បុរសខ្លាំងក្រាញអំណាចនៅកម្ពុជាលោក ហ៊ុន សែន បានចំអកឲ្យមេដឹកនាំ និងសកម្មជនបក្សប្រឆាំងថាបានបរាជ័យ ដោយសារពួកគេរំពឹងទុកថានៅពេលលោក Pita ជាប់ជានាយករដ្ឋមន្ត្រីថៃ នឹងអនុញ្ញាតឲ្យពួកគេប្រើប្រាស់ទឹកដីថៃ ធ្វើចលនាបះបោរប្រឆាំងនឹងរដ្ឋាភិបាលកម្ពុជា ខណៈបណ្តាប្រជាពលរដ្ឋថៃ និងអ្នកគាំទ្រលោក Pita Limjaroenrat បាននាំគ្នារិះគន់ និងជេរប្រមាថលោកនាយករដ្ឋមន្ត្រី ហ៊ុន សែន ដែលបានលើកឡើងពីការបរាជ័យរបស់លោក Pita មិនអាចធ្វើជានាយករដ្ឋមន្ត្រី។
លោក ហ៊ុន សែន បានបង្ហោះសារនៅក្នុងតេឡេក្រាមកាលពីយប់ថ្ងៃទី១៣ ខែកក្កដា ឆ្នាំ២០២៣ ដោយលើកឡើងថា ការមិនទទួលបានសំឡេងគ្រប់គ្រាន់ដើម្បីធ្វើជានាយករដ្ឋមន្ត្រីថៃ របស់លោក Pita គឺជាការបរាជ័យដ៏ធំសម្រាប់មេដឹកនាំ និងសកម្មជនដែលកំពុងភៀសខ្លួននៅក្រៅប្រទេស។
បុរសខ្លាំងគ្រួសារនិយមថា កន្លងមក មេដឹកនាំ និងសកម្មជនបក្សប្រឆាំងតែងតែរំពឹងទុកថា នៅពេលលោក Pita ក្លាយជានាយករដ្ឋមន្ត្រីថៃ ពួកគេនឹងប្រើប្រាស់ទឹកដីថៃ ដើម្បីធ្វើចលនាបះបោរប្រឆាំងនឹងរដ្ឋាភិបាលកម្ពុជា ប៉ុន្តែឥឡូវក្តីរំពឹងរបស់មេដឹកនាំ និងក្រុមសកម្មជនដែលលោក ហ៊ុន សែន ហៅដោយប្រើពាក្យអសុរោះជាពួកអាតិរច្ឆានទាំងនោះ ថាបានរលាយដូចអំបិលត្រូវទឹកហើយ ដោយសារពួកគេធ្វើនយោបាយផ្អែកលើដង្ហើមអ្នកដទៃ។
ប្រធានវេទិកាពលរដ្ឋ និងជាអ្នកវិភាគនយោបាយ លោក គឹម សុខ ប្រាប់សារព័ត៌មាន The Cambodia Daily ថា លោក ហ៊ុន សែន ពិតជាអសីលធម៌ណាស់ដែលហៅអ្នកដទៃប្រើពាក្យ «តិរច្ឆាន»។ លោកថា មួយវិញទៀតវាក៏បានបង្ហាញពីការនិយាយអត់ហេតុផល ចងចិត្តគុំ សម្អប់ ចរិតសងសឹក និងបង្កបញ្ហាមិនចេះឆ្អែត ទាំងការថ្លែងសាធារណៈ ទាំងលើបណ្ដាញសង្គមហ្វេសប៊ុក រហូតដល់ Twitter គឺនៅកន្លែងណា លោក ហ៊ុន សែន រករឿងឈ្លោះនៅទីនោះ។
ប្រភពដដែលនេះបន្ថែមថា កាលណាគាត់មានចំណេះទាប និងសមត្ថភាពតិចពេក លោក ហ៊ុន សែន គួរតែរកគ្រូបង្រៀនសីលធម៌និយាយស្ដី និងគ្រូអប់រំចិត្ត មុននឹងថ្លែងសារអ្វីមួយជាចំហ ពីព្រោះពាក្យតិរច្ឆាននេះ គឺសម្រាប់តែពួកមនុស្សបាតផ្សារនិយាយជេរគ្នាតែប៉ុណ្ណោះ មិនមែនសម្រាប់មេដឹកនាំយកទៅប្រើបញ្ចេញសារ ឬថ្លែងជេរអ្នកដទៃឡើយ។
អ្នកវិភាគរូបនេះថា បើនិយាយទៅដល់នយោបាយវិញ ជាចិត្តសាស្ត្រ លោក ហ៊ុន សែន ត្រូវទទួលស្គាល់ថា នៅពេលលោក ភីថា ក្លាយជានាយករដ្ឋមន្ត្រីថៃ លោក ភីថា នឹងជួយសម្រួលឱកាសធ្វើសកម្មភាពរបស់ក្រុមអ្នកតស៊ូដើម្បីប្រជាធិបតេយ្យក្នុងតំបន់អាស៊ាន រួមទាំងអ្នកតស៊ូខ្មែរផងដែរ។ ម្យ៉ាងទៀត លោក ភីថា ក៏បានប្រាប់ច្បាស់ទៅកាន់លោក ហ៊ុន សែន រួចហើយថា នឹងជួយសម្រួលពលករចំណាកស្រុកដែលធ្វើការនៅប្រទេសថៃ។
លោក គឹម សុខ ថារឿងទាំងនេះធ្វើឲ្យលោក ហ៊ុន សែន ភ័យខ្លាំងណាស់ ព្រោះបើលោក ភីថា កាន់អំណាចមែន វាជាផ្លូវដ៏ទូលាយសម្រាប់អ្នកតស៊ូដើម្បីប្រជាធិបតេយ្យខ្មែរកាន់តែសកម្ម និងហៀរចូលកម្ពុជាតាមទឹកដីថៃ ដើម្បីទៅតទល់នឹងអំណាចផ្ដាច់ការរបស់គ្រួសារ ហ៊ុន។ ដូច្នេះលោកថា លោក ហ៊ុន សែន ដឹងវត្តមានរបស់លោក ភីថា ជានាយករដ្ឋមន្ត្រីថៃ មិនត្រឹមតែជាអ្នកកែទម្រង់នៅថៃ ទេ ក៏ជាជំនួយរុញឲ្យអំណាចផ្ដាច់ការនៅកម្ពុជារង្គើដែរ។
ការប្រកាសចំអករបស់លោក ហ៊ុន សែន មេដឹកនាំក្រាញអំណាចតពូជនៅកម្ពុជានេះ ធ្វើឡើងខណៈដែលលោក សម រង្ស៊ី ក៏ធ្លាប់បង្ហាញពីចេតនាត្រឡប់ចូលកម្ពុជាជាថ្មី ក្រោយពេលដែលលោក Pita ក្លាយជានាយករដ្ឋមន្ត្រីរបស់ថៃ។
បណ្តាប្រជាពលរដ្ឋថៃ និងអ្នកគាំទ្រលោក Pita Limjaroenrat បាននាំគ្នារិះគន់ និងជេរប្រមាថលោកនាយករដ្ឋមន្ត្រី ហ៊ុន សែន ដែលបានលើកឡើងពីការបរាជ័យរបស់លោក Pita មិនអាចធ្វើជានាយករដ្ឋមន្ត្រី។ ប្រតិកម្មពីបណ្តាពលរដ្ឋថៃ និងអ្នកគាំទ្រលោក Pita កើតមានឡើងក្រោយពេលដែលលោកនាយករដ្ឋមន្ត្រី ហ៊ុន សែន តាមបណ្ដាញសង្គមធ្វីតធ័រ ថាការមិនទទួលបានសំឡេងគ្រប់គ្រាន់ដើម្បីធ្វើជានាយករដ្ឋមន្ត្រីថៃ របស់លោក Pita គឺជាការបរាជ័យដ៏ធំរបស់ក្រុមពួកតិរច្ឆាននៅកម្ពុជា។
សារឌឺដងពីមជ្ឈដ្ឋានប្រជាជនថៃ មកលើលោកនាយករដ្ឋមន្ត្រី ហ៊ុន សែន ក្រោយពេលដែលលោក ហ៊ុន សែន នៅល្ងាចថ្ងៃព្រហស្បតិ៍ ទី១៣ កក្កដា បានបង្ហោះខ្លឹមសារពីការបរាជ័យរបស់លោក Pita មិនអាចក្លាយជានាយករដ្ឋមន្ត្រី ដោយលើកឡើងថា អ្វីៗដែលកើតឡើងក្នុងប្រទេសថៃនៅថ្ងៃនេះ គឺមិនបានពាក់ព័ន្ធនឹងលោក ឬកម្ពុជាឡើយ។ វាជារឿងគួរឲ្យអាណិតដែលឃើញលោកព្យាយាមបង្កើតរឿងឡើងដោយខ្លួនឯងយ៉ាងដូច្នេះ។ សង្ឃឹមថាលោកអាចឃើញប្រព័ន្ធប្រជាធិបតេយ្យដ៏ពេញលេញរបស់ថៃ ហើយវានឹងជះឥទ្ធិពលដល់ប្រជាពលរដ្ឋនៃប្រទេសកម្ពុជា៕