ប្រធានាធិបតីសហរដ្ឋអាមេរិកលោក ចូ បៃដិន បញ្ជូនលិខិតទៅជូនសមភាគីអ៊ុយក្រែន លោក វូឡូឌីមៀ ហ្សេឡេនស្គី ដែលលោក បៃដិន ផ្ញើសារសាទរប្រជាជនអ៊ុយក្រែនដែលបានធ្វើពលិកម្មដើម្បីសេរីភាព និងអធិបតេយ្យភាពរបស់ប្រទេស។
លិខិតរបស់លោក បៃដិន ត្រូវបានចុះផ្សាយនៅលើគេហទំព័រសេតវិមាន។ កាលពីថ្ងៃទី២៤ សីហា ជាទិវាបុណ្យឯករាជ្យជាតិរបស់ប្រទេសអ៊ុយក្រែន។ ក្នុងព្រឹត្តិការណ៍នេះ មេដឹកនាំប្រទេសអឺរ៉ុប មួយចំនួនបានធ្វើដំណើរទៅចូលរួមដោយផ្ទាល់នៅរដ្ឋធានីគៀវ ជាទីក្រុងដែលកំពុងរងការវាយប្រហារដោយគ្រាប់មីស៊ីលរបស់រុស្ស៊ី។
ប្រធានាធិបតីលីទុយអានី ប្រទេសព័រទុយហ្គាល់ នាយករដ្ឋមន្ត្រីហ្វាំងឡង់ បានទៅកាន់រដ្ឋធានីគៀវ។ ក្រៅពីនេះ មេដឹកនាំជាច្រើនបានបញ្ជូនសារ ក្នុងនោះមានលោក បៃដិន ប្រធានាធិបតីសហរដ្ឋអាមេរិកមួយដែរ។
សាររបស់លោក បៃដិន បានបញ្ជាក់ឡើងវិញអំពីការប្ដេជ្ញាចិត្តរបស់សហរដ្ឋអាមេរិកក្នុងការគាំទ្របុព្វហេតុនៃប្រជាជនអ៊ុយក្រែន ដែលកំពុងតស៊ូដោយការធ្វើពលិកម្មដើម្បីប្រឆាំងនឹងការឈ្លានពានពីសំណាក់ប្រទេសរុស្ស៊ី។
លោក បៃដិន សន្យាថានឹងបន្តជួយអ៊ុយក្រែនរហូតរំដោះបានវិញនូវសេរីភាពរបស់ខ្លួន។
តាមសេចក្ដីថ្លែងការណ៍របស់សេតវិមាន លោក ហ្សេឡេនស្គី បានភ្ជាប់ទូរសព្ទទៅលោក បៃដិន។ លោក ហ្សេឡេនស្គី បានថ្លែងអរគុណដ៏ជ្រាលជ្រៅចំពោះលោក បៃដិន និងប្រជាជនអាមេរិក ដែលបានជួយគាំទ្រប្រជាជនអ៊ុយក្រែនក្នុងបុព្វហេតុនៃការប្រឆាំងអ្នកឈ្លានពាន។
លោក ហ្សេឡេនស្គី បានហៅជំនួយរបស់សហរដ្ឋអាមេរិក ទាំងជំនួយសព្វាវុធ និងជំនួយផ្សេងៗ បាននាំឱ្យប្រជាជនអ៊ុយក្រែនមានកម្លាំងចិត្តធ្វើសង្គ្រាមការពារទឹកដី និងសេរីភាពរបស់ខ្លួន។
ជាមួយគ្នានេះ លោក ហ្សេឡេនស្គី បានរំលឹកលោក បៃដិន ដែលបានសន្យាផ្ដល់យន្តហោះចម្បាំង F-16 ទៅឱ្យអ៊ុយក្រែន ដែលលោកសង្ឃឹមថា កងទ័ពអ៊ុយក្រែននឹងបានប្រើយន្តហោះ F-16 ដើម្បីការពារដែនអាកាសរបស់ខ្លួន។
លោក ហ្សេឡេនស្គី ក៏បានលើកឡើងផងដែរការដែលសហរដ្ឋអាមេរិកបើកភ្លើងខៀវឱ្យប្រទេសដាណឺម៉ាក និងហុឡង់ដ៍ បញ្ជូនយន្តហោះចម្បាំង F-16 ទៅឱ្យអ៊ុយក្រែន។ លោកសង្ឃឹមថាអ៊ុយក្រែននឹងទទួលបាន F-16 ពីប្រទេសទាំងពីរនេះនៅពេលឆាប់ៗខាងមុខនេះ។
យោងតាមការចុះផ្សាយរបស់សារព័ត៌មាន Politico សហរដ្ឋអាមេរិកនឹងចាប់ផ្ដើមហ្វឹកហ្វឺនអ្នកបើកបរយន្តហោះជនជាតិអ៊ុយក្រែន ឱ្យចេះបើកយន្តហោះចម្បាំង F-16 ចាប់ពីខែតុលា ឆ្នាំ២០២៣ នេះ។
ក្រសួងការពារជាតិសហរដ្ឋអាមេរិក បានប្រកាសថា ការហ្វឹកហ្វឺននេះនឹងធ្វើឡើងនៅលើលំហអាកាសនៃរដ្ឋ Arizona។
អ្នកនាំពាក្យមន្ទីរប៉ុងតាហ្គោន Pat Ryder បានថ្លែងថា ការហ្វឹកហាត់អ្នកបើកបរយន្តហោះ F-16 គឺជាការឆ្លើយតបទៅនឹងប្រទេសមួយចំនួននៅអឺរ៉ុប ដែលចង់បញ្ជូន F-16 ទៅឱ្យអ៊ុយក្រែន។ តែបើតាមមន្ត្រីអ្នកនាំពាក្យក្រសួងការពារជាតិអ៊ុយក្រែន ប្រទេសអ៊ុយក្រែនត្រូវការយន្តហោះចម្បាំងពីពួកបស្ចិមប្រទេសយ៉ាងតិច ១២៨គ្រឿង ព្រោះតែពេលនេះ អ៊ុយក្រែននៅសល់យន្តហោះចម្បាំងសម័យសហភាពសូវៀតតិចតួចប៉ុណ្ណោះ។
លោក ហ្សេឡេនស្គី ថ្លែងថា F-16 នឹងធ្វើឱ្យអ៊ុយក្រែនមានតុល្យភាពសង្គ្រាមអាកាសជាមួយនឹងរុស្ស៊ី ដែលលោកថា យន្តហោះដែលអ៊ុយក្រែនមានក្នុងដៃ គឺ Mig-29 ជាយន្តហោះសម័យសហភាពសូវៀតដែលមិនមានតុល្យភាពនឹងយន្តហោះចម្បាំងរបស់រុស្ស៊ីជំនាន់ក្រោយនេះទេ មានដូចជា Mig-31 និង Su-57។ យន្តហោះរុស្ស៊ីពីរប្រភេទនេះ ត្រូវបានរុស្ស៊ីប្រើប្រាស់យ៉ាងសកម្មក្នុងសង្គ្រាម។
ជាមួយគ្នានេះ រុស្ស៊ីប្រើរហូតយន្តហោះទម្លាក់គ្រាប់បែកយុទ្ធសាស្ត្រ Tu-160, Tu-142 និង T-90 ទៀតផង។ យន្តហោះបីប្រភេទនេះវាអាចផ្ទុកមីស៊ីល និងមីស៊ីលបំពាក់ដោយគ្រាប់នុយក្លេអ៊ែរទៀតផង។
សហរដ្ឋអាមេរិកជាប្រទេសមួយក្នុងចំណោមប្រទេសចំនួន ៥០ ដែលផ្ដល់ជំនួយយោធា និងជំនួយស៊ីវិលទៅឱ្យអ៊ុយក្រែន។
សម្រាប់សហរដ្ឋអាមេរិកជាប្រទេសដែលផ្ដល់ជំនួយទៅឱ្យអ៊ុយក្រែនច្រើនជាងគេ គឺរាប់ពាន់លានដុល្លារ។
យោងតាមរបាយការណ៍របស់ក្រសួងការបរទេសអាមេរិក ជំនួយយោធាជិត ៤៥ពាន់លានដុល្លារ និងជំនួយស៊ីវិលជាង ២០ពាន់លានដុល្លារបានធ្លាក់ទៅដល់ប្រទេសអ៊ុយក្រែនហើយ។
សភាសហរដ្ឋអាមេរិកបានអនុម័តឱ្យរដ្ឋការលោក បៃដិន នូវសាច់ប្រាក់សរុប ៩៥ពាន់លានដុល្លារក្នុងរយៈពេល ២ឆ្នាំពីរវាងឆ្នាំ២០២២ និងឆ្នាំ២០២៣។ ចំណែកជំនួយស៊ីវិលមានស្បៀង មានថ្នាំពេទ្យ រួមនឹងសាច់ប្រាក់សុទ្ធ ដើម្បីជួយរដ្ឋាភិបាលលោក ហ្សេឡេនស្គី បើកប្រាក់ខែឱ្យកងទ័ព និងរដ្ឋការរបស់លោក។ ជំនួយយោធា គឺជាសព្វាវុធធុនធ្ងន់ និងគ្រាប់កាំភ្លើងធំ គ្រាប់មីស៊ីល រហូតរថក្រោះ និងរថពាសដែករាប់រយគ្រឿង។
តាមរយៈជំនួយរបស់សហរដ្ឋអាមេរិក និងសម្ព័ន្ធមិត្ត បាននាំឱ្យអ៊ុយក្រែនមានសមត្ថភាពទប់ទល់បានសង្គ្រាមឈ្លានពានពីមហាអំណាចយោធាលំដាប់ទី២ ពិភពលោក គឺប្រទេសរុស្ស៊ី ដែលមានព្រំដែនជាប់នឹងអ៊ុយក្រែន៕