29 C
Phnom Penh

គ្រួសារ​សាច់ញាតិ​លោក ទៀ បាញ់ កំពុង​គំរាម​ផែនការ​សន្តតិវង្ស​របស់​លោក ហ៊ុន សែន

ដោយ ឌឹ ខេមបូឌា ដេលី

បទវិភាគ

សារព័ត៌មាន​របស់​ប្រទេស​ជប៉ុន ឲ្យ​ដឹង​ថា គ្រួសារ​ត្រកូល ទៀ និង​គ្រួសារ​ត្រកូល ហ៊ុន កំពុង​មាន​ប៉ះទង្គិច​គ្នា​ក្នុង​ផែនការ​សន្តតិវង្ស​របស់​លោក ហ៊ុន សែន ស្រប​ពេល​ដែល​ចិន ហាក់​មិន​មាន​ជំនឿ​លើ​លោក ហ៊ុន ម៉ាណែត ជា​មេដឹកនាំ​ថ្មី​របស់​ប្រទេស​កម្ពុជា​ទៅ​ថ្ងៃ​មុខ។

គ្រួសារ​សាច់ញាតិ​របស់​លោក ទៀ បាញ់ រដ្ឋមន្ត្រី​ក្រសួង​ការពារ​ជាតិ កំពុងតែ​គំរាម​ផែនការ​របស់​លោក ហ៊ុន សែន ចង់​ដំឡើង​សាច់ញាតិ​របស់​លោក​នៅ​ក្នុង​ក្រសួង​ការពារ​ជាតិ ដែល​ធ្វើ​ឱ្យ​ស្ថាប័ន​នេះ​ធ្លាក់​ក្នុង​ឥទ្ធិពល​របស់​ចិន។

សារព័ត៌មាន​របស់​ជប៉ុន ASIA TIMES កាលពី​ថ្ងៃទី​៧ ខែ​មីនា បាន​ចុះផ្សាយ​ថា រដ្ឋមន្ត្រី​ក្រសួង​ការពារ​ជាតិ​កម្ពុជា លោក ទៀ បាញ់ ត្រូវ​បាន​រាយការណ៍​ថា លោក​បាន​រាំង​ខ្ទប់​ផែនការ​របស់​លោក ហ៊ុន សែន ដែល​ចង់​ដំឡើង​តួនាទី​ដ៏​ធំ​របស់​កូនប្រុស​គាត់​ម្នាក់​ក្នុង​ក្រសួង​ការពារ​ជាតិ។

ប្រភព​ដដែល​ឲ្យ​ដឹង​ថា គេ​សង្កេត​ឃើញ​ជម្លោះ​មួយ​កើតឡើង​នៅ​ក្នុង​សាច់ញាតិ​អ្នក​នយោបាយ​កំពូលៗ​នៃ​ប្រទេស​កម្ពុជា​ដែល​កំពុង​កាន់​អំណាច ដែល​មើល​ទៅ​ជា​ការ​តស៊ូ​មតិ​ប្រជែង​នឹង​ផែនការ​សន្តតិវង្ស​របស់​បុរស​ខ្លាំង លោក ហ៊ុន សែន ដែល​នាំ​ឱ្យ​មាន​ការ​ចោទ​សួរ​ថា តើ​ចិន​ពិត​ជា​គាំទ្រ​លោក ហ៊ុន សែន ឲ្យ​ផ្ទេរ​អំណាច​ទៅ​ឱ្យ​កូនប្រុស​ច្បង​របស់​លោក គឺ​លោក​ឧត្តមសេនីយ៍ឯក ហ៊ុន ម៉ាណែត ពិត​ដែរ​ឬ​ទេ?

ប្រភព​ដដែល​បន្ត​ថា ផែនការ​ពង្រឹង​សន្តតិវង្ស​នេះ​កំពុង​ដើរ​លើ​វិថី​ដ៏​លំបាក ដែល​មើល​ទៅ​ដូចជា​ល្បែង​ផ្លាស់ប្ដូរ​នយោបាយ​ដ៏​ស្រួចស្រាល់​មួយ​កំពុង​ផុស​ឡើង​នៅ​កម្ពុជា។

លោក​នាយករដ្ឋមន្ត្រី ហ៊ុន សែន និង​កូនប្រុស​ច្បង​របស់​លោក គឺ​លោក ហ៊ុន ម៉ាណែត និង​គណៈប្រតិភូ​កម្ពុជា ជួប​សម្ដែង​ការ​គួរសម​លោក ស៊ី ជីនពីង (Xi Jinping) ប្រធានាធិបតី​នៃ​សាធារណរដ្ឋ​ប្រជាមានិត​ចិន កាលពី​ថ្ងៃទី​១០ ខែ​កុម្ភៈ ឆ្នាំ​២០២៣ នៅ​ទីក្រុង​ប៉េកាំង ប្រទេស​ចិន។

យោង​តាម​ប្រភព​ជាច្រើន​ដែល​សុំ​មិន​បញ្ចេញ​អត្តសញ្ញាណ​បាន​អះអាង​ថា ខណៈ​នេះ​គ្រួសារ​សាច់ញាតិ​របស់​លោក​រដ្ឋមន្ត្រី​ការពារ​ជាតិ ទៀ បាញ់ កំពុងតែ​គំរាមកំហែង​ផែនការ​របស់​លោក ហ៊ុន សែន ដែល​ចង់​ដំឡើង​សាច់ញាតិ​របស់​លោក​នៅ​ក្នុង​ក្រសួង​ការពារ​ជាតិ ដែល​ធ្វើ​ឱ្យ​ស្ថាប័ន​នេះ​ធ្លាក់​ក្នុង​ឥទ្ធិពល​ចិន។

ប្រភព​ដដែល​លើកឡើង​ថា លោក ហ៊ុន សែន ឆ្នាំ​នេះ​មាន​អាយុ​ជាង ៧០​ឆ្នាំ​ហើយ ហើយ​លោក​កំពុង​មាន​ផែនការ​ផ្ទេរ​អំណាច​តំណែង​នាយករដ្ឋមន្ត្រី​ទៅ​ឱ្យ​កូនប្រុស​ច្បង​របស់​លោក គឺ​លោក ហ៊ុន ម៉ាណែត ដែល​បុរស​វ័យក្មេង​រូប​នេះ​មាន​ឋានៈ​ជា​មេបញ្ជាការ​កងទ័ព​ជើងគោក​នៃ​កងយោធពល​ខេមរភូមិន្ទ​កម្ពុជា ហើយ​បេក្ខភាព​របស់​លោក ហ៊ុន ម៉ាណែត ក៏​មាន​ការ​ទទួលស្គាល់​ទៅ​ហើយ​នៅ​ក្នុង​សមាជ​បក្ស​ប្រជាជន​កម្ពុជា​កាលពី​ចុង​ឆ្នាំ​២០២១។

ប្រភព​លាក់​អត្តសញ្ញាណ​មួយ​បាន​ទម្លាយ​ថា សាច់ញាតិ​មួយ​របស់​លោក ហ៊ុន សែន ដែល​សុំ​ដំឡើង​តួនាទី​ជាន់ខ្ពស់​ក្នុង​ក្រសួង​ការពារ​ជាតិ ត្រូវ​បាន​រាំង​ខ្ទប់ ដែល​ក្រសួង​នេះ​ស្ថិត​នៅ​ក្រោម​អំណាច​របស់​លោក ទៀ បាញ់។

នេះ​ជា​ការ​គំរាម​មួយ​ដល់​សាច់ញាតិ​របស់​លោក ហ៊ុន សែន ដែល​គេ​មើល​ឃើញ​ថា​ជា​ជម្លោះ​កើតឡើង​ពី​ការ​ដណ្ដើម​កាន់កាប់​គ្រប់គ្រង​ក្រសួង​ការពារ​ជាតិ​ទៅ​ថ្ងៃ​ខាងមុខ។

គេ​ជឿ​ថា ជម្លោះ​នេះ​ជា​ការ​បញ្ជូន​សារ​មួយ​ប្រាប់​ទៅ​លោក ហ៊ុន សែន ដែល​តែងតែ​ធ្វើការ​វះកាត់​សេចក្ដី​សម្រេច​ទៅ​លើ​ស្ថាប័ន​មួយ ដែល​លោក​យក​អំណាច​របស់​លោក​ជា​នាយករដ្ឋមន្ត្រី​ទៅ​ចាត់ចែង​លើ​អំណាច​រដ្ឋមន្ត្រី​របស់​ក្រសួង។

លោក ទៀ បាញ់ ដែល​កាន់​តំណែង​ជា​រដ្ឋមន្ត្រី​ក្រសួង​ការពារ​ជាតិ​ចាប់តាំងពី​ទសវត្ស​១៩៨០ មក គេ​ជឿ​ថា លោក​ជា​មន្ត្រី​បក្ស​កំពូល​មួយ​រូប​ដែរ​ដែល​គាំទ្រ​បេក្ខភាព​នាយករដ្ឋមន្ត្រី​របស់​លោក ហ៊ុន ម៉ាណែត។

លោក​នាយករដ្ឋមន្ត្រី ហ៊ុន សែន និង​លោក ទៀ បាញ់ រដ្ឋមន្ត្រី​ក្រសួង​ការពារ​ជាតិ ក្នុង​ពិធី​សម្ពោធ​ដាក់​ឲ្យ​ប្រើប្រាស់​ជា​ផ្លូវការ​អគារ​រដ្ឋបាល និង​សាល​ប្រជុំ​ទីស្ដីការ​ក្រសួង​ការពារ​ជាតិ នៅ​ថ្ងៃ​ទី​២៩ ខែ​ធ្នូ ឆ្នាំ​២០២១។ (រូបថត​ពី​ហ្វេសប៊ុក​លោក ហ៊ុន សែន)

នៅ​ក្នុង​បក្ស​ប្រជាជន​កម្ពុជា​មាន​មន្ត្រី​ជើងចាស់ និង​ថ្នាក់​ដឹកនាំ​ជាន់ខ្ពស់​ជាច្រើន​ដែល​មាន​បទពិសោធន៍ តែ​ដើម្បី​សាមគ្គីភាព​ក្នុង​បក្ស និង​ដើម្បី​ផល​ប្រយោជន៍​អំណាច​របស់​ខ្លួន ថ្នាក់​ដឹកនាំ​បក្ស​ទាំងអស់​នោះ​យល់ព្រម​ចំពោះ​សំណើ​របស់​លោក ហ៊ុន សែន ដែល​លើក​លោក ហ៊ុន ម៉ាណែត សម្រាប់​បេក្ខភាព​នាយករដ្ឋមន្ត្រី​ក្នុង​បក្ស។

ឧត្តមសេនីយ៍ ហ៊ុន ម៉ាណែត មាន​អាយុ ៤៤​ឆ្នាំ ជា​មេបញ្ជាការ​កងទ័ព​ជើងគោក និង​ជា​អគ្គបញ្ជាការរង​នៃ​កងយោធពល​ខេមរភូមិន្ទ​កម្ពុជា។ លោក ហ៊ុន ម៉ាណែត ក៏​ជា​ប្រធាន​យុវជន​របស់​បក្ស និង​ជា​អ្នក​គ្រប់គ្រង​ជំនួយ​សប្បុរសធម៌​របស់​បក្ស​ទៀត​ផង។

ចំណែក​កូនប្រុស​ម្នាក់​ទៀត​របស់​លោក ហ៊ុន សែន គឺ​លោក ហ៊ុន ម៉ានី។ លោក​ជា​សមាជិក​សភា និង​ជា​ប្រធាន​សម្ព័ន្ធ​យុវជន​កម្ពុជា។ រីឯ​កូនប្រុស​លោក ហ៊ុន សែន ម្នាក់​ទៀត​ឈ្មោះ ហ៊ុន ម៉ានិត ត្រូវ​បាន​ស្នើ​ដំឡើង​ឋានៈ​ស្មើ​នឹង​រដ្ឋមន្ត្រី​កាលពី​ខែ​ធ្នូ ឆ្នាំ​២០២២ ខណៈ​លោក​ជា​ប្រធាន​អង្គភាព​ចារកម្ម​របស់​ក្រសួង​ការពារ​ជាតិ​ផង​ដែរ​នោះ។

យ៉ាងណា លោក ទៀ បាញ់ និង​លោក ស ខេង រដ្ឋមន្ត្រី​ក្រសួង​មហាផ្ទៃ អ្នក​ទាំង​ពីរ​គឺជា​ឧបនាយករដ្ឋមន្ត្រី។ ពួកគាត់​ទាំង​ពីរ​នាក់​នេះ​ត្រូវ​គេ​មើល​ឃើញ​ថា បាន​គាំទ្រ​ផែនការ​ស្នង​តំណែង​របស់​លោក ហ៊ុន សែន ដោយ​ស្ថិត​ក្នុង​កាលៈទេសៈ​ពិសេស។

តែ​ឥឡូវ​នេះ ពួកគាត់​ទទួល​បាន​ការ​ធានា​ថា សាច់ញាតិ និង​កូនចៅ​របស់​ពួកគាត់​អាច​នឹង​ទទួល​បាន​ការ​គ្រប់គ្រង​ក្រសួង​របស់​ឪពុក​ដែល​កំពុង​កាន់កាប់ ឱ្យ​តែ​ពួកគាត់​ទាំង​ពីរ​យល់ព្រម​តាម​ផែនការ​ផ្ទេរ​អំណាច​របស់​លោក ហ៊ុន សែន ទៅ​ឱ្យ​កូនប្រុស​របស់​គាត់ គឺ​លោក ហ៊ុន ម៉ាណែត។

គេ​ជឿ​ថា កូនប្រុស​លោក ទៀ បាញ់ គឺ​លោក ទៀ សីហា ដែល​បច្ចុប្បន្ន​ជា​អភិបាល​ខេត្ត​សៀមរាប ក៏​អាច​នឹង​ក្លាយ​ជា​រដ្ឋមន្ត្រី​ការពារ​ជាតិ​ជំនួស​ឪពុក​របស់​ខ្លួន​ដែរ។ ការ​ស្នង​តំណែង​សម្រាប់​អ្នក​ជំនាន់​ក្រោយ​នេះ ក៏​អាច​ធ្លាក់​ដល់​ជំនាន់​ក្រោយ​ទៀត គឺ​រហូត​ដល់​ចៅ​ឯណោះ។ ប៉ុន្តែ​ការ​សន្យា​របស់​លោក ហ៊ុន សែន ក៏​មាន​ភាព​ស្មុគស្មាញ និង​មាន​ការ​ជំទាស់​ខ្លះៗ​ដែរ។

សារព័ត៌មាន Asia Times បាន​រាយការណ៍​មក​ថា ពលរដ្ឋ​ខ្មែរ​ដែល​មាន​សមត្ថភាព​អាច​គ្មាន​ឱកាស​នោះ​ទេ ហើយ​ពួកគេ​អាច​គិត​ថា​វា​សំខាន់​ណាស់​នៅ​ពេលនេះ​ដែល​ពួកគេ​ត្រូវ​គិត​ថា ខ្លួន​គួរ​មាន​ឱកាស​ដែរ ឬ​ក៏​អត់​នោះ។ ដូច្នេះ ភាព​លំបាក​អាច​មាន​ចំពោះ​ផែនការ​សន្តតិវង្ស ព្រោះ​យុវជន​កម្ពុជា​ភាគច្រើន​ក៏​មាន​សមត្ថភាព​ដែរ។

សារព័ត៌មាន​មួយ​នេះ​បាន​ធ្វើ​ការ​វិភាគ​ថា ឫសគល់​នៃ​ជម្លោះ​ក៏​អាច​កើតមាន​ទាក់ទង​ទៅ​នឹង​ឥទ្ធិពល​ចិន ដែល​ជា​មិត្ត​ដែកថែប​របស់​រដ្ឋាភិបាល​លោក ហ៊ុន សែន ជាមួយ​ក្រុម​មិន​និយម​ចិន។ មាន​កត្តា​ច្រើន​ទៀត​ដែល​លោក ហ៊ុន សែន ពិបាក​ត្រួសត្រាយ​ផ្លូវ​សម្រាប់​កូនប្រុស​របស់​គាត់។ ជាពិសេស ករណី​រដ្ឋការ​អាមេរិក​សង្ស័យ​ថា កម្ពុជា​បាន​ចុះហត្ថលេខា​សម្ងាត់​រួច​ទៅ​ហើយ​ជាមួយ​ចិន អំពី​ការ​ផ្ដល់​ឱ្យ​មាន​វត្តមាន​ទ័ព​ចិន​នៅ​មូលដ្ឋាន​ទ័ព​ជើងទឹក​រាម​កម្ពុជា ដែល​វា​បង្កើត​ឱ្យ​មាន​ឥទ្ធិពល​ចិន​នៅ​ក្នុង​តំបន់​អាស៊ី​អាគ្នេយ៍ ជាពិសេស​ប៉ះពាល់​ដល់​វៀតណាម និង​ប្រទេស​ថៃ ព្រោះ​ចិន ចង់​មាន​វត្តមាន​ទ័ព​របស់​ខ្លួន​នៅ​លើ​ទឹកដី​កម្ពុជា ដើម្បី​ឱ្យ​ចិន​មាន​កម្លាំង និង​អនុត្តរភាព​ជុំវិញ​ជម្លោះ​សមុទ្រ​ចិន​ខាងត្បូង។

បើ​ទោះ​ជា​កម្ពុជា និង​ចិន តែងតែ​ច្រានចោល​ការ​សង្ស័យ​របស់​អាមេរិក​ក៏ដោយ ប៉ុន្តែ​ក្រសួង​ការពារ​ជាតិ​របស់​អាមេរិក បញ្ជាក់​ច្បាស់​ហើយ​ថា មូលដ្ឋាន​ទ័ព​ជើងទឹក​រាម គឺជា​មូលដ្ឋាន​កងទ័ព​ជើងទឹក​របស់​ចិន នៅ​ក្នុង​ដែនដី​អាស៊ី​ប៉ាស៊ីហ្វិក​នេះ។

ផល​ប្រយោជន៍​របស់​ចិន​មាន​នៅ​កម្ពុជា​សឹង​គ្រប់​តំបន់ តែ​ចិន​ដូចជា​មិន​សប្បាយ​ចិត្ត​ច្រើន​ទេ បើ​ទោះបី​ក្នុង​ចំណោម​ថ្នាក់​ដឹកនាំ​កម្ពុជា​មួយ​ចំនួន​មិន​ទទួល​យក​នូវ​អ្វី​ដែល​ចិន​ចង់​បាន​ពី​កម្ពុជា។ លោក ហ៊ុន សែន កាលពី​ខែ​មុន​នេះ​បាន​ធ្វើ​ដំណើរ​ទៅ​កាន់​ទីក្រុង​ប៉េកាំង ហើយ​បាន​ជួប​នឹង​លោក ស៊ី ជីនពីង ដោយ​មាន​វត្តមាន​លោក ហ៊ុន ម៉ាណែត ដែរ។ នេះ​ជា​លើក​ទី​ពីរ​ហើយ​ដែល​លោក ហ៊ុន ម៉ាណែត បាន​ជួប​លោក ស៊ី នៅ​ក្រុង​ប៉េកាំង។

ប្រភព​ការទូត​មួយ​បាន​ប្រាប់ Asia Times ថា ក្រុង​ប៉េកាំង ដូចជា​មិន​ទាន់​គិត​ដល់​លោក ហ៊ុន ម៉ាណែត សក្ដិសម ឬ​អាច​ក្លាយ​ជា​មេដឹកនាំ​ថ្មី​របស់​កម្ពុជា​នៅឡើយ​ទេ បើ​ទោះជា​លោក​មាន​បរិញ្ញាបត្រ​ផ្នែក​យោធា​មកពី​សាលា West Point ក្នុង​សហរដ្ឋ​អាមេរិក​ក៏ដោយ ហើយ​ដែល​មើល​ទៅ ចិន​អាច​មិន​ទុកចិត្ត​ចំពោះ​បុគ្គល​ដែល​ស្នង​តំណែង​លោក ហ៊ុន សែន រូប​នេះ។

ជាមួយ​គ្នា​នេះ​ក៏​មាន​ការ​ចោទ​សួរ​អំពី​ឥទ្ធិពល​ចិន​នៅ​ក្នុង​ក្រសួង​ការពារ​ជាតិ​កម្ពុជា ហើយ​ថា​តើ​ចិន​ចង់​បាន​អ្វី​ពី​ក្រសួង​មួយ​នេះ​សម្រាប់​ថ្ងៃ​ខាងមុខ ព្រោះ​លោក ហ៊ុន ម៉ាណែត ដូចជា​នៅ​ខ្វះ​អ្នក​ស្មោះត្រង់​ក្នុង​ក្រសួង​មួយ​នេះ។

ចំណែក​ករណី​លោក ទៀ វិញ ប្អូនប្រុស​របស់​លោក ទៀ បាញ់ ជា​មេ​ទ័ព​ជើងទឹក​កម្ពុជា ត្រូវ​បាន​អាមេរិក​ដាក់​ទណ្ឌកម្ម​ករណី​ពុករលួយ ជុំវិញ​ការ​ស្ថាបនា​ឡើងវិញ​នូវ​មូលដ្ឋាន​ទ័ព​ជើងទឹក​រាម ដែល​ជា​ជំនួយ​របស់​ចិន។ ថ្មីៗ​នេះ​មាន​ការ​ចុះផ្សាយ​ជាច្រើន​អំពី​ការ​ជួញដូរ​មនុស្ស​ពាក់ព័ន្ធ​នឹង​ពលរដ្ឋ​ចិន​ចូល​មក​កម្ពុជា។

សាស្ត្រាចារ្យ​នៃ​សាកលវិទ្យាល័យ​រដ្ឋ Arizona សហរដ្ឋ​អាមេរិក លោក អៀ សុផុល បាន​ចោទ​ជា​សំណួរ​ថា តើ​លោក ស៊ី ពិត​ជា​គាំទ្រ​លោក ហ៊ុន ម៉ាណែត ជា​មេដឹកនាំ​ថ្មី​សម្រាប់​កម្ពុជា​ដែរ​ឬ​ទេ?

ចំណែក​អតីត​មេដឹកនាំ​បក្ស​ប្រឆាំង លោក សម រង្ស៊ី បាន​សរសេរ​លើ​ទំព័រ​ហ្វេសប៊ុក​របស់​លោក​ថា បើ​យោង​តាម​ការ​ចុះផ្សាយ​របស់​សារព័ត៌មាន Asia Times លោក ហ៊ុន សែន អាច​បញ្ជា​ឲ្យ​គេ​ចាប់​លោក ទៀ បាញ់ ជាក់​ជាមិនខាន បើ​គាត់​អាច​ធ្វើ​ទៅ​រួច។

លោក សម រង្ស៊ី បញ្ជាក់​ថា លោក ទៀ បាញ់ ដែល​មាន​ឋានៈ​ជា​រដ្ឋមន្ត្រី​ក្រសួង​ការពារ​ជាតិ​សព្វថ្ងៃ​នេះ​មាន​កងកម្លាំង​ប្រដាប់​អាវុធ​ក្រោម​បញ្ជា​គាត់​ពេញ​ដៃ ដូច្នេះ​ពួកគេ​ច្បាស់​ជា​ការពារ​គាត់​មិន​ឲ្យ​លោក ហ៊ុន សែន ចាប់​ខ្លួន​លោក ទៀ បាញ់ ជាដាច់ខាត។

សម រង្ស៊ី

រីឯ​អ្នកវិភាគ​ឯករាជ្យ និង​ជា​ប្រធាន​វេទិកា​ពលរដ្ឋ លោក គឹម សុខ ប្រាប់​សារព័ត៌មាន The Cambodia Daily ថា លោក ហ៊ុន សែន ពឹង​តែ​លើ​កងកម្លាំង​អង្គរក្ស​ដែល​គាត់​បង្កើត​ឡើង​ប៉ុណ្ណោះ ចំណែក​លោក ទៀ បាញ់ មាន​កម្លាំង​កងទ័ព​នៅ​ក្រសួង​ការពារ​ជាតិ​មួយ​ផ្នែក​ធំ​ដែល​គាំទ្រ​គាត់ ដូច្នេះ​ទោះ​លោក ហ៊ុន សែន ចង់​ចាប់​លោក ទៀ បាញ់ ក៏​មិន​ស្រួល​ពេក​នោះ​ដែរ។

អ្នកវិភាគ​ឯករាជ្យ​រូប​នេះ​បញ្ជាក់​ថា ផែនការ​លោក ហ៊ុន សែន គឺ​ក្តោប​ក្តាប់​អំណាច​ផ្ដាច់មុខ​តែ​ក្រុម​គ្រួសារ​គាត់​ប៉ុណ្ណោះ ដូច្នេះ​ប្រសិនបើ​លោក ទៀ បាញ់ លោក ស ខេង និង​អ្នកស្រី ម៉ែន សំអន មិន​រើបម្រះ​ពី​ពេលនេះ​ទេ ពួកគេ​នឹង​លែង​មាន​ឱកាស​ទៀត​ហើយ ព្រោះ​នៅ​ពេល​ដែល​គ្រួសារ​លោក ហ៊ុន សែន ក្តាប់​អំណាច​បាន​ពេញ​ដៃ សូម្បី​ពួកគេ​ចង់​ការពារ​ខ្លួន​ក៏​មិន​អាច​ការពារ​បាន​ដែរ។

កាលពី​ថ្ងៃទី​២៤ ខែ​ធ្នូ ឆ្នាំ​២០២១ គណបក្ស​ប្រជាជន​កម្ពុជា​បាន​សម្រេច​គាំទ្រ​លោក ហ៊ុន ម៉ាណែត ឱ្យ​ធ្វើ​ជា​បេក្ខភាព​នាយករដ្ឋមន្ត្រី​បន្ត​ពី​លោក ហ៊ុន សែន ប៉ុន្តែ​ការ​សម្រេច​នេះ​មាន​ការ​ទម្លាយ​ថា ដោយសារតែ​លោក ហ៊ុន សែន គំរាម និង​បញ្ចុះបញ្ចូល ដោយ​ការ​ដំឡើង​តំណែង​មន្ត្រី​ក្នុង​បក្ស​របស់​ខ្លួន​ដែល​ចង់​ចូល​មក​កាន់​តំណែង​នេះ​គ្រប់ៗ​គ្នា​តែប៉ុណ្ណោះ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស