អតីតមេដឹកនាំបក្សប្រឆាំង លោក សម រង្ស៊ី អំពាវនាវកុំឱ្យសហគមន៍អន្តរជាតិទទួលស្គាល់ការបោះឆ្នោតជាតិនៅកម្ពុជានាពេលខាងមុខនេះ និងអំពាវនាវមិនឱ្យទទួលស្គាល់រដ្ឋាភិបាលថ្មីដែលកើតចេញពីការបោះឆ្នោតនេះផងដែរ ដោយលោកចាត់ទុកថាជាការបោះឆ្នោតដ៏អាក្រក់បំផុត និងជាការបោះឆ្នោតក្លែងក្លាយប៉ុណ្ណោះ។
អតីតមេដឹកនាំបក្សប្រឆាំង លោក សម រង្ស៊ី បានសរសេរលើទំព័រហ្វេសប៊ុករបស់ខ្លួននៅថ្ងៃទី៩ ឧសភា ឆ្នាំ២០២៣ នេះថា ដើម្បីឱ្យការបោះឆ្នោតជ្រើសរើសតំណាងរាស្ត្រនៅកម្ពុជាប្រព្រឹត្តទៅដោយស្មោះត្រង់ គឺមិនត្រូវឱ្យមានការរៀបចំជាប្រព័ន្ធ និងការក្លែងបន្លំពីសំណាក់អាជ្ញាធរដែលបានលាក់បាំង ឬបំភ្លៃឆន្ទៈម្ចាស់ឆ្នោតដូចអ្វីដែលរដ្ឋាភិបាលលោក ហ៊ុន សែន កំពុងរៀបចំនៅពេលនេះឡើយ។
អតីតមេដឹកនាំបក្សប្រឆាំងរូបនេះលើកឡើងថា ប្រសិនបើប្រជាជនកម្ពុជាពិតជាត្រូវបានអនុញ្ញាតឱ្យជ្រើសរើសអនាគតរបស់ពួកគេនៅក្នុងការបោះឆ្នោតនាពេលខាងមុខនេះដោយសេរី ត្រឹមត្រូវ និងយុត្តិធម៌ស្របតាមដំណើរការលទ្ធិប្រជាធិបតេយ្យ នោះអ្វីៗគ្រប់យ៉ាងនឹងល្អ។
លោក សម រង្ស៊ី បញ្ជាក់ថា ការបោះឆ្នោតដែលនឹងត្រូវរៀបចំឡើងនៅកម្ពុជាក្នុងខែកក្កដា ឆ្នាំ២០២៣ ខាងមុខនេះ គឺជាប់ពាក់ព័ន្ធនឹងការបាត់បង់អំណាចរបស់មេដឹកនាំបក្សកាន់អំណាចលោក ហ៊ុន សែន យ៉ាងខ្លាំង បន្ទាប់ពីគាត់បានគ្រប់គ្រងប្រទេសកម្ពុជាតាមរបៀបផ្ដាច់ការក្នុងតំណែងជានាយករដ្ឋមន្ត្រីអស់រយៈពេល ៣៨ឆ្នាំមកនេះ។
កាលពីថ្ងៃទី២៩ ខែមិថុនា ឆ្នាំ២០២២ ប្រមុខរដ្ឋាភិបាលកម្ពុជា លោក ហ៊ុន សែន បានចេញអនុក្រឹត្យស្ដីពីការកំណត់កាលបរិច្ឆេទនៃការបោះឆ្នោតជាតិអាណត្តិទី៧ ដែលបានកំណត់យកថ្ងៃអាទិត្យ ទី២៣ ខែកក្កដា ឆ្នាំ២០២៣ ជាថ្ងៃបោះឆ្នោតជ្រើសតាំងតំណាងរាស្ត្រទៅតាមអាណត្តិរបស់ខ្លួនដែលមានរយៈពេល ៥ឆ្នាំម្តងដូចអាណត្តិមុនៗ។
ការបោះឆ្នោតជ្រើសតាំងតំណាងរាស្ត្រក្នុងអាណត្តិទី៧ នេះ គណបក្សដែលមានសក្ដានុពលនៅកម្ពុជា គឺមានតែបក្សប្រជាជនកម្ពុជារបស់លោក ហ៊ុន សែន តែមួយគត់ដែលចូលរួម ខណៈគណបក្សសង្គ្រោះជាតិដែលត្រូវគេចាត់ទុកជាគណបក្សប្រឆាំងដ៏ធំនៅកម្ពុជា ត្រូវតុលាការរំលាយ ចំណែកមេដឹកនាំបក្សប្រឆាំង លោក កឹម សុខា ក៏ត្រូវកាត់ទោសឱ្យជាប់គុក ២៧ឆ្នាំថែមទៀត។ បញ្ហានេះពួកគេនឹងមិនអាចចូលរួមការបោះឆ្នោតខាងមុខនេះបានឡើយ។
ដោយឡែកអតីតមេដឹកនាំប្រឆាំង លោក សម រង្ស៊ី មិនអាចវិលចូលប្រទេសកម្ពុជាវិញបានទេ ស្របពេលដែលអតីតមន្ត្រីជាន់ខ្ពស់គណបក្សសង្គ្រោះជាតិដែលបានចូលរួមជីវភាពនយោបាយជាមួយគណបក្សភ្លើងទៀននៅពេលនេះ ដូចជាលោក សុន ឆ័យ លោក គង់ គាំ និងលោក ថាច់ សេដ្ឋា ក៏ត្រូវរងនូវបណ្តឹងរហូតឈានដល់ការរឹបអូសដីធ្លី ផ្ទះសម្បែង និងការចាប់ឃុំខ្លួនថែមទៀត ដែលគេមើលឃើញថាជាការគំរាមកំហែងខាងនយោបាយយ៉ាងធ្ងន់ធ្ងរនៅពេលនេះ។
ទាក់ទិននឹងបញ្ហានេះ កាលពីថ្ងៃទី២២ ខែធ្នូ ឆ្នាំ២០២២ ក្នុងពិធីសម្ពោធផ្លូវក្នុងខេត្តព្រះសីហនុ លោក ហ៊ុន សែន ព្រមានថា ក្រុមប្រឆាំងដែលនៅបន្តគាំទ្រអតីតមេដឹកនាំប្រឆាំង លោក សម រង្ស៊ី ជម្រើសចុងក្រោយគឺមានតែដេកគុកប៉ុណ្ណោះ ហើយលោកនឹងបញ្ចប់វប្បធម៌ឡាំប៉ាក្រោយការបោះឆ្នោតដែលអ្នកទាំងនោះធ្លាប់ធ្វើកន្លងមកឱ្យបានចាប់ពេលនេះតទៅ។
វិធានការច្បាប់ និងសារព្រមានផ្ទួនៗរបស់លោកនាយករដ្ឋមន្ត្រី ហ៊ុន សែន លើមន្ត្រីបក្សប្រឆាំងទាំងនេះ ត្រូវក្រុមអ្នកសង្កេតការណ៍រិះគន់ថា ជាយុទ្ធសាស្ត្រដែលគណបក្សកាន់អំណាចតែងតែប្រើប្រាស់ដើម្បីបំបាក់ដៃគូប្រកួតប្រជែងរបស់ខ្លួននៅមុនរដូវកាលបោះឆ្នោតមកដល់។
ការបោះឆ្នោតនៅកម្ពុជា បានធ្វើឡើងចំនួន ៦អាណត្តិមកហើយសម្រាប់ការបោះឆ្នោតជ្រើសរើសតំណាងរាស្ត្រ ប៉ុន្តែរាល់ពេលដែលជិតដល់រដូវកាលនៃការបោះឆ្នោតមកដល់ម្តងៗ ទាំងពលរដ្ឋខ្មែរ និងគណបក្សនយោបាយក្រៅរដ្ឋាភិបាលតែងរងនូវការគំរាមកំហែងពីមន្ត្រីបក្សកាន់អំណាចជាប្រចាំ។
ជុំវិញដំណើរការនៃការបោះឆ្នោតខាងមុខនេះ ត្រូវក្រុមអ្នកសង្កេតការណ៍មើលឃើញថា ស្ថានការណ៍ទាំងស្រុងគឺស្ថិតក្នុងការគ្រប់គ្រងរបស់បក្សកាន់អំណាចគ្រប់បែបយ៉ាង ដូចជាសមាសភាពទាំង ៩រូបរបស់ គ.ជ.ប គឺសុទ្ធតែមកពីបក្សកាន់អំណាច បណ្ដាញសារព័ត៌មានក៏មកពីបក្សកាន់អំណាច មន្ត្រី គ.ជ.ប នៅមូលដ្ឋាន ក៏ជ្រើសរើសដោយបក្សកាន់អំណាច។ នេះគេនៅមិនគិតដល់ការគំរាមកំហែងពីមេដឹកនាំបក្សកាន់អំណាចលើគណបក្សក្រៅរដ្ឋាភិបាលនៅឡើយទេ៕