អតីតមេដឹកនាំបក្សប្រឆាំងលោក សម រង្ស៊ី បន្តអំពាវនាវទៅពលរដ្ឋឲ្យគូសសញ្ញាខ្វែងឈ្មោះគណបក្សទាំងអស់លើសន្លឹកឆ្នោតចោល ទោះបីលោក ហ៊ុន សែន បានកែច្បាប់បោះឆ្នោតបិទផ្លូវ និងព្រមានរំលាយបក្សភ្លើងទៀនក៏ដោយ។
ការបន្តអំពាវនាវរបស់លោក សម រង្ស៊ី កាលពីថ្ងៃទី១៨ ខែមិថុនា ឆ្នាំ២០២៣ ខណៈលោកកំពុងស្នាក់នៅប្រទេសបារាំង ចាប់តាំងពីមុនពេលតុលាការកំពូលរំលាយគណបក្សសង្គ្រោះជាតិឆ្នាំ២០១៧។
អតីតមេដឹកនាំបក្សប្រឆាំងរូបនេះបានលើកឡើងថា នៅថ្ងៃទី២៣ ខែកក្កដា ឆ្នាំ២០២៣ ការប្រកួតប្រជែងមែនទែនដែលពិភពលោកទាំងមូលរង់ចាំមើលលទ្ធផល គឺការប្រកួតប្រជែងរវាងសន្លឹកឆ្នោតតែ ២ប្រភេទប៉ុណ្ណោះ ក្នុងនោះ សន្លឹកឆ្នោតដែលមានគូសឲ្យគណបក្សប្រជាជនកម្ពុជា និងមួយទៀតសន្លឹកឆ្នោតដែលមានគូសសញ្ញាខ្វែងចោលលើឈ្មោះគណបក្សទាំងអស់។
ក្រៅពីលោក សម រង្ស៊ី នោះ អតីតតំណាងរាស្ត្រគណបក្សសង្គ្រោះជាតិ លោក អ៊ុំ សំអាន ដែលកំពុងនិរទេសខ្លួននៅក្រៅប្រទេស ក៏បានសរសេរលើហ្វេសប៊ុកនៅថ្ងៃទី១៩ មិថុនា នេះដែរថា បើមានការបង្ខិតបង្ខំ ឬត្រូវបង្ខំចិត្តឲ្យទៅបោះឆ្នោតនោះ ពួកគាត់អាចគូសខ្វែងចោលលើសន្លឹកឆ្នោតបាន។ លោកថា ការបោះឆ្នោតជាសម្ងាត់ គ្មាននរណាដឹងថាពួកគាត់គូសខ្វែងចោលលើសន្លឹកឆ្នោតនោះទេ លើកលែងតែពួកគាត់ប្រាប់អ្នកដទៃប៉ុណ្ណោះ។
បើគ្មានការបង្ខិតបង្ខំ ឬត្រូវបង្ខំចិត្តឲ្យទៅបោះឆ្នោតនោះទេ លោក អ៊ុំ សំអាន ថាមិនចាំបាច់ទៅបោះឆ្នោតនោះទេ ព្រោះគ្មានគណបក្សដែលប្រជាពលរដ្ឋស្រឡាញ់ ហើយការបោះឆ្នោតខែក្រោយនេះ គ្រាន់តែជាការបោះឆ្នោតលេងសើចដើម្បីបង្គ្រប់កិច្ចក្នុងការផ្ទេរអំណាចផ្ដាច់ការតពូជដល់លោក ហ៊ុន ម៉ាណែត។
ការបន្តអំពាវនាវនេះ ទោះបីជាបុរសខ្លាំងក្រាញអំណាចតពូជនៅកម្ពុជាលោក ហ៊ុន សែន កាលពីថ្ងៃទី១៤ ខែមិថុនា បានព្រមានរំលាយគណបក្សភ្លើងទៀនចោល បើហ៊ានទាក់ទង និងធ្វើសកម្មភាពតាមបញ្ជារបស់លោក សម រង្ស៉ី ក្នុងចេតនារារាំង ឬអុកឡុកការបោះឆ្នោតខាងមុខ។ ក្រៅពីព្រមានហើយ លោក ហ៊ុន សែន ក៏ធ្វើវិសោធនកម្មច្បាប់បោះឆ្នោតដើម្បីបិទផ្លូវអ្នកដែលមិនបានទៅបោះឆ្នោតថ្ងៃទី២៣ ខែកក្កដា ខាងមុខនេះផងដែរ។
បើតាមលោក ហ៊ុន សែន ថាបច្ចុប្បន្នពង្រាងស្ដីពីការធ្វើវិសោធនកម្មច្បាប់បោះឆ្នោតបានបញ្ជូនទៅដល់រដ្ឋសភាហើយ បន្ទាប់ពីលោកបានបញ្ជារដ្ឋមន្ត្រីក្រសួងយុត្តិធម៌ និងក្រសួងមហាផ្ទៃ ឲ្យពន្លឿនការធ្វើវិសោធនកម្មច្បាប់នេះឲ្យបានឆាប់។
តែក្រុមឃ្លាំមើលចាត់ទុកការកែច្បាប់បោះឆ្នោតតាមបញ្ជារបស់មេដឹកនាំបក្សកាន់អំណាចលោក ហ៊ុន សែន ដើម្បីគាបសង្កត់មន្ត្រីបក្សក្រៅរដ្ឋាភិបាលឱ្យទៅបោះឆ្នោតទាំងដែលមិនឲ្យគណបក្សរបស់ពួកគេឈរឈ្មោះបោះឆ្នោតនោះ ថាជាអំពើឧក្រិដ្ឋកម្មលើរដ្ឋធម្មនុញ្ញកម្ពុជាយ៉ាងធ្ងន់ធ្ងរ៕