32 C
Phnom Penh

គយ​ប្រមូល​ចំណូល​ពន្ធ​បាន​ជាង​៥០០​លាន​ដុល្លារ​ក្នុង​រយៈពេល​៣​ខែ​ដំបូង​ឆ្នាំ​២០២៣

ដោយ ឌឹ ខេមបូឌា ដេលី

បទវិភាគ

អគ្គនាយក​នៃ​អគ្គនាយកដ្ឋាន​គយ និង​រដ្ឋាករ​កម្ពុជា អះអាង​ថា ខ្លួន​ប្រមូល​ចំណូល​ពន្ធ​បាន​ចំនួន​ជាង ២៣០០​ប៊ី​លាន​រៀល ដែល​ស្មើ​នឹង​ប្រមាណ​ជាង ៥០០​លាន​ដុល្លារ​អាមេរិក​នៅ​ក្នុង​ត្រីមាស​ទី​១ ឆ្នាំ​២០២៣ នេះ។

អគ្គនាយក​នៃ​អគ្គនាយកដ្ឋាន​គយ និង​រដ្ឋាករ​កម្ពុជា លោក គុណ ញឹម បាន​លើកឡើង​ក្នុង​កិច្ចប្រជុំ​បូក​សរុប​លទ្ធផល​ការងារ​គយ និង​រដ្ឋាករ​កម្ពុជា​សម្រាប់​ត្រីមាស​ទី​១ ឆ្នាំ​២០២៣ កាលពី​ថ្ងៃទី​១១ មេសា កន្លងទៅ​ថា ពន្ធ​ដែល​អគ្គនាយក​នៃ​អគ្គនាយកដ្ឋាន​គយ និង​រដ្ឋាករ​កម្ពុជា​ប្រមូល​បាន​ពី​ការ​នាំចូល​មក​កម្ពុជា ដូចជា​យានយន្ត គ្រឿងចក្រ គ្រឿងសំណង់ និង​របស់​ផ្សេង​ទៀត​ជាច្រើន។

លោក គុណ ញឹម អះអាង​ថា ក្រៅពី​ការ​ប្រមូល​ពន្ធ​ពី​ការ​នាំចូល អគ្គនាយកដ្ឋាន​គយ និង​រដ្ឋាករ​កម្ពុជា ក៏​ទទួល​បាន​ប្រាក់ចំណូល​ពី​ការ​នាំចេញ​របស់​កម្ពុជា​ផង​ដែរ ដូចជា​ផលិតផល​កាត់ដេរ ផលិតផល​វិនិយោគ​មិនមែន​កាត់ដេរ ដូចជា​គ្រឿង​បំណែក​អេឡិចត្រូនិក បង្គំ​ខ្សែភ្លើង កង់ ផលិតផល​ពី​ឈើ និង​ផលិតផល​ជាច្រើន​ទៀត។ បន្ថែម​ពី​នេះ​ក៏​មាន​កសិផល​របស់​កម្ពុជា​ដែរ ដូចជា​ស្រូវ អង្ករ និង​កៅស៊ូ ជាដើម។

កាលពី​អំឡុង​ឆ្នាំ​២០២២ អគ្គនាយក​នៃ​អគ្គនាយកដ្ឋាន​គយ និង​រដ្ឋាករ​កម្ពុជា លោក គុណ ញឹម បាន​អះអាង​ថា ក្នុង​ត្រីមាស​ទី​១ ឆ្នាំ​២០២២ អគ្គនាយកដ្ឋាន​គយ និង​រដ្ឋាករ​កម្ពុជា​ប្រមូល​ចំណូល​គិត​ជា​ទឹកប្រាក់​មាន​ចំនួន​ជិត ៦០០​លាន​ដុល្លារ​សហរដ្ឋ​អាមេរិក។ លោក​បន្ថែម​ថា ក្នុង​ចំណូល​ទាំងនោះ​មាន​តែ​ខែ​មេសា​មួយ​គត់​ដែល​អគ្គនាយកដ្ឋាន​គយ និង​រដ្ឋាករ​កម្ពុជា ប្រមូល​ប្រាក់​ចំណូល​ពន្ធ​រហូត​ដល់​ទៅ ២២០​លាន​ដុល្លារ​អាមេរិក។

យុទ្ធសាស្ត្រ​ស្ដីពី​អនុលោមភាព និង​ការ​អនុវត្ត​ច្បាប់​ឆ្នាំ​២០២០ ដល់​ឆ្នាំ​២០២៣ នៃ​អគ្គនាយកដ្ឋាន​គយ និង​រដ្ឋាករ​កម្ពុជា បញ្ជាក់​ថា ដើម្បី​ពង្រឹង​ប្រសិទ្ធភាព​នៃ​ការ​ប្រមូល​ចំណូល​ពន្ធ និង​អាករ ក៏ដូចជា​ការ​ធានា​នូវ​ការ​ប្រកួតប្រជែង​ដោយ​ស្មើ​ភាព​ក្នុង​ការ​ធ្វើ​ពាណិជ្ជកម្ម ការពារ​សន្តិសុខ​សុវត្ថិភាព​សង្គម អគ្គនាយកដ្ឋាន​គយ និង​រដ្ឋាករ​កម្ពុជា​បាន​ដាក់​ចេញ​នូវ​វិធានការ​លើក​កម្ពស់​ក្នុង​ការ​ទប់ស្កាត់ និង​បង្ការ​រាល់​បទល្មើស​រត់​គេច​ពន្ធ បន្លំ​ពន្ធ និង​បទល្មើស​ឆ្លងដែន​យ៉ាង​ហ្មត់ចត់ ដូចជា​ឃ្លាំមើល​តាម​តំបន់​ភូមិសាស្ត្រ​ដែល​មាន​ហានិភ័យ​ខ្ពស់ លើក​កម្ពស់​ការ​យល់ដឹង​ជា​សាធារណៈ និង​ការ​អនុវត្ត​នីតិវិធី​បំពេញ​បែបបទ​បញ្ចេញ​ទំនិញ​គយ ជាដើម។

យ៉ាងណា​ក៏ដោយ កាលពី​អំឡុង​ខែ​កុម្ភៈ ឆ្នាំ​២០២៣ មន្ត្រី​នៃ​អគ្គនាយកដ្ឋាន​គយ និង​រដ្ឋាករ​នៅ​កម្ពុជា​ជាច្រើន​បាន​លាតត្រដាង​ថា ក្រោយ​ពេល​ចូល​កាន់​តំណែង​ជា​អគ្គនាយក​នៃ​អគ្គនាយកដ្ឋាន​គយ លោក គុណ ញឹម បាន​ប្រព្រឹត្ត និង​កំពុងតែ​ប្រព្រឹត្ត​អំពើពុករលួយ​តាម​គ្រប់​រូបភាព ដែល​ធ្វើ​ឲ្យ​លោក​នាយករដ្ឋមន្ត្រី ហ៊ុន សែន មាន​ការ​ពេញចិត្ត​ពេញ​ថ្លើម​យ៉ាង​ខ្លាំង រហូត​ប្រកាស​បន្ត​តំណែង​ឱ្យ​លោក គុណ ញឹម ធ្វើជា​អគ្គនាយក​នៃ​អគ្គនាយកដ្ឋាន​គយ និង​រដ្ឋាករ​កម្ពុជា​ដល់​ឆ្នាំ​២០២៥ បន្ត​ទៀត។

ប្រភព​ផ្ទៃក្នុង​ខាងលើ​បាន​លាតត្រដាង​ថា លោក គុណ ញឹម បាន​បង្កើត​ឲ្យ​មាន​ក្រុម​ពីរ​បែប​ដើម្បី​ប្រព្រឹត្ត​អំពើពុករលួយ​ស្រប​ច្បាប់ ដូចជា​ការ​បង្កើត​ក្រុម​អនុលោម ដើម្បី​ជំរិត​ទារ​លុយ​ពី​ក្រុមហ៊ុន និង​អ្នក​រកស៊ី​នាំ​ទំនិញ​ចេញ​ចូល​តូច​ធំ​ដែល​គ្មាន​ខ្នងបង្អែក និង​ក្រុម​រត់ការ​ពន្យារ​អាយុ​ដើម្បី​បន្ត​ពេល​កាន់​តំណែង​ក្នុង​ស្ថាប័ន​គយ​ផង​ដែរ។

ប្រភព​ដដែល​បាន​ឲ្យ​ដឹង​ថា លោក ប៉ោ សួន ដែល​ជា​ប្រធាន​ក្រុម​អនុលោម កំពុង​ក្លាយ​ជា​សេនាធិការ​ជំនួស​មុខ​ឲ្យ​លោក គុណ ញឹម និង​លោក អូន ព័ន្ធមុនីរ័ត្ន ក្នុង​ល្បែង​ប្រព្រឹត្ត​អំពើពុករលួយ​ជា​ប្រព័ន្ធ ដោយ​ហ៊ាន​ដើរ​បង្ខំ​ទារ​លុយ​ត្រង់ៗ​ពី​ក្រុមហ៊ុន និង​អ្នក​រកស៊ី​តូច​ធំ​ដែល​គ្មាន​ខ្នងបង្អែក ដើម្បី​យក​ទៅ​ចែក​ផលប្រយោជន៍​ចែក​លាភ​គ្នា​ជាមួយ​មេៗ​ស្ថាប័ន​ខាងលើ​យ៉ាង​អនាធិបតេយ្យ​សព្វថ្ងៃ​នេះ។

ផ្អែក​តាម​ប្រភព​ផ្ទៃក្នុង​នៃ​មន្ត្រី​គយ​កម្ពុជា បាន​ប្រាប់ The Cambodia Daily ថា គ្រាន់តែ​ប្រធាន​គយ​ចល័ត លោក កើត សុធារ៉ា ដែល​នៅ​ក្រោម​ការ​ត្រួតពិនិត្យ​របស់​លោក ប៉ោ សួន នោះ អាច​កើប​ប្រាក់​បាន​យ៉ាងតិច ១០​ម៉ឺន​ដុល្លារ​ឯណោះ​ក្នុង​មួយ​ថ្ងៃៗ ដើម្បី​យក​ទៅ​ចែក​ឲ្យ​មេៗ​ខាងលើ។

ប្រភព​ដដែល​ទម្លាយ​ថា កម្រិត ឬ​ថ្នាក់​ការិយាល័យ នាយកដ្ឋាន និង​សាខា​គយ​ខណ្ឌ​ជាដើម ក៏​ត្រូវ​ចំណាយ​ប្រាក់​សូកប៉ាន់​យ៉ាងតិច ១០​ម៉ឺន​ដុល្លារ​ដែរ ចំណែក​ប៉ុស្តិ៍​មេ​គយ​រាជធានី​ភ្នំពេញ និង​មេ​គយ​ខេត្ត ដូចជា​ខេត្ត​ព្រះសីហនុ និង​ខេត្ត​បន្ទាយមានជ័យ ជាដើម ដណ្ដើម​គ្នា​សូកប៉ាន់​រក​កន្លែង​ខ្លាញ់​រហូត​ដល់ ១​លាន ៥​សែន ទៅ ២​លាន​ដុល្លារ​ឯណោះ។ ជាង​នេះ​ទៀត ករណី​សូកប៉ាន់​ពន្យារ​អាយុ​វិញ ស្ថាប័ន​គយ​ក៏​កំពុង​នាំមុខ​គេ​ដែរ​ក្នុង​រឿង​អាស្រូវ​នេះ ដូចជា​ករណី​ប្រធាន​ក្រុម​អនុលោម លោក ប៉ោ សួន ជាដើម។

កាលពី​ថ្ងៃទី​២៥ ខែ​មករា ឆ្នាំ​២០២២ កន្លងទៅ អង្គការ​តម្លាភាព​អន្តរជាតិ (Transparency International) បាន​លាតត្រដាង​ថា ប្រទេស​កម្ពុជា​បាន​ជាប់​ចំណាត់ថ្នាក់​លេខ​១៥៧ ក្នុង​ចំណោម​ប្រទេស​ចំនួន​១៨០ នៅ​លើ​ពិភពលោក ទាក់ទង​នឹង​ការ​ប្រព្រឹត្ត​អំពើពុករលួយ​ក្នុង​ឆ្នាំ​២០២១ កន្លងទៅ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស