អតីតមេដឹកនាំបក្សប្រឆាំង លោក សម រង្ស៊ី ចោទសួរថា តើហេតុអ្វីបានជាព្រះមហាក្សត្រខ្មែរសព្វថ្ងៃនេះយល់ព្រមធ្វើតាមបញ្ជារបស់លោក ហ៊ុន សែន ដោយបិទព្រះនេត្រមិនទទួលស្គាល់ការពិត មិនខ្វល់ព្រះទ័យពីទុក្ខសោករបស់ប្រជារាស្ត្រ បន្ទាប់ពីព្រះអង្គបានចេញព្រះរាជសារអំពាវនាវឱ្យពលរដ្ឋខ្មែរទៅចូលរួមបោះឆ្នោតឱ្យបានគ្រប់គ្នា។
អតីតមេដឹកនាំបក្សប្រឆាំង លោក សម រង្ស៊ី បានសរសេរលើទំព័រហ្វេសប៊ុករបស់ខ្លួនកាលពីថ្ងៃទី១៩ កុម្ភៈ នេះថា ហេតុអ្វីបានជាព្រះអង្គមានព្រះបន្ទូលថា ការបោះឆ្នោតថ្ងៃទី២៣ ខែកក្កដា ឆ្នាំ២០២៣ ខាងមុខនេះ នឹងប្រព្រឹត្តទៅដោយសេរី ត្រឹមត្រូវ និងយុត្តិធម៌ក្នុងសេចក្តីអំពាវនាវរបស់សម្តេចព្រះអង្គ កាលពីថ្ងៃទី៨ ខែកុម្ភៈ ឆ្នាំ២០២៣ កន្លងទៅនេះ។
អតីតមេដឹកនាំបក្សប្រឆាំងរូបនេះលើកជាសំណួរបន្ថែមថា តើព្រះអង្គជ្រាបទេថា គណៈកម្មាធិការជាតិរៀបចំការបោះឆ្នោត (គ.ជ.ប) មានសមាសភាពតាមការចាត់ចែងរបស់គណបក្សកាន់អំណាចសព្វថ្ងៃ ហើយធ្វើតាមតែបញ្ជាគណបក្សនេះ ដែលជួយលួចបន្លំសន្លឹកឆ្នោតតាមតែអំពើចិត្តរហូតមក?
ជាងនេះទៀត តើព្រះអង្គមានជ្រាបទេថា ការបោះឆ្នោតមុនៗរហូតមកដល់ថ្ងៃនេះ បានប្រព្រឹត្តទៅដោយមានការលួចបន្លំសន្លឹកឆ្នោត ដែលវាមិនបានឆ្លុះបញ្ចាំងពីឆន្ទៈរបស់ប្រជារាស្ត្រខ្មែរដែលចង់បានការផ្លាស់ប្ដូរនោះ?
លើសពីនេះ តើហេតុអ្វីបានជាព្រះអង្គយាងទៅបើកសម័យប្រជុំរដ្ឋសភាក្រោយការបោះឆ្នោតកាលពីថ្ងៃទី២៩ ខែកក្កដា ឆ្នាំ២០១៨ ទោះជាព្រះអង្គជ្រាបហើយពេលនោះថារដ្ឋសភានោះមិនមែនតំណាងឲ្យប្រជារាស្ត្រខ្មែរទាំងមូល ពីព្រោះគណបក្សសង្គ្រោះជាតិដែលមានការគាំទ្រពីប្រជារាស្ត្រពាក់កណ្តាលនគរ ត្រូវបានគេរំលាយដោយអត្តនោម័តិ មុនការបោះឆ្នោតជាតិនៅថ្ងៃទី២៩ ខែកក្កដា ឆ្នាំ២០១៨ នោះ។
លោក សម រង្ស៊ី ចោទជាសំណួរថា តើហេតុអ្វីបានជាព្រះអង្គមិនយកគំរូតាមព្រះរាជបិតារបស់ព្រះអង្គ សម្តេចព្រះ នរោត្តម សីហនុ ដែលទ្រង់មិនយល់ព្រមដាច់ខាតយាងទៅបើកសម័យប្រជុំណាមួយរបស់រដ្ឋសភា បើមានគណបក្សនយោបាយជាប់ឆ្នោតណាមួយធ្វើពហិការមិនចូលសភា ដោយមិនសុខចិត្តពីការលួចបន្លំសន្លឹកឆ្នោតនោះ។
កាលពីថ្ងៃទី៨ ខែកុម្ភៈ ឆ្នាំ២០២៣ ព្រះករុណាព្រះបាទសម្តេចព្រះ នរោត្តម សីហមុនី ព្រះមហាក្សត្រខ្មែរបានចេញព្រះរាជសារអំពាវនាវឱ្យពលរដ្ឋខ្មែរទៅចូលរួមបោះឆ្នោតជ្រើសតាំងតំណាងរាស្ត្រអាណត្តិទី៧ នាថ្ងៃទី២៣ ខែកក្កដា ឆ្នាំ២០២៣ ខាងមុខនេះឱ្យបានគ្រប់គ្នា ដើម្បីជ្រើសរើសអ្នកដឹកនាំជាតិ ដើម្បីការអភិវឌ្ឍប្រទេសជាតិ។
ក្នុងព្រះរាជសារនោះបញ្ជាក់ថា «សូមពលរដ្ឋខ្មែរមេត្តាប្រើសិទ្ធិសេរីភាពទៅបោះឆ្នោតទៅតាមសតិសម្បជញ្ញៈរបស់ខ្លួនម្នាក់ៗ ដែលមានទំនុកចិត្តទៅលើបេក្ខជនណាម្នាក់ ឬគណបក្សនយោបាយណាមួយដោយសេរី។»
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ ប្រាប់សារព័ត៌មាន The Cambodia Daily នៅថ្ងៃទី២០ កុម្ភៈ នេះថា ការស្ដីបន្ទោសព្រះមហាក្សត្រមិនមែនជាដំណោះស្រាយសម្រាប់អ្នកនយោបាយទេ គឺរឹតតែធ្វើឱ្យមានវិបត្តិនយោបាយទៅវិញប៉ុណ្ណោះ ព្រោះព្រះមហាក្សត្រទ្រង់មិនមែនជាភាគីជម្លោះនៃអ្នកនយោបាយឡើយ ដូច្នេះអ្នកនយោបាយដែលមានជម្លោះ គួរសុំការដោះស្រាយពីព្រះអង្គ ដើម្បីឱ្យមានការផ្សះផ្សា និងការបង្រួបបង្រួមជាតិ។
លោក សេក សុជាតិ លើកឡើងថា មុននឹងបន្ទោសព្រះមហាក្សត្រ អ្នកនយោបាយទាំងនោះគួរតែមើលពីទង្វើរបស់ខ្លួនវិញថា តើពួកគេបានធ្វើអ្វីខ្លះ។ លោកបន្តថា អ្នកនយោបាយខ្លះបានទុកព្រះមហាក្សត្រចោល ដោយមិនខ្វល់ពីព្រះអង្គឡើយ ប៉ុន្តែពេលមានបញ្ហាដល់ខ្លួនឯង បែរជាយកព្រះអង្គធ្វើជាផ្ទាំងស៊ីបសម្រាប់ខ្លួនបញ្ចេញកំហឹងទៅវិញ។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិតរូបនេះបញ្ជាក់ថា ការប្រើសំណួរដ៏ច្រើនរបស់លោក សម រង្ស៊ី គ្រាន់តែជាវិធីបង្វែរកំហុសដាក់បន្ទុកលើព្រះមហាក្សត្រ ដើម្បីបិទបាំងកំហុសខ្លួនឯងប៉ុណ្ណោះ។
ក្រុមអ្នកសង្កេតការណ៍លើកឡើងថា លោក សម រង្ស៊ី បន្ទោសព្រះមហាក្សត្រចំពោះការយាងទៅបើកសម័យប្រជុំរដ្ឋសភាកាលពីថ្ងៃទី២៩ ខែកក្កដា ឆ្នាំ២០១៨ ដើម្បីផ្តល់ភាពស្របច្បាប់ឲ្យបក្សកាន់អំណាចក្រោយការបោះឆ្នោតនៅឆ្នាំនោះ។
ប្រភពដដែលលើកឡើងថា លោក សម រង្ស៊ី ភ្លេចថា កាលពីក្រោយការបោះឆ្នោតជាតិឆ្នាំ២០១៣ ក្រោមការចរចានយោបាយដែលត្រូវផ្តល់តួនាទីឱ្យគាត់ជាប្រធានក្រុមមតិភាគតិច អតីតមេដឹកនាំប្រឆាំងរូបនេះក៏ធ្លាប់បានដឹកនាំមន្ត្រីរបស់ខ្លួនចូលបំពេញភាពស្របច្បាប់ឱ្យរដ្ឋសភាមិនគ្រប់ទឹករបស់បក្សកាន់អំណាចដែរ ដែលធ្វើឱ្យលោក ហ៊ុន សែន មានឱកាសរំលាយបក្សសង្គ្រោះជាតិកាលពីឆ្នាំ២០១៧ កន្លងទៅ។
ដូច្នេះ ពលរដ្ឋខ្មែរគួរសួរលោក សម រង្ស៊ី អំពីការសម្រេចចិត្តចូលប្រជុំសភាកាលពីឆ្នាំ២០១៣ ដើម្បីផ្តល់ភាពស្របច្បាប់ឲ្យបក្សកាន់អំណាចរបស់លោក ហ៊ុន សែន ដែរឬទេ ឲ្យដូចការសួររបស់គាត់ទៅកាន់ព្រះមហាក្សត្រនៅពេលនេះអ៊ីចឹងដែរ៕