អ្នកនាំពាក្យក្រសួងការបរទេសសហរដ្ឋអាមេរិក ប្រកាសរឹតត្បិតលើទិដ្ឋាការមន្ត្រីមួយចំនួនដែលបានបំផ្លាញលទ្ធិប្រជាធិបតេយ្យ ហើយនិងផ្អាកលើកម្មវិធីជំនួយបរទេសមួយចំនួនបន្ទាប់ពីការបោះឆ្នោតជាតិនៅកម្ពុជាប្រព្រឹត្តទៅគ្មានភាពសេរី និងយុត្តិធម៌។
ក្នុងសេចក្ដីថ្លែងការណ៍អ្នកនាំពាក្យក្រសួងការបរទេសសហរដ្ឋអាមេរិក ស្ដីពីការបោះឆ្នោតនៅកម្ពុជា លោក Matthew Miller ដែលចេញផ្សាយជាសាធារណៈនៅថ្ងៃទី២៤ ខែកក្កដា ឆ្នាំ២០២៣ ឲ្យដឹងថា សហរដ្ឋអាមេរិកមានការរំខានចិត្តដោយការបោះឆ្នោតជាតិនៅកម្ពុជា នាថ្ងៃទី២៣ ខែកក្កដា ឆ្នាំ២០២៣ ធ្វើឡើងគ្មានភាពសេរី និងយុត្តិធម៌។
រដ្ឋាភិបាលក្រុងវ៉ាស៊ីនតុន អះអាងថា នៅមុនការបោះឆ្នោត អាជ្ញាធរកម្ពុជាបានធ្វើការគំរាមកំហែង និងយាយីជាបន្តបន្ទាប់ទៅលើគណបក្សនយោបាយប្រឆាំង ប្រព័ន្ធផ្សព្វផ្សាយ និងសង្គមស៊ីវិល ដែលជាការបំផ្លាញដល់ស្មារតីនៃរដ្ឋធម្មនុញ្ញរបស់ប្រទេស និងកាតព្វកិច្ចជាអន្តរជាតិរបស់ប្រទេសកម្ពុជា។ សកម្មភាពទាំងនេះមិនអាចធ្វើឲ្យប្រជាជនកម្ពុជាមានសំឡេង និងជម្រើសក្នុងការកំណត់អនាគតនៃប្រទេសរបស់ពួកគេបាននោះទេ។
ជាការឆ្លើយតបនឹងទង្វើទាំងនេះ សហរដ្ឋអាមេរិកបានធ្វើការរឹតត្បិតលើទិដ្ឋាការសម្រាប់បុគ្គលមួយចំនួនដែលបានបំផ្លាញលទ្ធិប្រជាធិបតេយ្យ ហើយនិងធ្វើការផ្អាកលើកម្មវិធីជំនួយបរទេសមួយចំនួនផងដែរ។
លោក Matthew Miller អះអាងថា គណបក្សប្រជាជនកម្ពុជាដែលកំពុងគ្រប់គ្រងប្រទេសបានបង្កើតរដ្ឋាភិបាលថ្មី មានឱកាសកែលំអកិត្តិនាមជាអន្តរជាតិរបស់ប្រទេសកម្ពុជា ដូចជាស្ដារឡើងវិញនូវលទ្ធិប្រជាធិបតេយ្យពហុបក្សពិតប្រាកដ បញ្ចប់ការកាត់ក្តីដែលមានលក្ខណៈនយោបាយ កែប្រែការដាក់ទោសដោយតុលាការទៅលើអ្នករិះគន់រដ្ឋាភិបាល ដោយអនុញ្ញាតឲ្យផ្នែកសារព័ត៌មានឯករាជ្យបើកដំណើរការឡើងវិញដោយគ្មានការជ្រៀតជ្រែក។
សហរដ្ឋអាមេរិកបញ្ជាក់ថា ខ្លួនរីករាយនឹងបន្តភាពជាដៃគូជាមួយប្រជាជនកម្ពុជា ដើម្បីគាំទ្របំណងប្រាថ្នារបស់គេដែលចង់ឲ្យប្រទេសរបស់គេមានវិបុលភាព លទ្ធិប្រជាធិបតេយ្យ និងឯករាជភាពច្រើនឡើង ដែលក្នុងនោះសំឡេងទាំងអស់ត្រូវបានគេស្តាប់។
ការប្រកាសរបស់អាមេរិកនេះ ធ្វើឡើងបន្ទាប់ពីអាជ្ញាធរកម្ពុជានៅថ្ងៃទី២៣ ខែកក្កដា បានកំណត់មុខសញ្ញាមនុស្សជិត ៤០នាក់ដែលគូសខ្វែងសន្លឹកឆ្នោត ខណៈសកម្មជនគណបក្សភ្លើងទៀន ២នាក់ត្រូវបានសមត្ថកិច្ចចាប់ខ្លួនក្រោមហេតុផលថា គូសខ្វែងសន្លឹកឆ្នោតចោល។
វិធានការរបស់អាជ្ញាធរនេះ បន្ទាប់ពីបុរសខ្លាំងក្រាញអំណាចតពូជនៅកម្ពុជា លោក ហ៊ុន សែន បានបញ្ជាឲ្យសមត្ថកិច្ចតាមស្វែងរកពលរដ្ឋដែលគូសខ្វែងសន្លឹកឆ្នោតចោល និងបានឲ្យពួកគេចេញសារភាពជាមួយ គ.ជ.ប និងអាជ្ញាធរ បើមិនដូច្នោះទេ វិធានការផ្លូវច្បាប់នឹងត្រូវចោទប្រកាន់ក្រោមលេសថាការគូសខ្វែងសន្លឹកឆ្នោតជាបទល្មើស។
រដ្ឋធម្មនុញ្ញព្រះរាជាណាចក្រកម្ពុជា មាត្រា ៣៥ ចែងថា ពលរដ្ឋខ្មែរទាំងពីរភេទមានសិទ្ធិចូលរួមយ៉ាងសកម្មក្នុងជីវភាពនយោបាយ សេដ្ឋកិច្ច សង្គមកិច្ច និងវប្បធម៌របស់ប្រទេសជាតិ។ សេចក្ដីស្នើទាំងឡាយរបស់ប្រជាពលរដ្ឋ ត្រូវបានទទួលការពិនិត្យ និងដោះស្រាយយ៉ាងហ្មត់ចត់ពីអង្គការរដ្ឋ៕