អតីតនិស្សិតដើម្បីលទ្ធិប្រជាធិបតេយ្យម្នាក់ដែលធ្វើសកម្មភាពប្រឆាំងនឹងវៀតណាម បានសុំចុះចូលជាមួយគណបក្សប្រជាជនកម្ពុជា ដែលបង្កើតឡើងដោយវៀតណាម ហើយកំពុងដឹកនាំដោយលោកនាយករដ្ឋមន្ត្រី ហ៊ុន សែន សព្វថ្ងៃនេះ។
ក្នុងលិខិតមួយដែលផ្ញើទៅកាន់លោកនាយករដ្ឋមន្ត្រី ហ៊ុន សែន ចុះថ្ងៃទី១០ ខែឧសភា ឆ្នាំ២០២៣ លោក នីន តារារតន៍ ដែលអះអាងថាជាអតីតនិស្សិតនៃក្រុមចលនានិស្សិតដើម្បីលទ្ធិប្រជាធិបតេយ្យក្នុងឆ្នាំ១៩៩៩ និងដើមឆ្នាំ២០០០ បានលើកឡើងថា ការដែលខ្លួនចាកចេញពីក្រុមចលនានិស្សិតដើម្បីលទ្ធិប្រជាធិបតេយ្យ ដោយសារតែខ្លួនមិនពេញចិត្តនឹងការដឹកនាំរបស់លោក អ៊ុំ សំអាន អតីតតំណាងរាស្ត្រគណបក្សសង្គ្រោះជាតិ។
អតីតនិស្សិតរូបនេះអះអាងថា ចាប់តាំងពីលោក អ៊ុំ សំអាន ធ្វើជាអ្នកដឹកនាំ និងលោក ស ឡុងដេត ឡើងជាអគ្គលេខាធិការមក បានធ្វើសកម្មភាពដោយប្រព្រឹត្តទង្វើអសីលធម៌ ខ្វះការពិចារណា ងប់ងុលតែនឹងរឿងធ្វើបាតុកម្ម និងជេរប្រមាថរដ្ឋាភិបាលកម្ពុជាតែប៉ុណ្ណោះ។ លោកថា មូលហេតុទាំងនេះបានធ្វើឲ្យលោក និងលោក សេង សារី បានចេញពីក្រុមចលនានិស្សិតនេះវិញ ដោយបន្តការងាររៀងៗខ្លួនរហូតមកទល់សព្វថ្ងៃនេះ។
លោក នីន តារារតន៍ ក៏បានសុំទោសលោក ហ៊ុន សែន និងស្នើសុំចូលរួមជីវភាពនយោបាយជាមួយគណបក្សប្រជាជនកម្ពុជា ក្រោមហេតុផលថា ដើម្បីបានបម្រើពលរដ្ឋ និងអភិវឌ្ឍប្រទេសក្រោមការដឹកនាំរបស់លោក ហ៊ុន សែន នាពេលបច្ចុប្បន្ននេះ។
ឆ្លើយតបការស្នើសុំនេះ នៅថ្ងៃទី១០ ខែឧសភា ដដែល បុរសខ្លាំងក្រាញអំណាចជិត ៤០ឆ្នាំនៅកម្ពុជា លោក ហ៊ុន សែន បានប្រកាសស្វាគមន៍ចំពោះការសុំចូលរួមជីវភាពនយោបាយជាមួយគណបក្សប្រជាជនកម្ពុជារបស់លោក នីន តារារតន៍។
ជុំវិញការចោទប្រកាន់នេះ លោក អ៊ុំ សំអាន បានប្រាប់សារព័ត៌មាន The Cambodia Daily នៅមុនការផ្សាយនេះថា ការលើកឡើងរបស់លោក នីន តារារតន៍ គឺជាការលាបពណ៌ដ៏ខ្វះនូវគុណធម៌ និងសីលធម៌ដើម្បីតែចង់បាននូវតួនាទី និងលាភសក្ការៈក្នុងរដ្ឋាភិបាលតែប៉ុណ្ណោះ។ លោក អ៊ុំ សំអាន អះអាងថា លោក នីន តារារតន៍ ជាមនុស្សរមិលគុណចំពោះចលនានិស្សិតដើម្បីលទ្ធិប្រជាធិបតេយ្យ ពីព្រោះទីនោះហើយជាកន្លែង និងជាទីជម្រក រួមទាំងអាហារហូបចុកប្រចាំថ្ងៃដែលផ្តល់ឲ្យគាត់អាចបន្តការសិក្សារហូតរៀនចប់ថ្នាក់មហាវិទ្យាល័យផ្នែកសង្គមវិទ្យា។
ការសុំចុះចូលគណបក្សប្រជាជនកម្ពុជានាពេលនេះ ធ្វើឡើងបន្ទាប់ពីអតីតក្រុមចលនានិស្សិតដើម្បីលទ្ធិប្រជាធិបតេយ្យ លោក ទូច វិបុល និងសមាជិកម្នាក់ទៀត លោក អៀ ចាន់ណា និងលោក សារ៉ូ សុវុឌ្ឍិ បានប្រកាសគាំទ្រ និងចូលរួមជីវភាពនយោបាយជាមួយបក្សប្រជាជនកម្ពុជា កាលពីពេលថ្មីៗនេះ ហើយក្រៅពីសកម្មជនសង្គម ក៏មានថ្នាក់ដឹកនាំបក្សក្រៅរដ្ឋាភិបាល ដូចជាគណបក្សភ្លើងទៀន និងគណបក្សប្រជាធិបតេយ្យមូលដ្ឋាន ជាដើម។
ការសុំចុះចូលជាមួយរដ្ឋាភិបាលកម្ពុជានេះ ដោយពួកគេថាការដឹកនាំរបស់លោក ហ៊ុន សែន រយៈពេលជិត ៤០ឆ្នាំមកនេះ បានធ្វើឲ្យប្រទេសកម្ពុជារីកចម្រើន និងមានសន្តិភាពពេញលេញ ខណៈសហគមន៍ជាតិ និងអន្តរជាតិមើលឃើញថា រយៈពេលជាង ៣៨ឆ្នាំនៃការដឹកនាំរបស់លោក ហ៊ុន សែន បានធ្វើឲ្យស្ថានភាពសិទ្ធិ និងលទ្ធិប្រជាធិបតេយ្យនៅកម្ពុជាធ្លាក់ចុះ ដោយឈានទៅរកការដឹកនាំបែបផ្ដាច់ការ។
ចំណែកអ្នកឃ្លាំមើលចាត់ទុកការចុះចូលជាមួយបក្សកាន់អំណាចរបស់សកម្មជន និងមន្ត្រីបក្សក្រៅរដ្ឋាភិបាល ថាជាទង្វើជាន់ពន្លិចអ្នកប្រជាធិបតេយ្យ និងគាំទ្រនយោបាយទុច្ចរិតរបស់បក្សកាន់អំណាចដែលដឹកនាំដោយលោក ហ៊ុន សែន។
លោក នីន តារារតន៍ ជាអតីតនិស្សិតនៃក្រុមចលនានិស្សិតដើម្បីលទ្ធិប្រជាធិបតេយ្យ ដែលធ្វើសកម្មភាពប្រឆាំងនឹងបញ្ហាព្រំដែនជាមួយវៀតណាម ប៉ុន្តែនៅថ្ងៃទី១០ ខែឧសភា នេះ លោកក៏ងាកមកសុំចូលរួមជីវភាពនយោបាយជាមួយគណបក្សប្រជាជនកម្ពុជា ដែលជាមេដឹកនាំលើកបន្តុបដោយវៀតណាមទៅវិញ។
គណបក្សប្រជាជនកម្ពុជាដែលមានឈ្មោះដើមថា គណបក្សប្រជាជនបដិវត្តន៍កម្ពុជា ត្រូវបានបង្កើតឡើងដោយលោក សឺន ង៉ុកមិញ ហៅអាចារ្យ មៀន នៅឆ្នាំ១៩៥១។ លោក សឺន ង៉ុកមិញ ដែលមានឈ្មោះជាភាសាវៀតណាមថា ផាម យ៉ាំង ហួ (Phạm Văn Hua) និងដែលមានឪពុកជាខ្មែរក្រោម និងម្តាយជាជនជាតិវៀតណាម នៅខេត្តព្រះត្រពាំង កម្ពុជាក្រោមនោះ គឺជាអតីតសមាជិកគណបក្សកុម្មុយនីស្តឥណ្ឌូចិន ដែលត្រូវបានបង្កើតឡើងដោយលោក ហូ ជី មិញ (Ho Chi Minh) តាំងពីឆ្នាំ១៩៣០៕