មកដល់ពេលនេះ សង្គ្រាមរុស្ស៊ីឈ្លានពានអ៊ុយក្រែន បានឆ្លងផុតជាង ១ឆ្នាំទៅហើយ។ ក្នុងរយៈពេលមួយឆ្នាំនេះ កងទ័ពនៃប្រទេសទាំងពីរស្លាប់មានចំនួនច្រើនប្រហាក់ប្រហែលគ្នា។
ប៉ុន្តែបើតាមមន្ត្រីចារកម្មរបស់អង់គ្លេស និងអាមេរិក គឺកងទ័ពរបស់រុស្ស៊ីបាត់បង់នៅលើទឹកដីនៃសមរភូមិអ៊ុយក្រែនកើនឡើងដល់ទៅជាង ២០ម៉ឺននាក់ ដែលក្នុងនោះមានទាំងអ្នកស្លាប់ និងអ្នករងរបួស។
ជាមួយគ្នានេះ សព្វាវុធរបស់រុស្ស៊ីបាត់បង់ក្នុងសមរភូមិអាចមានចំនួនរហូតដល់ទៅជិត ២ម៉ឺនគ្រឿង ក្នុងនោះរថក្រោះជាង ៣៣០០គ្រឿង រថពាសដែកជិត ៧ពាន់គ្រឿង និងប្រព័ន្ធកាំភ្លើងធំជិត ៣ពាន់គ្រឿង។
អ្នកជំនាញយោធារបស់ពួកបស្ចិមប្រទេសយល់ឃើញថា បើមហាអំណាចរុស្ស៊ីបាត់បង់សព្វាវុធអន្តរាគមន៍ទ័ពថ្មើរជើងធ្ងន់ធ្ងរដូចនេះ អាចពិបាកក្នុងការយកឈ្នះសង្គ្រាមនៅលើទឹកដីអ៊ុយក្រែន។
អ្នកសង្កេតការណ៍ខ្លះមើលឃើញថា បើទោះជារុស្ស៊ីពិបាកឈ្នះសង្គ្រាមលើទឹកដីអ៊ុយក្រែន ក៏ពិតមែន តែអ៊ុយក្រែន ក៏មិនអាចវាយលុកចូលទឹកដីរុស្ស៊ី ឬក៏ធ្វើសង្គ្រាមឈ្នះរុស្ស៊ីបាននោះទេ បើទោះជាសព្វាវុធរបស់ពួកបស្ចិមប្រទេសផ្ដល់ទៅឲ្យអ៊ុយក្រែន កាន់តែមានចំនួនច្រើនក៏ដោយ ព្រោះរុស្ស៊ី ក៏មិនទាន់ចុះខ្សោយទ័ពថ្មើរជើងរហូតដល់អាចចាញ់សង្គ្រាមនោះដែរ។
ដូច្នេះហើយ នាំឲ្យមានទស្សនៈពីរផ្ទុយគ្នា។ ទស្សនៈមួយយល់ឃើញថា បើប្រទេសពីរនេះមិនអាចបញ្ចប់សង្គ្រាមដោយមានអ្នកឈ្នះ និងអ្នកចាញ់ វានឹងនាំទៅរកសង្គ្រាមដូចនៅឧបទ្វីបកូរ៉េ ដែលបានផ្ទុះឡើងកាលពីដើមទសវត្សឆ្នាំ១៩៥០ ដែលនាំឲ្យប្រទេសកូរ៉េបែងចែកជាពីរមកដល់បច្ចុប្បន្ននេះ គឺកូរ៉េខាងជើង និងកូរ៉េខាងត្បូង។ តែទស្សនៈមួយទៀតយល់ថា សង្គ្រាមរុស្ស៊ី-អ៊ុយក្រែនអាចនឹងបិទបញ្ចប់ក្នុងឆ្នាំ២០២៣ នេះ ដោយរកឃើញអ្នកឈ្នះសង្គ្រាម ហើយអ្នកឈ្នះនោះគេអាចគិតថាប្រហែលជាប្រទេសអ៊ុយក្រែន។
នេះជាទស្សនៈដែលមើលឃើញថា សង្គ្រាមរុស្ស៊ី-អ៊ុយក្រែនបច្ចុប្បន្ននេះទំនងមានតែបញ្ចប់តាមរយៈការចរចាតែប៉ុណ្ណោះ គឺភាគីទាំងពីរយល់ព្រមទទួលយកភាពស្មើគ្នានៅលើសមរភូមិដោយគ្មានភាគីណាមួយមានប្រៀបក្នុងសង្គ្រាមនោះទេ។
វាមានន័យថា អ៊ុយក្រែនយល់ព្រមទៅតាមការទាមទាររបស់រុស្ស៊ីមួយចំនួន ហើយរុស្ស៊ីក៏យល់ព្រមតាមការដាក់លក្ខខណ្ឌរបស់អ៊ុយក្រែនផងដែរ។
គេអាចគិតថា អ៊ុយក្រែនជាជនរងគ្រោះនៃសង្គ្រាមត្រូវតែបង្ខំចិត្តទទួលយកសន្តិភាពពីរុស្ស៊ី ហើយរុស្ស៊ីខ្លួនឯងនេះក៏សុខចិត្តទទួលយកការសម្របសម្រួលនៃការដកទ័ពត្រឡប់ទៅវិញ។ បើរំលឹកអំពីសង្គ្រាមលើឧបទ្វីបកូរ៉េរយៈពេល ៤ឆ្នាំ ទីបំផុតសង្គ្រាមនោះមិនមែនផ្ទុះឡើងរវាងកូរ៉េសាច់ឈាមខ្លួនឯងនោះទេ គឺភាគីទាំងពីរសុទ្ធតែមានអន្តរាគមន៍ពីពួកមហាអំណាចដូចៗគ្នា ដែលពេលនោះគេហៅថាសង្គ្រាមត្រជាក់ ហើយសង្គ្រាមត្រជាក់នេះគឺជាការប្រទាញប្រទង់រវាងប្លុកសេរី និងប្លុកកុម្មុយនីស្ត។
ប្លុកសេរីមានអាមេរិកនៅពីក្រោយកូរ៉េខាងត្បូង ហើយប្លុកកុម្មុយនីស្តមានសហភាពសូវៀត និងចិន នៅពីក្រោយកូរ៉េខាងជើង។
សង្គ្រាមឧបទ្វីបកូរ៉េ ទ័ពអាមេរិករាប់ម៉ឺននាក់ចូលជួយកូរ៉េខាងត្បូង ចំណែកកូរ៉េខាងជើងមានទ័ពចិនរាប់ម៉ឺនរាប់សែននាក់ ហើយជំនួយសព្វាវុធយ៉ាងសម្បើមពីសហភាពសូវៀត។ សង្គ្រាមបង្ហូរឈាមមិនត្រឹមតែជាតិសាសន៍កូរ៉េបងប្អូននឹងគ្នានោះទេ គឺជាតិសាសន៍ដទៃ ចិន និងអាមេរិក ក៏ស្លាប់នៅលើសមរភូមិនេះដែរ។
យ៉ាងណា ចិនបញ្ជូនទ័ពរាប់សែននាក់ច្រើនជាងអាមេរិករាប់សិបដងចូលជួយកូរ៉េខាងជើង។ ដល់ទីបញ្ចប់នៃការបិទបញ្ចប់សង្គ្រាមតាមរយៈការចរចានៅអំឡុងខែកក្កដា ឆ្នាំ១៩៥៣ គេរកឃើញទ័ពចិនស្លាប់លើសលប់ គឺរហូតដល់ទៅជាង ៣សែននាក់ ខណៈទ័ពអាមេរិកស្លាប់ប្រមាណជាជាង ៣ម៉ឺននាក់។
ការបិទបញ្ចប់សង្គ្រាមនៅកូរ៉េកើតឡើងដោយភាគីទាំងពីរយល់ព្រមជាមួយគ្នា ខណៈអាមេរិក និងសហភាពសូវៀត ក៏យល់ព្រមបញ្ចប់សង្គ្រាមផងដែរ ហើយក៏ឈានទៅដល់ការពុះច្រៀកទឹកដីកូរ៉េជាពីរមកដល់បច្ចុប្បន្ននេះ។
នេះជាទស្សនៈមួយដែលគេគិតថា សង្គ្រាមរុស្ស៊ីឈ្លានពានអ៊ុយក្រែនកំពុងដើរលើផ្លូវនៃសង្គ្រាមឧបទ្វីបកូរ៉េកាលពីទសវត្ស១៩៥០។
តើអនាគតសង្គ្រាមនៅអ៊ុយក្រែនអាចដូចនៅឧបទ្វីបកូរ៉េដែរឬទេ?
ចម្លើយនៃសំណួរនេះ គេនឹងអាចដឹងទៅតាមពេលវេលាជាក់ស្ដែងប៉ុណ្ណោះ ព្រោះភាគីទាំងពីរ រុស្ស៊ី និងអ៊ុយក្រែន ដូចជាពុំទាន់ចង់បញ្ចប់សង្គ្រាមតាមរយៈការចរចានោះទេ ជាពិសេសគឺអ៊ុយក្រែនដែលជាជនរងគ្រោះនៃសង្គ្រាមរបស់រុស្ស៊ី។
យ៉ាងណា ទស្សនៈមួយទៀតដែលមើលទៅផ្ទុយនឹងទស្សនៈទីមួយនោះ គេអាចនិយាយថា សហរដ្ឋអាមេរិក និងពួកបស្ចិមប្រទេសគេមិនឲ្យសង្គ្រាមអ៊ុយក្រែនបិទបញ្ចប់ដូចឧបទ្វីបកូរ៉េនោះទេ។ ទស្សនៈនេះគេមើលឃើញឆន្ទៈរបស់អាមេរិកកំពុងដឹកមុខគេនៃសម្ព័ន្ធភាពរបស់ខ្លួន ដើម្បីលើកទឹកចិត្តឲ្យអ៊ុយក្រែនមិនត្រឹមតែការពារទឹកដីរបស់ខ្លួនដែលរងការវាយកាន់កាប់បានដោយទ័ពរុស្ស៊ីនោះទេ គឺសូម្បីតែឧបទ្វីបគ្រីមៀរ ដែលរុស្ស៊ីយកបានពីអ៊ុយក្រែន កាលពីឆ្នាំ២០១៤ ក៏ពួកបស្ចិមប្រទេសទាំងនោះកំពុងតែរុញឲ្យអ៊ុយក្រែនលើកទ័ពចូលទៅលុកលុយតំបន់នេះ ហើយរំដោះតំបន់នេះមកវិញដែរ។
មូលហេតុពួកបស្ចិមប្រទេសគិតថា បើអ៊ុយក្រែនវាយរុលចូលគ្រីមៀរ គេនឹងបានឃើញការដោះដូរការដឹកនាំក្នុងប្រទេសរុស្ស៊ី ពីព្រោះលោក វ៉្លាឌីមៀ ពូទីន ជាអ្នកបញ្ជាឲ្យលើកទ័ពលុកលុយអ៊ុយក្រែន ជាង ២៥ម៉ឺននាក់នោះអាចនឹងត្រូវផ្ទៃក្នុងរបស់ខ្លួនផ្ដួលរលំ ឬក៏លោក ពូទីន ផ្ទាល់ធ្វើអត្តឃាតអំណាចរបស់ខ្លួនឯងតែម្ដង។ នេះមានន័យថា បុរសខ្លាំងម្នាក់សុខចិត្តចាញ់សង្គ្រាមតែម្នាក់ឯង ប៉ុន្តែគាត់នឹងមិនឲ្យរុស្ស៊ីចាញ់សង្គ្រាមនៅអ៊ុយក្រែន ឬចាញ់ពួកបស្ចិមប្រទេសនោះទេ។
យ៉ាងណា បើលោក ពូទីន អស់អំណាច របបដឹកនាំរបស់លោកក៏រលាយផងដែរ។ ដូចនេះការធ្វើសង្គ្រាមនៅលើទឹកដីអ៊ុយក្រែន អាចនឹងទៅរកពេលវេលាបញ្ចប់បាន ព្រោះមេដឹកនាំដែលមានមហិច្ឆតាពង្រីកទឹកដី ក៏បាត់ស្រមោលនៅក្នុងវិមានក្រឹមឡាំងផងដែរ។
មានន័យថា មេដឹកនាំជំនាន់ក្រោយអាចនឹងទទួលយកការបញ្ចប់សង្គ្រាមរបស់អ៊ុយក្រែន និងពួកបស្ចិមប្រទេសដោយការកំណត់អធិបតេយ្យភាពជាមួយអ៊ុយក្រែនឡើងវិញ និងការកំណត់នយោបាយក្នុងតំបន់ឡើងវិញផងដែរ។
ត្រង់ចំណុចនេះ អ្នកវិភាគខ្លះមើលឃើញថា បើអ៊ុយក្រែនបែរជាឈ្នះសង្គ្រាម គឺរុស្ស៊ីក្លាយជាអ្នកចាញ់សង្គ្រាម ហើយចង់មិនចង់ គ្រីមៀរពិតជានឹងក្លាយទៅជាទឹកដីរបស់អ៊ុយក្រែនវិញ។ ដូចនេះគេនឹងរកឃើញពេលវេលានៃការបញ្ចប់សង្គ្រាមរវាងរុស្ស៊ី និងអ៊ុយក្រែន គឺមានអ្នកឈ្នះមានអ្នកចាញ់៕