ថ្ងៃទី៨ ទី៩ ឧសភា ជាថ្ងៃខួប ៧៨ឆ្នាំនៃជ័យជម្នះរបស់ប្រទេសសម្ព័ន្ធមិត្ត ហើយក៏ជាជ័យជម្នះរបស់សហភាពសូវៀត ទៅលើរបប ហ៊ីត្លែរអាល្លឺម៉ង់ នៅក្នុងសង្គ្រាមលោកលើកទី២ ដែរ។
ពួកណាហ្ស៊ីអាល្លឺម៉ង់ដែលបរាជ័យក្នុងសមរភូមិ ប្រកាសចុះចាញ់ជាផ្លូវការនៅថ្ងៃទី៨ ឧសភា ប៉ុន្តែមេដឹកនាំសហភាពសូវៀត នៅពេលនោះ គឺកម្មាភិបាលស្តាលីន មិនព្រមទេ លុះត្រាតែតំណាងប្រទេសអាល្លឺម៉ង់នៅសម័យនោះចុះហត្ថលេខាជាផ្លូវការថាចុះចាញ់សង្គ្រាម ទើបយល់ព្រម។
ការប្រារព្ធទិវាជ័យជម្នះលើពួកណាហ្ស៊ីអាល្លឺម៉ង់ ត្រូវរៀបចំនៅថ្ងៃផ្សេងៗគ្នារវាងសហភាពសូវៀត និងអឺរ៉ុប។ សម្រាប់លោក វ៉្លាឌីមៀរ ពូទីន មេដឹកនាំជំនាន់ក្រោយនៃប្រទេសរុស្ស៊ី ដែលតំណាងឱ្យសហភាពសូវៀត តែងតែមានវត្តមានក្នុងព្រឹត្តិការណ៍នេះដោយមិនខានឡើយ។
លោក ពូទីន តែងតែលើកទឹកចិត្តប្រជាជនរុស្ស៊ី ឱ្យមានស្មារតីជាតិខ្ពស់ក្នុងការរួមកម្លាំងគ្នាប្រឆាំងប្រទេសខាងក្រៅ។
ទិវាជ័យជម្នះលើពួកណាហ្ស៊ីអាល្លឺម៉ង់ ក្នុងសង្គ្រាមលោកលើកទី២ ជាបុណ្យជាតិដ៏ធំបំផុតរបស់ប្រទេសរុស្ស៊ី ព្រោះវាបញ្ជាក់ពីការតស៊ូរបស់ប្រជាជនសហភាពសូវៀត រហូតដល់ដណ្តើមបានជ័យជម្នះលើកងទ័ពហ៊ីត្លែរកាលពី ៧៨ឆ្នាំមុន។
ពីទីក្រុងមូស្គូ ព្រឹត្តិការណ៍ទិវា ៩ឧសភា ចាប់ផ្ដើមហើយ ទោះជាប្រព័ន្ធផ្សព្វផ្សាយមួយចំនួនរបស់រុស្ស៊ី នៅមុនថ្ងៃទី៩ ឧសភា បានផ្សាយថា ក្រុងមូស្គូ នឹងមិនប្រារព្ធពិធីនេះទេ ព្រោះក្រុងមូស្គូទើបរងការវាយប្រហារដោយយានដ្រូនពីរគ្រឿងដែលក្រុងមូស្គូ ចោទថា ជាអំពើភេរវកម្មរបស់អ៊ុយក្រែន ហើយចោទសហរដ្ឋអាមេរិកនៅពីក្រោយហេតុការណ៍នេះ។
ទាំងអ៊ុយក្រែន និងអាមេរិក បដិសេធការចោទរបស់រុស្ស៊ី ដោយចោទបកវិញថា ដ្រូនពីរគ្រឿងនោះជាដ្រូនរបស់រុស្ស៊ី ដែលក្រុងមូស្គូជាអ្នករៀបចំឆាកនេះឡើង ហើយដ្រូនពីរគ្រឿងនោះក៏ត្រូវបានបាញ់ទម្លាក់ ខណៈវាមិនទាន់សម្រេចគោលដៅរបស់វាផងនោះ។
តាមសារព័ត៌មាន The Washington Times បានឱ្យដឹងថា លោក ពូទីន ដែលជាអធិបតីនៃព្រឹត្តិការណ៍នេះ បានថ្លែងនៅឯទីលានក្រហមថា សង្គ្រាមពិតហើយនៅពេលនេះ គឺជាសង្គ្រាមដែលពួកលោកខាងលិចវាយលើរុស្ស៊ី។
ថ្លែងសុន្ទរកថាទៅកាន់ប្រជាជនរុស្ស៊ី ក្នុងទិវាជ័យជម្នះ ៩ឧសភា លោក ពូទីន បានប្រដូចសង្គ្រាមនៅអ៊ុយក្រែនដែលលោកចាត់ទុកថាជាវិធានការការពារប្រឆាំងនឹងលោកខាងលិចដែលចង់បំបែករុស្ស៊ី ដែលក្រុងមូស្គូ បានប្រឈមមុខនៅក្នុងសម័យកាលហ៊ីត្លែរឈ្លានពានសហភាពសូវៀតក្នុងឆ្នាំ១៩៤១។
ការថ្លែងរបស់លោក ពូទីន ធ្វើឡើងក្រោយប៉ុន្មានម៉ោងប៉ុណ្ណោះបន្ទាប់ពីទ័ពរបស់រុស្ស៊ីបន្តបាញ់មីស៊ីលជាច្រើនគ្រាប់ចូលទៅទឹកដីអ៊ុយក្រែន។ តែអ៊ុយក្រែន អះអាងថា យ៉ាងតិចមីស៊ីល ២៣គ្រាប់ត្រូវបានបាញ់ទម្លាក់ក្នុងចំណោមមីស៊ីល ២៥គ្រាប់។
ក្នុងស្ថានភាពដ៏ក្ដៅគគុកនេះ ពីទីក្រុងគៀវ ប្រធានាធិបតីអ៊ុយក្រែន លោក Volodymyr Zelenskyy បានថ្លែងដោយចំអកថា កងទ័ពរុស្ស៊ីនៅអ៊ុយក្រែននឹងត្រូវបរាជ័យដូចពួកណាហ្ស៊ីអាល្លឺម៉ង់ដែលត្រូវបានបរាជ័យនៅក្នុងសម័យសង្គ្រាមលោកលើកទី២។
លោក Zelenskyy បានបញ្ជាក់នៅក្នុងសារជាវីដេអូដែលតែងតែថ្លែងទៅកាន់ប្រជាជនអ៊ុយក្រែនសម្រាប់មួយថ្ងៃម្ដង។ លោកបញ្ជាក់ថា៖ ប្រជាជនអ៊ុយក្រែនប្រយុទ្ធនៅសម័យកាលនោះ គឺដូចការប្រយុទ្ធនៅពេលឥឡូវនេះ ដើម្បីកុំឱ្យប្រទេសណាមួយយកប្រទេសផ្សេងទៀតធ្វើជាទាសករ។ អំពើអាក្រក់ទាំងអស់នោះដែលប្រទេសរុស្ស៊ីសម័យទំនើបបាននាំត្រឡប់យកមកវិញ គឺបរាជ័យដូចណាហ្ស៊ីអាល្លឺម៉ង់ ដែលត្រូវបានបរាជ័យក្នុងសង្គ្រាមលោកលើកទី២។
លោក Zelenskyy បាននិយាយថា គោលបំណងរបស់រុស្ស៊ីនៅអ៊ុយក្រែន គឺវាយយកធ្វើជាទាសកររបស់ខ្លួន និងបំផ្លិចបំផ្លាញប្រទេសដទៃ។ លោកថា ការគាំទ្រអ៊ុយក្រែននៅពេលនេះ គឺប្រៀបបាននឹងកិច្ចប្រឹងប្រែងក្នុងការធ្វើឱ្យហ៊ីត្លែរអាល្លឺម៉ង់បរាជ័យនៅក្នុងខែឧសភា ឆ្នាំ១៩៤៥។
លោក Zelenskyy ថ្លែងទៀតថា៖ ជាថ្មីម្ដងទៀត សត្រូវនៅនេះបានយកការឈ្លានពាន និងការភ្ជាប់យកទឹកដី ការត្រួតត្រា និងការចាប់បញ្ជូនមនុស្សចេញពីប្រទេស ការសម្លាប់ទ្រង់ទ្រាយធំ ការធ្វើទារុណកម្ម ការបាញ់ផ្លោងលើទីក្រុង និងការដុតភូមិឋាននានា គឺលេសនៃការពារសន្តិសុខរបស់ខ្លួន។
លោកអះអាងថា ការរំដោះទឹកដីរបស់អ៊ុយក្រែន និងការការពារគុណតម្លៃនៃយុត្តិធម៌របស់អ៊ុយក្រែនពីការឈ្លានពានរបស់រុស្ស៊ី គឺជាជ័យជម្នះរបស់ប្រជាជនអ៊ុយក្រែន និងពិភពលោកដែលនឹងប្រកបដោយសន្តិភាពពិតៗ។
ការលើកឡើងរបស់លោក Zelenskyy នេះធ្វើឡើងចំពេលលោកប្រកាសក្រឹត្យមួយដើម្បីរំឭកអំពីជ័យជម្នះលើហ៊ីត្លែរអាល្លឺម៉ង់ក្នុងសម័យសង្គ្រាមលោកលើកទី២ ដែលធ្វើឡើងនៅថ្ងៃទី៨ ខែឧសភា ដូចដែលសម្ព័ន្ធមិត្តបស្ចិមប្រទេសនានាធ្វើឡើងនៅថ្ងៃទី៨ ឧសភា នេះដែរ។
លោក Zelenskyy បានបន្តថា អ៊ុយក្រែននឹងកំណត់យកថ្ងៃទី៩ ខែឧសភា ដើម្បីរំឭកដល់ការគាំទ្ររបស់អឺរ៉ុប ចំពោះអ៊ុយក្រែន ក្នុងការតស៊ូប្រឆាំងការឈ្លានពានពីសំណាក់រុស្ស៊ីនៅក្រោមការដឹកនាំរបស់លោក ពូទីន។
លោកប្រធានាធិបតីអ៊ុយក្រែនរូបនេះបានប្រកាសថា អ៊ុយក្រែននឹងឈប់ប្រារព្ធទិវាជ័យជម្នះលើកងទ័ពណាហ្ស៊ីអាល្លឺម៉ង់ នៅថ្ងៃទី៩ ឧសភា ដូចរុស្ស៊ីទៀតហើយ។
តាមប្រធានាធិបតីអ៊ុយក្រែន លោកនឹងដាក់សំណើច្បាប់ទៅកាន់សភាអ៊ុយក្រែន ដើម្បីយកថ្ងៃទី៨ ឧសភា ជាថ្ងៃប្រារព្ធជ័យជម្នះជាមួយនឹងពិភពលោកសេរី ពោលគឺជាមួយនឹងសហភាពអឺរ៉ុប និងប្រទេសដទៃទៀតនៅលើពិភពលោក៕