 របស់អ្នកស្រី អ៊ុងសាន ស៊ូជី ពីសំណាក់របបសឹកភូមានៅពេលនេះ គឺជាសមិទ្ធផលនៃដំណើរទស្សនកិច្ចរបស់មេដឹកនាំខ្មែរ លោក ហ៊ុន សែន ទៅជួបមេរដ្ឋប្រហារយោធាភូមាកាលពីដើមឆ្នាំ២០២២ ដែលគាត់ធ្វើជាប្រធានអាស៊ានប្តូរវេននៅពេលនោះ។){kind=link}
ក្រុមអ្នកសង្កេតការណ៍លើកឡើងថា ការរំលាយគណបក្សសម្ព័ន្ធជាតិដើម្បីប្រជាធិបតេយ្យ (NLD) របស់អ្នកស្រី អ៊ុងសាន ស៊ូជី ពីសំណាក់របបសឹកភូមានៅពេលនេះ គឺជាសមិទ្ធផលនៃដំណើរទស្សនកិច្ចរបស់មេដឹកនាំខ្មែរ លោក ហ៊ុន សែន ទៅជួបមេរដ្ឋប្រហារយោធាភូមាកាលពីដើមឆ្នាំ២០២២ ដែលគាត់ធ្វើជាប្រធានអាស៊ានប្តូរវេននៅពេលនោះ។
អនុប្រធានវេទិកាពលរដ្ឋ លោក ម៉ែន ណាត ប្រាប់សារព័ត៌មាន The Cambodia Daily នៅថ្ងៃទី២៩ មីនា នេះថា ការប្រកាសរំលាយគណបក្សរបស់អ្នកស្រី អ៊ុងសាន ស៊ូជី នេះ គឺជាបង្អែកមួយដែលអាចជួយលោក ហ៊ុន សែន សម្រាប់ដោះសានៅពេលដែលសហគមន៍អន្តរជាតិទាមទារឱ្យរដ្ឋាភិបាលរបស់គាត់គោរពសិទ្ធិមនុស្ស និងលើកស្ទួយលទ្ធិប្រជាធិបតេយ្យនៅកម្ពុជានៅពេលក្រោយ។
លោកបន្ថែមថា បើមានការទាមទារបន្តទៀតពីសហគមន៍អន្តរជាតិឱ្យរដ្ឋាភិបាលរបស់គាត់គោរពសិទ្ធិមនុស្ស និងលើកស្ទួយលទ្ធិប្រជាធិបតេយ្យ លោក ហ៊ុន សែន ក៏អាចនឹងជំរុញឱ្យពួកគេទៅទាមទារឱ្យរបបសឹកភូមាគោរពលទ្ធិប្រជាធិបតេយ្យដែរ ក្នុងនាមភូមាជាប្រទេសដែលជាសមាជិកអាស៊ានដែរនោះ។
លោក ម៉ែន ណាត ព្រមានថា លោក ហ៊ុន សែន នឹងប្រើអំណាចទំនើងចិត្តរបស់គាត់កាន់តែខ្លាំង ដើម្បីបង្ក្រាបអ្នកដែលប្រឆាំងនឹងការដឹកនាំរបស់គាត់ ហើយគាត់នឹងយកប្រទេសភូមាធ្វើគំរូ ប្រសិនបើរបបសឹកភូមាអនុវត្តទៅហើយគ្មានការដាក់ទណ្ឌកម្មណាមួយពីប្រទេសលោកសេរីទេ នោះលោក ហ៊ុន សែន នឹងបន្តការរំលោភច្បាប់ រំលោភសិទ្ធិមនុស្ស និងជាន់ឈ្លីលទ្ធិប្រជាធិបតេយ្យកាន់តែខ្លាំងជាងនេះបន្ថែមទៀត ជាពិសេសគឺដើម្បីធានាសុវត្ថិភាពការផ្ទេរអំណាចទៅកូនរបស់គាត់នៅពេលខាងមុខនេះតែម្តង។
ទីភ្នាក់ងារសារព័ត៌មាន AFP ចុះផ្សាយនៅថ្ងៃទី២៩ ខែមីនា ឆ្នាំ២០២៣ ថា គណៈកម្មការរៀបចំការបោះឆ្នោតដែលគ្រប់គ្រងដោយរបបសឹកភូមា បានប្រកាសថា គណបក្សរបស់អ្នកស្រី អ៊ុងសាន ស៊ូជី នឹងត្រូវបានរំលាយចោល ដោយសារតែគណបក្សនេះបរាជ័យក្នុងការចុះបញ្ជីគណបក្សនយោបាយឈរឈ្មោះបោះឆ្នោតឡើងវិញនៅក្រោមច្បាប់បោះឆ្នោតថ្មីរបស់របបសឹកភូមា។
ទាក់ទិននឹងបញ្ហានេះ ទូរទស្សន៍ Myawaddy TV របស់ភូមា បានចុះផ្សាយកាលពីថ្ងៃទី២៨ ខែមីនា ឆ្នាំ២០២៣ ថា គណបក្សសម្ព័ន្ធជាតិដើម្បីប្រជាធិបតេយ្យ (NLD) របស់អ្នកស្រី អ៊ុងសាន ស៊ូជី ស្ថិតនៅក្នុងចំណោមគណបក្សនយោបាយចំនួន៤០ ដែលមិនបានបំពេញតាមក្រឹត្យក្រមនៃកាលបរិច្ឆេទចុះបញ្ជីសម្រាប់ការបោះឆ្នោតសកល។
ការរំលាយគណបក្សដែលជាគូបដិបក្ខនឹងខ្លួននេះ ធ្វើឡើងដូចគ្នាទៅនឹងការរំលាយគណបក្សសង្គ្រោះជាតិដែលជាគណបក្សប្រឆាំងដ៏ធំនៅកម្ពុជាកាលពីឆ្នាំ២០១៧ ដែរ បន្ទាប់ពីដំណើរទស្សនកិច្ចរបស់លោក ហ៊ុន សែន ក្នុងនាមប្រធានអាស៊ានឆ្នាំ២០២២ ទៅកាន់ប្រទេសភូមា កាលពីអំឡុងខែមករា ឆ្នាំ២០២២ កន្លងទៅនោះ។
ក្នុងជំនួបរវាងលោក ហ៊ុន សែន និងលោក មីន អ៊ុងឡាំង ក្នុងដំណើរទស្សនកិច្ចនៅពេលនោះ ត្រូវគេសង្ស័យថា លោក ហ៊ុន សែន មិនបានសម្រួលឱ្យមានការដោះស្រាយវិបត្តិនៅភូមាទេ ប៉ុន្តែគាត់ទំនងជាផ្តល់មេរៀនដល់របបសឹកភូមា ឱ្យរៀនគ្រប់គ្រងអំណាចឱ្យកាន់តែរឹងមាំដូចលោក ហ៊ុន សែន ខ្លួនឯងកំពុងអនុវត្តនៅកម្ពុជាសព្វថ្ងៃនេះទៅវិញ។
អគ្គលេខាធិការវេទិកាពលរដ្ឋ លោក អ៊ាប គឹមសេង ធ្លាប់បានលើកឡើងមុនដំណើរទស្សនកិច្ចរបស់លោក ហ៊ុន សែន ទៅជួបមេដឹកនាំរបបសឹកភូមា កាលពីដើមខែមករា ឆ្នាំ២០២២ ថា លោក ហ៊ុន សែន នឹងណែនាំឱ្យមេរដ្ឋប្រហារយោធាភូមា លោក មីង អ៊ុងឡាំង ប្រើល្បិចកលដែលគាត់ធ្លាប់ធ្វើក្នុងការរំលាយគណបក្សសង្គ្រោះជាតិ ឱ្យរបបសឹកភូមារំលាយបក្សរបស់អ្នកស្រី អ៊ុងសាន ស៊ូជី ជាមិនខាន។
លោក អ៊ាប គឹមសេង បញ្ជាក់ថា ក្រៅពីណែនាំឱ្យប្រើល្បិចរំលាយគណបក្សរបស់អ្នកស្រី អ៊ុងសាន ស៊ូជី លោក ហ៊ុន សែន ក៏នឹងណែនាំឱ្យមេរដ្ឋប្រហារយោធាភូមា បង្កើតការបោះឆ្នោតមួយដើម្បីបន្លំភ្នែកអន្តរជាតិ ដែលធ្វើឡើងក្រោមការរៀបចំរបស់មេរដ្ឋប្រហារយោធាភូមា ដោយគ្មានវត្តមានគណបក្សរបស់អ្នកស្រី អ៊ុងសាន ស៊ូជី និងបង្កើតបក្សតូចៗឲ្យចូលរួមការបោះឆ្នោតលំអសួនផ្ដាច់ការដូចដែលលោក ហ៊ុន សែន ធ្វើនៅកម្ពុជាសព្វថ្ងៃនេះដែរ។
ទាក់ទិននឹងបញ្ហានេះ ទីភ្នាក់ងារព័ត៌មាន AFP បានចុះផ្សាយកាលពីថ្ងៃទី២៧ ខែមីនា ឆ្នាំ២០២៣ អំឡុងពិធីព្យុហយាត្រាថា មេដឹកនាំផ្ដាច់ការភូមា លោក មីន អ៊ុងឡាំង បានប្រកាសប្ដេជ្ញាថានឹងមិនបន្ធូរបន្ថយដាច់ខាតក្នុងការបង្ក្រាបក្រុមចលនាប្រឆាំង ហើយបានសន្យាជាថ្មីថា របបសឹកភូមានឹងរៀបចំឱ្យមានការបោះឆ្នោតសកលមួយនាពេលខាងមុខនេះ៕