហិកតារ​នោះ​មាន​តម្លៃ​រហូត​ទៅ​ដល់​ជាង ៥​ពាន់​លាន​ដុល្លារ​អាមេរិក​ឯណោះ។

នៅ​ថ្ងៃទី​១៥ ខែ​សីហា ឆ្នាំ​២០២២ តំណាង​អ្នកទិញ​លោក Kelvin Chua អគ្គនាយក​នៃ​ក្រុមហ៊ុន​អចលនទ្រព្យ​សិង្ហបុរី AKRAM Development Co., Ltd និង​លោក​ឧកញ៉ា ពុង ឃាវសែ ប្រធាន​ក្រុមប្រឹក្សាភិបាល​នៃ​ក្រុមហ៊ុន OCIC ជា​តំណាង​អ្នកលក់ បាន​ចុះហត្ថលេខា​លើ​កិច្ចព្រមព្រៀង​ទិញ​លក់​នេះ​ក្នុង​តម្លៃ​បោះ​ទុន​ជាង ១៥០​លាន​ដុល្លារ​អាមេរិក។

លោក Kelvin Chua បាន​ថ្លែង​នៅ​ក្នុង​ថ្ងៃ​ចុះហត្ថលេខា​លើ​កិច្ចព្រមព្រៀង​ទិញ​ថា គោលបំណង​នៃ​ការ​ទិញ​នេះ គឺ​ដើម្បី​អភិវឌ្ឍ​គម្រោង​បែប​ប្រណីត​លំដាប់​កំពូល ដោយ​លោក​បាន​មើល​ឃើញ​អំពី​ការ​កើនឡើង​តម្រូវការ​នៃ​គម្រោង​បែប​ប្រណីត​លំដាប់​កំពូល​នៅ​កម្ពុជា។

សហគ្រិន​វ័យ ៣៥​ឆ្នាំ​រូប​នេះ​បាន​សង្កត់​ធ្ងន់​ថា លោក​មាន​ក្ដី​សោមនស្ស​រីករាយ​ជា​ខ្លាំង​ក្នុង​ការ​ទិញ​យក​បាន​នូវ​ទីតាំង​ដី​នេះ​ពី​លោក​ឧកញ៉ា ពុង ឃាវសែ។ ការ​ទិញ​យក​ដី​មួយ​កន្លែង​នេះ​ប្រាកដជា​មិន​អាច​ធ្វើ​ទៅ​បាន​នោះ​ទេ ប្រសិនបើ​មិន​មាន​ការ​គាំទ្រ និង​ទុកចិត្ត​របស់​លោក​ឧកញ៉ា ពុង ឃាវសែ នៅ​ក្នុង​គម្រោង​របស់​គាត់។

លោក​មាន​ភាព​រីករាយ​ដែល​បាន​ក្លាយ​ជា​ផ្នែក​មួយ​នៃ​ចក្ខុវិស័យ​របស់​លោក ពុង ឃាវសែ នៅ​ក្នុង​ការ​អភិវឌ្ឍ​កោះនរា និង​មាន​ក្ដី​សង្ឃឹម​យ៉ាង​មុតមាំ​ថា ទីតាំង​ដ៏​មាន​សក្ដានុពល​មួយ​នេះ​នឹង​ក្លាយ​ជា​ចំណុច​ទាក់ទាញ​បំផុត​មួយ​នៃ​គម្រោង​របស់​លោក។

ក្រុមហ៊ុន​អភិវឌ្ឍ AKRAM គឺជា​ក្រុមហ៊ុន​ដៃគូ​រវាង​លោក Kelvin Chua និង​លោក Melvin Poh មកពី​ក្រុមហ៊ុន Centra Group Singapore ដែល​មាន​គម្រោង​អភិវឌ្ឍ​ជាច្រើន​ក្រាស់ក្រែល​មាន​តម្លៃ​ជាង ១,៦៥​ពាន់​លាន​ដុល្លារ​នៅ​ក្នុង​ដៃ។

លោក Kelvin Chua ធ្លាប់​អះអាង​ថា កោះនរា​គឺជា​ទីតាំង​យុត្តិសាស្ត្រ​ដ៏​មុតមាំ​មួយ​ដែល​មិន​ត្រឹមតែ​ស្ថិត​នៅ​ជាប់​នឹង​ដង​ទន្លេមេគង្គ​ប៉ុណ្ណោះ​ទេ តែ​ក៏​ស្ថិត​នៅ​កៀក​ជាមួយ​នឹង​ទីតាំង​ដ៏​ពិសិដ្ឋ​ពីរ​ផ្សេង​ទៀត គឺ​ទីក្រុង​កោះពេជ្រ និង​ណាហ្គា​វើលដ៍​ផង​ដែរ។

បើ​និយាយ​អំពី​ទីក្រុង​កោះពេជ្រ ដែល​គេ​ចាត់ទុក​ថា​ជា​ទីតាំង​ដ៏​ពិសិដ្ឋ​នោះ តំបន់​កោះពេជ្រ​នេះ​ពី​ដើម​ឡើយ​គ្រាន់តែ​ជា​លំនៅឋាន និង​កន្លែង​ដាំ​បន្លែ​របស់​គ្រួសារ​ក្រីក្រ​ប៉ុន្មាន​រយ​នាក់​ប៉ុណ្ណោះ។ កោះ​ទំហំ ១០០​ហិកតារ​ដែល​នៅ​ប្រសព្វ​នឹង​ទន្លេ​បួន​មុខ​នេះ ត្រូវ​បាន​អភិវឌ្ឍ​នៅ​ឆ្នាំ​២០០៦ ដោយ​ក្រុមហ៊ុន​វិនិយោគទុន​អាណិកជន​កម្ពុជា (Overseas Cambodian Investment Corporation) របស់​ធនាគារ​កាណាឌីយ៉ា បន្ទាប់ពី​ក្រុមហ៊ុន​ដ៏​មាន​ឥទ្ធិពល​មួយ​នេះ​បាន​បង្ខំ​ឱ្យ​ពលរដ្ឋ​ប្រមាណ ៣០០​គ្រួសារ​នៅ​ទីនោះ​លក់​ដី​ទៅ​ឱ្យ​ក្រុមហ៊ុន​ក្នុង​តម្លៃ​ដ៏​ទាប​មួយ។

ក្រុមហ៊ុន​កម្ពុជា​ដ៏​ធំ​មួយ​នេះ​បាន​លក់​ដី​មួយ​ចំនួន​បន្ត ឬ​វិនិយោគ​រួម​គ្នា​ជាមួយ​ក្រុមហ៊ុន​ឯកជន​មួយ​ចំនួន​ទៀត ដើម្បី​សាងសង់​សំណង់​ទំនើបៗ​ដែល​មាន​តម្លៃ​សរុប​ជាច្រើន​ពាន់​លាន​ដុល្លារ។

គម្រោង​ធំៗ​ទាំងនោះ​មាន​ដូចជា៖

  • គម្រោង Riviera ដែល​មាន​តម្លៃ ៧០០​លាន​ដុល្លារ មាន​ខុនដូ ៣៣​ជាន់​ចំនួន ៣​អគារ ខុនដូ ២៩​ជាន់​ចំនួន ២​អគារ អាង​ហែល​ទឹក ផ្សារ​ទំនើប មន្ទីរពេទ្យ និង​សាលារៀន​លំដាប់​អន្តរជាតិ ដែល​បាន​បញ្ចប់​នៅ​ឆ្នាំ​២០១៧
  • គម្រោង​ខុនដូ Casa Meridian
  • គម្រោង​ផ្សារ​ទំនើប La Siene
  • គម្រោង​បុរី​វរជន ជាដើម
  • និង​គម្រោង​សំណង់​អគារ​ពេជ្រ​ដែល​មាន​កម្ពស់​រហូត​ដល់ ៥៥៥​ម៉ែត្រ ជាដើម។

កាលពី​ថ្ងៃទី​២២ ខែ​វិច្ឆិកា ឆ្នាំ​២០២២ គឺជា​ខួប​គម្រប់ ១២​ឆ្នាំ​គត់​នៃ​ព្រឹត្តិការណ៍​រត់​ជាន់​គ្នា​ស្លាប់​នៅ​លើ​ស្ពាន​កោះពេជ្រ​នៅ​យប់​ចុងក្រោយ​នៃ​ពិធីបុណ្យ​អុំទូក កាលពី​ឆ្នាំ​២០១០។ ព្រឹត្តិការណ៍​រត់​ជាន់​គ្នា​ស្លាប់​នៅ​លើ​ស្ពាន​កោះពេជ្រ​កាលពី ១២​ឆ្នាំ​មុន ដែល​បាន​បណ្តាល​ឱ្យ​មនុស្ស ៣៥៣​នាក់​ស្លាប់​បាត់បង់​ជីវិត និង ៤១០​នាក់​បាន​រង​របួស។

ងាក​មក​កោះនរា​វិញ ក្រុមហ៊ុន OCIC ដែល​ជា​ក្រុមហ៊ុន​វិនិយោគ​ពហុ​ជំនាញ​ដ៏​ធំ​បំផុត​របស់​ប្រទេស​កម្ពុជា​នេះ កំពុង​ជំរុញ​ការ​កសាង​គម្រោង​ទីក្រុង​រណប​តម្លៃ ២,៥​ពាន់​លាន​ដុល្លារ​របស់​ខ្លួន​ឈ្មោះ​ថា ទីក្រុង​កោះនរា។ គម្រោង​នេះ​នឹង​ក្លាយ​ជា​មជ្ឈមណ្ឌល​ពាណិជ្ជកម្ម និង​ជា​តំបន់​លំនៅឋាន​លំដាប់​ប្រណីត​ក្នុង​រាជធានី​ភ្នំពេញ។

គម្រោង​អភិវឌ្ឍន៍​នេះ​នឹង​រួម​បញ្ចូល​តំបន់​ពាណិជ្ជកម្ម និង​ការ​កម្សាន្ត ប្រណីតភាព លំនៅឋាន សាលារៀន ធនាគារ មជ្ឈមណ្ឌល​វេជ្ជសាស្ត្រ និង​សេវាកម្ម​ជាច្រើន​ទៀត។

ក្រុមហ៊ុន OCIC បាន​ទទួល​គោលការណ៍​អនុញ្ញាត​ពី​រាជរដ្ឋាភិបាល​ក្នុង​ការ​អភិវឌ្ឍ​កោះនរា​នេះ​ដែល​មាន​ទីតាំង​ស្ថិត​ក្នុង​ខណ្ឌ​ច្បារអំពៅ រាជធានី​ភ្នំពេញ។ នេះ​បើ​យោង​តាមរយៈ​លិខិត​លេខ​១០៨៥ សជណ.កស ចុះ​ថ្ងៃទី​២៨ ខែ​តុលា ឆ្នាំ​២០១៨ របស់​ទីស្ដីការ​គណៈរដ្ឋមន្ត្រី។ ក្នុង​លិខិត​ដដែល​នោះ​បញ្ជាក់​ថា ក្រុមហ៊ុន OCIC នឹង​ស្ថាបនា​ស្ពាន​បេតុង​ខ្សែកាប​ចំនួន ១​ខ្សែ ដើម្បី​តភ្ជាប់​ទីក្រុង​កោះពេជ្រ​ទៅ​គម្រោង​អភិវឌ្ឍន៍​កោះនរា។

យោង​តាម​លិខិត​មួយ​ច្បាប់​របស់​លោក ឃួង ស្រេង អភិបាល​នៃ​គណៈ​អភិបាល​រាជធានី​ភ្នំពេញ​ផ្ញើ​ជូន​លោក អូន ព័ន្ធមុនីរ័ត្ន ឧបនាយករដ្ឋមន្ត្រី និង​ជា​រដ្ឋមន្ត្រី​ក្រសួង​សេដ្ឋកិច្ច និង​ហិរញ្ញវត្ថុ សម្ភារៈ និង​គ្រឿងចក្រ​សម្រាប់​ស្ថាបនា​ស្ពាន​ដែល​ក្រុមហ៊ុន OCIC ស្នើសុំ​នាំចូល​នេះ​មាន​តម្លៃ​សរុប ៤០​លាន ៨​សែន ៨​ម៉ឺន ៨​ពាន់ ៥៨០​ដុល្លារ​អាមេរិក (៤០ ៨៨៨ ៥៨០​ដុល្លារ) ដោយ​ពន្ធ​ជា​បន្ទុក​របស់​រដ្ឋ។

អគ្គនាយករង​នៃ​ក្រុមហ៊ុន OCIC លោក ទូច សំណាង បាន​ប្រាប់​សារព័ត៌មាន​ក្នុង​ស្រុក​កន្លងមក​ថា ស្ពាន​កោះនរា​ដែល​ភ្ជាប់​ទៅ​កាន់​ផ្លូវជាតិ​លេខ​១ ដាក់​ឱ្យ​ប្រើប្រាស់​នៅ​ដើម​ខែ​តុលា ឆ្នាំ​២០២២ នេះ ដើម្បី​សម្រួល​ដល់​ការ​ធ្វើ​ចរាចរ​ដ៏​មមាញឹក​នៅ​តាម​បណ្តោយ​ផ្លូវ​នេះ​ឆ្ពោះ​ទៅ​ទីក្រុង​ភ្នំពេញ។

ដោយឡែក​ស្ពាន​មួយ​ទៀត​តភ្ជាប់​ពី​កោះនរា​ឆ្ពោះ​ទៅ​កាន់​កោះពេជ្រ គ្រោង​នឹង​បញ្ចប់​នៅ​ខែ​តុលា ឆ្នាំ​២០២៣ ខាងមុខ។ លោក​រំពឹង​ថា ស្ពាន​នេះ​នឹង​ជួយ​សម្រួល​ដល់​ការ​ធ្វើ​ចរាចរ​របស់​ពលរដ្ឋ​តាម​បណ្តោយ​ផ្លូវជាតិ​លេខ​១ ឆ្ពោះ​ទៅ​កាន់​ក្រុង​ភ្នំពេញ។

ក្នុង​ឱកាស​អញ្ជើញ​បើក​ការដ្ឋាន​សាងសង់​ស្ពាន​បេតុង​ខ្សែកាប ១​ខ្សែ​ឆ្លងកាត់​ទន្លេបាសាក់ តភ្ជាប់​ពី​កោះពេជ្រ​ទៅ​គម្រោង​អភិវឌ្ឍន៍​កោះនរា នៅ​ថ្ងៃទី​២៦ ខែ​តុលា កន្លងមក លោក​នាយករដ្ឋមន្ត្រី ហ៊ុន សែន បាន​បញ្ជាក់​ថា ការ​បង្កើត​ឱ្យ​មាន​ស្ពាន​នេះ​ជា​សមិទ្ធផល​របស់​ជាតិ ដែល​បាន​រួម​ចំណែក​ដល់​ផលិតផល​ក្នុង​ស្រុក​សរុប​ប្រមាណ​ជា ២២៥​លាន​ដុល្លារ​ក្នុង​មួយ​ឆ្នាំ ដែល​ស្មើ​នឹង ០,៩% នៃ​ផលិតផល​ក្នុង​ស្រុក​សរុប​នា​ពេល​បច្ចុប្បន្ន។

លោក ហ៊ុន សែន បន្ត​ថា ការ​អភិវឌ្ឍ​តំបន់​នេះ គឺ​បាន​ធ្វើ​ឱ្យ​សំណង់​មាន​ការ​កើនឡើង ហើយ​បាន​បង្កើន​នូវ​ចំណូល​ពន្ធ និង​ពន្ធ​អចលនទ្រព្យ​ជា​រៀង​រាល់​ឆ្នាំ​តាមរយៈ​ការ​លក់ និង​ដោះដូរ​ផ្ទះ ដែល​ត្រូវការ​បង់​ពន្ធ​ប្រថាប់ត្រា និង​ពន្ធ​អចលនទ្រព្យ។

ក្រឡេក​មក​មើល​អ្នក​ឧកញ៉ា ពុង ឃាវសែ វិញ ថា​តើ​បាន​វិនិយោគ​លើ​វិស័យ​អ្វី​ខ្លះ?

អ្នក​ឧកញ៉ា ពុង ឃាវសែ រកស៊ី​ចំណេញ​ប្រាក់​ជាច្រើន​ក្នុង​ប្រទេស​កាណាដា មុន​ពេល​បង្កើត​ធនាគារ​កាណាឌីយ៉ា ដែល​ជា​ធនាគារ​ដំបូង​បំផុត​មួយ​ក្នុង​ចំណោម​ធនាគារ​ធំៗ​ជាច្រើន​ទៀត​នៅ​កម្ពុជា។

អ្នក​ឧកញ៉ា ពុង ឃាវសែ ក៏​មាន​ចំណាប់អារម្មណ៍​លើ​ការ​រកស៊ី​ខាង​ពាណិជ្ជកម្ម​ផង​ដែរ ហើយ​មាន​ទំនាក់ទំនង​យ៉ាង​ជិតស្និទ្ធ​ជាមួយ​លោក​នាយករដ្ឋមន្ត្រី ហ៊ុន សែន និង​លោកស្រី ប៊ុន រ៉ានី ហ៊ុន សែន។

បច្ចុប្បន្ន អ្នក​ឧកញ៉ា ពុង ឃាវសែ មាន​តួនាទី​សំខាន់ៗ​ជាច្រើន ដូចជា៖

  • ប្រធាន​ក្រុមប្រឹក្សាភិបាល និង​ជា​អគ្គនាយក​ធនាគារ​កាណាឌីយ៉ា
  • អគ្គនាយក​ក្រុមហ៊ុន​វិនិយោគទុន​អាណិកជន​កម្ពុជា (OCIC)
  • ប្រធាន​សមាគម​អ្នក​សាងសង់​កម្ពុជា
  • ប្រធាន​សមាគម​ធនាគារ​កម្ពុជា
  • ប្រធាន​សមាគម​ខ្មែរ-ចិន។

អ្នក​ឧកញ៉ា​រូប​នេះ​ក៏​មាន​ធនាគារ​ប្រៃសណីយ៍​កម្ពុជា ក្រុមហ៊ុន​ធានារ៉ាប់រង​អាយុជីវិត​សុវណ្ណភូមិ និង​ក្រុមហ៊ុន​ធានារ៉ាប់រង​ទូទៅ Cambodia-Vietnam Insurance Plc។ លោក​ក៏​បាន​វិនិយោគ​ទៅ​លើ​សួន​ឧស្សាហកម្ម​កាណាឌីយ៉ា ដែល​មាន​រោងចក្រ​កាត់ដេរ​សម្លៀកបំពាក់​ប្រមាណ​ជិត ៥០​រោងចក្រ បូក​រួម​ជាមួយ​នឹង​ផ្សារ ឃ្លាំង​ស្តុក​ទំនិញ​ជាច្រើន​ទៀត។

មិន​ទាន់​អស់​ត្រឹម​នេះ​ទេ អ្វី​ដែល​គួរ​ឲ្យ​កត់សម្គាល់​ជាង​នេះ​ទៅ​ទៀត​នោះ គឺ​អ្នក​ឧកញ៉ា ពុង ឃាវសែ បាន​បោះទុន​វិនិយោគ​រាប់​ពាន់​លាន​ដុល្លារ​អាមេរិក​ទៅ​លើ​គម្រោង​បុរី​លំនៅឋាន និង​អគារ​ពាណិជ្ជកម្ម​ធំៗ​ជាច្រើន​នៅ​ក្នុង​រាជធានី​ភ្នំពេញ ដូចជា៖

  • បុរី​ទន្លេបាសាក់
  • បុរី​ចម្ការមន
  • បុរី​វរជន
  • អូឡាំព្យាស៊ីធី នៅ​ជុំវិញ​ស្តាត​អូឡាំពិក
  • សាន់វ៉េ ស៊ីធី ទួលគោក
  • លំនៅឋាន​ជាច្រើន​នៅ​ជុំវិញ​ផ្សារ​ទំនើប​រតនា​ផ្លាហ្សា និង​ទល់​មុខ​ព្រលាន​យន្តហោះ​អន្តរជាតិ​ភ្នំពេញ
  • អគារ​ផ្សារ​ទំនើប​សូរិយា
  • អគារ​ផ្សារ​ទំនើប​សុវណ្ណា
  • អគារ​ខុនដូ និង​បុរី​លំនៅឋាន​នៅ​តាម​បណ្តា​ខេត្ត​មួយ​ចំនួន ដូចជា​សៀមរាប បាត់ដំបង និង​ខេត្ត​ព្រះសីហនុ និង​បណ្តា​ខេត្ត​ជាច្រើន​ផ្សេង​ទៀត។

អ្នក​ឧកញ៉ា​រូប​នេះ​បាន​សហការ​ចាប់​ដៃគូ​វិនិយោគ​ជាមួយ​ប្រទេស​មួយ​ចំនួន ដូចជា ថៃ វៀតណាម សិង្ហបុរី ម៉ាឡេស៊ី និង​ជាពិសេស​ចិន គឺជា​ប្រទេស​ដែល​លោក​បាន​វិនិយោគ​ច្រើន​ជាងគេ និង​ជិតដិត​ជាងគេ ដោយសារតែ​លោក​ឧកញ៉ា​អាច​និយាយ​ភាសា​ចិន​ដូច​គ្នា ចិន​មាន​ទុន​ច្រើន និង​មាន​ការ​គាំទ្រ​ពី​រដ្ឋាភិបាល។

លោក​ឧកញ៉ា ពុង ឃាវសែ បាន​បោះទុន​វិនិយោគ​រាប់​ពាន់​លាន​ដុល្លារ​អាមេរិក​ទៅ​លើ​គម្រោង​អភិវឌ្ឍន៍​ទីក្រុង​រណប​ចំនួន​បី​នៅ​ក្នុង​ទីក្រុង​ភ្នំពេញ៖

  1. ទី​១ ទីក្រុង​រណប​កោះពេជ្រ
  2. ទី​២ គឺ​ទីក្រុង​រណប​ជ្រោយចង្វារ ទីក្រុង​នៃ​អនាគត ក្រោម​ទុន​វិនិយោគ​ចំនួន ១៦០០​លាន​ដុល្លារ​អាមេរិក
  3. និង​ទី​បី ទីក្រុង​កោះនរា ដែល​ទុន​វិនិយោគ​ជាង ៥​ពាន់​លាន​ដុល្លារ។

ករណី​ការ​អភិវឌ្ឍន​នេះ បាន​ធ្វើ​ឱ្យ​តម្លៃ​ដី​នៅ​ក្នុង​តំបន់​នោះ​មាន​ការ​ហក់​ឡើង ដែល​ក្នុង​នោះ​ក្រុមហ៊ុន​អចលនទ្រព្យ CBRE បាន​រាយការណ៍​ពី​ការ​កើនឡើង​យ៉ាង​ឆាប់​រហ័ស​សម្រាប់​តម្លៃ​ដី​ក្នុង​មួយ​ម៉ែត្រ​ការ៉េ​នៅ​តាម​បណ្ដោយ​ផ្លូវជាតិ​លេខ​១។

ក្រុមហ៊ុន CBRE Cambodia បាន​ឱ្យ​ដឹង​ថា តម្លៃ​ដី​នៅ​ក្នុង​តំបន់​ច្បារអំពៅ​តាម​បណ្ដោយ​ផ្លូវជាតិ បាន​ហក់​ឡើង​ខ្ពស់​ជា​មធ្យម​ប្រមាណ​ជាង ២​ពាន់​ដុល្លារ​ក្នុង​មួយ​ម៉ែត្រ​ការ៉េ ខណៈ​អំឡុង​ឆ្នាំ​២០១៨ មាន​តម្លៃ​ប្រមាណ ១២០០​ដុល្លារ​ក្នុង​មួយ​ម៉ែត្រ​ការ៉េ។ ការ​កើនឡើង​នៃ​តម្លៃ​នេះ គឺ​ចាប់ផ្ដើម​នៅ​ក្នុង​ឆ្នាំ​ដែល​ក្រុមហ៊ុន OCIC ត្រូវ​បាន​រដ្ឋាភិបាល​ផ្ដល់​សម្បទាន​ជា​លើកដំបូង ដើម្បី​ធ្វើ​សកម្មភាព​ចាក់​ដី​បំពេញ​ទន្លេ។

នៅ​លើ​គេហទំព័រ B.I.C. Development ដែល​ជា​ក្រុមហ៊ុន​បុត្រ​សម្ព័ន្ធ​មួយ រូបភាព​ផែនការ​មេ​ក៏​បាន​បង្ហាញ​ពី​ដំណាក់កាល​នៃ​ការ​សាងសង់​ដែល​ដាក់​ស្លាក​ថា «Yim Family Land» បាន​បង្ហាញ​ថា ទីតាំង​នេះ​កាន់កាប់​ដោយ​លោក យឹម លក្ខណ៍ ដែល​ត្រូវ​បាន​ស្គាល់​ថា​ជា​កូនប្រុស​ពៅ​របស់​លោក​ឧបនាយករដ្ឋមន្ត្រី យឹម ឆៃលី។ ក្រុមហ៊ុន​នេះ​សន្យា​ថា​នឹង​អភិវឌ្ឍ​លើ​ផ្ទៃដី​ទំហំ ៦១​ហិកតារ​សម្រាប់​ទីក្រុង​រណប​ខ្នាត​តូច ដែល​មាន​លំនៅឋាន ទីតាំង​ពាណិជ្ជកម្ម និង​សួនច្បារ ដែល​គេ​ស្គាល់​ថា​ជា One Phnom Penh។

លោក យឹម លក្ខណ៍ គឺជា​អ្នកជំនួញ​ដ៏​ធំ​មួយ​របស់​កម្ពុជា តាមរយៈ​ជា​ប្រធាន​ក្រុមប្រឹក្សាភិបាល​ក្រុមហ៊ុន BIC គ្រុប ដែល​មាន​ក្រុមហ៊ុន​បុត្រ​សម្ព័ន្ធ​ជាច្រើន ដូចជា៖

  • ធនាគារ B.I.C Bank
  • B.I.C Markets
  • B.I.C Insurance
  • គម្រោង​បឹងស្នោរ «Yim Family Land»
  • ក្រុមហ៊ុន Paradise Investment Co., Ltd.,
  • ក្រុមហ៊ុន Kampot Foods និង SEA Fintech។

ជាមួយ​គ្នា​នេះ ភរិយា​របស់​លោក គឺ​លោកស្រី យឹម វិតសានី ជា​អ្នកជំនួញ​ជនជាតិ​ថៃ ដែល​មាន​ក្រុមហ៊ុន​ក្នុង​ដៃ​ច្រើន​ផង​ដែរ​នៅ​ក្នុង​ប្រទេស​ថៃ។

គម្រោង​អភិវឌ្ឍន៍​កោះនរា​បាន​ផ្តល់​ផល​ប្រយោជន៍​យ៉ាង​ច្រើន​ដល់​សាធារណៈ និង​សេដ្ឋកិច្ច​ជាតិ ដោយ​មាន​ស្ពាន​ឆ្លងកាត់​ងាយស្រួល​នោះ ពលរដ្ឋ​ទូទៅ​កំពុង​តែ​មាន​មន្ទិល​សង្ស័យ​ថា តើ​ទៅ​ថ្ងៃ​អនាគត ពលរដ្ឋ​អាច​នឹង​ធ្វើ​ដំណើរ​កាត់​តំបន់​អភិវឌ្ឍន៍​កោះ​នេះ​បាន​ដែរ​ឬ​យ៉ាង​ណា​នៅ​ពេល​ដែល​ស្ពាន​សាងសង់​រួច និង​អគារ​ទីក្រុង​នេះ​ប្រកាស​លក់។

ពលរដ្ឋ​ម្នាក់​ដែល​រស់នៅ​ក្នុង​ខណ្ឌ​ច្បារអំពៅ ហើយ​ផ្ទះ​របស់​លោក​ត្រូវ​បាន​គេ​ចរចា​ទិញ​ជាច្រើន​លើក បាន​ថ្លែង​ដោយ​ពុំ​បញ្ចេញ​ឈ្មោះ​ថា សព្វថ្ងៃ​នេះ​ពលរដ្ឋ​មាន​ភាព​ងាយស្រួល​ច្រើន​បន្ទាប់ពី​សាលាក្រុង​បាន​ដាក់​សាឡាង​ឱ្យ​ពលរដ្ឋ​ឆ្លងកាត់​តាម​គម្រោង​អភិវឌ្ឍន៍​កោះនរា ហើយ​ការ​អភិវឌ្ឍ​កោះ​នេះ​ក៏​បាន​ធ្វើ​ឲ្យ​តម្លៃ​ដី​ឡើង​ថ្លៃ​ខ្ពស់​ផង​ដែរ។

លោក​ថា ពលរដ្ឋ​មួយ​ចំនួន​ធំ​បាន​លក់​ដី​ឲ្យ​ឈ្មួញ​ដោយសារ​គេ​ខ្លាច​មាន​បញ្ហា​ដូច​ការ​អភិវឌ្ឍ​កោះពេជ្រ​លើកដំបូង។

លោក​បន្ត​ថា ការ​ធ្វើ​ដំណើរ​តាម​សាឡាង​បាន​កាត់បន្ថយ​ការ​កកស្ទះ​បាន​មួយ​កម្រិត ប៉ុន្តែ​លោក​កំពុងតែ​សង្ស័យ​ថា តើ​ទៅ​ថ្ងៃ​អនាគត ពលរដ្ឋ​អាច​នឹង​ប្រើប្រាស់​ផ្លូវ​នោះ​បាន​ឬ​អត់ ពីព្រោះ​នេះ​ជា​ទីក្រុង​រណប​របស់​គ្រួសារ​អ្នក​មាន​អំណាច ឧកញ៉ា និង​មហាសេដ្ឋី។

បុរស​ដដែល​បាន​លើកឡើង​ថា លោក​មាន​បទពិសោធន៍​មួយ គឺ​បុរី​វិមាន​ចម្ការមន ដែល​អាច​កាត់បន្ថយ​កកស្ទះ​បាន​នៅ​ខាង​មុខ​ក្រសួង​មហាផ្ទៃ ប៉ុន្តែ​បុរី​នោះ​មិន​បាន​អនុញ្ញាត​ឱ្យ​សាធារណជន​ទូទៅ​ប្រើប្រាស់​នោះ​ទេ ក្រៅតែ​ពី​អ្នក​ដែល​មាន​ផ្ទះ​នៅ​ក្នុង​បុរី​នោះ។

លោក​បាន​ថ្លែង​ឲ្យ​ដឹង​បន្ត​ទៀត​ថា ដោយសារតែ​បទពិសោធន៍​នេះ លោក​គ្មាន​ជំនឿ​ចិត្ត​ថា​នឹង​បាន​ប្រើប្រាស់​ស្ពាន​នេះ​ទេ។ ការ​កសាង​ស្ពាន​នេះ គឺ​សម្រាប់​តែ​គម្រោង​អភិវឌ្ឍន៍​កោះនរា​ប៉ុណ្ណោះ ដូច្នេះ​ទៅ​ថ្ងៃ​អនាគត លុះត្រាតែ​អ្នក​រស់នៅ​ក្នុង​តំបន់​នោះ ទើប​អាច​ប្រើប្រាស់​បាន។ លោក​ថា​គេ​ប្រើ​ដៃ​រដ្ឋ​ដើម្បី​ធ្វើ​ស្ពាន​ចម្លង​ពួកគេ​ពី​កោះពេជ្រ​មក​កោះនរា​តែប៉ុណ្ណោះ ដូច្នេះ​មាន​ន័យ​ថា​ពួកគេ​បាន​ប្រព្រឹត្ត​អំពើពុករលួយ​ជា​ប្រព័ន្ធ។

ពលរដ្ឋ​ម្នាក់​ទៀត​ដែល​ស្នើសុំ​មិន​បញ្ចេញ​ឈ្មោះ បាន​អះអាង​ថា ការ​សាងសង់​ស្ពាន​នេះ​គឺជា​ល្បិច​របស់​គ្រួសារ​ត្រកូល «ហ៊ុន» ដើម្បី​យក​លេស​អភិវឌ្ឍ​ធ្វើ​ស្ពាន​ឲ្យ​ពលរដ្ឋ​ឆ្លងកាត់​ដើម្បី​កាត់បន្ថយ​ការ​កកស្ទះ​ចរាចរណ៍ តែ​ធាតុ​ពិត គឺ​គេ​បូម​ខ្សាច់​ពង្រីក​កោះ​ដើម្បី​លក់​ដី​ឱ្យ​បរទេស​តែប៉ុណ្ណោះ។

លោក​បាន​ថ្លែង​ឲ្យ​ដឹង​បន្ត​ទៀត​ថា មាន​តែ​ស្រុក​ខ្មែរ​ទេ​ដែល​មាន​ទន្លេ​បឹងបួ​ស្អាត បែរ​ជា​មិន​នាំគ្នា​ថែរក្សា មាន​តែ​ចាក់​ដី​លុប​ទៅវិញ។ លោក​ថា​នៅ​សម័យ​អង្គរ ដូនតា​ជីក​ប្រឡាយ​ដើម្បី​មាន​ទឹក​ការពារ​នគរ តែ​សម័យ​នេះ​បូម​ខ្សាច់​ពង្រួម​ទន្លេ ដើម្បី​បាន​លុយ​សម្រាប់​គ្រួសារ​របស់​ពួកគេ​ដោយ​ពុំ​បាន​គិត​អំពី​ការ​ប៉ះពាល់​មច្ឆជាតិ និង​ផល​ប៉ះពាល់​បរិស្ថាន​នោះ​ទេ។ លោក​ថា បន្តិច​ទៀត​ទន្លេ​នេះ​នឹង​រួម​កាន់តែ​តូច​ទៅៗ។

យោង​តាម​ការ​បង្ហោះ​កាលពី​ខែ​ធ្នូ ឆ្នាំ​២០២០ នៅ​លើ​គេហទំព័រ​របស់​សមាគម​អ្នក​សាងសង់​កម្ពុជា (CCA) បាន​ឱ្យ​ដឹង​ថា គម្រោង​នេះ​នឹង​ត្រូវ​ការ​ចាក់​បំពេញ​ដី​ប្រមាណ​ជា ៦០​លាន​ម៉ែត្រគូប​បន្ថែម​ទៀត ដើម្បី​បញ្ចប់​កិច្ច​ការងារ​នេះ​ទាំងស្រុង​លើ​ផ្ទៃដី ១២៥​ហិកតារ។

តាម​ការ​វាស់វែង​លើ​ផែនទី​ផ្កាយរណប ផ្ទៃដី​កោះនរា​មាន​ទទឹង​ប្រមាណ​ជា ៤២០​ម៉ែត្រ។ ការ​ចាក់​បំពេញ​ដី​ក្នុង​ទន្លេ​ក៏​បាន​បង្រួម​ច្រក​សំខាន់​នៃ​ទន្លេមេគង្គ​ប្រមាណ​ជា​មួយ​ភាគ​បី (១/៣) ក្នុង​ចំណុច​នោះ​ផង​ដែរ ហើយ​នឹង​កាន់តែ​រួម​តូច​បន្ថែម​ទៀត​នា​ពេល​អនាគត ដោយសារតែ​ការ​ចាក់​បំពេញ​ច្រាំងទន្លេ​ក្នុង​តំបន់​ដែល​លោក​ឧកញ៉ា ឃុន សៀ កំពុង​ត្រៀម​ទុក​សម្រាប់​ការ​អភិវឌ្ឍ​គម្រោង​ទីក្រុង​រណប​ដាច់ដោយឡែក​មួយ​ទៀត​ពី​កោះនរា​ទៅ​អរិយក្សត្រ លើ​ផ្ទៃដី​ទំហំ ៧០​ហិកតារ ដែល​ត្រូវ​បាន​អភិវឌ្ឍ​ដោយ​ក្រុមហ៊ុន ឃុន សៀ អាហរ័ណ​នីហរ័ណ។

អ្នកជំនាញ​ផ្នែក​ជលសាស្ត្រ​មួយ​រូប​របស់​ក្រុមហ៊ុន​ប្រឹក្សា Green Enivro-Sult Cambodia (GESC) លោក មាស សុធា ធ្លាប់​បាន​លើកឡើង​ប្រាប់​សារព័ត៌មាន​ក្នុង​ស្រុក​ថា ការ​ចាក់​បំពេញ​កោះនរា​តែ​មួយ​អាច​នឹង​បង្កើន​ល្បឿន​លំហូរ​ទឹកទន្លេ​រហូត​ដល់​ទៅ ២០​ភាគរយ ដែល​ធ្វើ​ឱ្យ​ហានិភ័យ​នៃ​ទឹកជំនន់ និង​ការ​បាក់​ច្រាំងទន្លេ​កាន់តែ​កើនឡើង។

កាលពី​ឆ្នាំ​២០១៩ ក្រុមហ៊ុន​ខាងលើ​បាន​សហការ​ជាមួយ​ក្រសួង​ធនធាន​ទឹក និង​ឧតុនិយម ដើម្បី​ធ្វើការ​សិក្សា​ពី​គំរូ​លំហូរ​ទន្លេមេគង្គ ដើម្បី​ពិនិត្យ​មើល​ថា​តើ​ការ​ចាក់​បំពេញ​កោះនរា​នេះ​អាច​ធ្វើ​ឱ្យ​មាន​ការ​ផ្លាស់ប្ដូរ​របស់​ទន្លេ​យ៉ាង​ដូចម្ដេច​ខ្លះ។ ការ​សិក្សា​នោះ​បាន​ប្រើប្រាស់​ទិន្នន័យ​ប្រវត្តិសាស្ត្រ​ជាច្រើន ដើម្បី​បង្កើត​គំរូ​លំហូរ​ដែល​អាច​ប៉ាន់ប្រមាណ​កម្រិត​ទឹក​នា​ពេល​អនាគត និង​ហានិភ័យ​ទឹកជំនន់​ដែល​បង្ក​ឡើង​ដោយសារ​ការ​សាងសង់​ថ្មី។

លោក មាស សុធា បាន​បន្ថែម​ថា អាទិភាព​ចម្បង​នៃ​ការ​ស្រាវជ្រាវ​នេះ គឺ​ដើម្បី​ផ្ដល់​អនុសាសន៍​នានា​ក្នុង​ការ​សាងសង់​កោះ​ថ្មី​ដែល​មាន​ផល​ប៉ះពាល់​លើ​ទន្លេមេគង្គ និង​ទន្លេបាសាក់។

ក្រុមហ៊ុន GESC និង​ភាគី​ពាក់ព័ន្ធ​នានា​របស់​ក្រសួង បាន​ផ្ដល់​ជា​យោបល់​ជាច្រើន​អំពី​របៀប​ដែល​អាច​ធ្វើ​ទៅ​បាន រួម​ទាំង​ការ​រក្សា​ទុក​ប្រឡាយ​ដែល​បែងចែក​កោះនរា​ពី​តំបន់​ច្បារអំពៅ ណែនាំ​ឱ្យ​ក្រុមហ៊ុន OCIC ប្រើប្រាស់​ការ​បូម​ខ្សាច់​នៅ​បាតទន្លេ ដើម្បី​កាត់បន្ថយ​ល្បឿន​នៃ​លំហូរ និង​ស្នើ​ឱ្យ​អ្នក​អភិវឌ្ឍន៍​ថែទាំ​ច្រាំងទន្លេ​ទាំង​សងខាង​ក្នុង​ប្រវែង ៥​គីឡូម៉ែត្រ ដើម្បី​ការពារ​តំបន់​ដែល​មាន​ហានិភ័យ​បំផុត​ផង​ដែរ។

កន្លងមក គណបក្ស​ប្រជាធិបតេយ្យ​មូលដ្ឋាន (GDP) ធ្លាប់​បាន​ដាក់​លិខិត​ស្នើសុំ​ឲ្យ​រដ្ឋសភា​ឯក​បក្ស កោះ​ហៅ​រដ្ឋាភិបាល​មក​សួរនាំ​អំពី​ការ​ផ្តល់​សិទ្ធិ​ឲ្យ​ក្រុមហ៊ុន អូ.ស៊ី.អាយ.ស៊ី លុប​ទន្លេមេគង្គ​ក្រោម ទំហំ​ជាង ១០០​ហិកតារ សម្រាប់​បង្កើត​ជា​ទីក្រុង​រណប​ថ្មី​មួយ​ទៀត​ស្ថិត​នៅ​ក្បែរ​ទីក្រុង​កោះពេជ្រ។

ការ​ដាក់​លិខិត​នេះ ដោយ​សង្កេត​ឃើញ​ថា​ការ​លុប​ទន្លេមេគង្គ​ក្រោម ដោយ​ក្រុមហ៊ុន អូ.ស៊ី.អាយ.ស៊ី ដើម្បី​យក​ដី​អភិវឌ្ឍ​នេះ គឺជា​ការ​បម្រើ​ផល​ប្រយោជន៍​ឯកជន​សុទ្ធសាធ ដែល​ផ្ទុយ​នឹង​ច្បាប់។ គណបក្ស​មួយ​នេះ​ព្រួយបារម្ភ​ថា ការ​លុប​ផ្ទៃ​ទឹកទន្លេ​មេគង្គ​ធំធេង​នេះ នឹង​អាច​បង្ក​ផល​ប៉ះពាល់​ធ្ងន់ធ្ងរ​ដល់​បរិស្ថាន ជាពិសេស​ការ​រារាំង​ផ្លូវ​មច្ឆជាតិ បង្ក​ទឹកជំនន់ និង​ការ​បាក់​ច្រាំងទន្លេ​នា​ពេល​អនាគត៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស