លោក ហ៊ុន សែន សម្រេចកាត់ឆ្វៀលដីចេញពីគម្របព្រៃឈើឆ្នាំ២០០២ និងដីសម្បទានសង្គមកិច្ចស្ថិតក្នុងខេត្តព្រះសីហនុ សរុបជាង ៥ហិកតារឱ្យទៅរដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា លោក ចម ប្រសិទ្ធ ធ្វើជាកម្មសិទ្ធិ។
លោក ហ៊ុន សែន បានចេញអនុក្រឹត្យកាលពីថ្ងៃទី២៩ ខែមិថុនា ឆ្នាំ២០២២ ដែលផ្សព្វផ្សាយនៅថ្ងៃទី២ ខែមករា នេះ បានសម្រេចកាត់ដីទំហំជាង ៥ហិកតារ ស្ថិតនៅភូមិ១ ឃុំទំនប់រលក ស្រុកស្ទឹងហាវ ខេត្តព្រះសីហនុ ឱ្យទៅជាកម្មសិទ្ធិស្របច្បាប់របស់រដ្ឋមន្ត្រីក្រសួងឧស្សាហកម្ម លោក ចម ប្រសិទ្ធ និងភរិយា អ្នកស្រី ទេព បុប្ផា ប្រសិទ្ធ ធ្វើជាកម្មសិទ្ធិ ក្នុងនោះដីទំហំជាង ៤ហិកតារកាត់ចេញពីទីតាំងដីសម្បទានសង្គមកិច្ច និងដីទំហំជាង ៨០អា បានកាត់ចេញពីដែនគម្របព្រៃឈើឆ្នាំ២០០២ ដោយធ្វើអនុបយោគជាដីឯកជនរបស់រដ្ឋ។
មេដឹកនាំប្រទេសកម្ពុជាដែលកំពុងដឹកនាំប្រទេសតាមបែបគ្រួសារនិយម លោក ហ៊ុន សែន បញ្ជាក់ថា ការសម្រេចកាត់ឆ្វៀលដីចេញពីគម្របព្រៃឈើឆ្នាំ២០០២ និងដីសម្បទានសង្គមកិច្ចសរុបជាង ៥ហិកតារនេះ ធ្វើឡើងតាមសំណើរបស់រដ្ឋមន្ត្រីក្រសួងដែនដី នគរូបនីយកម្ម និងសំណង់ លោក ជា សុផារ៉ា ហើយអភិបាលខេត្តព្រះសីហនុ និងក្រសួងពាក់ព័ន្ធ ដូចជាក្រសួងកសិកម្ម ក្រសួងមហាផ្ទៃ និងក្រសួងសេដ្ឋកិច្ច និងហិរញ្ញវត្ថុ ជាដើម ត្រូវអនុវត្តអនុក្រឹត្យនេះឱ្យមានប្រសិទ្ធភាពខ្ពស់។
ការកាត់ឆ្វៀលដីរដ្ឋ និងដីសម្បទានសង្គមកិច្ចឱ្យទៅជាកម្មសិទ្ធិឯកជនក្រោមការដឹកនាំរបស់មេដឹកនាំបក្សកាន់អំណាច លោក ហ៊ុន សែន បែបនេះ ត្រូវគេរិះគន់យ៉ាងធ្ងន់ធ្ងរ ខណៈបុរសខ្លាំងកម្ពុជារូបនេះកំពុងតែអនុវត្តយ៉ាងអនាធិបតេយ្យទូទាំងប្រទេសសព្វថ្ងៃនេះ។
ជុំវិញការកាត់ឆ្វៀលដីចេញពីគម្របព្រៃឈើឆ្នាំ២០០២ ដែលស្ថិតក្នុងខេត្តព្រះសីហនុ នេះ ឧកញ៉ាជាច្រើនដែលជិតស្និទ្ធនឹងលោកនាយករដ្ឋមន្ត្រី ហ៊ុន សែន រួមទាំងសាច់ញាតិ និងកូនបង្កើតរបស់គាត់ផង បានទទួលដីជាច្រើនរយហិកតារធ្វើជាកម្មសិទ្ធិ ដូចជាឧកញ៉ា ពុង ឃាវសែ ទទួលបានដីជាង ១០ហិកតារកាលពីថ្ងៃទី៣១ ខែធ្នូ ឆ្នាំ២០២១ ឧកញ៉ា សេង ញ៉ក និងជំទាវ លី អាផណ ដែលត្រូវជាសាច់ញាតិរបស់ឧកញ៉ា លី យ៉ុងផាត់ ទទួលបានដីជាង ៦០០ហិកតារកាលពីថ្ងៃទី៩ ខែមិថុនា ឆ្នាំ២០២០ ធ្វើជាកម្មសិទ្ធិ។
លើសពីនេះទៀត អ្នកស្រី ហ៊ុន ម៉ាណា និងអ្នកស្រី ហ៊ុន ម៉ាលី ដែលត្រូវជាកូនស្រីបង្កើតរបស់លោកនាយករដ្ឋមន្ត្រី ហ៊ុន សែន បានទទួលដីពីដែនគម្របព្រៃឈើឆ្នាំ២០០២ នេះទំហំជាង ៤០ហិកតារកាលពីអំឡុងខែកក្កដា ឆ្នាំ២០២០ ផងដែរ។
ទាក់ទិននឹងបញ្ហានេះ កាលពីឆ្នាំ២០១៧ លោក ហ៊ុន សែន បានបញ្ជាឲ្យមន្ត្រីអាជ្ញាធរខេត្តព្រះសីហនុ ត្រូវនាំគ្នាថែរក្សាការពារតំបន់គម្របព្រៃឈើឆ្នាំ២០០២ ក្នុងខេត្តនេះឲ្យបានគង់វង្ស ជៀសវាងការកាប់បំផ្លាញពីជនខិលខូច និងការរំលោភទន្ទ្រានពីក្រុមហ៊ុនឯកជននានា ដើម្បីទុកបម្រើវិស័យទេសចរណ៍ដែលចូលមកក្នុងខេត្តនេះ។
ប៉ុន្តែអ្នកដែលបំផ្លាញតំបន់គម្របព្រៃឈើឆ្នាំ២០០២ នេះ ត្រូវគេមើលឃើញថាគឺជាលោក ហ៊ុន សែន ខ្លួនឯងទៅវិញ។
កាលពីថ្ងៃទី៣០ ខែវិច្ឆិកា ឆ្នាំ២០២២ លោក ហ៊ុន សែន ចុះហត្ថលេខាលើអនុក្រឹត្យមួយដោយកំណត់ដីសាធារណៈរបស់រដ្ឋជិត ១លានហិកតារនៅក្នុងតំបន់ការពារធម្មជាតិក្នុងខេត្តចំនួន១៥ រួមមានខេត្តត្បូងឃ្មុំ ក្រចេះ មណ្ឌលគិរី រតនគិរី ស្ទឹងត្រែង កំពង់ធំ និងខេត្តតាកែវ ជាដើម ដើម្បីត្រៀមធ្វើអនុបយោគ និងបែងចែកសម្រាប់កម្មសិទ្ធិឯកជនឱ្យទៅក្រុមហ៊ុនឯកជននានាដើម្បីធ្វើការអភិវឌ្ឍ។
នាយិកាមជ្ឈមណ្ឌលសិទ្ធិមនុស្សកម្ពុជា អ្នកស្រី ចក់ សុភាព ធ្លាប់បានលើកឡើងកាលពីពេលកន្លងទៅថា អាជ្ញាធរត្រូវពន្យល់ និងផ្សព្វផ្សាយឱ្យបានច្បាស់លាស់ពីការកាត់ដីគម្របព្រៃឈើ និងការធ្វើអនុបយោគតំបន់ផ្សេងៗទៀតកន្លងមក ដើម្បីឱ្យមានតម្លាភាពក្នុងកិច្ចការរបស់ខ្លួន។
ទាក់ទិននឹងបញ្ហានេះ លោក អូត ឡាទីន មន្ត្រីសម្របសម្រួលសហគមន៍នៃសមាគមបណ្ដាញយុវជនកម្ពុជា (CYN) អះអាងកាលពីពេលថ្មីៗនេះថា ការកែសម្រួលព្រំប្រទល់តំបន់ការពារធម្មជាតិនេះ នឹងធ្វើឲ្យដីព្រៃតំបន់ការពារធម្មជាតិនៅក្នុងប្រទេសកម្ពុជាកាន់តែរួញតូចទៅៗ ហើយយន្តការនេះមិនឆ្លុះបញ្ចាំងពីការបង្ហាញអំពីដំណោះស្រាយនៃវិបត្តិព្រៃឈើនោះឡើយ ខណៈអ្នកដែលទទួលបានផលប្រយោជន៍ធំអាចជាក្រុមអ្នកមានអំណាច និងក្រុមអ្នកមានធនធានច្រើនប៉ុណ្ណោះ។
ចំណែកមន្ត្រីអង្គការឃ្លាំមើលការអភិវឌ្ឍសង្គមចំនួន ២ស្ថាប័ន រួមមានអង្គការ LICADHO និងអង្គការស្រាវជ្រាវជាតិកម្ពុជា ឬហៅកាត់ ស៊ីអិនរ៉ូ ប្រចាំខេត្តព្រះសីហនុ ធ្លាប់បានបង្ហាញកង្វល់កាលពីពេលកន្លងទៅថា សព្វថ្ងៃនេះដីគម្របព្រៃឈើឆ្នាំ២០០២ ដែលរដ្ឋាភិបាលបានរក្សាទុកកំពុងរងការបំផ្លាញ និងពុះច្រៀកធ្វើកម្មសិទ្ធិឯកជនឱ្យទៅអ្នកមានទ្រព្យធន និងអ្នកមានអំណាចក្នុងជួររដ្ឋាភិបាលប្រទេសកម្ពុជាព្រោងព្រាត៕