ក្រុមអ្នកឃ្លាំមើលលើកឡើងថា ការផ្លាស់ប្ដូរឈ្មោះវិញ្ញាសាកីឡាមួយ (Muay) មកជាគុនខ្មែរ ក្នុងព្រឹត្តិការណ៍ស៊ីហ្គេមលើកទី៣២ នេះ វាគឺជាសិទ្ធិរបស់កម្ពុជាដែលជាម្ចាស់ផ្ទះ ហើយក៏ជាការលើកកម្ពស់អត្តសញ្ញាណកីឡាកម្ពុជានៅលើឆាកអន្តរជាតិផងដែរ។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ ប្រាប់សារព័ត៌មាន The Cambodia Daily នៅថ្ងៃទី២៥ មករា នេះថា លោកឯកភាពទៅនឹងគណៈកម្មាធិការជាតិរៀបចំការប្រកួតកីឡាស៊ីហ្គេម ដែលសម្រេចប្តូរឈ្មោះវិញ្ញាសាប្រកួតប្រដាល់មួយទៅជា «គុនខ្មែរ» ព្រោះថាការធ្វើបែបនេះ គឺជាការបញ្ចៀសនូវការយល់ច្រឡំពីបណ្តាប្រទេសដែលមកចូលរួមចំពោះវិញ្ញាសា «មួយថៃ» ផង និងជាការលើកតម្កើងកិត្តិយសជាតិផ្នែកវិស័យកីឡាមួយកម្រិតទៀត ក្រោយអវត្តមានការរៀបចំកីឡាស៊ីហ្គេមរបស់ខ្លួនអស់រយៈពេលជាង ៤០ឆ្នាំមកនេះ។
លោក សេក សុជាតិ លើកឡើងថា ការសម្រេចចូលរួម ឬមិនចូលរួមខាងសហព័ន្ធកីឡារបស់ថៃ គឺជាសិទ្ធិសម្រេចរបស់ពួកគេ ប៉ុន្តែអ្វីដែលកម្ពុជាត្រូវធ្វើ គឺត្រូវតែរៀបចំ និងដឹកនាំការប្រកួតស៊ីហ្គេមលើកទី៣២ នេះឱ្យទទួលបានជោគជ័យ ដើម្បីឱ្យប្រទេសនានាដែលមកចូលរួមបានឃើញ និងទទួលស្គាល់នូវសមត្ថភាពដឹកនាំរបស់កម្ពុជាក្នុងព្រឹត្តិការណ៍លើកដំបូងរបស់ខ្លួននេះ។
កាលពីថ្ងៃទី២៣ ខែមករា ឆ្នាំ២០២៣ អនុប្រធានគណៈកម្មាធិការជាតិអូឡាំពិកថៃ (NOCT) លោក Charoen Wattanasin អះអាងថា គណៈកម្មាធិការអូឡាំពិកអន្តរជាតិ (IOC) មិនបានទទួលស្គាល់ពាក្យ «គុនខ្មែរ» ទេ ដូច្នេះការប្តូរឈ្មោះវិញ្ញាសាប្រកួតប្រដាល់ មួយ (Muay) ទៅជា «គុនខ្មែរ» (Kun Khmer) ក្នុងការប្រកួតស៊ីហ្គេមលើកទី៣២ កម្ពុជាបានបំពានទាំងស្រុងទៅលើច្បាប់នៃការប្រកួតកីឡាអន្តរជាតិ។
លោក Charoen Wattanasin អះអាងថា សមាគមកីឡាប្រដាល់ថៃនឹងមិនបញ្ជូនអត្តពលិកទៅប្រកួតក្នុងវិញ្ញាសានេះដាច់ខាត។ ជាងនេះទៀត ថៃនឹងដាក់ពិន័យទៅលើប្រទេសដែលជាសមាជិកសហព័ន្ធកីឡាមួយថៃអន្តរជាតិ (IFMA) ណាដែលហ៊ានបញ្ជូនអត្តពលិកទៅប្រកួតស៊ីហ្គេមនៅកម្ពុជាផងដែរ។
យ៉ាងណាក៏ដោយ អគ្គលេខាធិការគណៈកម្មាធិការជាតិរៀបចំការប្រកួតកីឡាស៊ីហ្គេម (CAMSOC) លោក វ៉ាត់ ចំរើន អះអាងថា កម្ពុជានៅតែប្រកាន់គោលជំហរមិនផ្លាស់ប្ដូរឈ្មោះពីគុនខ្មែរទៅមួយ (Muay) វិញទេ បើទោះជាភាគីថៃ ឬសមាគមប្រដាល់ថៃមិនបញ្ជូនអត្តពលិកមកប្រកួតក៏ដោយ។
លោកបញ្ជាក់ថា ការសម្រេចលុបចោលការប្រើពាក្យកីឡា «Muay» ចេញពីការប្រកួតស៊ីហ្គេមឆ្នាំ២០២៣ ដោយកម្ពុជាបានប្រកាន់ជំហរប្រើពាក្យ «Kun Khmer» គឺដើម្បីបង្ហាញពីកីឡាជាអត្តសញ្ញាណរបស់ខ្លួនក្នុងនាមជាម្ចាស់ផ្ទះទៅតាមការចង់បានរបស់ប្រជាជនកម្ពុជា។
លោក វ៉ាត់ ចំរើន ពន្យល់ថា នៅក្នុងធម្មនុញ្ញរបស់សហព័ន្ធកីឡាអាស៊ីអាគ្នេយ៍បានដាក់ពាក្យថា “កីឡាមួយ” មិនមែន មួយថៃ ទេ ស្របពេលដែលកម្ពុជាធ្វើជាម្ចាស់ផ្ទះរៀបចំស៊ីហ្គេមឆ្នាំ២០២៣ ក៏សម្រេចសុំដាក់ឈ្មោះ គុនខ្មែរ ចូលរួមក្នុងកីឡាមួយនេះតែម្តងទៅ។
ព្រឹត្តិការណ៍ស៊ីហ្គេមលើកទី៣២ ដែលកម្ពុជាធ្វើជាម្ចាស់ផ្ទះ នឹងចាប់ផ្ដើមនៅថ្ងៃទី៥ ដល់ថ្ងៃទី១៧ ខែឧសភា ឆ្នាំ២០២៣ ខាងមុខនេះ ហើយវិញ្ញាសាប្រដាល់គុនខ្មែរនេះ បើទោះជាគ្មានភាគីថៃចូលរួមក៏ដោយ ក៏មានប្រទេសចំនួន៦ បានសម្រេចមកចូលរួមដែរ ដូចជាឥណ្ឌូនេស៊ី វៀតណាម ហ្វីលីពីន ឡាវ មីយ៉ាន់ម៉ា និងម៉ាឡេស៊ី ផងដែរ ខណៈច្បាប់កីឡាបញ្ជាក់ថា វិញ្ញាសាដែលមានចាប់ពី ៤ប្រទេសឡើងទៅ គឺអាចដាក់ឲ្យប្រកួតបានហើយ។
នៅថ្ងៃទី២៥ ខែមករា ឆ្នាំ២០២៣ នេះ ប្រមុខរដ្ឋាភិបាលកម្ពុជា លោក ហ៊ុន សែន សរសេរលើទំព័រហ្វេសប៊ុករបស់លោកថា សូមស្វាគមន៍ការរាប់ថយក្រោយ ១០០ថ្ងៃនៃព្រឹត្តិការណ៍ស៊ីហ្គេមលើកទី៣២ ដែលកម្ពុជាទទួលរៀបចំសម្រាប់ព្រឹត្តិការណ៍ស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ដែលកម្ពុជាធ្វើជាម្ចាស់ផ្ទះក្នុងឆ្នាំ២០២៣ នេះ។
ទាក់ទិននឹងបញ្ហានេះ សារព័ត៌មានប្រទេសថៃ ដែលមានឈ្មោះថា ONE SIAM បានចុះផ្សាយកាលពីពេលកន្លងទៅថា ភស្តុតាងបុរាណវិទ្យាមួយបង្ហាញថា មួយថៃ (MuayThai) មានប្រភពមកពីអាណាចក្រខ្មែរ។ ថ្ងៃនេះកម្ពុជាមានគុនខ្មែរ ឡាវមានមួយឡាវ ហើយថៃមានមួយថៃ (Muay Thai)។
ប្រភពដដែលបញ្ជាក់ថា កីឡាទាំងបីនេះមានលក្ខណៈស្រដៀងគ្នាខ្លាំងណាស់ ប៉ុន្តែដោយសារកង្វះខាតកំណត់ត្រាជាលាយលក្ខណ៍អក្សរ វាពិបាកក្នុងការផ្ទៀងផ្ទាត់ណាស់ថាតើផ្នែកណាខ្លះជា មួយថៃ (Muay Thai)? គេគ្រាន់តែសម្គាល់បានថា មួយថៃ (Muay Thai) ពិតជាបានចាប់ផ្តើមក្នុងអាណាចក្រខ្មែរប្រាកដមែន៕