នាយករដ្ឋមន្ត្រីកម្ពុជាលោក ហ៊ុន សែន ព្រមានថា ប្រសិនបើប្រធានាធិបតីសហរដ្ឋអាមេរិកពិតជាផ្តល់គ្រាប់បែកចង្កោមដល់ប្រទេសអ៊ុយក្រែន មែននោះ អ្នករងគ្រោះពិតប្រាកដគឺជាប្រជាជនអ៊ុយក្រែន ព្រោះរឿងនេះគឺជាដានប្រវត្តិសាស្ត្រដ៏ជូរចត់មួយរបស់ប្រទេសកម្ពុជាដែលបានកើតឡើងរួចមកហើយកាលពីជាង ៥០ឆ្នាំមុន។
បុរសខ្លាំងដែលអួតពីការបញ្ចប់សង្គ្រាមនៅកម្ពុជា លោក ហ៊ុន សែន បានសរសេរលើបណ្ដាញទំនាក់ទំនងតេឡេក្រាមកាលពីថ្ងៃទី៩ ខែកក្កដា ឆ្នាំ២០២៣ នេះថា ប៉ុន្មានថ្ងៃមកនេះមានការផ្សព្វផ្សាយថា សហរដ្ឋអាមេរិកនឹងផ្តល់គ្រាប់បែកចង្កោមឲ្យទៅអ៊ុយក្រែន ដើម្បីប្រយុទ្ធជាមួយកងទ័ពរុស្ស៊ី ដូច្នេះប្រសិនបើរឿងនេះជាការពិត វានឹងក្លាយទៅជាគ្រោះថ្នាក់ធំបំផុតសម្រាប់ប្រជាជនអ៊ុយក្រែនរាប់សិបឆ្នាំ ឬរហូតដល់រយឆ្នាំទៀតផង ប្រសិនបើគ្រាប់បែកចង្កោមនេះយកទៅប្រើប្រាស់ក្នុងតំបន់ដែលរុស្ស៊ីកាន់កាប់ក្នុងទឹកដីអ៊ុយក្រែន។
មេដឹកនាំខ្មែរដែលមានទំនោរទៅរកការដឹកនាំបែបកុម្មុយនីស្ត លោក ហ៊ុន សែន លើកឡើងថា បទពិសោធន៍ដ៏ឈឺចាប់របស់កម្ពុជាដែលបានទទួលការទម្លាក់គ្រាប់បែកចង្កោមពីសហរដ្ឋអាមេរិកនៅដើមទសវត្សន៍ឆ្នាំ១៩៧០ ហើយមកដល់ពេលនេះគឺមានរយៈពេលជាងកន្លះសតវត្សរ៍ទៅហើយ តែកម្ពុជានៅតែមិនទាន់អាចរកវិធីបំផ្លាញគ្រាប់បែកចង្កោមទាំងនោះចោលអស់នៅឡើយ។
មេដឹកនាំខ្មែរឡើងកាន់អំណាចក្នុងសម័យសង្គ្រាម លោក ហ៊ុន សែន បញ្ជាក់ថា លោកដឹងយ៉ាងច្បាស់ថាប្រទេសកម្ពុជាតូចហើយទន់ខ្សោយ សំឡេងគ្មានទម្ងន់ ប៉ុន្តែដោយក្តីអាណិតប្រជាជនអ៊ុយក្រែន លោកសូមអំពាវនាវប្រធានាធិបតីអាមេរិកដែលជាអ្នកផ្តល់ឱ្យ និងប្រធានាធិបតីអ៊ុយក្រែន ដែលជាអ្នកទទួល សូមមេត្តាកុំប្រើប្រាស់គ្រាប់បែកចង្កោមក្នុងសង្គ្រាមនេះធ្វើអ្វី ព្រោះអ្នករងគ្រោះពិតប្រាកដពីគ្រាប់បែកនេះ គឺប្រជាជន ហើយជាពិសេសគឺប្រជាជនអ៊ុយក្រែនតែម្តង។
ការអះអាងនេះ ធ្វើឡើងស្របពេលដែលសហរដ្ឋអាមេរិកបានសម្រេចផ្តល់ជំនួយគ្រាប់បែកចង្កោមដល់ប្រទេសអ៊ុយក្រែន ដើម្បីប្រើប្រាស់ក្នុងសង្គ្រាមទប់ទល់នឹងប្រទេសរុស្ស៊ី ដែលកំពុងឈ្លានពានលើអ៊ុយក្រែន នៅពេលនេះ។
សារព័ត៌មានអាមេរិក New York Times បានចុះផ្សាយកាលពីពេលថ្មីៗនេះថា សហរដ្ឋអាមេរិកកំពុងរៀបចំកញ្ចប់ជំនួយយោធាថ្មីក្នុងទំហំទឹកប្រាក់ ៨០០លានដុល្លារបន្ថែមទៀតដល់អ៊ុយក្រែន ដែលក្នុងនោះមានគ្រាប់បែកចង្កោមផងដែរ។ ជំនួយយោធាថ្មីដែលអាមេរិកត្រៀមបញ្ជូនទៅឱ្យអ៊ុយក្រែន នេះ គឺដើម្បីជួយបង្កើនប្រសិទ្ធភាពវាយបករបស់កងទ័ពអ៊ុយក្រែន ហើយគ្រាប់បែកចង្កោមនេះគឺជាអាវុធដែលប្រទេសជាង ១២០ បានហាមឃាត់ការប្រើប្រាស់ ប៉ុន្តែសហរដ្ឋអាមេរិក និងអ៊ុយក្រែន ព្រមទាំងរុស្ស៊ី ពុំបានចុះហត្ថលេខាលើច្បាប់អន្តរជាតិនេះទេ។
អ្នកវិភាគឯករាជ្យ និងជាប្រធានវេទិកាពលរដ្ឋ លោក គឹម សុខ ប្រាប់សារព័ត៌មាន The Cambodia Daily នៅថ្ងៃទី១០ កក្កដា នេះថា ការលើកឡើងរបស់លោក ហ៊ុន សែន ជុំវិញការសម្រេចផ្តល់ជំនួយគ្រាប់បែកចង្កោមដល់អ៊ុយក្រែនពីសហរដ្ឋអាមេរិកនៅពេលនេះ គ្រាន់តែជាល្បិចបញ្ឆេះកំហឹងឲ្យប្រជាពលរដ្ឋខ្មែរស្អប់សហរដ្ឋអាមេរិក ដែលតែងតែគាំទ្រអ្នកប្រជាធិបតេយ្យប៉ុណ្ណោះ ព្រោះចរិតលោក ហ៊ុន សែន ដែលធ្វើបាបពលរដ្ឋខ្មែរសព្វថ្ងៃនេះ មិនអាចក្លាយទៅជាមនុស្សចេះអាណិតពលរដ្ឋអ៊ុយក្រែននោះទេ។
លោក គឹម សុខ លើកឡើងថា ប្រធានាធិបតីអ៊ុយក្រែន មិនមែនដល់ថ្នាក់មិនដឹងថាការប្រើគ្រាប់បែកចង្កោមដោយការទម្លាក់ពីលើយន្តហោះ ឬកប់ក្នុងដី នឹងបង្កគ្រោះថ្នាក់ដល់អ៊ុយក្រែនខ្លួនឯងនោះឡើយ ព្រោះថាស្ថានភាពសង្គ្រាមរវាងរុស្ស៊ី និងអ៊ុយក្រែននៅពេលនេះ មិនមែនជាសង្គ្រាមទ័ពព្រៃទេ គឺជាសង្គ្រាមរណសិរ្ស ខណៈគ្រាប់បែកចង្កោមគឺគេប្រើប្រាស់សម្រាប់តែទប់ទល់នឹងសង្គ្រាមទ័ពព្រៃប៉ុណ្ណោះ។
អ្នកវិភាគរូបនេះបញ្ជាក់ថា ការប្រើគ្រាប់បែកចង្កោមដែលមានប្រយោជន៍បំផុតសម្រាប់អ៊ុយក្រែន គឺត្រូវប្រើសម្រាប់ការពារនៅតំបន់ណាដែលជាប់ព្រំដែនរុស្ស៊ី ដើម្បីទប់ទល់នឹងការឈ្លានពានរបស់រុស្ស៊ីចូលទឹកដីរបស់ខ្លួន ខណៈប្រធានាធិបតីអ៊ុយក្រែន ក៏ច្បាស់ជាយល់ពីរបៀបនៃការប្រើគ្រាប់បែកនេះ ដើម្បីទទួលបានផលប្រយោជន៍សម្រាប់ខ្លួនដែរ មិនមែនគេមិនយល់ដឹងដូចការលើកឡើងរបស់លោក ហ៊ុន សែន នោះទេ។
ទាក់ទិននឹងបញ្ហានេះ លេខាធិការសារព័ត៌មានសម្រាប់សេតវិមាន អ្នកស្រី Jen Psaki បាននិយាយក្នុងសន្និសីទសារព័ត៌មានថា ការពិត រុស្ស៊ីបានប្រើអាវុធនេះរួចទៅហើយនៅទឹកដីអ៊ុយក្រែន តែអ្នកស្រីថា បើរុស្ស៊ីផ្លាស់ប្ដូរជំហរ ក៏អាមេរិកមិនផ្លាស់ប្ដូរជំហរនេះវិញដែរ។
គ្រាប់បែកចង្កោម គឺជាប្រភេទអាវុធដែលគេអាចបាញ់ចេញពីកាំភ្លើងធំក៏បាន ទម្លាក់ពីលើយន្តហោះក៏បាន ឬបាញ់ចេញពីនាវាក៏បាន ដែលវានឹងបំបែកចេញជាគ្រាប់តូចៗពីលើផ្ទៃអាកាសធ្លាក់មកលើដីរាយប៉ាយ ហើយវាងាយប៉ះខ្លាំងណាស់ដល់ជីវិតមនុស្ស៕