កូនប្រុសច្បងលោក ហ៊ុន សែន ដែលត្រៀមស្នងតំណែងនាយករដ្ឋមន្ត្រី លោក ហ៊ុន ម៉ាណែត ប្រកាសជំហររបស់គណបក្សប្រជាជនកម្ពុជា ក្នុងការសុំសន្លឹកឆ្នោតពីប្រជាពលរដ្ឋសម្រាប់ការបោះឆ្នោតនៅចុងខែកក្កដា នេះ។
កូនប្រុសច្បងត្រៀមស្នងអំណាចបន្តត្រកូលហ៊ុន គឺលោក ហ៊ុន ម៉ាណែត បង្ហោះវីដេអូលើទំព័រហ្វេសប៊ុករបស់ខ្លួននៅថ្ងៃទី១៣ កក្កដា នេះ ដោយណែនាំទៅកាន់សមាជិកគណបក្សប្រជាជនកម្ពុជាថា ពលរដ្ឋខ្លះមិនព្រមចូលជាសមាជិកគណបក្សប្រជាជនកម្ពុជាទេ ប៉ុន្តែបើអាចសុំសន្លឹកឆ្នោតរបស់ពួកគាត់បាន គឺរឹតតែល្អ ទោះពួកគាត់មិនគាំទ្របក្សណា ឬជាសមាជិកគណបក្សណាក៏ដោយ។
ទាយាទត្រៀមស្នងមរតកអំណាចទាំងរំលោភច្បាប់ លោក ហ៊ុន ម៉ាណែត លើកឡើងថា តាមបទពិសោធន៍កន្លងមក នៅការិយាល័យបោះឆ្នោតខ្លះសមាជិកគណបក្សប្រជាជនកម្ពុជាមានតែ ១០០នាក់ប៉ុណ្ណោះ ប៉ុន្តែសន្លឹកឆ្នោតដែលគណបក្សទទួលបានបែរជាលើសពី ១០០សន្លឹកទៅវិញ ដែលនេះបញ្ជាក់ថា ប្រជាពលរដ្ឋខ្លះគាត់មិនមែនជាសមាជិកគណបក្សប្រជាជនកម្ពុជាមែន ប៉ុន្តែគាត់គាំទ្រការដឹកនាំរបស់គណបក្សប្រជាជនកម្ពុជា។
បេក្ខជននាយករដ្ឋមន្ត្រីដែលកំពុងត្រៀមស្នងអំណាចនៅក្រោយការបោះឆ្នោតឆ្នាំ២០២៣ លោក ហ៊ុន ម៉ាណែត បញ្ជាក់ថា គុណសម្បត្តិរបស់គណបក្សប្រជាជនកម្ពុជា គឺធ្វើកិច្ចការដើម្បីអភិវឌ្ឍប្រទេសជាតិមិនដែលឈប់សម្រាក ប៉ុន្តែក្រុមប្រឆាំងបានត្រឹមតែដេកមើល រិះគន់ ហើយសន្យាជាមួយប្រជាពលរដ្ឋប៉ុណ្ណោះ ដូច្នោះហើយបានជាពលរដ្ឋខ្លះមិនមែនជាសមាជិកគណបក្សប្រជាជនកម្ពុជា ប៉ុន្តែបែរជាបោះឆ្នោតគាំទ្រគណបក្សប្រជាជនកម្ពុជាទៅវិញ នោះគឺដោយសារតែគណបក្សប្រជាជនកម្ពុជាធ្វើអត់ឈប់នេះឯង។
ការអះអាងនេះ ធ្វើឡើងស្របពេលដែលគេមើលឃើញថា គណបក្សប្រជាជនកម្ពុជាកំពុងធ្វើយុទ្ធនាការស្វែងរកសំឡេងឆ្នោតយ៉ាងគគ្រឹកគគ្រេងនៅក្នុងពេលយុទ្ធនាការឃោសនាបោះឆ្នោតសម្រាប់ការបោះឆ្នោតជាតិនាខែកក្កដា ឆ្នាំ២០២៣ នេះ។
ដំណើរការនៃការបោះឆ្នោតនៅថ្ងៃទី២៣ ខែកក្កដា ឆ្នាំ២០២៣ នេះ ពិតមែនតែគ្មានគណបក្សសង្គ្រោះជាតិ គណបក្សភ្លើងទៀនដែលជាគណបក្សមានកម្លាំងគាំទ្រប្រហាក់ប្រហែលនឹងបក្សកាន់អំណាចដោយសារការរាំងខ្ទប់របស់លោក ហ៊ុន សែន ព្រមទាំងគ្មានវត្តមានមេដឹកនាំប្រឆាំងលោក កឹម សុខា និងលោក សម រង្ស៊ី ក៏ដោយ ក៏លោក ហ៊ុន សែន និងសមាជិកបក្សកាន់អំណាចទាំងអស់នៅតែបារម្ភខ្លាចប្រជាពលរដ្ឋមិនបោះឆ្នោតឱ្យបក្សកាន់អំណាចដែរ តាមរយៈនៃការគូសខ្វែងសន្លឹកឆ្នោតចោល បើទោះបីជាលោក ហ៊ុន សែន បានកែច្បាប់បោះឆ្នោតដើម្បីតម្រូវឱ្យប្រជាពលរដ្ឋត្រូវតែទៅបោះឆ្នោតទៅហើយនោះ។
ក្រុមអ្នកវិភាគលើកឡើងថា ដើម្បីឱ្យដំណើរការនៃការបោះឆ្នោតនាពេលដ៏ខ្លីខាងមុខនេះប្រកបដោយសុវត្ថិភាព និងជោគជ័យ កុំឱ្យមានការគូសខ្វែងសន្លឹកឆ្នោត លោក ហ៊ុន សែន បានប្រើវិធីគ្រប់បែបយ៉ាងដែលគាត់អាចធ្វើបាន ដូចជាកែប្រែច្បាប់បោះឆ្នោតដើម្បីបង្ខំឱ្យពលរដ្ឋទៅបោះឆ្នោត និងព្រមានដាក់ទោសទណ្ឌទៅដល់អ្នកណាដែលគូសខ្វែងសន្លឹកឆ្នោត ជាដើម។
លើសពីនេះ លោក ហ៊ុន សែន ក៏បានបញ្ជាឱ្យសមាជិករបស់ខ្លួននៅទូទាំងប្រទេសដើរបង្រៀនប្រជាពលរដ្ឋគូសសញ្ញាធីកលើសន្លឹកឆ្នោតគ្រប់គ្នា និងគ្រប់ទីកន្លែងថែមទៀត បើទោះបីជាពលរដ្ឋខ្មែរបានឆ្លងកាត់ការបោះឆ្នោតអស់ ៦អាណត្តិមកហើយក្តី។
ប្រភពដដែលលើកឡើងថា ការគំរាមកំហែង ការបំភិតបំភ័យ លោក ហ៊ុន សែន បានធ្វើអស់ហើយនៅមុនការបោះឆ្នោតនេះ ប៉ុន្តែនៅសល់តែមួយជំហានទៀតប៉ុណ្ណោះដែលគាត់មិនអាចធ្វើបាន នោះគឺនៅក្នុងបន្ទប់សម្ងាត់គូសសន្លឹកឆ្នោតដែលគាត់មិនអាចដឹងថា តើពលរដ្ឋនឹងគូសសញ្ញាខ្វែងលើសន្លឹកឆ្នោត ឬក៏អត់នោះទេ។
កម្ពុជាបានរៀបចំឱ្យមានដំណើរការបោះឆ្នោតជាតិបាន ៦អាណត្តិហើយ ប៉ុន្តែគេសង្កេតឃើញថា ការបោះឆ្នោតដែលត្រឹមត្រូវ សេរី និងយុត្តិធម៌ គឺមានតែការបោះឆ្នោតលើកទី១ នៅឆ្នាំ១៩៩៣ ដែលរៀបចំដោយអ៊ុនតាក់ប៉ុណ្ណោះ។ ក្រៅពីនោះ គឺជាការបោះឆ្នោតដែលពោរពេញដោយការគំរាមកំហែងរបស់គណបក្សប្រជាជនកម្ពុជាគ្រប់អាណត្តិទាំងអស់ ដែលអាចឱ្យលោក ហ៊ុន សែន បន្តក្រាញអំណាចរហូតដល់សព្វថ្ងៃនេះ៕