អតីតអគ្គទីប្រឹក្សាស្ថានទូតខ្មែរប្រចាំប្រទេសឥណ្ឌូនេស៊ី អំពាវនាវឱ្យបុរសខ្លាំងក្រាញអំណាចនៅកម្ពុជា គឺលោក ហ៊ុន សែន ដឹកនាំនយោបាយទៅរកការឯកភាពជាតិ ដើម្បីឱ្យកម្ពុជាទទួលបានសន្តិភាព និងសេចក្តីសុខសុភមង្គលពិតប្រាកដ។
អតីតអគ្គទីប្រឹក្សាស្ថានទូតខ្មែរប្រចាំប្រទេសឥណ្ឌូនេស៊ី បណ្ឌិត សូ ណារ៉ូ បានលើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីរាត្រីថ្ងៃទី១៨ មករា ថា បើទោះជាលោក ហ៊ុន សែន អាចធ្វើឱ្យប្រទេសកម្ពុជាត្រូវគ្រប់គ្រងដោយពេញលេញក្នុងដៃនៃរដ្ឋាភិបាលរបស់គាត់ក៏ដោយ ប៉ុន្តែបើសាមគ្គីជាតិនៅតែបែកបាក់ នោះក៏ជាសញ្ញានៃការបែកបាក់ទឹកដីទៅថ្ងៃមុខបន្តទៀត ព្រោះការដឹកនាំដែលគ្មានយុត្តិធម៌ គឺត្រូវតែមានការតវ៉ាទាមទារ ដែលវាគឺជាភាពសត្យានុម័តពីធម្មជាតិ។
បណ្ឌិត សូ ណារ៉ូ អះអាងថា ការដឹកនាំនយោបាយដោយការរំលោភច្បាប់ដូចមេដឹកនាំបក្សកាន់អំណាច លោក ហ៊ុន សែន អនុវត្តសព្វថ្ងៃនេះ ដែលបានធ្វើការរឹបអូសផ្ទះមន្ត្រីរបស់បក្សក្រៅរដ្ឋាភិបាលយកទៅលក់ដោយបង្ខំដើម្បីសងជំងឺចិត្តខ្លួនឯង ក្នុងទំហំទឹកប្រាក់ដែលលើសពីមាត្រាដែលបានចែងក្នុងច្បាប់ គឺជាអំពើអយុត្តិធម៌យ៉ាងធ្ងន់ធ្ងរ ហើយទង្វើបែបនេះនឹងធ្វើឱ្យបែកបាក់សាមគ្គីជាតិខ្មែរកាន់តែធំទៅៗ ក៏ដូចជាការរុញច្រានឱ្យប្រទេសកម្ពុជាក្លាយទៅជារដ្ឋដែលពោរពេញទៅដោយភាពអនាធិបតេយ្យដូច្នោះដែរ។
ប្រភពដដែលបញ្ជាក់ថា ការអនុវត្តកណ្ដាប់ដៃដែករបស់លោក ហ៊ុន សែន ដោយរំលោភច្បាប់ធ្វើទុក្ខបុកម្នេញលើពលរដ្ឋ ឬលើអ្នកនយោបាយដែលមាននិន្នាការផ្ទុយពីខ្លួន ជាមូលហេតុសមស្របដែលធ្វើឱ្យពលរដ្ឋមានកំហឹងនឹងការដឹកនាំរបស់គាត់ពេញផ្ទៃប្រទេស ហើយសន្តិភាពដែលលោក ហ៊ុន សែន ប្រកាសកន្លងមកនេះគ្រាន់តែជាសន្តិភាពក្រោមអំណាចយង់ឃ្នងរបស់គាត់ដែលពលរដ្ឋមិនហ៊ានតវ៉ាប៉ុណ្ណោះ។
ការអះអាងនេះ ធ្វើឡើងស្របពេលដែលមេដឹកនាំបក្សកាន់អំណាច លោក ហ៊ុន សែន ប្រើវិធានការធ្វើទុក្ខបុកម្នេញទៅលើក្រុមអ្នកតវ៉ាដែលប្រឆាំងនឹងការដឹកនាំរបស់លោកកាន់តែខ្លាំងឡើងៗនៅដើមឆ្នាំ២០២៣ នេះ។
កាលពីថ្ងៃទី៣០ ខែធ្នូ ឆ្នាំ២០២២ លោក ហ៊ុន សែន លើកឡើងក្នុងពិធីបើកការដ្ឋានស្ដារផ្លូវជាតិខេត្តកំពត ថា កម្ពុជាដែលដឹកនាំដោយរូបលោក គឺអាចគ្រប់គ្រង និងបង្រួបបង្រួមទឹកដីបានទាំងមូល ក្នុងនោះសមាសភាពអ្នកដែលធ្លាប់តែកាន់កាំភ្លើងប្រឆាំងនឹងរដ្ឋាភិបាលរបស់លោក បានមករួបរួមជាមួយគណបក្សប្រជាជនកម្ពុជាអស់ហើយ ដូចជាសមាសភាពមកពីខាងគណបក្សហ៊្វុនស៊ិនប៉ិច សមាសភាពមកពីរណសិរ្សរំដោះប្រជាពលរដ្ឋខ្មែរ និងសមាសភាពរបស់ក្រុមខ្មែរក្រហម ជាដើម ដែលនេះគឺជាសមិទ្ធផលដ៏ធំធេងនៃការរក្សាសន្តិភាពរបស់គណបក្សប្រជាជនកម្ពុជា។
ទោះជាបែបនេះក្តី កម្ពុជាដែលក្រោមការដឹកនាំរបស់លោក ហ៊ុន សែន ត្រូវគេមើលឃើញថា បើទោះបីជាកម្ពុជាមានកិច្ចព្រមព្រៀងសន្តិភាពទីក្រុងប៉ារីសឆ្នាំ១៩៩១ ដើម្បីបង្រួបបង្រួមបញ្ចប់វិបត្តិផ្ទៃក្នុងរបស់កម្ពុជាហើយក៏ដោយ ក៏កម្ពុជានៅតែមិនអាចរួបរួមគ្នាបានរវាងអ្នកនយោបាយ និងអ្នកនយោបាយដដែល ខណៈមេដឹកនាំបក្សកាន់អំណាចរូបនេះនៅតែបន្តប្រើយុទ្ធសាស្ត្រកម្ទេចគេឯងរហូតដល់សព្វថ្ងៃនេះ។
យ៉ាងណាក៏ដោយ កាលពីថ្ងៃទី១៦ ខែកញ្ញា ឆ្នាំ២០២១ កន្លងទៅ ប្រមុខរដ្ឋាភិបាលកម្ពុជា លោក ហ៊ុន សែន អះអាងថា លោកបានធ្វើច្រើនណាស់ក្នុងការដឹកនាំជាតិរកការបង្រួបបង្រួមរវាងខ្មែរនិងខ្មែរ ប៉ុន្តែភាគីនយោបាយក្រុមប្រឆាំងមិនយល់អំពីការបង្រួបបង្រួមជាតិនេះទេ ហើយនៅពេលនេះគ្មានកិច្ចការនយោបាយណាដែលត្រូវដោះស្រាយដោយការចរចានោះឡើយ។
ទោះជាបែបនេះក្តី ក្រុមអ្នកសង្កេតការណ៍លើកឡើងថា ប្រវត្តិនៃការដឹកនាំប្រទេសជាង ៤០ឆ្នាំរបស់មេដឹកនាំបក្សកាន់អំណាច លោក ហ៊ុន សែន ចាប់តាំងពីកងទ័ពវៀតណាមលើកបន្តុបជានាយករដ្ឋមន្ត្រីកាលពីឆ្នាំ១៩៨៥ មក គឺមានតែការបំបែកបំបាក់ និងបំផ្លាញជាតិខ្មែរប៉ុណ្ណោះ។
អង្គការ Freedom House បានចេញរបាយការណ៍របស់ខ្លួននៅឆ្នាំ២០២២ នេះថា ប្រព័ន្ធនយោបាយរបស់ប្រទេសកម្ពុជា ត្រូវបានលោកនាយករដ្ឋមន្ត្រី ហ៊ុន សែន គ្រប់គ្រងផ្ដាច់មុខទាំងស្រុង ក្នុងនោះគណបក្សប្រឆាំង បណ្ដាញសារព័ត៌មានឯករាជ្យ អ្នកតវ៉ាទាមទារសិទ្ធិសេរីភាព និងប្រជាពលរដ្ឋខ្មែររស់នៅក្នុងភាពភ័យខ្លាចគ្រប់ៗគ្នា៕