ក្រុមអ្នកវិភាគឯករាជ្យ ជំរុញឲ្យមេដឹកនាំកម្ពុជាលោក ហ៊ុន សែន ស្នើភាគីវៀតណាមបាញ់ដ្រូនដែលហោះចូលទឹកដីខ្មែរជាមួយកម្ពុជា ដើម្បីឲ្យប្រាកដថាដ្រូនទាំងនោះមិនមែនជាដ្រូនរបស់វៀតណាម និងដើម្បីឲ្យប្រាកដថា ដ្រូននោះមិនមែនជាដ្រូនរបស់លោក ហ៊ុន សែន ដែលប្រើដើម្បីបង្កើតព្រឹត្តិការណ៍ក្នុងផែនការនយោបាយរបស់គាត់។
អ្នកវិភាគឯករាជ្យ និងជាប្រធានវេទិកាពលរដ្ឋ លោក គឹម សុខ បានលើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីរាត្រីថ្ងៃអង្គារ ថា ដើម្បីឲ្យច្បាស់ថាដ្រូននោះជាដ្រូនរបស់ក្រុមជនជាតិវៀតណាមភាគតិចឬអត់ លោក ហ៊ុន សែន គួរស្នើភាគីវៀតណាមបាញ់ដ្រូននោះជាមួយកម្ពុជា ព្រោះថារដ្ឋាភិបាលវៀតណាមក៏ចង់កម្ចាត់ជនជាតិភាគតិចទាំងនោះដែរ ដូច្នេះចាំមើលថាតើរដ្ឋាភិបាលវៀតណាមហ៊ានសហការបាញ់ដ្រូននោះឬក៏អត់។
ជាងនេះទៀត ប្រជាពលរដ្ឋខ្មែរក៏ត្រូវចាំមើលដែរ ថាតើលោក ហ៊ុន សែន ហ៊ានស្នើឲ្យរដ្ឋាភិបាលវៀតណាមសហការបាញ់ដ្រូននោះជាមួយខ្លួន ឬក៏អត់ផងដែរ ព្រោះថាបើភាគីវៀតណាមក៏មិនហ៊ានសហការ លោក ហ៊ុន សែន ក៏មិនហ៊ានស្នើឱ្យភាគីវៀតណាមបាញ់ដ្រូននោះ គឺមានន័យថា ដ្រូនទាំងនោះមិនមែនជារបស់ក្រុមជនជាតិវៀតណាមភាគតិចនោះទេ គឺជាដ្រូនរបស់វៀតណាម ឬជាដ្រូនរបស់លោក ហ៊ុន សែន ខ្លួនឯងប៉ុណ្ណោះ។
អ្នកវិភាគរូបនេះលើកឡើងថា បើដ្រូនទាំងនោះជាដ្រូនរបស់វៀតណាម ហើយលោក ហ៊ុន សែន បែរជាចោទថាជាដ្រូនរបស់ជនជាតិវៀតណាមភាគតិចដេហ្គានោះ លោក ហ៊ុន សែន កំពុងធ្លាក់ចូលអន្ទាក់វៀតណាមក្នុងការកម្ចាត់ជនជាតិវៀតណាមភាគតិចជំនួសរដ្ឋាភិបាលវៀតណាមទៅវិញ។ ជាងនេះទៀត ក៏ជាការជួយដល់រដ្ឋាភិបាលវៀតណាម ក្នុងពេលដែលពួកគេកំពុងតែប្រឈមនឹងការចោទប្រកាន់ថាបានរំលោភសិទ្ធិជនជាតិភាគតិច និងរំលោភសិទ្ធិពលរដ្ឋខ្មែរក្រោមផងដែរ។
លោក គឹម សុខ ដាក់ការសង្ស័យថា ផ្ទុយទៅវិញ បើដ្រូននោះជាដ្រូនរបស់លោក ហ៊ុន សែន វិញ នោះគឺជាផែនការនយោបាយបម្រុងទុកមួយរបស់គាត់ចំពោះការបោះឆ្នោតខាងមុខនេះ។
លោកពន្យល់ថា ផែនការនោះគឺប្រសិនបើដំណើរការបោះឆ្នោតនាពេលខាងមុខនេះត្រូវពលរដ្ឋគូសសន្លឹកឆ្នោតចោល ដែលធ្វើឲ្យខូចដំណើរការនៃការបោះឆ្នោតនោះ គាត់នឹងប្រកាសបិទដំណើរការបោះឆ្នោតនោះតែម្តង ដោយប្រើលេសថា សន្តិសុខជាតិកំពុងរងនូវការវាយប្រហារពីបច្ចាមិត្តនៅតំបន់ព្រំដែន ហើយគាត់នឹងបន្តដឹកនាំរដ្ឋាភិបាលបន្តទៀត ដោយលុបការបោះឆ្នោតនេះចោលតែម្តង។
ប្រធានវេទិកាពលរដ្ឋរូបនេះលើកឡើងថា ការសន្និដ្ឋានរបស់លោកបែបនេះ គឺដោយសារតែហេតុការណ៍ដែលបានលេចឡើងនៅមុនការបោះឆ្នោត គឺហាក់ដូចជាជួនគ្នាពេកក្នុងរយៈពេល ៣អាណត្តិចុងក្រោយនេះ ក្នុងនោះ មុនការបោះឆ្នោតឆ្នាំ២០០៨ ហេតុការណ៍ផ្ទុះអាវុធរវាងកម្ពុជា-ថៃ បានកើតឡើង ហើយនៅមុនការបោះឆ្នោតឆ្នាំ២០១៣ ហេតុការណ៍ចម្រូងចម្រាសរវាងកម្ពុជា និងឡាវ ក៏បានកើតឡើងដែរ រហូតដល់មុនការបោះឆ្នោតឆ្នាំ២០២៣ នេះ ស្រាប់តែមានដ្រូនហោះចូលទឹកដីកម្ពុជាទៅវិញ។
លោក គឹម សុខ បញ្ជាក់ថា ការសង្ស័យចុងក្រោយរបស់លោក គឺនៅត្រង់ថា តើនេះអាចជាល្បិចរបស់លោក ហ៊ុន សែន ដើម្បីប្រើកម្លាំងទ័ពបង្ក្រាបកម្លាំងផ្ទៃក្នុងរបស់ខ្លួននៅតំបន់ព្រំដែនដែលគាត់សង្ស័យថាមានគេលាក់កម្លាំងដើម្បីប្រឆាំងនឹងលោក ហ៊ុន ម៉ាណែត ដែរឬក៏អត់។ លោកបន្ថែមថា ការសង្ស័យរបស់លោកបែបនេះ គឺដោយសារតែលោក ហ៊ុន សែន ប្រកាសទប់ទល់នឹងសត្រូវដែលរំលោភចូលទឹកដីរបស់ខ្លួនដោយចំហពេក ស្របពេលគាត់មិនទាន់ដឹងថាជាដ្រូនរបស់ភាគីណាឲ្យប្រាកដផងនោះ។
ការអះអាងនេះ ធ្វើឡើងបន្ទាប់ពីប្រមុខរដ្ឋាភិបាលកម្ពុជាលោក ហ៊ុន សែន ប្រកាសបាញ់ទម្លាក់ដ្រូនដែលបានហោះចូលទឹកដីកម្ពុជាកាលពីពេលថ្មីៗនេះ។
នៅថ្ងៃទី២៨ ខែមិថុនា ឆ្នាំ២០២៣ នេះ នាយករដ្ឋមន្ត្រីកម្ពុជាលោក ហ៊ុន សែន លើកឡើងក្នុងពិធីជួបជាមួយកម្មករនៅក្នុងរាជធានីភ្នំពេញ ដោយសន្មតថា ដ្រូនដែលបានហោះចូលទឹកដីកម្ពុជាគឺជាដ្រូនរបស់ក្រុមជនជាតិវៀតណាមភាគតិចដេហ្គា ក្នុងនោះលោក ហ៊ុន សែន ដាក់ការសង្ស័យថា ក្រុមជនជាតិយួនភាគតិចដេហ្គាទាំងនោះកំពុងហ្វឹកហាត់នៅប្រទេសមួយក្នុងតំបន់អាស៊ាន និងប្រើដីកម្ពុជាដើម្បីឆ្លងកាត់។
លោក ហ៊ុន សែន បញ្ជាឱ្យកងកម្លាំងប្រដាប់អាវុធដំឡើងកាំជ្រួចសម្រាប់បាញ់យន្តហោះ និងអាវុធគ្រប់ធុនដើម្បីបាញ់ដ្រូនទាំងនោះឱ្យខាងតែបាន ទោះត្រូវចំណាយរហូតដល់ ៥លានគ្រាប់ក៏ដោយ បើដ្រូននោះនៅតែបន្តហោះចូលទឹកដីកម្ពុជាបន្តទៀត ជាពិសេសគឺចាប់ពីយប់ថ្ងៃពុធនេះទៅ ត្រូវតែបាញ់ដោយគ្មានការលើកលែងឡើយ។
លោក ហ៊ុន សែន បញ្ជាក់ថា អង្គភាពណាដែលបានអាចបាញ់ទម្លាក់ដ្រូននោះបាន លោកនឹងផ្តល់រង្វាន់ ២០ម៉ឺនដុល្លារអាមេរិកក្នុង ១គ្រឿង ព្រោះលោកចង់ដឹងថា ដ្រូនទាំងនោះជាដ្រូនរបស់ប្រទេសណា ហើយលោកនឹងប្តឹងទៅអង្គការសហប្រជាជាតិតែម្តងពីការរំលោភដែនអធិបតេយ្យរបស់កម្ពុជាចំពោះប្រទេសដែលជាម្ចាស់ដ្រូនទាំងនេះ។
កាលពីថ្ងៃទី២៧ ខែមិថុនា ឆ្នាំ២០២៣ លោកនាយករដ្ឋមន្ត្រីអះអាងថា មានដ្រូនដែលគ្មានប្រភពបានហោះចូលទឹកដីកម្ពុជាជាច្រើនគ្រឿង ដែលជាការរំលោភអធិបតេយ្យជាតិរបស់កម្ពុជាយ៉ាងធ្ងន់ធ្ងរ។ ជាក់ស្តែង នៅយប់ថ្ងៃអង្គារ មានដ្រូនចំនួន ៧គ្រឿងបានហោះចូលទឹកដីកម្ពុជាក្នុងខេត្តមណ្ឌលគិរី ស្ថិតក្នុងស្រុកកោះញែក បន្ថែមទៀត ប៉ុន្តែមិនមានដ្រូនណាមួយត្រូវបានបាញ់ទម្លាក់ដោយកងកម្លាំងកម្ពុជានោះទេ៕