រដ្ឋសភាឯកបក្សនឹងបើកកិច្ចប្រជុំលើកដំបូងនៅថ្ងៃ២១ និងថ្ងៃទី២២ ខែសីហា បន្ទាប់ពីបុរសខ្លាំងក្រាញអំណាចតពូជនៅកម្ពុជា លោក ហ៊ុន សែន ប្រកាសថាលោក ហ៊ុន ម៉ាណែត នឹងក្លាយជានាយករដ្ឋមន្ត្រីពេញសិទ្ធិនៅល្ងាចថ្ងៃទី២២ ខែសីហា។
សេចក្តីជូនដំណឹងរបស់នាយកដ្ឋានព័ត៌មាននៃរដ្ឋសភា ចុះថ្ងៃទី៣១ ខែកក្កដា ឲ្យដឹងថា រដ្ឋសភានឹងបើកកិច្ចប្រជុំលើកដំបូងក្នុងនីតិកាលទី៧ នៅថ្ងៃទី២១ និងថ្ងៃទី២២ ខែសីហា ខាងមុខនេះ។
រដ្ឋសភាឯកបក្សប្រកាសបើកកិច្ចប្រជុំលើកដំបូងនៅអាណត្តិទី៧ នេះ ធ្វើឡើងបន្ទាប់ពីគណៈកម្មាធិការជាតិរៀបចំការបោះឆ្នោតក្រោមបញ្ជាលោក ហ៊ុន សែន សម្រេចប្រកាសលទ្ធផលបោះឆ្នោតផ្លូវការនៅថ្ងៃទី៤ ខែសីហា។
ក្រៅពីប្រកាសលទ្ធផលហើយ នៅថ្ងៃនោះដែរក៏មានការបែងចែកអាសនៈនៅក្នុងរដ្ឋសភាទៅឲ្យគណបក្សនយោបាយដែលបានចូលរួមបោះឆ្នោតកាលពីថ្ងៃទី២៣ ខែកក្កដា កន្លងទៅផងដែរ។ មានតែគណបក្សប្រជាជនកម្ពុជាដែលឈ្នះការបោះឆ្នោតដាច់ ដោយទទួលបានអាសនៈនៅក្នុងរដ្ឋសភាចំនួន ១២០ ហើយនៅសល់ ៥អាសនៈទៀតត្រូវបានបែងចែកទៅឲ្យគណបក្សហ៊្វុនស៊ិនប៉ិចដឹកនាំដោយព្រះអង្គម្ចាស់ នរោត្តម ចក្រាវុធ។
បើតាមរដ្ឋធម្មនុញ្ញកម្ពុជា «រដ្ឋសភាបើកសម័យប្រជុំដំបូង ៦០ថ្ងៃយ៉ាងយូរក្រោយពេលបោះឆ្នោត តាមការកោះប្រជុំរបស់ព្រះមហាក្សត្រ»។ ក្រោយការកោះប្រជុំក្រោមព្រះរាជអធិបតីភាពរបស់ព្រះមហាក្សត្រ រដ្ឋសភាត្រូវបើកដំណើរការកិច្ចប្រជុំរបស់ខ្លួនក្រោមព្រឹទ្ធសមាជិករដ្ឋសភាមួយរូប ដែលជាបេក្ខជនជាប់ឆ្នោតមានអាយុច្រើនជាងគេ ដើម្បីប្រកាសសុពលភាពនៃអាណត្តិរបស់សមាជិកនីមួយៗ។
ព្រឹទ្ធសមាជិកត្រូវដឹកនាំការបោះឆ្នោតជ្រើសរើសប្រធាន អនុប្រធានរដ្ឋសភា ក៏ដូចជាការបោះឆ្នោតជ្រើសរើសសមាសភាពគណៈកម្មការជំនាញនានារបស់រដ្ឋសភាតាមការស្នើរបស់គណបក្សដែលមានអាសនៈច្រើនជាងគេនៅក្នុងរដ្ឋសភា ដោយមតិភាគច្រើនដាច់ខាតនៃចំនួនសមាជិករដ្ឋសភាទាំងមូល។
តែយ៉ាងណាមិញ ច្បាប់ធម្មនុញ្ញបន្ថែមត្រង់មាត្រា៤ ថ្មី (មួយ) បានកំណត់ថា «ប្រធានរដ្ឋសភាត្រូវបោះឆ្នោតជ្រើសរើសចេញពីសមាជិករដ្ឋសភាដែលមានសញ្ជាតិខ្មែរតែមួយគត់»។ បន្ទាប់ពីការប្រកាសសុពលភាពបេក្ខជនជាប់ឆ្នោត និងការបោះឆ្នោតជ្រើសរើសក្បាលម៉ាស៊ីនរដ្ឋសភារួចមក ប្រធាន អនុប្រធាន រួមទាំងសមាជិក-សមាជិករដ្ឋសភាទាំងអស់ ត្រូវធ្វើសច្ចាប្រណិធាននៅក្នុងព្រះបរមរាជវាំងមុនចូលកាន់តំណែងជាតំណាងរាស្ត្រជាផ្លូវការ។
ក្រោយពេលនីតិកាលថ្មីរបស់រដ្ឋសភាចូលកាន់តំណែងជាស្ថាពរហើយនោះ ព្រះមហាក្សត្រទ្រង់ចាត់តាំងវរជនមួយរូបជានាយករដ្ឋមន្ត្រីឱ្យបង្កើតរាជរដ្ឋាភិបាលថ្មី តាមសេចក្ដីស្នើពីគណបក្សដែលមានអាសនៈច្រើនជាងគេក្នុងរដ្ឋសភា។
មាត្រា១១៩ ថ្មី (ពីរ) នៃរដ្ឋធម្មនុញ្ញកម្ពុជា បានចែងថា សេចក្ដីស្នើពីគណបក្សដែលមានអាសនៈច្រើនជាងគេនៅក្នុងរដ្ឋសភានេះ ត្រូវចម្លងជូនប្រធានរដ្ឋសភា ហើយវរជនដែលនឹងត្រូវទទួលបានការចាត់តាំងជានាយករដ្ឋមន្ត្រីនេះ ក៏ត្រូវតែជាតំណាងរាស្ត្រដែលមានសញ្ជាតិខ្មែរតែមួយគត់។
មាត្រាដដែលនេះបានឱ្យដឹងដែរថា វរជនដែលត្រូវបានចាត់តាំងនេះ ត្រូវនាំសហការីដែលជាតំណាងរាស្ត្រ ឬជាសមាជិកគណបក្សតំណាងនៅក្នុងរដ្ឋសភាដែលផ្គូផ្គងឱ្យកាន់តំណែងផ្សេងៗក្នុងរាជរដ្ឋាភិបាល ទៅសុំសេចក្ដីទុកចិត្តពីរដ្ឋសភា។
ការបោះឆ្នោតផ្ដល់សេចក្ដីទុកចិត្តនេះ ត្រូវធ្វើលើបញ្ជីសមាសភាពនៃគណៈរដ្ឋមន្ត្រីទាំងមូល ហើយកាលបើរដ្ឋសភាបានបោះឆ្នោតទុកចិត្តហើយនោះ ព្រះមហាក្សត្រទ្រង់ចេញព្រះរាជក្រឹត្យតែងតាំងគណៈរដ្ឋមន្ត្រីថ្មីនោះ។ មុនចូលកាន់តំណែងជាផ្លូវការ គណៈរដ្ឋមន្ត្រីត្រូវធ្វើសច្ចាប្រណិធាននៅក្នុងព្រះបរមរាជវាំងផងដែរ។
គួរបញ្ជាក់ផងដែរថា ក្រោយបញ្ចប់ការបោះឆ្នោតភ្លាមៗ បុរសខ្លាំងកាន់អំណាចជិត ៤០ឆ្នាំនៅកម្ពុជាលោក ហ៊ុន សែន បានប្រកាសថា កូនប្រុសច្បងរបស់លោក គឺលោក ហ៊ុន ម៉ាណែត នឹងក្លាយជានាយករដ្ឋមន្ត្រីពេញសិទ្ធិនៅថ្ងៃទី២២ ខែសីហា ឆ្នាំ២០២៣ បន្ទាប់ពីរដ្ឋសភាឯកបក្សបញ្ចប់កិច្ចប្រជុំនៅថ្ងៃទី២១ និង២២ ខែសីហា៕