បុរសខ្លាំងក្រាញអំណាចនៅកម្ពុជា លោក ហ៊ុន សែន ថ្លែងថា ការធ្វើឲ្យបាត់ឯកសារដើមដែលធ្វើឲ្យគណបក្សភ្លើងទៀនខកខានចូលរួមបោះឆ្នោតនៅខែកក្កដា ខាងមុខនេះ វាជាឧបាយកលរបស់ថ្នាក់ដឹកនាំបក្សភ្លើងទៀន លោក សម រង្ស៊ី ដើម្បីឲ្យបរទេសដាក់សម្ពាធលើកម្ពុជា។
គណៈកម្មាធិការជាតិរៀបចំការបោះឆ្នោត និងក្រុមប្រឹក្សាធម្មនុញ្ញបានបដិសេធសំណើសុំចុះបញ្ជីបោះឆ្នោតខែកក្កដា ខាងមុខនេះ ដោយ គ.ជ.ប ទាមទារឲ្យគណបក្សភ្លើងទៀនដាក់ឯកសារច្បាប់ដើមបញ្ជាក់ការចុះបញ្ជីគណបក្សនយោបាយនៅក្រសួងមហាផ្ទៃ ដែលមានបញ្ជាក់នីត្យានុកូលកម្មដោយរដ្ឋបាលរាជធានី ខេត្ត ក្រុង ស្រុក ខណ្ឌ ចំនួន ១ (មួយ) ច្បាប់។ ប៉ុន្តែឯកសារច្បាប់ដើមដែលចេញដោយរដ្ឋាភិបាលនោះ ត្រូវគណបក្សភ្លើងទៀនអះអាងថាបាន «បាត់បង់» បន្ទាប់ពីបិទទីស្នាក់ការគណបក្សសង្គ្រោះជាតិក្នុងឆ្នាំ២០១៧។
ក្នុងពិធីសំណេះសំណាលជាមួយកម្មករនិយោជិតនាថ្ងៃសុក្រនេះ លោកនាយករដ្ឋមន្ត្រី ហ៊ុន សែន ថ្លែងថា ឯកសារដើមរបស់គណបក្សភ្លើងទៀនដែលគណៈកម្មាធិការជាតិរៀបចំការបោះឆ្នោត ទាមទារឲ្យដាក់នោះ លោកមិនជឿថាបានបាត់ឡើយ។ ផ្ទុយទៅវិញ ឯកសារនោះត្រូវបានអតីតមេដឹកនាំគណបក្សភ្លើងទៀននៅក្រៅប្រទេសយកទៅលាក់ ហើយឆ្លើយដោះសាថា «បាត់»។ លោកថា ការឆ្លើយដោះសាបាត់ឯកសារដើមនេះ ព្រោះអីលោក សម រង្ស៊ី មិនចង់ឲ្យគណបក្សភ្លើងទៀនចូលរួមការបោះឆ្នោតនៅខែកក្កដា ខាងមុខនេះទេ ដោយដឹងថាគណបក្សភ្លើងទៀនមិនអាចយកឈ្នះគណបក្សប្រជាជនកម្ពុជា។
មួយវិញទៀត ការធ្វើដូច្នេះ លោកថាដោយសារលោក សម រង្ស៊ី និងមន្ត្រីជាន់ខ្ពស់ផ្សេងទៀតនៅក្រៅប្រទេសចង់ឲ្យបណ្ដាប្រទេសនានាដាក់សម្ពាធ និងគាបមកលើកម្ពុជាផងដែរ។ លោក ហ៊ុន សែន ក៏ថ្លែងការពារ គ.ជ.ប រឿងដែលចុះបញ្ជីបោះឆ្នោតឲ្យគណបក្សភ្លើងទៀនកាលពីបោះឆ្នោតក្រុមប្រឹក្សាឃុំ-សង្កាត់ ដោយមិនទាមទារយកឯកសារច្បាប់ដើមនាពេលនោះផងដែរ។
បុរសខ្លាំងក្រាញអំណាចតពូជនៅកម្ពុជា ចាត់ទុកការអះអាងបាត់ឯកសារដើមរបស់គណបក្សភ្លើងទៀន ដែលធ្វើឲ្យគណបក្សនេះមិនអាចចុះបញ្ជីបោះឆ្នោតបាន ថាជាឧបាយកលរបស់លោក សម រង្ស៊ី និងមន្ត្រីជាន់ខ្ពស់សំខាន់ៗនៅក្រៅប្រទេស។
ក្រៅពីចោទប្រកាន់ទៅអតីតមេដឹកនាំគណបក្សភ្លើងទៀនហើយ លោក ហ៊ុន សែន ក៏បានព្រមានចាប់ខ្លួនលោក រ៉ុង ឈុន ដាក់ពន្ធនាគារជាថ្មីទៀតដែរ បើសិនហ៊ានកៀងគរអ្នកគាំទ្រគណបក្សភ្លើងទៀន និងអ្នកផ្សេងៗតវ៉ា បន្ទាប់ពីក្រុមប្រឹក្សាធម្មនុញ្ញ និងគណៈកម្មាធិការជាតិរៀបចំការបោះឆ្នោត បដិសេធសំណើសុំចុះបញ្ជីឈ្មោះបោះឆ្នោតនោះ។
ប្រធានវេទិកាពលរដ្ឋ និងជាអ្នកវិភាគនយោបាយសង្គម លោក គឹម សុខ ចាត់ទុកការបកស្រាយរបស់លោក ហ៊ុន សែន ថាវ័ណ្ឌកខ្លួនឯងកាន់តែខ្លាំងករណីដែលគណៈកម្មាធិការជាតិរៀបចំការបោះឆ្នោត និងក្រុមប្រឹក្សាធម្មនុញ្ញមិនទទួលស្គាល់ ដឹងឮឯកសាររបស់ក្រសួងមហាផ្ទៃអំពីភាពស្របច្បាប់របស់គណបក្សភ្លើងទៀន ក្នុងការចូលរួមការបោះឆ្នោតបាននោះ។ លោកថាករណីនេះវាបានបញ្ជាក់ឲ្យឃើញថា ក្រុមប្រឹក្សាធម្មនុញ្ញ និង គ.ជ.ប ក៏មិនទទួលស្គាល់រដ្ឋាភិបាលរបស់លោក ហ៊ុន សែន ជារដ្ឋាភិបាលស្របច្បាប់នោះដែរ។
លោកបន្តថា ក្រសួងមហាផ្ទៃគឺជាអង្គការរដ្ឋដ៏ធំនៃរដ្ឋាភិបាលលោក ហ៊ុន សែន ហើយក្រសួងមហាផ្ទៃមានភារកិច្ចផលិតឯកសារគតិយុត្តិសម្រាប់ប្រើប្រាស់ ដូច្នេះ គ.ជ.ប និងក្រុមប្រឹក្សាធម្មនុញ្ញមិនទទួលស្គាល់ឯកសារក្រសួងមហាផ្ទៃផង នោះមានន័យថា គ.ជ.ប ជាពិសេសក្រុមប្រឹក្សាធម្មនុញ្ញក៏មិនទទួលស្គាល់រដ្ឋាភិបាលលោក ហ៊ុន សែន ជារដ្ឋាភិបាលស្របច្បាប់ដែរ។
ក្រោយពីក្រុមប្រឹក្សាធម្មនុញ្ញបដិសេធបណ្ដឹងតវ៉ាដែលគណបក្សភ្លើងទៀនបានបង្ហាញការសោកស្ដាយ ដោយចាត់ទុកការបដិសេធនេះថាមិនស្របនឹងស្មារតីនៃកិច្ចព្រមព្រៀងសន្តិភាពទីក្រុងប៉ារីស ហើយច្បាប់គណបក្សនយោបាយ និងច្បាប់ស្ដីពីជ្រើសតាំងតំណាងរាស្ត្រ។ មួយទៀតប៉ះពាល់ដល់សិទ្ធិប្រជាពលរដ្ឋដែលបានបោះឆ្នោតឲ្យគណបក្សភ្លើងទៀន កាលពីក្រុមប្រឹក្សាឃុំ-សង្កាត់ឆ្នាំ២០២២ ដែលមានចំនួនជិត ២លាននាក់ ហើយផ្ទុយពីកតិកាសញ្ញាអន្តរជាតិស្ដីពីសិទ្ធិពលរដ្ឋ សិទ្ធិនយោបាយ និងរដ្ឋធម្មនុញ្ញកម្ពុជា ជាដើម៕