នៅទីបំផុត ផែនការសន្តិភាពរបស់ចិន ១២ចំណុចដែលមិនបានលើកឡើងចំៗអំពីការដកទ័ពរុស្ស៊ី ចេញពីទឹកដីអ៊ុយក្រែន និងបង្ខំឱ្យរុស្ស៊ី គោរពអធិបតេយ្យភាពរបស់អ៊ុយក្រែន កំពុងតែបរាជ័យដែលពុំអាចរំកិលខ្លួនពីចំណុចសូន្យបាននោះទេ។
ឥឡូវនេះ អាហ្វ្រិកខាងត្បូងដែលជាសម្ព័ន្ធមិត្តរបស់រុស្ស៊ីដូចចិនដែរ បានតាំងខ្លួនចូលមកសម្របសម្រួលឱ្យមានសន្តិភាពសម្រាប់ប្រជាជនអ៊ុយក្រែន។ តែសម្រាប់មេដឹកនាំអាហ្វ្រិកខាងត្បូង ខុសពីមេដឹកនាំចិន ដោយហ៊ានប្រាប់ត្រង់ទៅលោក ពូទីន ថា ត្រូវបញ្ចប់សង្គ្រាម ព្រោះវាបង្កឱ្យមានផលវិបាកជាខ្លាំងដល់ពិភពលោក។
ជាមួយគ្នានេះ អាហ្វ្រិកខាងត្បូងបានបង្កើតក្រុមប្រតិភូនៃប្រទេសនៃទ្វីបអាហ្វ្រិកមាន ៧ប្រទេស ដើរតួនាទីជាអ្នកសម្របសម្រួលដែលមើលទៅដូចជាមានភាពរឹងមាំជាងចិន ហើយផែនការសន្តិភាពនេះមាន ១០ចំណុច។
ផែនការសន្តិភាព ១០ចំណុច ក្នុងនោះរួមមាន ការបន្ធូរបន្ថយភាពតានតឹង ការទទួលស្គាល់ចំពោះអធិបតេយ្យប្រទេសអ៊ុយក្រែន ការធានាសន្តិសុខសម្រាប់ប្រទេសអ៊ុយក្រែន ការនាំចេញគ្រាប់ធញ្ញជាតិដោយគ្មានឧបសគ្គតាមសមុទ្រខ្មៅ ហើយនិងការបញ្ជូនឈ្លើយសឹក និងកុមារទៅកាន់ប្រទេសអ៊ុយក្រែន វិញ។
ដោយឆ្លើយតបនឹងសំណើសន្តិភាពរបស់អាហ្វ្រិកខាងត្បូង លោករដ្ឋមន្ត្រីការបរទេសរុស្ស៊ី Sergei Lavrov និយាយថា លោកនឹងជួយផ្សព្វផ្សាយផែនការសន្តិភាពនេះ តែអ្នកនាំពាក្យវិមានក្រឹមឡាំង Dmitry Peskov ដែលស្រង់សម្ដីដោយបណ្ដាញផ្សាយព័ត៌មានរបស់រុស្ស៊ី មកចុះផ្សាយថា ជាការពិត ត្រឹមតែលើកឡើងជាផែនការ មិនជាបញ្ហាអ្វីទេ តែការអនុវត្តជាក់ស្ដែងទើបជាការពិបាក។ នេះបើយោងតាមទីភ្នាក់ងារសារព័ត៌មាន Reuters។
ការលើកឡើងផែនការរបស់អាហ្វ្រិកខាងត្បូងនៅទីក្រុង Saint Petersburg កាលពីថ្ងៃសៅរ៍សប្ដាហ៍មកនេះ ខណៈលោក Cyril Ramaphosa ប្រធានាធិបតីអាហ្វ្រិកខាងត្បូង បានជួបលោកប្រធានាធិបតីរុស្ស៊ី វ៉្លាឌីមៀរ ពូទីន ក្រោយពីលោកបានទៅជួបប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡេនស្គី នៅទីក្រុងគៀវ។
ការធ្វើដំណើរទៅកាន់ប្រទេសរុស្ស៊ី របស់លោក Ramaphosa និងប្រតិភូមេដឹកនាំទ្វីបអាហ្វ្រិក ក្រោមគោលដៅជួយស្វែងរកសន្តិភាពរវាងទីក្រុងគៀវ និងទីក្រុងមូស្គូ ដោយបានអំពាវនាវទៅកាន់សមភាគីរុស្ស៊ី ថា សង្គ្រាមបង្ហូរឈាមនៅក្នុងប្រទេសអ៊ុយក្រែន ចាំបាច់ត្រូវតែបញ្ឈប់។
ក្រោយជួបពិភាក្សាជាមួយលោក ពូទីន នៅទីក្រុង Saint Petersburg ប្រធានាធិបតីអាហ្វ្រិកខាងត្បូង Ramaphosa បាននិយាយថា សង្គ្រាមនេះត្រូវតែបញ្ចប់តាមរយៈកិច្ចចរចាដោយសន្តិវិធី និងមធ្យោបាយការទូត។ មេដឹកនាំអាហ្វ្រិករូបនេះបានបន្ថែមថា គណៈប្រតិភូរបស់លោកដែលរួមមានមេដឹកនាំ និងមន្ត្រីជាន់ខ្ពស់មកពីប្រទេសអាហ្វ្រិកមួយចំនួនទៀត ចង់ឱ្យសង្គ្រាមអ៊ុយក្រែន ត្រូវបិទបញ្ចប់។
អ៊ុយក្រែន ថាគេមិនត្រូវចាញ់បោករុស្ស៊ី ទៀតទេ
នៅក្នុងសន្និសីទកាសែតនៅទីក្រុងគៀវ លោកប្រធានាធិបតី ហ្សេឡេនស្គី បានឆ្លើយនៅចំពោះមុខគណៈប្រតិភូអាហ្វ្រិកនេះថា អ៊ុយក្រែន មិនអាចទទួលយកនូវសំណើចរចាសន្តិភាពជាមួយអ្នកឈ្លានពានបានទេ។
លោក ហ្សេឡេនស្គី ថាបើព្រមចរចាជាមួយរុស្ស៊ី នៅពេលនេះ គឺជាការចាញ់បោកល្បែងឆ្ពិនភ្នែកបោកប្រាស់របស់រុស្ស៊ីម្ដងទៀត។
លោក ហ្សេឡេនស្គី បានបញ្ជាក់ថា បើមានការចរចានៅពេលនេះ ខណៈរុស្ស៊ី កំពុងតែគ្រប់គ្រងទឹកដីអ៊ុយក្រែន ដោយខុសច្បាប់ គឺវាមិនខុសពីការបង្កកសង្គ្រាមនេះឲ្យនៅទ្រឹងមួយកន្លែង ក៏វាអាចធ្វើឱ្យការឈឺចាប់របស់ប្រជាជនអ៊ុយក្រែន នៅតែបន្តទ្រឹងមួយកន្លែងដែរ។
លោក ហ្សេឡេនស្គី បានបន្ថែមថា រុស្ស៊ីនឹងមិនអាចបោកបញ្ឆោតពិភពលោកជាលើកទី២ បានទេ ព្រោះអ៊ុយក្រែន បានស្គាល់ល្បិចកលរបស់រុស្ស៊ី ហើយ ព្រោះធាតុពិត លោក ពូទីន នៅតែមានមហិច្ឆតាលោភលន់ឈ្លានពានអ៊ុយក្រែន ដដែល។
សម្ព័ន្ធភាពណាតូសាទរ តែប្រាប់ទៅមេដឹកនាំអាហ្វ្រិក ថា ត្រូវមើលល្បិចរបស់រុស្ស៊ីឱ្យច្បាស់សិន
អង្គការសម្ព័ន្ធមិត្តណាតូ បានថ្លែងអបអរចំពោះក្រុមប្រទេសអាហ្វ្រិក ចូលរួមឈឺឆ្អាលស្វែងរកសន្តិភាពសម្រាប់អ៊ុយក្រែន។
អគ្គលេខាធិការណាតូ Jens Stoltenberg បានរំលឹកថា ការចរចាសន្តិភាពត្រូវតែមានភាពសុចរិត យុត្តិធម៌សម្រាប់អ៊ុយក្រែន ដែលជាជនរងគ្រោះ។ ដំណោះស្រាយសន្តិភាពត្រូវតែមានភ្ជាប់ជាអាទិភាពនូវការទទួលស្គាល់កំហុសរបស់រុស្ស៊ី ដែលលើកទ័ពចូលទៅធ្វើសង្គ្រាមឈ្លានពានប្រទេសមួយដែលឯករាជ្យ។
តាមលោក Jens Stoltenberg ពេលនេះ អ៊ុយក្រែន កំពុងតែបើកការវាយប្រយុទ្ធទ្រង់ទ្រាយធំដណ្តើមទឹកដីរបស់ខ្លួនមកវិញ ក៏ជាពេលដែលរុស្ស៊ីត្រូវដឹងថា អ៊ុយក្រែនគេមិនលះបង់ទឹកដីរបស់ខ្លួនទេ។
តែយ៉ាងណា ចំពោះក្រុមប្រទេសលោកខាងលិច គឺទាល់តែអ៊ុយក្រែន មានប្រៀបលើរុស្ស៊ី សិន ទើបដល់ពេលចូលតុចរចា។
យ៉ាងណាមានការកត់សម្គាល់ថា ផែនការសន្តិភាពរបស់តំបន់អាហ្វ្រិក មើលទៅមានភាពរឹងមាំជាងផែនការសន្តិភាពរបស់ចិន តែផែនការនេះក៏អាចនឹងជួបបរាជ័យដែរ៕