លោក ជា ចាន់តូ ត្រូវបានតែងតាំងជាអគ្គទេសាភិបាលកិត្តិយសធនាគារជាតិនៃកម្ពុជា ដែលមានឋានៈស្មើទេសរដ្ឋមន្ត្រី បន្ទាប់ពីកូនស្រីរបស់លោក គឺអ្នកស្រី ជា សិរី បានឡើងជាប្រធានជំនួសឪពុកនាពេលថ្មីៗនេះ។
ក្នុងព្រះរាជក្រឹត្យរបស់ព្រះករុណា ព្រះបាទសម្ដេចព្រះ បរមនាថ នរោត្តម សីហមុនី កាលពីថ្ងៃទី២៩ កក្កដា ដែលទើបចេញផ្សាយនាពេលនេះ ឲ្យដឹងថា ព្រះមហាក្សត្រត្រាស់បង្គាប់តែងតាំងលោក ជា ចាន់តូ បន្ទាប់ពីបុរសខ្លាំងក្រាញអំណាចតពូជនៅកម្ពុជាលោក ហ៊ុន សែន ទូលថ្វាយទៅព្រះអង្គ។
ការតែងតាំងលោក ជា ចាន់តូ ជាអគ្គទេសាភិបាលកិត្តិយសធនាគារជាតិនៃកម្ពុជាវិញនាពេលនេះ ធ្វើឡើងបន្ទាប់ពីអ្នកស្រី ជា សិរី ដែលត្រូវជាកូនស្រីរបស់លោក បានឡើងធ្វើជាប្រធានធនាគារជាតិនៃកម្ពុជាកាលពីថ្ងៃទី២៩ ខែកក្កដា។
លោក ជា ចាន់តូ បានកាន់តំណែងជាអគ្គទេសាភិបាលធនាគារជាតិនៃកម្ពុជារយៈពេលប្រមាណ ២៥ឆ្នាំមកហើយ បើគិតចាប់តាំងពីឆ្នាំ១៩៩៨ មកដល់ពេលបច្ចុប្បន្ន ដែលពេលនោះ កម្ពុជាប្រឈមនឹងវិបត្តិហិរញ្ញវត្ថុអាស៊ី។ លោក ចាន់តូ បានកំណែទម្រង់ និងពង្រឹងប្រព័ន្ធធនាគាររបស់កម្ពុជា ជាពិសេសធ្វើទំនើបកម្ម និងធ្វើសមាហរណកម្មនៅក្នុងប្រព័ន្ធហិរញ្ញវត្ថុក្នុងតំបន់ និងអន្តរជាតិ។
មុនទទួលបានតួនាទីជាអគ្គទេសាភិបាលនេះ លោក ជា ចាន់តូ ធ្លាប់ទទួលខុសត្រូវធំនៅធនាគារកណ្តាល ក្នុងតួនាទីជានាយកធនាគារជាតិនៃកម្ពុជា ពីឆ្នាំ១៩៧៩ ដល់ឆ្នាំ១៩៨១។ បន្ទាប់មក លោកត្រូវបានតែងតាំងជាទេសាភិបាលរងនៃធនាគារជាតិនៃកម្ពុជា ពីឆ្នាំ១៩៨១ ដល់ឆ្នាំ១៩៨៦។
នៅក្នុងឆ្នាំ១៩៨៦ លោក ជា ចាន់តូ ក៏បានបម្រើការជាអនុរដ្ឋមន្ត្រីទីមួយនៅក្រសួងផែនការ។ មិនតែប៉ុណ្ណោះ លោកក៏ធ្លាប់ជាសមាជិកសភាចន្លោះឆ្នាំ១៩៩៣ ដល់ឆ្នាំ១៩៩៨ ផងដែរ។
លោក ជា ចាន់តូ ក៏បានទទួលពានរង្វាន់ជាអ្នកគ្រប់គ្រងបានល្អបំផុតក្នុងការជំរុញកំណើន និងស្ថិរភាពសេដ្ឋកិច្ចក្នុងអំឡុងពេលជំងឺរាតត្បាត Covid-19 ពីធនាគារកណ្ដាលប្រចាំតំបន់អាស៊ីប៉ាស៊ីហ្វិក កាលពីឆ្នាំ២០២១។
គួរបញ្ជាក់ផងដែរថា ការលើកតំណែង និងតួនាទីឲ្យកូនៗកាន់ជំនួស ហើយឪពុកនៅឈរពីក្រោយខ្នងទាំងនៅក្នុងធនាគារជាតិកម្ពុជា និងក្នុងក្រសួងស្ថាប័នរដ្ឋនេះ ធ្វើឡើងបន្ទាប់ពីបុរសខ្លាំងកាន់អំណាចជិត ៤០ឆ្នាំនៅកម្ពុជាលោក ហ៊ុន សែន បានប្រកាសផ្ទេរតំណែងនាយករដ្ឋមន្ត្រីឲ្យកូនប្រុសច្បងរបស់ខ្លួន គឺលោក ហ៊ុន ម៉ាណែត ធ្វើជានាយករដ្ឋមន្ត្រីបន្តវេនពីលោកនៅថ្ងៃទី២២ ខែសីហា ឆ្នាំ២០២៣ នេះ ក្នុងនោះលោក ហ៊ុន សែន ក៏បានប្រកាសឲ្យរដ្ឋមន្ត្រីចាស់ដែលកាន់តំណែង និងតួនាទី ត្រូវចុះចេញទាំងអស់ ហើយដាក់កូនៗជាឈាមថ្មីជំនួសវិញ។
ជុំវិញរឿងនេះ អ្នកឃ្លាំមើលបញ្ហាសង្គមសង្កេតឃើញថា កម្ពុជានៅពេលនេះប្រៀបដូចជាក្រុមហ៊ុនឯកជនមួយរបស់គ្រួសារអ្នកមានអំណាច ដោយថាបច្ចុប្បន្ន ពួកគេបានដោះដូរ និងតែងតាំងកូនៗរបស់ពួកគេឲ្យជំនួសតំណែងរបស់ខ្លួនតាមអំពើចិត្ត ខណៈពលរដ្ឋម្ចាស់ប្រទេសត្រូវរស់នៅក្រោមការគាបសង្កត់ និងរងនូវការភ័យខ្លាច និងអត់ឃ្លានគ្រប់ពេលវេលា៕