បុរសខ្លាំងដែលកំពុងក្តោបក្តាប់អំណាចជានាយករដ្ឋមន្ត្រីពិតប្រាកដលោក ហ៊ុន សែន រំឭកកូនប្រុសរបស់គាត់ គឺលោក ហ៊ុន ម៉ាណែត ដែលលោកលើកបន្តុបឲ្យឡើងកាន់តំណែងជានាយករដ្ឋមន្ត្រីថា មេដឹកនាំម្នាក់ដែលមិនចេះរក្សាសមាជិកចាស់ និងបង្កើនសមាជិកថ្មី ច្បាស់ជាប្រឈមមុខនឹងការរលំរលាយរដ្ឋាភិបាលរបស់ខ្លួនជាមិនខានឡើយ។
លោក ហ៊ុន សែន សរសេរក្នុងប្រព័ន្ធទំនាក់ទំនងតេឡេក្រាមរបស់ខ្លួននៅថ្ងៃទី៣០ សីហា នេះថា លោកបានបង្ហោះវីដេអូមួយដែលលោកបានលើកឡើងក្នុងអង្គប្រជុំដើមអាណត្តិទី៦ ឆ្នាំ២០១៨ ដើម្បីជាការក្រើនរំលឹកដល់មន្ត្រីរដ្ឋាភិបាលបន្តវេនតាមស្ថាប័ននីមួយៗ ដោយសូមឱ្យមានការប្រុងប្រយ័ត្នលើភាពអគុណធម៌របស់ខ្លួនសម្រាប់ការរៀបចំមន្ត្រីក្នុងអាណត្តិថ្មីដែលពួកគេនឹងដឹកនាំក្នុងរដ្ឋាភិបាលថ្មីនេះ។
មេដឹកនាំបក្សកាន់អំណាចលោក ហ៊ុន សែន លើកឡើងថា លោកគាំទ្រឱ្យមានការកែទម្រង់ ប៉ុន្តែលោកមិនគាំទ្រការកែទម្រង់ណាដែលខ្វះការឲ្យតម្លៃមនុស្សដែលខំធ្វើការក្នុងរយៈពេលកន្លងមក ដោយការដកចេញពីតំណែងដោយគ្មានមូលហេតុនោះទេ ព្រោះថាដើម្បីជោគជ័យក្នុងឆាកជីវិតនយោបាយ ត្រូវតែរក្សាសមាជិកចាស់ ហើយត្រូវបង្កើនសមាជិកថ្មី ទោះត្រូវធ្វើកំណែទម្រង់ដូចម្តេចក៏ដោយ។
លោក ហ៊ុន សែន ជាអ្នកដកមន្ត្រីចាស់ៗមុនគេ។
កាលពីថ្ងៃទី២៩ ខែសីហា ឆ្នាំ២០២៣ ក្នុងពិធីជួបជាមួយកម្មករនៅតំបន់ព្រៃស្ពឺ រាជធានីភ្នំពេញ នាយករដ្ឋមន្ត្រីថ្មី លោក ហ៊ុន ម៉ាណែត អះអាងថា គោលនយោបាយនៃរាជរដ្ឋាភិបាលអាណត្តិថ្មីដឹកនាំដោយគណបក្សប្រជាជនកម្ពុជា គឺនៅបន្តលើគោលដៅថែរក្សាឱ្យបានដាច់ខាតនូវសមិទ្ធផលចាស់ដែលគណបក្សប្រជាជនកម្ពុជាដឹកនាំអស់រយៈពេល ៤៤ឆ្នាំកន្លងមក។
ទាក់ទិននឹងបញ្ហានេះ កាលពីដើមខែសីហា ឆ្នាំ២០២៣ អនុប្រធានប្រចាំតំបន់អាស៊ីរបស់អង្គការឃ្លាំមើលសិទ្ធិមនុស្ស លោក ហ្វីល រ៉ូបឺសុន បានលើកឡើងក្នុងកម្មវិធី Idea Talk នៃសារព័ត៌មាន The Cambodia Daily ថា លោក ហ៊ុន ម៉ាណែត មិនអាចដឹកនាំរដ្ឋាភិបាលដែលឪពុករបស់គាត់រៀបចំឱ្យងាកទៅរកការលើកស្ទួយសិទ្ធិមនុស្ស និងធ្វើឱ្យប្រសើរឡើងនូវរបបប្រជាធិបតេយ្យនៅប្រទេសកម្ពុជាបានទេ ព្រោះការដឹកនាំរបស់គាត់ គឺមានលោក ហ៊ុន សែន ជាអ្នកបង្គាប់ចាត់ចែងពីក្រោយខ្នង។
លោក Phil Robertson អះអាងថា លោកគ្មានសង្ឃឹមថារដ្ឋាភិបាលថ្មីដែលដឹកនាំដោយលោក ហ៊ុន ម៉ាណែត នឹងឆ្ពោះទៅរកភាពល្អប្រសើរជាងឪពុករបស់គាត់ឡើយ ខណៈអ្នកទោសមនសិការដែលជាសកម្មជននយោបាយ សកម្មជនបរិស្ថាន សកម្មជនសិទ្ធិមនុស្ស និងមេដឹកនាំបក្សប្រឆាំង ជាដើម ដែលកំពុងរងនូវការផ្ដន្ទាទោសទាំងអយុត្តិធម៌ក្នុងជំនាន់លោក ហ៊ុន សែន ដឹកនាំ ក៏នឹងមិនទទួលបាននូវយុត្តិធម៌ ឬសេរីភាពក្នុងជំនាន់រដ្ឋាភិបាលថ្មីរបស់លោក ហ៊ុន ម៉ាណែត នោះដែរ។
ដំណាលពេលគ្នានោះដែរ អតីតមេដឹកនាំបក្សប្រឆាំងលោក សម រង្ស៊ី លើកឡើងកាលពីពេលថ្មីៗនេះថា ដោយសារតែប្រទេសកម្ពុជាយកគំរូបន្តវេនតាមប្រទេសស៊ីរី គឺឪពុកផ្ទេរអំណាចឲ្យទៅកូន ដូច្នេះទោះជាលោក ហ៊ុន ម៉ាណែត រៀនសូត្រពីសហរដ្ឋអាមេរិកក៏ដោយ ក៏គាត់មិនអាចធ្វើអ្វីកើតដែរ ក្រៅតែពីដឹកនាំក្រោមប្រព័ន្ធដែលឪពុកគាត់បានរៀបចំទុកឲ្យនោះ។
លោក សម រង្ស៊ី លើកឡើងថា ការផ្ទេរអំណាចបែបនេះ នឹងជំរុញការដឹកនាំរបស់លោក ហ៊ុន ម៉ាណែត ឱ្យធ្លាក់ទៅក្នុងអំពើដ៏អាក្រក់ មិនខុសពីកូនប្រុសមេដឹកនាំស៊ីរី លោក Bashar al-Assad ដែលរៀនសូត្រពីប្រទេសអង់គ្លេសជាវេជ្ជបណ្ឌិតយោធា ហើយទទួលអំណាចពីឪពុកខ្លួនឯងនោះទេ ដែលបានជំរុញឱ្យគាត់ដឹកនាំប្រទេសស៊ីរី ទៅរករបបផ្ដាច់ការ និងពុករលួយសាហាវជាងឪពុករបស់គាត់ទៀត។
អតីតអ្នកទោសនយោបាយ និងជាមន្ត្រីជាន់ខ្ពស់គណបក្សសង្គ្រោះជាតិលោក មាជ សុវណ្ណារ៉ា ប្រាប់សារព័ត៌មាន The Cambodia Daily នៅថ្ងៃទី៣០ សីហា នេះថា ការលើកឡើងរបស់លោក ហ៊ុន សែន បែបនេះ គឺជាការបង្ហាញឥទ្ធិពលមួយយ៉ាងខ្លាំងទៅលើរដ្ឋាភិបាលថ្មីនេះ ដែលគេអាចសន្និដ្ឋានបានថា រដ្ឋាភិបាលថ្មីនេះនៅតែស្ថិតក្រោមអំណាចបញ្ជារបស់លោក ហ៊ុន សែន ដដែល បើទោះបីជាគាត់មិនមែនជានាយករដ្ឋមន្ត្រីក៏ដោយ។
លោក មាជ សុវណ្ណារ៉ា លើកឡើងថា ទ្រឹស្ដីរក្សាសមាជិកចាស់ បង្កើនសមាជិកថ្មី អាចប្រើបានក្នុងរង្វង់គណបក្សនយោបាយ ប៉ុន្តែមិនអាចយកទៅអនុវត្តក្នុងប្រព័ន្ធដឹកនាំក្នុងរដ្ឋាភិបាលទេ ព្រោះថាការដឹកនាំប្រទេស គឺដើម្បីរកប្រយោជន៍ជូនជាតិមាតុភូមិ និងប្រជាពលរដ្ឋ មិនអាចប្រើការដឹកនាំបែបនេះក្នុងរដ្ឋបាលរដ្ឋឡើយ ត្បិតការធ្វើបែបនេះ នឹងធ្វើឱ្យខាតបង់ថវិកាជាតិធ្ងន់ធ្ងរនៅពេលដែលការចងក្រងសមាជិកខ្លួនឯងក្នុងជួររដ្ឋាភិបាលកាន់តែច្រើនឡើងៗ ស្របពេលដែលពួកគេទទួលប្រាក់ខែពីការបង់ពន្ធរបស់ប្រជាពលរដ្ឋនោះ។ ក្នុងប្រទេសប្រជាធិបតេយ្យ គេហៅថារដ្ឋាភិបាលបង្ហិនបង្ហោចជាតិ (government waste)៕