 បានបញ្ជូនសារលិខិតអបអរសាទរលោក ហ៊ុន សែន ដែលបក្សប្រជាជនកម្ពុជាបានឈ្នះឆ្នោតជាថ្មីម្ដងទៀតនៅក្នុងការបោះឆ្នោតសភានៅថ្ងៃទី២៣ កក្កដា។ នេះបើយោងតាមការចុះផ្សាយរបស់សារព័ត៌មានចិន ស៊ីនហួរ នៅថ្ងៃទី២៥ កក្កដា។){kind=link}
អគ្គលេខាបក្សកុម្មុយនីស្ត និងជាប្រធានាធិបតីចិន លោក ស៊ី ជីនពីង (Xi Jinping) បានបញ្ជូនសារលិខិតអបអរសាទរលោក ហ៊ុន សែន ដែលបក្សប្រជាជនកម្ពុជាបានឈ្នះឆ្នោតជាថ្មីម្ដងទៀតនៅក្នុងការបោះឆ្នោតសភានៅថ្ងៃទី២៣ កក្កដា។ នេះបើយោងតាមការចុះផ្សាយរបស់សារព័ត៌មានចិន ស៊ីនហួរ នៅថ្ងៃទី២៥ កក្កដា។
សាររបស់លោក ស៊ី បានសរសេរថា ជាការល្អដែលកម្ពុជាកំពុងស្ថិតនៅក្រោមប្រព័ន្ធគ្រប់គ្រងមួយត្រឹមត្រូវនៃរដ្ឋាភិបាលដែលដឹកនាំដោយលោក ហ៊ុន សែន បានផ្ដល់នូវស្ថិរភាពនយោបាយ ការអភិវឌ្ឍសេដ្ឋកិច្ច និងជីវភាពប្រជាជនកាន់តែប្រសើរឡើងស្របតាមស្ថានភាពតំបន់ និងពិភពលោក។
លោក ស៊ី បន្តថា រដ្ឋាភិបាលចិនតែងតែគាំទ្រកម្ពុជាដើរលើផ្លូវអភិវឌ្ឍន៍ដែលស្របនឹងស្ថានភាពរបស់ប្រទេស និងតំបន់។ លោកថានៅក្រោមការដឹកនាំរបស់លោក ហ៊ុន សែន គណបក្សប្រជាជនកម្ពុជានឹងនៅតែជាកម្លាំងចលករមួយដ៏មហិមាជួយធ្វើឱ្យប្រជាជនកម្ពុជា និងប្រទេសកម្ពុជារីកចម្រើនជាមួយនឹងសន្តិភាពស្ថិរភាព អភិវឌ្ឍន៍ រឹងមាំ។
លោក ស៊ី សង្កត់ធ្ងន់ថា ចិននិងកម្ពុជា គឺជាសហគមន៍តែមួយ តែងតែជួយរំលែកគ្នានូវទុក្ខលំបាក អនាគត និងឈរលើកិច្ចសហប្រតិបត្តិការយោគយល់។
លោក ស៊ី ក៏បានសម្ដែងឆន្ទៈរបស់លោកបន្តសហការជាមួយលោក ហ៊ុន សែន សំដៅពង្រឹងស្ថិរភាពនយោបាយ និងទំនាក់ទំនងសហប្រតិបត្តិការទ្វេភាគីឱ្យកាន់តែស៊ីជម្រៅថែមទៀតរវាងប្រទេសទាំងពីរលើគ្រប់វិស័យ។
ជាមួយគ្នានេះ ក្រសួងការបរទេសចិន ក៏បានសម្ដែងការអបអរសាទរចំពោះគណបក្សប្រជាជនកម្ពុជា ដែលបានឈ្នះក្នុងការបោះឆ្នោតក្រោមការដឹកនាំរបស់លោក ហ៊ុន សែន និងជឿជាក់ថានៅថ្ងៃអនាគត ប្រទេសកម្ពុជានឹងទទួលបានសមិទ្ធផលកាន់តែច្រើនក្នុងការអភិវឌ្ឍ និងកសាងប្រទេសជាតិ ក៏ដូចជានាំមកនូវផលប្រយោជន៍កាន់តែច្រើនដល់ប្រជាជន។
អ្នកស្រី Mao Ning អ្នកនាំពាក្យក្រសួងការបរទេសចិន បានថ្លែងថា ក្នុងនាមជាប្រទេសជិតខាងល្អ និងមិត្តភក្ដិល្អ ប្រទេសចិនសូមសម្ដែងការអបអរសាទរយ៉ាងកក់ក្តៅចំពោះការដែលប្រទេសកម្ពុជាបានរៀបចំការបោះឆ្នោតសភាដោយរលូន ក៏ដូចជាសម្ដែងការអបអរសាទរចំពោះគណបក្សប្រជាជនកម្ពុជាដែលបានឈ្នះក្នុងការបោះឆ្នោតក្រោមការដឹកនាំដោយលោក ហ៊ុន សែន។ ក្នុងន័យនេះ ចិនសម្ដែងការអបអរសាទរជាមុនចំពោះប្រទេសកម្ពុជាក្នុងការបង្កើតរដ្ឋសភា និងរដ្ឋាភិបាលអាណត្តិថ្មីដោយរលូន ហើយជឿជាក់ថាកម្ពុជានឹងទទួលបានសមិទ្ធផលកាន់តែច្រើនក្នុងការអភិវឌ្ឍ និងកសាងប្រទេសជាតិ។
ចិនជាប្រទេសមួយដែលស្ថិតនៅក្រោមបក្សកុម្មុយនីស្ត ហើយប្រទេសដ៏ធំមិនដែលស្គាល់ការបោះឆ្នោតក្នុងសំឡេងពហុបក្សនេះ បានបញ្ជូនក្រុមប្រតិភូរបស់បក្សមកអង្កេតការបោះឆ្នោតនៅកម្ពុជាផងដែរ។ ក្រុមនេះបានជួបលោក ហ៊ុន សែន ហើយសរសើរដំណើរការបោះឆ្នោត។
បើតាមការអង្កេត គេនៅពុំទាន់ឃើញមេដឹកនាំប្រទេសអាស៊ានណាមួយបញ្ជូនសារអបអរសាទរលោក ហ៊ុន សែន និងសរសើរអំពីដំណើរការបោះឆ្នោតនៅកម្ពុជានៅឡើយទេ។
គេក៏ពុំទាន់ឃើញប្រទេសទាំងនោះចាត់តាំងអ្នកសង្កេតការណ៍ ឬក៏អង្គការឯករាជ្យរបស់ប្រទេសទាំងនោះមកសង្កេតការបោះឆ្នោតនៅកម្ពុជានោះដែរ ហើយក្នុងនោះក៏គ្មានអង្គការបណ្ដាញការបោះឆ្នោតអាស៊ីដោយសេរី ឬកាត់ថាអាន់ហ្វ្រេល ក៏ពុំបានបញ្ជូនអ្នកសង្កេតការណ៍របស់ខ្លួនមកដែរ។
អង្គការនេះមានឈ្មោះល្បីល្បាញនៅក្នុងតំបន់ដែលជំនាញក្នុងការវាយតម្លៃស្ថានការណ៍នយោបាយ និងការបោះឆ្នោតនៅអាស៊ី។
តែយ៉ាងណា មានសមាជិកសភា និងអ្នកនយោបាយប្រទេសមួយចំនួនដែលត្រូវគេមើលឃើញថាមានទំនាក់ទំនងជាមួយនឹងគណបក្សប្រជាជនកម្ពុជាជាលក្ខណៈឯកជន បានមកអង្កេតការបោះឆ្នោតនៅកម្ពុជា។ ក្រៅពីនេះ របបសឹកភូមា បានបញ្ជូនអ្នកសង្កេតការណ៍របស់ខ្លួនមកផងដែរ។ ប្រធានប្រតិភូរបស់របបសឹកនេះដឹកនាំដោយប្រធានគណៈកម្មការបោះឆ្នោតដែលពួកយោធាបង្កើតឡើង គឺឧត្តមសេនីយ៍ ថេន សូ។
នៅប្រទេសភូមា ក៏ជិតមានការរៀបចំការបោះឆ្នោតផងដែរ ក្រោមការបង្គាប់បញ្ជារបស់របបសឹក នៅខណៈពួកយោធាដែលប្លន់អំណាចពីរដ្ឋាភិបាលស៊ីវិលកាលពីឆ្នាំ២០២១ កំពុងតែបង្ក្រាបយ៉ាងរង្គាលទៅលើក្រុមប្រឆាំង ហើយចាប់ដាក់គុកអ្នកនយោបាយប្រឆាំងរាប់ពាន់នាក់ ក្នុងនោះមានអ្នកស្រី អ៊ុងសាន ស៊ូជី ជើងឯកប្រជាធិបតេយ្យនៅអាស៊ីផងដែរ។
ការបោះឆ្នោតនៅក្រោមរបបសឹកភូមានេះ សហគមន៍អន្តរជាតិប្រកាសរួចស្រេចហើយថាពួកគេមិនទទួលស្គាល់ដំណើរការបោះឆ្នោតនោះទេ ប្រសិនបើគ្មានកម្លាំងនយោបាយ និងដោះលែងអ្នកទោសនយោបាយ ជាពិសេសគឺអ្នកស្រី អ៊ុងសាន ស៊ូជី រួមនឹងសមាជិកជាន់ខ្ពស់នៃគណបក្សសម្ព័ន្ធជាតិប្រជាធិបតេយ្យ NLD របស់លោកស្រី។
ជាមួយគ្នានេះ ក្រុមបស្ចិមប្រទេស និងប្រទេសប្រជាធិបតេយ្យ រួមទាំងប្រទេសជប៉ុន ក៏មិនបានបញ្ជូនអ្នកសង្កេតការណ៍មកអង្កេតការបោះឆ្នោតនៅកម្ពុជានោះដែរ ខណៈសហភាពអឺរ៉ុបទាំងមូល ២៧ប្រទេស ក៏មិនបានបញ្ជូនអ្នកសង្កេតការណ៍ផងដែរ។
ឥឡូវនេះ សហភាពអឺរ៉ុប សហរដ្ឋអាមេរិក បារាំង អាល្លឺម៉ង់ អង់គ្លេស បានហៅការបោះឆ្នោតថ្ងៃទី២៣ ខែកក្កដា គឺជាការផ្ដួលបក្សខ្លាំងមួយដ៏មានប្រជាប្រិយភាពមិនឲ្យប្រកួតការបោះឆ្នោត ជាការបង្ហាញនូវការបំបាត់ឆន្ទៈរបស់អ្នកគាំទ្របក្សប្រឆាំង គឺគណបក្សភ្លើងទៀន ដែលប្រកាន់យកគោលការណ៍ប្រជាធិបតេយ្យ។
ក្រុមបស្ចិមប្រទេសប្រកាសមិនទទួលស្គាល់លទ្ធផលបោះឆ្នោតនោះទេ។ មិនតែប៉ុណ្ណោះ អគ្គលេខាធិការអង្គការសហប្រជាជាតិ លោក អង់តូនីញ៉ូ ហ្គូតារេស ក៏បានសម្ដែងការខកចិត្តរួចទៅហើយ ព្រោះតែកម្ពុជាបោះឆ្នោតពុំមានគណបក្សប្រឆាំងដ៏ធំមួយនេះចូលរួមប្រកួត៕