កូនប្រុសពៅរបស់មេដឹកនាំក្រាញអំណាចផ្ដាច់មុខនៅកម្ពុជា លោក ហ៊ុន ម៉ានី អះអាងថា លទ្ធផលនៃការបោះឆ្នោតជ្រើសតាំងតំណាងរាស្ត្រអាណត្តិទី៧ នេះ គឺជាការឆ្លុះបញ្ចាំងយ៉ាងច្បាស់ពីជំនឿទុកចិត្តឥតងាករេរបស់ពលរដ្ឋម្ចាស់ឆ្នោតមកលើការខិតខំប្រឹងប្រែង និងសមត្ថភាពដឹកនាំប្រកបដោយភាពម្ចាស់ការ ម៉ឺងម៉ាត់ និងចាស់ទុំរបស់បក្សប្រជាជនកម្ពុជាក្នុងរយៈកាលកន្លងមកនេះ។
បេក្ខជនតំណាងរាស្ត្រមណ្ឌលកំពង់ស្ពឺរបស់បក្សប្រជាជនកម្ពុជា លោ ហ៊ុន ម៉ានី សរសេរលើគណនីហ្វេសប៊ុករបស់ខ្លួននៅថ្ងៃទី២៤ កក្កដា នេះថា ផ្អែកលើលទ្ធផលបណ្ដោះអាសន្នកាលពីថ្ងៃទី២៣ ខែកក្កដា នេះ អាចសន្និដ្ឋានបានថាបក្សប្រជាជនកម្ពុជាទទួលបានអាសនៈច្រើនលើសលប់ ដែលធានាបាននូវជ័យជម្នះក្នុងការរៀបចំរដ្ឋាភិបាលសម្រាប់អាណត្តិទី៧ ឆ្នាំ២០២៣ នេះ។
លោក ហ៊ុន ម៉ានី អះអាងថា ក្នុងនាមលោកជាបេក្ខជនតំណាងរាស្ត្រមួយរូប លោកពិតជាអំណរគុណដល់ពលរដ្ឋកម្ពុជាទាំងអស់ដែលបានអនុវត្តសិទ្ធិនយោបាយរបស់ខ្លួនធ្វើការសម្រេចចិត្តយ៉ាងត្រឹមត្រូវ ក្នុងការផ្តល់ឱកាសឱ្យគណបក្សប្រជាជនកម្ពុជាបន្តបម្រើជាតិ និងប្រជាជនក្នុងរយៈពេល ៥ឆ្នាំទៅមុខទៀត។
ការអះអាងនេះ ធ្វើឡើងបន្ទាប់ពីគណៈកម្មាធិការជាតិរៀបចំការបោះឆ្នោតបានប្រកាសលទ្ធផលបឋមក្រោយការបោះឆ្នោត ដែលបង្ហាញឱ្យឃើញថា គណបក្សប្រជាជនកម្ពុជាទទួលបានអាសនៈរដ្ឋសភាច្រើនលើសលប់ក្នុងការបោះឆ្នោតជាតិឆ្នាំ២០២៣ នេះ។
ដំណើរការនៃការបោះឆ្នោតជ្រើសតាំងតំណាងរាស្ត្រអាណត្តិទី៧ បានបញ្ចប់ហើយកាលពីថ្ងៃទី២៣ ខែកក្កដា ក្នុងនោះគណបក្សប្រជាជនកម្ពុជាទទួលបាន ១២០អាសនៈ ខណៈមជ្ឈដ្ឋានជាតិ និងអន្តរជាតិប្រកាសមិនទទួលស្គាល់លទ្ធផលនៃការបោះឆ្នោតនេះឡើយ។
អតីតតំណាងរាស្ត្រគណបក្សសង្គ្រោះជាតិ លោក អ៊ុំ សំអាន សរសេរលើទំព័រហ្វេសប៊ុករបស់លោកនៅថ្ងៃទី២៤ កក្កដា នេះដែរថា នៅមុនការបោះឆ្នោតជាតិថ្ងៃទី២៣ ខែកក្កដា នេះ អាជ្ញាធរកម្ពុជាក្រោមបង្គាប់រដ្ឋាភិបាលរបស់លោក ហ៊ុន សែន បានគំរាមកំហែង និងយាយីគណបក្សប្រឆាំង ប្រព័ន្ធផ្សព្វផ្សាយឯករាជ្យ ព្រមទាំងអង្គការសង្គមស៊ីវិលដែលមិនគាំទ្របក្សកាន់អំណាចយ៉ាងធ្ងន់ធ្ងរ ដែលធ្វើឲ្យប៉ះពាល់ដល់ស្មារតីនៃរដ្ឋធម្មនុញ្ញរបស់ប្រទេសកម្ពុជា និងកាតព្វកិច្ចអន្តរជាតិរបស់កម្ពុជាផងដែរ។
ចំណែកអតីតមេដឹកនាំបក្សប្រឆាំងលោក សម រង្ស៊ី លើកឡើងនៅថ្ងៃនេះដែរថា ការបោះឆ្នោតកាលពីថ្ងៃទី២៣ ខែកក្កដា កន្លងទៅនេះ គឺជាការលួចបន្លំសន្លឹកឆ្នោត និងជាការក្បត់ឆន្ទៈរាស្ត្រពីរបបដឹកនាំរបស់លោក ហ៊ុន សែន ទាំងស្រុង ដែលអ្នកប្រជាធិបតេយ្យត្រូវតែបន្តប្រឆាំងដាច់ខាតទាំងនៅក្នុងប្រទេសកម្ពុជា និងនៅលើឆាកអន្តរជាតិ ដើម្បីផ្តល់សេរីភាព និងយុត្តិធម៌ជូនប្រជារាស្ត្រខ្មែរវិញ។
លោកអះអាងថា ហេតុនៃការលួចសន្លឹកឆ្នោតនោះ គឺនៅត្រង់ថា បើពួកគេពិតជាជឿជាក់ថាគណបក្សប្រជាជនកម្ពុជាទទួលជ័យជំនះភ្លូកទឹកភ្លូកដីក្នុងការបោះឆ្នោតនេះមែននោះ ហេតុអ្វីបានជាពួកគេមិនព្រមធ្វើឲ្យមានតម្លាភាពនៅពេលរាប់សន្លឹកឆ្នោត។
លោក សម រង្ស៊ី លើកជាសំណួរថា ហេតុអ្វីបានជាពួកគេនៅតែបិទទ្វារ និងបិទបង្អួចការិយាល័យបោះឆ្នោតភាគច្រើនលើសលប់នៅពេលរាប់សន្លឹកឆ្នោត ហើយនៅតែបន្តគំរាមពលរដ្ឋឲ្យទៅឆ្ងាយពីការិយាល័យបោះឆ្នោតទាំងនោះធ្វើអ្វី? ដូច្នេះគ្មាននរណាជឿជាក់លើលទ្ធផលនៃការបោះឆ្នោតនេះឡើយ។
ក្រោយការបោះឆ្នោតជាតិនៅកម្ពុជាត្រូវបានបញ្ចប់ភ្លាម សហរដ្ឋអាមេរិកក៏បានសម្រេចដាក់ទណ្ឌកម្មលើរដ្ឋាភិបាលកម្ពុជាភ្លាមៗផងដែរ ដោយប្រកាសផ្អាកកម្មវិធីជំនួយមួយចំនួន និងសម្រេចដាក់ទណ្ឌកម្មលើទិដ្ឋាការរបស់មន្ត្រីរដ្ឋាភិបាលកម្ពុជាគ្រាក់ៗមួយចំនួនថែមទៀត ដោយសារតែគេមើលឃើញថាការបោះឆ្នោតនៅថ្ងៃទី២៣ ខែកក្កដា ឆ្នាំ២០២៣ នេះ គឺជាការបោះឆ្នោតដែលមិនប្រកបដោយសេរី ត្រឹមត្រូវ យុត្តិធម៌ និងគ្មានតម្លាភាព។
ចាប់តាំងពីឆ្នាំ១៩៩៣ រហូតដល់ឆ្នាំ២០១៨ កម្ពុជាបានរៀបចំឱ្យមានការបោះឆ្នោតជាតិចំនួន ៧លើករួចមកហើយ ប៉ុន្តែការបោះឆ្នោតដែលគេចាត់ទុកថាត្រឹមត្រូវនោះ គឺមានតែការបោះឆ្នោតដែលរៀបចំដោយអង្គការសហប្រជាជាតិនៅអាណត្តិទី១ ឆ្នាំ១៩៩៣ ប៉ុណ្ណោះ ក្រៅពីនេះ ដូចជាអាណត្តិទី២ ឆ្នាំ១៩៩៨ អាណត្តិទី៣ ឆ្នាំ២០០៣ អាណត្តិទី៤ ឆ្នាំ២០០៨ អាណត្តិទី៥ ឆ្នាំ២០១៣ និងអាណត្តិទី៦ ឆ្នាំ២០១៨ និងការបោះឆ្នោតនៅថ្ងៃទី២៣ ខែកក្កដា នេះជាដើម សុទ្ធសឹងតែជាការបោះឆ្នោតដែលលួចបន្លំសន្លឹកឆ្នោតដោយបក្សប្រជាជនកម្ពុជាទាំងអស់៕