បុរសខ្លាំងដែលចូលចិត្តអួតពីសន្តិភាពក្រោមអំណាចផ្ដាច់មុខ លោក ហ៊ុន សែន បន្តគំរាមតាមកម្ទេចអ្នកដែលមានបំណងបំផ្លាញសន្តិភាពរបស់ប្រទេសកម្ពុជាដោយមិនញញើត ទោះត្រូវប្រើវិធីបែបណា និងត្រូវលះបង់ក្នុងតម្លៃណាក៏ដោយ។
បុរសខ្លាំងក្តាប់អំណាចផ្ដាច់មុខនៅកម្ពុជា លោក ហ៊ុន សែន លើកឡើងក្នុងពិធីបុណ្យទន្លេនៅខេត្តកំពង់ធំ កាលពីថ្ងៃទី៩ មីនា ថា នរណាក៏ដោយដែលមានបំណង ឬធ្វើសកម្មភាពដើម្បីបំផ្លាញសន្តិភាពរបស់ប្រទេសកម្ពុជា លោកមិនញញើតក្នុងការប្រើគ្រប់មធ្យោបាយ និងគ្រប់វិធានការទាំងអស់ក្នុងការតបតជាមួយពួកគេឡើយ ដើម្បីរក្សានូវសន្តិភាព និងធានាដល់ការអភិវឌ្ឍប្រទេសកម្ពុជាទៅថ្ងៃមុខ។
មេដឹកនាំកម្ពុជាដែលសល់ពីរបបយង់ឃ្នង លោក ហ៊ុន សែន អះអាងថា សន្តិភាពមានតម្លៃជាងអ្វីៗទាំងអស់។ លោកបន្ថែមថា បើមិនមានសន្តិភាពទេ សូមកុំនិយាយដល់បញ្ហាសិទ្ធិមនុស្ស និងលទ្ធិប្រជាធិបតេយ្យឲ្យសោះ គឺអាចនិយាយបានត្រឹមតែសិទ្ធិរស់រានមានជីវិតប៉ុណ្ណោះ។
អតីតមេកម្មាភិបាលខ្មែរក្រហម លោក ហ៊ុន សែន បញ្ជាក់ថា ប្រជាជនកម្ពុជាធ្លាប់ឆ្លងកាត់សង្គ្រាម និងរបបប្រល័យពូជសាសន៍ ប៉ុល ពត កន្លងមក ច្បាស់ជាយល់អំពីអ្វីដែលរាជរដ្ឋាភិបាលចាត់វិធានការដើម្បីរក្សាសន្តិភាព ព្រោះថាសន្តិភាពត្រូវកើតមុនអ្វីៗទាំងអស់ ដូច្នេះមិនត្រូវឱ្យប្រទេសណាមួយ ឬក្រុមណាមួយមកបំផ្លាញសន្តិភាពនៅក្នុងប្រទេសនេះជាដាច់ខាត។
អតីតអ្នកទោសនយោបាយ និងជាមន្ត្រីជាន់ខ្ពស់គណបក្សសង្គ្រោះជាតិ លោក មាជ សុវណ្ណារ៉ា ប្រាប់សារព័ត៌មាន The Cambodia Daily ថា វិបត្តិសង្គមដែលបានកើតឡើងរាប់មិនអស់នៅកម្ពុជា គឺកើតមកតែពីអ្នកនយោបាយ និងអ្នកដឹកនាំប្រទេសដែលមិនយកច្បាប់របស់ប្រទេសជាតិជាគោលការណ៍ក្នុងការដឹកនាំប៉ុណ្ណោះ។ លោកបន្តថា ដោយសារតែបែបនេះហើយ បាននាំឲ្យមានជម្លោះបុគ្គល និងបុគ្គល ដែលបញ្ហានេះនឹងមិនអាចឲ្យកម្ពុជាទទួលបាននូវសន្តិភាពពិតប្រាកដបានទេ។
លោក មាជ សុវណ្ណារ៉ា អះអាងថា លោកមានតែអបអរសាទរទៅវិញទេចំពោះការប្រកាសរក្សាសន្តិភាពរបស់លោកនាយករដ្ឋមន្ត្រី ហ៊ុន សែន ប៉ុន្តែគាត់ក៏គួរតែបង្ហាញឲ្យច្បាស់ដែរថា តើគាត់នឹងចាប់ដៃគូនយោបាយបែបណាជាមួយមេដឹកនាំនយោបាយដែលមានឥទ្ធិពលនៅកម្ពុជា ដើម្បីឲ្យកម្ពុជាមានសន្តិភាពពិតប្រាកដ និងយូរអង្វែងទៅថ្ងៃមុខ ជាមេដឹកនាំដែលចូលចិត្តប្រើអំពើហិង្សា ការជេរប្រមាថ ការលាបពណ៌ ឬជាមេដឹកនាំដែលប្រកាន់គោលការណ៍អហិង្សា។
មន្ត្រីជាន់ខ្ពស់បក្សប្រឆាំងរូបនេះបញ្ជាក់ថា ដើម្បីឲ្យមានសន្តិភាពយូរអង្វែងគ្មានអ្វីក្រៅពីអ្នកនយោបាយ និងមេដឹកនាំប្រទេសដាក់តុចរចាគ្នា និងអនុវត្តទៅតាមច្បាប់ដែលខ្លួនមាន ដើម្បីប្រកួតប្រជែងដោយស្មោះត្រង់ដោយតម្កល់ប្រយោជន៍ជាតិជាធំនោះទេ។
ទាក់ទិននឹងបញ្ហានេះ អ្នកវិភាគឯករាជ្យ និងជាប្រធានវេទិកាពលរដ្ឋ លោក គឹម សុខ ធ្លាប់អះអាងកាលពីពេលថ្មីៗនេះថា ដើម្បីឱ្យកម្ពុជាមានសន្តិភាព និងមានស្ថិរភាពនយោបាយពិតប្រាកដ ទាល់តែកិច្ចព្រមព្រៀងសន្តិភាពទីក្រុងប៉ារីសឆ្នាំ១៩៩១ និងរដ្ឋធម្មនុញ្ញរបស់កម្ពុជា ត្រូវបានរដ្ឋាភិបាលយកទៅអនុវត្តឱ្យបានពេញលេញ។
លោក គឹម សុខា លើកឡើងថា ការគ្រប់គ្រង និងការគាបសង្កត់របស់លោក ហ៊ុន សែន ដែលដឹកនាំដោយការរំលោភទៅលើកិច្ចព្រមព្រៀងសន្តិភាពទីក្រុងប៉ារីសឆ្នាំ១៩៩១ និងរដ្ឋធម្មនុញ្ញរបស់កម្ពុជាយ៉ាងព្រៃផ្សៃសព្វថ្ងៃនេះ គឺជាភស្តុតាងយ៉ាងជាក់ច្បាស់ពីការបំផ្លាញសន្តិភាព និងបង្កអសន្តិសុខធ្ងន់ធ្ងរដល់ប្រទេសកម្ពុជាទាំងមូល។
ទាក់ទិននឹងបញ្ហានេះ អតីតប្រធានសហភាពសហជីពកម្ពុជា លោក រ៉ុង ឈុន បានអះអាងកាលពីពេលថ្មីៗនេះថា ពិតមែនតែកម្ពុជាមិនមានសំឡេងគ្រាប់ផ្លោងដាក់គ្នា ប៉ុន្តែកម្ពុជាដែលក្រោមការដឹកនាំរបស់បក្សកាន់អំណាច ធ្វើឱ្យមានសំឡេងទ្រហោយំរបស់ប្រជាពលរដ្ឋខ្មែរគ្រប់ទីកន្លែង ដោយសារការរំលោភយកដីធ្លី ការចាប់ឃុំខ្លួនអ្នកតវ៉ាដើម្បីសេរីភាព និងការបិទខ្ទប់សេរីភាពបញ្ចេញមតិគ្រប់បែបយ៉ាង ជាដើម។
កម្ពុជាដែលក្រោមការដឹកនាំរបស់គណបក្សកាន់អំណាចដែលមានលោក ហ៊ុន សែន ជាមេដឹកនាំជាង ៤០ឆ្នាំមកនេះ បានជាប់ក្នុងបញ្ជីអាក្រក់របស់ពិភពលោកជាបន្តបន្ទាប់ ដូចជាការប្រព្រឹត្តអំពើពុករលួយត្រូវអង្គការតម្លាភាពអន្តរជាតិដាក់ពិន្ទុឲ្យជាប់ចំណាត់ថ្នាក់លេខ១៥០ ក្នុងចំណោមប្រទេស១៨០។
ដោយឡែកសេរីភាពសារព័ត៌មាននៅកម្ពុជា ក៏ត្រូវអង្គការអ្នកសារព័ត៌មានគ្មានព្រំដែន ដាក់ឲ្យជាប់ចំណាត់ថ្នាក់លេខ១៤២ ក្នុងចំណោមប្រទេស១៨០ ស្របពេលដែលនីតិរដ្ឋរបស់កម្ពុជា ក៏ត្រូវអង្គការគម្រោងយុត្តិធម៌ពិភពលោក ដាក់ចំណាត់ថ្នាក់លេខ១៣៩ ក្នុងចំណោមប្រទេស១៤០ ដែរ ដែលសុទ្ធតែចំណាត់ថ្នាក់អាក្រក់ទាំងអស់៕