ក្រុមមន្ត្រីដែលរុស្ស៊ីលើកបន្តុបនៅក្នុងផ្នែកមួយនៃតំបន់ខឺសុន ភាគខាងត្បូងប្រទេសអ៊ុយក្រែន បាននិយាយនៅថ្ងៃព្រហស្បតិ៍នេះថា ការវាយប្រហារដោយមីស៊ីលរបស់អ៊ុយក្រែន បានត្រូវចំលើ Chongar ដែលតភ្ជាប់ជាមួយឧបទ្វីបគ្រីមៀរ។
លោក Vladimir Saldo មន្ត្រីលើកបន្តុបដោយរុស្ស៊ី នៅក្នុងតំបន់ខឺសុន និយាយថា ការវាយប្រហារនេះ អ៊ុយក្រែនបាញ់មីស៊ីល Storm Shadow។ មីស៊ីល Storm Shadow ជាជំនួយរបស់អង់គ្លេស។ មីស៊ីលនេះវាអាចរត់បានរយៈចម្ងាយ ៣០០គីឡូម៉ែត្រ។
ចំណែកអភិបាលតំបន់គ្រីមៀរ លោក Sergey Aksyonov បានឲ្យដឹងថា មន្ត្រីជំនាញកំពុងពិនិត្យមើលទីតាំងដើម្បីកំណត់ថា តើពេលណាដែលចរាចរណ៍នៅលើស្ពានអាចបន្តដំណើរការបានឡើងវិញ។
ស្ពាន Chongar ជាស្ពានមួយដែលតភ្ជាប់តំបន់គ្រីមៀរ ជាមួយអ៊ុយក្រែននៅភាគខាងត្បូង។ ឧបទ្វីបនេះត្រូវរុស្ស៊ីក្រសោបយកពីអ៊ុយក្រែន កាលពីឆ្នាំ២០១៤ តាមរយៈអតីតប្រធានាធិបតីអ៊ុយក្រែន ដែលបានចុះហត្ថលេខាកាត់ទឹកដីទៅឱ្យរុស្ស៊ី ជាថ្នូរនឹងសន្តិភាព។
ប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡេនស្គី ទទួលស្គាល់ថា ប្រតិបត្តិការវាយបករបស់អ៊ុយក្រែនប្រឆាំងនឹងកងកម្លាំងរុស្ស៊ី ពិតជាមានភាពយឺតយ៉ាវជាងការរំពឹងទុក ប៉ុន្តែកងកម្លាំងអ៊ុយក្រែននឹងមិនតក់ក្រហល់ក្នុងការបង្កើនល្បឿនវាយលុកនោះទេ។
លោក ហ្សេឡេនស្គី ធ្វើការកត់សម្គាល់ដូចនេះនៅក្នុងបទសម្ភាសន៍ជាមួយបណ្ដាញផ្សាយព័ត៌មានអង់គ្លេស BBC។ លោកក៏បានទទួលស្គាល់ដែរថា ភាពយឺតយ៉ាវនេះ គឺដោយសារតែគ្រាប់មីនដ៏ច្រើនសន្ធឹកសន្ធាប់ដែលរុស្ស៊ី បានដាក់ពង្រាយ។ តែយ៉ាងណា ប្រធានាធិបតីអ៊ុយក្រែនរូបនេះថ្លែងថា មនុស្សមួយចំនួនជឿថា នេះជាខ្សែភាពយន្ដ Hollywood ហើយចង់បានលទ្ធផលភ្លាមៗ។
កងកម្លាំងអ៊ុយក្រែន នឹងបង្កើនល្បឿនវាយលុកដោយផ្អែកលើវិធីសាស្ត្រសង្គ្រាមវាយបក។ ចាប់ពីការវាយបកដើម្បីរំដោះទឹកដីពីរុស្ស៊ី មកវិញនៅថ្ងៃទី១០ មិថុនា កងទ័ពអ៊ុយក្រែនបានវាយដណ្ដើមបានទីតាំងចំនួន៨ ពីកងទ័ពរុស្ស៊ី ក្នុងតំបន់ភាគខាងត្បូង និងភាគខាងកើត។
រដ្ឋមន្ត្រីការពារជាតិរុស្ស៊ី ចោទថាអ៊ុយក្រែនមានផែនការវាយចូលគ្រីមៀរ ដោយរ៉ុក្កែត HIMARS របស់អាមេរិក និងមីស៊ីល Storm Shadow របស់អង់គ្លេស។ រុស្ស៊ី បានចោទអ៊ុយក្រែន ថាមានផែនការវាយប្រហារលើតំបន់គ្រីមៀរ ដោយប្រើមីស៊ីលរយៈចម្ងាយឆ្ងាយផ្ដល់ដោយសហរដ្ឋអាមេរិក និងចក្រភពអង់គ្លេស ដោយព្រមានថា ទីក្រុងមូស្គូ នឹងសងសឹក ប្រសិនបើអ៊ុយក្រែនប្រព្រឹត្តដូចនេះ។
រដ្ឋមន្ត្រីការពារជាតិរុស្ស៊ី លោក សឺហ្គៃ សយហ្គូ បានអះអាងថា ទីក្រុងមូស្គូ ទទួលបានព័ត៌មានថាអ៊ុយក្រែនមានផែនការវាយប្រហារលើតំបន់គ្រីមៀរ នៅក្នុងប្រតិបត្តិការវាយបករបស់ខ្លួន ដោយប្រើរ៉ុក្កែត HIMARS ផ្ដល់ដោយសហរដ្ឋអាមេរិក និងមីស៊ីលគ្រូស Storm Shadow ផ្ដល់ដោយចក្រភពអង់គ្លេស។
ប្រមុខការពារជាតិរុស្ស៊ី ព្រមានថា ការប្រើប្រាស់មីស៊ីលទាំងនេះវាយប្រហារលើតំបន់ខាងក្រៅនៃប្រតិបត្តិការយោធាពិសេសរបស់រុស្ស៊ី នឹងត្រូវចាត់ទុកថាសហរដ្ឋអាមេរិក និងចក្រភពអង់គ្លេសលូកដៃចូលរួមក្នុងជម្លោះទាំងស្រុង ជាការជំរុញឱ្យមានការបើកការវាយប្រហារសងសឹកភ្លាមៗពីរុស្ស៊ី។
កន្លងមក រុស្ស៊ីព្រមានថានឹងបាញ់ទៅលើអង់គ្លេស ដោយគ្រាប់នុយក្លេអ៊ែរ ព្រោះតែប្រទេសសមាជិកណាតូនេះដើរជាន់បន្ទាត់ក្រហមរបស់រុស្ស៊ី។
រដ្ឋមន្ត្រីការបរទេសអាមេរិក លោក Antony Blinken បានប្រកាសថា សហរដ្ឋអាមេរិកនឹងផ្តល់ជំនួយផ្នែកសេដ្ឋកិច្ចទំហំ ១៣០០លានដុល្លារថែមទៀតដល់អ៊ុយក្រែន ដើម្បីជួយប្រទេសមួយនេះធ្វើកំណែទម្រង់ហេដ្ឋារចនាសម្ព័ន្ធថាមពលអគ្គិសនី ហើយនិងការធ្វើទំនើបកម្មច្រកព្រំដែន កំពង់ផែ និងផ្លូវដែក។
ថ្លែងក្នុងសន្និសីទស្ដីពីកិច្ចប្រឹងប្រែងជួយអ៊ុយក្រែនងើបពីសង្គ្រាម ដែលរៀបចំឡើងនៅទីក្រុងឡុងដ៍ របស់ចក្រភពអង់គ្លេស កាលពីថ្ងៃពុធ ទី២១ មិថុនា លោក Blinken បាននិយាយដូច្នេះថា៖ ការស្ដារឡើងវិញ គឺផ្ដោតជាសំខាន់ទៅលើការរៀបចំមូលដ្ឋានគ្រឹះសម្រាប់ឱ្យអ៊ុយក្រែន អាចវិវឌ្ឍខ្លួនក្លាយទៅជាប្រទេសឯករាជ្យមួយដែលមានសន្តិសុខ និងត្រូវបានធ្វើសមាហរណកម្មពេញលេញជាមួយអឺរ៉ុប។
តាមលោក Blinken ជំនួយនេះទទួលបានការគាំទ្រពីសភាជាតិអាមេរិកាំង។
បើតាមទីភ្នាក់ងារសារព័ត៌មាន AP កញ្ចប់ជំនួយថ្មីនេះជាការបន្ថែមពីលើទឹកប្រាក់សរុបជាង ២០ពាន់លានដុល្លារនៅក្នុងទម្រង់ជាជំនួយផ្នែកសេដ្ឋកិច្ច និងអភិវឌ្ឍន៍ ដែលសហរដ្ឋអាមេរិកបានផ្តល់ឱ្យទៅអ៊ុយក្រែននាពេលកន្លងមក។
សភាសហរដ្ឋអាមេរិកបានអនុម័តឱ្យរដ្ឋការលោក ចូ បៃដិន នូវសាច់ប្រាក់សរុប ៩៥ពាន់លានដុល្លារ ដើម្បីជួយប្រទេសអ៊ុយក្រែន ក្នុងការធ្វើសង្គ្រាមការពារទឹកដី និងការជួយស្ដារសេដ្ឋកិច្ចរបស់ប្រទេសមួយនេះ។
កញ្ចប់ជំនួយនូវសាច់ប្រាក់ទំហំដូចនេះមានរយៈពេល ២ឆ្នាំ ដោយរាប់ពីថ្ងៃទី២៤ ខែកុម្ភៈ ឆ្នាំ២០២២ ដល់ថ្ងៃទី២៤ ខែកុម្ភៈ ឆ្នាំ២០២៤។
បើគិតចាប់តាំងពីសង្គ្រាមរុស្ស៊ីឈ្លានពានអ៊ុយក្រែន រយៈពេល ៤៨៤ថ្ងៃមកនេះ សហរដ្ឋអាមេរិកបញ្ចេញសាច់ប្រាក់ក្នុងជំនួយយោធាជិត ៤៥ពាន់លានដុល្លារហើយបូកនឹងជំនួយផ្នែកសេដ្ឋកិច្ចជាង ២០ពាន់លានដុល្លារទៀត នាំឱ្យប្រទេសមហាអំណាចមួយនេះបានបញ្ចេញសាច់ប្រាក់របស់ខ្លួនសម្រាប់ប្រទេសអ៊ុយក្រែន ដែលហែកហួរដោយសង្គ្រាមឈ្លានពានពីសំណាក់មហាអំណាចរុស្ស៊ី មានជាង ៦៥ពាន់លានដុល្លារ៕