សហគមន៍រងគ្រោះដីធ្លីជាមួយសមាជិកព្រឹទ្ធសភាមកពីគណបក្សប្រជាជនកម្ពុជា ឧកញ៉ា លី យ៉ុងផាត់ បាននាំគ្នាអំពាវនាវទៅកាន់លោក ហ៊ុន សែន ឲ្យជួយអន្តរាគមន៍ទៅតុលាការខេត្តកោះកុង ឲ្យដោះលែងពលរដ្ឋចំនួន ៩នាក់ ឲ្យមានសេរីភាពឡើងវិញ ដោយថាពួកគេទាំងនោះមិនបានប្រព្រឹត្តបទ «ញុះញង់» ដូចការចោទប្រកាន់របស់តុលាការឡើយ។
ការស្នើនេះ បន្ទាប់ពីសមត្ថកិច្ចខេត្តកោះកុង កាលពីថ្ងៃទី២៩ ខែមិថុនា បានចាប់ខ្លួនសកម្មជនដីធ្លីចំនួន ១១នាក់ករណីពួកគេនាំគ្នាធ្វើដំណើរពីខេត្តមកកាន់រាជធានីភ្នំពេញ ដើម្បីយកញត្តិទៅដាក់នៅក្រសួងយុត្តិធម៌។
បើតាមយុវជនសហគមន៍តានី ១៩៧ បានសរសេរនៅលើហ្វេសប៊ុករបស់ខ្លួននៅថ្ងៃទី០៤ ខែកក្កដា នេះថា កន្លងមក លោក ហ៊ុន សែន បានប្រកាសមិនឲ្យពលរដ្ឋរងគ្រោះដីធ្លីជាប់ពន្ធនាគារឡើយ ប៉ុន្តែមន្ត្រីក្រោមឱវាទបែរជាចោទប្រកាន់ និងចាប់ខ្លួនពលរដ្ឋរងគ្រោះដាក់គុកទៅវិញ។
ពួកគេទទូចឲ្យលោក ហ៊ុន សែន ជួយអន្តរាគមន៍ទៅតុលាការខេត្តកោះកុង ឲ្យដោះលែងពលរដ្ឋដែលបាត់បង់ដីកំពុងតែរងទុក្ខវេទនានៅក្នុងពន្ធនាគារទាំង ៩រូប ឲ្យមានសេរីភាព និងបានត្រឡប់មកផ្ទះដើម្បីឲ្យពួកគេបានជួបជុំគ្រួសារវិញ។
ការដាក់ញត្តិរបស់សកម្មជនដីធ្លីនេះ ដើម្បីស្នើសុំរដ្ឋមន្ត្រីក្រសួងយុត្តិធម៌ លោក កើត រិទ្ធ ជួយកិច្ចអន្តរាគមន៍ទៅតុលាការខេត្តកោះកុង ឲ្យទម្លាក់ចោលរាល់បទចោទប្រឆាំងនឹងសហគមន៍ពួកគេ ដោយសារតែធ្វើសកម្មភាពការពារដីធ្លីរបស់ខ្លួន។ លើសពីនេះ ពួកគេក៏ស្នើសុំក្រសួងចាត់វិធានការផ្លូវច្បាប់ចំពោះបុគ្គលដែលរំលោភសិទ្ធិរបស់ពួកគេផងដែរ។
សកម្មជនដីធ្លីដែលត្រូវនគរបាលខេត្តកោះកុងចាប់ខ្លួន ក្នុងនោះមានអ្នកស្រី ផាវ ញ៉ើង អ្នកស្រី ដេត ហួរ អ្នកស្រី រ៉ឹក ស៊ឹង លោក ហេង ជ័យ លោក សុខ ជ័យ លោក ឡាំ ជាវ អ្នកស្រី សេង លីន អ្នកស្រី យឿន ខ្មៅ អ្នកស្រី យី គន្ធា អ្នកស្រី ទិន តាំង និងអ្នកស្រី សួន ថេង ហើយនិងក្មេងស្រីអាយុប្រាំពីរឆ្នាំមួយរូបត្រូវបាននាំទៅជាមួយខណៈពេលចាប់ខ្លួននោះផងដែរ។
តែយ៉ាងណា សមត្ថកិច្ចបានដោះលែងសកម្មជនម្នាក់ និងកូនស្រីអាយុ ៧ឆ្នាំឲ្យនៅក្រៅឃុំបណ្ដោះអាសន្ន ប៉ុន្តែដាក់ឲ្យស្ថិតនៅក្រោមការត្រួតពិនិត្យតាមផ្លូវតុលាការ ខណៈពលរដ្ឋ ៩នាក់ទៀតត្រូវបានតុលាការចោទប្រកាន់ និងបញ្ជូនទៅឃុំខ្លួនដាក់ពន្ធនាគារនៅថ្ងៃទី៣០ ខែមិថុនា ក្រោមបទចោទប្រកាន់ «ញុះញង់»។
បើតាមសេចក្ដីប្រកាសព័ត៌មានរបស់មជ្ឈមណ្ឌលសិទ្ធិមនុស្សកម្ពុជា ចេញផ្សាយនៅថ្ងៃទី០៤ ខែកក្កដា នេះថា មន្ត្រីពន្ធនាគារខេត្តកោះកុង មិនបានអនុញ្ញាតឲ្យក្រុមគ្រួសារបានជួប និងសួរសុខទុក្ខពលរដ្ឋរងគ្រោះដីធ្លីឡើយ ក្រោមហេតុផលថាកំពុងមានជំងឺឆ្លងក្នុងពន្ធនាគារ។
សង្គមស៊ីវិលដែលធ្វើការលើកកម្ពស់ផ្នែកសិទ្ធិមនុស្ស ចាត់ទុកការចោទប្រកាន់ និងឃុំខ្លួនពលរដ្ឋដែលគ្រាន់តែឡើងមករកកិច្ចអន្តរាគមន៍ពីរដ្ឋមន្ត្រីក្រសួងយុត្តិធម៌ ថាជារឿងអយុត្តិធម៌សម្រាប់ពលរដ្ឋកំពុងរងគ្រោះបាត់បង់ដីធ្លី។
ពលរដ្ឋរងគ្រោះដីធ្លីឡើងមករកកិច្ចអន្តរាគមន៍ពីរដ្ឋមន្ត្រីក្រសួងយុត្តិធម៌នេះ ធ្វើឡើងបន្ទាប់ពីចៅក្រមស៊ើបសួរសាលាដំបូងខេត្តកោះកុង លោក ឡោ ក្រឹម កាលពីថ្ងៃទី២៩ ខែមិថុនា ឆ្នាំ២០២២ បានសម្រេចដាក់ឲ្យតំណាងពលរដ្ឋ ៧នាក់ស្ថិតក្រោមការត្រួតពិនិត្យតាមផ្លូវតុលាការ ក្រោយឆ្លើយបំភ្លឺពាក់ព័ន្ធបទចោទ «អំពើញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម និងអំពើប៉ះពាល់កម្មសិទ្ធិនៃទ្រព្យសម្បត្តិឯកជនរបស់រដ្ឋ»។
តំណាងពលរដ្ឋ ៧នាក់ក្នុងនោះមានអ្នកស្រី ភាព តេង អ្នកស្រី ណុយ សុខ អ្នកស្រី ទន់ ឡាយ លោក តូច ង៉ាន់ លោក ឃង់ រុច និងតំណាងពលរដ្ឋផ្សេងទៀត។
បើតាមក្រុមប្រជាពលរដ្ឋធ្លាប់អះអាងថា ពួកគេចំនួន ២៤៣គ្រួសារនៅសហគមន៍ព្រលានក្នុងឃុំកណ្ដោល ស្រុកបុទុមសាគរ ត្រូវបានក្រុមហ៊ុន Koh Kong Sugar និង Koh Kong Plantation Industry របស់លោកឧកញ៉ា លី យ៉ុងផាត់ បានដាក់គ្រឿងចក្រឈូសឆាយដី និងផលដំណាំរបស់គាត់អស់ជាច្រើនហិកតារកាលពីឆ្នាំ២០០៦ ហើយអាជ្ញាធរបានគំរាមកំហែងមិនឲ្យពលរដ្ឋចេញតវ៉ាប្រឆាំង និងបានគំរាមចាប់ខ្លួនពួកគាត់ដាក់ពន្ធនាគារផងដែរ បើទោះបីជាដីនោះពួកគាត់បានចូលទៅអាស្រ័យផលតាំងពីឆ្នាំ១៩៩៥។
គិតចាប់តាំងពីឆ្នាំ២០០៦ មកដល់បច្ចុប្បន្ន ពួកគេមិនទាន់ទទួលបានដំណោះស្រាយហើយ ហើយពួកគេត្រូវបានឧកញ៉ា លី យ៉ុងផាត់ ប្ដឹងទៅតុលាការថែមទៀតផងដែរ៕