 ចាត់ទុកការផ្សព្វផ្សាយរបស់ក្រសួងព័ត៌មានដែលថាគណបក្សភ្លើងទៀនបានឯកភាពនូវវិធានការច្បាប់ជុំវិញការចាប់ខ្លួនលោក ថាច់ សេដ្ឋា ថាជារឿងបំផ្លើស។){kind=link}
ប្រធានមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) ចាត់ទុកការផ្សព្វផ្សាយរបស់ក្រសួងព័ត៌មានដែលថាគណបក្សភ្លើងទៀនបានឯកភាពនូវវិធានការច្បាប់ជុំវិញការចាប់ខ្លួនលោក ថាច់ សេដ្ឋា ថាជារឿងបំផ្លើស។
លោកបន្ថែមថា ទង្វើបែបនេះគឺជាការរំលោភលើកាតព្វកិច្ចរបស់ខ្លួនយ៉ាងធ្ងន់ធ្ងរដែលតម្រូវដោយច្បាប់ ក្នុងការបម្រើប្រជាពលរដ្ឋក្នុងនាមស្ថាប័នជាតិ។
ប្រធានមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) លោក ប៉ា ងួនទៀង ប្រាប់សារព័ត៌មាន The Cambodia Daily នៅថ្ងៃទី១៨ មករា នេះថា ការផ្សព្វផ្សាយរបស់ក្រសួងព័ត៌មាននូវរឿងមិនត្រឹមត្រូវបែបនេះ មិនត្រឹមតែលើកទឹកចិត្តឱ្យអង្គភាពសារព័ត៌មានក្នុងស្រុកមួយចំនួនផ្សព្វផ្សាយនូវព័ត៌មានក្លែងក្លាយទេ ថែមទាំងជាគំរូអាក្រក់យ៉ាងធ្ងន់ធ្ងរក្នុងសង្គមថែមទៀត។
លោក ប៉ា ងួនទៀង លើកឡើងថា ក្រសួងព័ត៌មានគឺជាស្ថាប័នរដ្ឋដែលមានតួនាទី និងភារកិច្ចផ្សព្វផ្សាយនូវព័ត៌មានត្រឹមត្រូវ និងឯករាជ្យ ដើម្បីលើកកម្ពស់ការផ្សព្វផ្សាយសារព័ត៌មានទៅកាន់ប្រជាពលរដ្ឋឱ្យកាន់តែមានភាពសុក្រឹត និងពិតប្រាកដ ដែលកិច្ចការទាំងអស់នេះ គឺជាតួនាទីស្នូល និងចាំបាច់បំផុតរបស់ខ្លួនដែលត្រូវផ្តល់ជូនប្រជាពលរដ្ឋគ្រប់រូប និងគ្រប់មជ្ឈដ្ឋាន។
ប្រធានមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យរូបនេះបញ្ជាក់ថា មកដល់ពេលនេះ លោកមិនទាន់ឃើញជំហររបស់គណបក្សភ្លើងទៀនឯកភាពទៅនឹងការចាប់ខ្លួនលោក ថាច់ សេដ្ឋា នៅឡើយទេ គឺមានតែការទាមទារឱ្យដោះលែងអនុប្រធានរបស់ខ្លួនឱ្យមានសេរីភាពពេញលេញឡើងវិញប៉ុណ្ណោះ ដូច្នេះការផ្សព្វផ្សាយរបស់ក្រសួងព័ត៌មានលើករណីនេះ គឺជារឿងភូតភរកុហកសាធារណជនទាំងស្រុង។
ការអះអាងនេះ ធ្វើឡើងបន្ទាប់ពីក្រសួងព័ត៌មានបានផ្សព្វផ្សាយថា គណបក្សភ្លើងទៀនបានឯកភាពទៅនឹងនីតិវិធីរបស់សមត្ថកិច្ចក្នុងការចាប់ខ្លួនលោក ថាច់ សេដ្ឋា កាលពីពេលថ្មីៗនេះ។
កាលពីថ្ងៃទី១៧ ខែមករា ឆ្នាំ២០២៣ ក្រសួងព័ត៌មានបានបង្ហោះសេចក្តីថ្លែងការណ៍របស់គណបក្សភ្លើងទៀនភ្ជាប់ជាមួយរូបថតលោក ថាច់ សេដ្ឋា ដែលត្រូវសមត្ថកិច្ចចាប់ខ្លួន ដោយសរសេរថា គណបក្សភ្លើងទៀនបានប្រកាសថា ការឃុំខ្លួន និងចាប់ខ្លួនលោក ថាច់ សេដ្ឋា គឺជារឿងត្រឹមត្រូវតាមនីតិវិធីច្បាប់នៅកម្ពុជា មិនពាក់ព័ន្ធនឹងរឿងនយោបាយនោះទេ។
យ៉ាងណាក៏ដោយ សេចក្ដីថ្លែងការណ៍របស់គណបក្សភ្លើងទៀនដែលចេញផ្សាយកាលពីថ្ងៃទី១៦ ខែមករា ឆ្នាំ២០២៣ មានខ្លឹមសារផ្ទុយស្រឡះពីការអះអាងរបស់ក្រសួងព័ត៌មានទាំងស្រុង ដោយចាត់ទុកសកម្មភាពនៃការចាប់ខ្លួនអនុប្រធានបក្សនេះ ថាបានជះឥទ្ធិពលដ៏អាក្រក់ដល់បរិយាកាសនយោបាយមុនការបោះឆ្នោតជ្រើសតាំងតំណាងរាស្ត្រនៅថ្ងៃទី២៣ ខែកក្កដា ឆ្នាំ២០២៣ ខាងមុខនេះ។ លើសពីនេះ គណបក្សភ្លើងទៀនព្រមានថា ខ្លួននឹងពិចារណាឡើងវិញអំពីលទ្ធភាពនៃការចូលរួមក្នុងការបោះឆ្នោតជាតិខាងមុខ ប្រសិនបើសកម្មភាពគំរាមកំហែងនៅតែបន្តកើតមានលើខ្លួនបន្តទៀតនោះ។
នាយកមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) លោក មឿន តុលា លើកឡើងលើគណនីហ្វេសប៊ុករបស់លោកនៅថ្ងៃទី១៨ មករា នេះថា ដល់ពេលដែលស្ថាប័នរដ្ឋផ្សព្វផ្សាយព័ត៌មានក្លែងក្លាយហើយ។ លោក មឿន តុលា សួរថា តើប្រជាពលរដ្ឋគួរនាំគ្នាប្រយុទ្ធប្រឆាំងនឹងព័ត៌មានក្លែងក្លាយដោយរបៀបណា?
យ៉ាងណាក៏ដោយ ក្រសួងព័ត៌មានបានលុបនូវការផ្សព្វផ្សាយរបស់ខ្លួនភ្លាមៗក្រោយពីបង្ហោះលើបណ្ដាញសង្គមហ្វេសប៊ុកបានប៉ុន្មានម៉ោងក្រោយមក ស្របពេលដែលមានការប្រតិកម្មពីមជ្ឈដ្ឋាននានាជាបន្តបន្ទាប់។
ទាក់ទិននឹងការផ្សព្វផ្សាយរបស់ក្រសួងព័ត៌មាននេះ មានអ្នកលេងបណ្ដាញសង្គមហ្វេសប៊ុកខ្លះលើកឡើងថា ទំនងជាក្រសួងព័ត៌មានបង្ហោះដោយការភាន់ច្រឡំប៉ុណ្ណោះ ប៉ុន្តែមន្ត្រីសង្គមស៊ីវិលដែលទទួលបន្ទុកសិទ្ធិមនុស្ស លោក មឿន តុលា តបថា បើពលរដ្ឋច្រឡំប្រហែលជាគេចមិនផុតពីជាប់ឃុំទេមើលទៅ។
ទាក់ទិននឹងបញ្ហានេះ អង្គការអ្នកសារព័ត៌មានគ្មានព្រំដែន បានចេញផ្សាយរបាយការណ៍របស់ខ្លួនស្ដីពីសន្ទស្សន៍សេរីភាពសារព័ត៌មានពិភពលោកសម្រាប់ឆ្នាំ២០២២ ថា សេរីភាពសារព័ត៌មាននៅកម្ពុជានៅតែមិនអាចងើបចេញពីចំណាត់ថ្នាក់មិនល្អដដែល គឺទទួលបានចំណាត់ថ្នាក់លេខ១៤២ ក្នុងចំណោមប្រទេស១៨០ ដែលជាចំណាត់ថ្នាក់មួយដូចឆ្នាំ២០១៨ ដែរ ដែលជាឆ្នាំរដ្ឋាភិបាលប្រើវិធានការបោសសម្អាតស្ថាប័នព័ត៌មានឯករាជ្យស្ទើរតែទាំងអស់ពីប្រទេសកម្ពុជា។
ក្នុងនោះ ស្ថាប័នកាសែតខ្លះត្រូវបិទទ្វារ ខ្លះទៀតត្រូវប្តូរម្ចាស់ ខណៈកាសែតបរទេសត្រូវបិទការិយាល័យរបស់ខ្លួនទាំងស្រុង។ ទន្ទឹមគ្នានោះ ក៏មានស្ថានីយវិទ្យុឯករាជ្យក្នុងស្រុកជាង ៣០ស្ថានីយផងដែរដែលត្រូវបានបង្ខំឱ្យបិទទ្វារទាំងដែលគ្មានកំហុស៕