មន្ត្រីជាន់ខ្ពស់បក្សប្រឆាំងលើកឡើងថា បញ្ជាការដ្ឋានអង្គរក្ស បើត្រូវបង្កើតឡើងដើម្បីតែការពារសុវត្ថិភាពនាយករដ្ឋមន្ត្រី គឺជារឿងត្រឹមត្រូវ ប៉ុន្តែបើបញ្ជាការដ្ឋានអង្គរក្សនេះក្លាយទៅជាកងកម្លាំងប្រើប្រាស់ផ្ទាល់ខ្លួនផ្ដាច់មុខរបស់នាយករដ្ឋមន្ត្រីវិញ នោះវាគឺជារឿងគ្រោះថ្នាក់បំផុតសម្រាប់កម្ពុជា។
អតីតអ្នកទោសនយោបាយ និងជាមន្ត្រីជាន់ខ្ពស់គណបក្សសង្គ្រោះជាតិលោក មាជ សុវណ្ណារ៉ា ប្រាប់សារព័ត៌មាន The Cambodia Daily នៅថ្ងៃទី៦ កញ្ញា នេះថា បញ្ជាការដ្ឋានអង្គរក្សកម្ពុជាសព្វថ្ងៃនេះគឺចំណុះឲ្យបញ្ជាការដ្ឋានកងយោធពលខេមរភូមិន្ទ ដែលមានន័យថា ពួកគេត្រូវទទួលប្រាក់បៀវត្សប្រទេសជាតិ មិនមែនទទួលបៀវត្សពីបុគ្គលណាទេ។
លោកបន្ថែមថា កន្លងមកគេមើលឃើញថា ពិតមែនតែពួកគេទទួលប្រាក់បៀវត្សពីប្រទេសជាតិ ប៉ុន្តែពួកគេបែរជាទទួលបទបញ្ជាតែពីបុគ្គលមានអំណាចទៅវិញ។
លោក មាជ សុវណ្ណារ៉ា លើកឡើងថា បញ្ជាការដ្ឋានអង្គរក្សពិតមែនតែមានតួនាទីការពារនាយករដ្ឋមន្ត្រី និងក្រុមគ្រួសាររបស់នាយករដ្ឋមន្ត្រី ប៉ុន្តែបើនាយករដ្ឋមន្ត្រីប្រើប្រាស់បញ្ជាការដ្ឋានមួយនេះទៅការពាររហូតដល់ពូជអម្បូររបស់ខ្លួននោះ គឺជារឿងប្រាសចាកពីតួនាទីរបស់ទីបញ្ជាការដ្ឋាននេះទាំងស្រុង។
មន្ត្រីជាន់ខ្ពស់អតីតគណបក្សសង្គ្រោះជាតិរូបនេះបញ្ជាក់ថា ជាការពិតដែលត្រូវមានបញ្ជាការដ្ឋានអង្គរក្សដើម្បីការពារមេដឹកនាំប្រទេស ប៉ុន្តែបើចេះតែបញ្ចូលកងកម្លាំងអង្គរក្សស្រេចតែនឹងចិត្តនាយករដ្ឋមន្ត្រី ដោយគ្មានការកំណត់តាមផ្លូវច្បាប់ច្បាស់លាស់ វានឹងបង្កហានិភ័យសម្រាប់ស្ថិរភាពរបស់ប្រទេសជាតិទៅវិញប៉ុណ្ណោះ។
ការអះអាងនេះ ធ្វើឡើងបន្ទាប់ពីមេបញ្ជាការដ្ឋានអង្គរក្សលោក ហ៊ីង ប៊ុនហៀង បានលើកឡើងពីតួនាទីរបស់បញ្ជាការដ្ឋានអង្គរក្សកាលពីពេលថ្មីៗនេះ។
កាលពីថ្ងៃទី៥ ខែកញ្ញា ឆ្នាំ២០២៣ មេបញ្ជាការដ្ឋានអង្គរក្សលោក ហ៊ីង ប៊ុនហៀង បានលើកឡើងថា បញ្ជាការដ្ឋានអង្គរក្សបង្កើតឡើងសំដៅធានាការពារសន្តិសុខសុវត្ថិភាពជូនពលរដ្ឋ ការពារតាមព្រំដែន ការពារភ្ញៀវជាតិ-អន្តរជាតិដែលបំពេញបេសកកម្មនៅកម្ពុជា។ ជាងនេះទៀត ក៏ដើម្បីការពារឥស្សរជនកំពូល ក្រុមគ្រួសារលោក ហ៊ុន សែន ជាពិសេសផងដែរ។
លោក ហ៊ីង ប៊ុនហៀង បញ្ជាក់ថា បញ្ជាការដ្ឋានអង្គរក្សបង្កើតឡើងមិនមែនដើម្បីតែការពារលោក ហ៊ុន សែន និងក្រុមគ្រួសារដូចអ្វីដែលក្រុមប្រឆាំងចោទប្រកាន់នោះទេ ត្បិតបញ្ជាការដ្ឋានអង្គរក្សស្ថិតក្រោមការដឹកនាំបញ្ជាផ្ទាល់របស់អគ្គបញ្ជាការនៃកងយោធពលខេមរភូមិន្ទ និងក្រសួងការពារជាតិ។
បញ្ជាការដ្ឋានកងអង្គរក្សដែលជាអតីតកងកម្លាំងយោធាក្រុងភ្នំពេញលេខ២៤៦ ត្រូវបានបង្កើតឡើងកាលពីថ្ងៃទី៤ ខែកញ្ញា ឆ្នាំ២០០៩ បន្ទាប់ពីលោក ហ៊ុន សែន ព្យាយាមកសាងកម្លាំងមួយនេះទុកសម្រាប់ការពារខ្លួន និងក្រុមគ្រួសាររបស់លោកផ្ដាច់មុខចាប់តាំងពីឆ្នាំ១៩៩០ មក។
ក្នុងពិធីប្រារព្ធខួបអនុស្សាវរីយ៍លើកទី១៤ នៃថ្ងៃប្រកាសបង្កើតបញ្ជាការដ្ឋានអង្គរក្សនៅក្រុងតាខ្មៅ ខេត្តកណ្តាល កាលពីថ្ងៃទី៥ ខែកញ្ញា ឆ្នាំ២០២៣ នេះ ក្មួយប្រសារបស់លោក ហ៊ុន សែន គឺលោក នេត សាវឿន ដែលកំពុងជំនួសតំណែងជានាយករដ្ឋមន្ត្រីស្តីទី បានចាត់ទុកបញ្ជាការដ្ឋានអង្គរក្ស គឺជាកម្លាំងពហុវិស័យ និងជាកម្លាំងចល័តអន្តរាគមន៍ពិសេសរបស់ប្រមុខរាជរដ្ឋាភិបាល ក្រសួងការពារជាតិ និងអគ្គបញ្ជាការដ្ឋាននៃកងយោធពលខេមរភូមិន្ទ ជាពិសេសគឺការអនុវត្តនូវបទបញ្ជារបស់លោក ហ៊ុន សែន និងបញ្ជារបស់អ្នកស្រី ប៊ុន រ៉ានី តែម្តង។
ទាក់ទិននឹងបញ្ហានេះ តំណាងរាស្ត្រអតីតគណបក្សសង្គ្រោះជាតិលោក អ៊ុំ សំអាន ធ្លាប់បានលើកឡើងថា ការបង្កើតបញ្ជាការដ្ឋានអង្គរក្សមិនមែនបម្រើប្រយោជន៍ជាតិទេ តែដើម្បីការពារអំណាចត្រកូល ហ៊ុន និងជាក្រុមមនុស្សដៃឆៅ ដែលហ៊ានប្រព្រឹត្តអំពើឧក្រិដ្ឋគ្រប់បែបយ៉ាងតាមបញ្ជារបស់លោក ហ៊ុន សែន ប៉ុណ្ណោះ។
លោក អ៊ុំ សំអាន លើកឡើងថា ក្នុងចំណោមមន្ត្រីជាន់ខ្ពស់បក្សកាន់អំណាច មានតែលោក ហ៊ុន សែន ម្នាក់ប៉ុណ្ណោះដែលក្តោបក្តាប់បញ្ជាការដ្ឋានអង្គរក្ស ក្រោមលេសដើម្បីការពារជាតិ ប៉ុន្តែតាមការពិត គឺដើម្បីអនុវត្តផែនការប្លន់អំណាចប៉ុណ្ណោះ ព្រោះថាគាត់មិនអាចដាក់ផែនការឧក្រិដ្ឋកម្មសម្ងាត់ឱ្យកងកម្លាំងផ្សេងអនុវត្តដែលមិនស្ថិតក្រោមការបញ្ជាមនុស្សជំនិតរបស់គាត់ ដូចជាលោក ហ៊ីង ប៊ុនហៀង នោះទេ។
មន្ត្រីក្នុងជួរកងអង្គរក្សម្នាក់បានទម្លាយប្រាប់សារព័ត៌មាន The Cambodia Daily ក្នុងលក្ខខណ្ឌមិនបញ្ចេញឈ្មោះដើម្បីរក្សាសុវត្ថិភាពផ្ទាល់ខ្លួនកាលពីពេលថ្មីៗនេះថា ការជ្រើសរើសក្រុមអង្គរក្សគឺធ្វើឡើងតាមសែស្រឡាយដែលគេទុកចិត្តប៉ុណ្ណោះ ហើយក្នុងនោះ គេតម្រូវឱ្យបង់លុយក្នុងទំហំច្រើនដោយគ្មានការកំណត់ជាក់លាក់ ជាថ្នូរនឹងការជាប់ឈ្មោះដើម្បីចូលជាក្រុមអង្គរក្សក្នុងបញ្ជាការដ្ឋានអង្គរក្សនោះ។
ប្រភពដដែលអះអាងថា នៅពេលដែលបានជាប់ឈ្មោះចូលទៅក្នុងបញ្ជាការដ្ឋានអង្គរក្សហើយ គេតម្រូវឱ្យអ្នកជាប់ថ្មីទាំងនោះហ្វឹកហាត់ដូចទាហានដូច្នោះដែរ ប៉ុន្តែមានការរឹតបន្តឹង និងការគាបសង្កត់ បិទសិទ្ធិសេរីភាពខ្លាំងជាងទាហានរាប់សិបដង និងប្រើទណ្ឌកម្មធ្ងន់ធ្ងរផ្សេងៗ ដូចជានៅពេលដែលមេបញ្ជាការហៅមិនឮ គឺត្រូវទទួលទារុណកម្មដោយការទះកំភ្លៀងជាច្រើនដៃ ឬត្រូវដេកហាលថ្ងៃរាប់ម៉ោង ជាដើម។
ប្រភពដដែលបញ្ជាក់ថា ក្នុងបញ្ជាការដ្ឋានអង្គរក្សទាំងមូលត្រូវគេបញ្ជាឱ្យស្តាប់បញ្ជា និងការពារតែក្រុមគ្រួសារលោក ហ៊ុន សែន តែមួយប៉ុណ្ណោះ ហើយជារៀងរាល់ថ្ងៃ ពួកគេតែងតម្រូវឱ្យច្រៀងចម្រៀងដែលមានខ្លឹមសារលើកតម្កើងក្រុមគ្រួសារលោក ហ៊ុន សែន និងខ្លឹមសារប្តូរផ្តាច់ការពារត្រកូលហ៊ុនជាប្រចាំ ដូចជាពាក្យថា «ត្រូវប្តូរផ្តាច់ការពារសម្តេច និងក្រុមគ្រួសារ ព្រមទាំងបុត្រាបុត្រី ជាដើម»។
មេបញ្ជាការដ្ឋានអង្គរក្សរបស់លោក ហ៊ុន សែន គឺលោក ហ៊ីង ប៊ុនហៀង នៅពេលនេះកំពុងជាប់ឈ្មោះក្នុងបញ្ជីខ្មៅរបស់សហរដ្ឋអាមេរិក ដោយសារតែគេរកឃើញថា លោក ហ៊ីង ប៊ុនហៀង រំលោភសិទ្ធិមនុស្សធ្ងន់ធ្ងរ ដូចជាពាក់ព័ន្ធនឹងការប្រើអំពើហិង្សាវាយដំតំណាងរាស្ត្របក្សប្រឆាំងនៅឆ្នាំ២០១៥ ពាក់ព័ន្ធនឹងអំពើហិង្សាក្នុងការបង្ក្រាបលើក្រុមអ្នកតវ៉ា និងសកម្មជនបក្សប្រឆាំង និងការបោកគ្រាប់បែកលើអ្នកតវ៉ាដោយអហិង្សា ដែលបានធ្វើឲ្យស្លាប់ និងរបួសមនុស្សជាច្រើននាក់កាលពីឆ្នាំ១៩៩៧ កន្លងទៅផងដែរ។
កងអង្គរក្សដែលមានតួនាទីការពារ និងអនុវត្តតាមបទបញ្ជាលោក ហ៊ុន សែន ត្រូវគេដឹងថាមកទល់នឹងពេលនេះមានចំនួនដល់ទៅរាប់ពាន់នាក់ឯណោះ ហើយពួកគេមានតួនាទីតែមួយគត់ គឺការពារពូជអម្បូរលោក ហ៊ុន សែន ទាំងអស់ ដែលបង្កការភ័យព្រួយដល់ស្ថិរភាពនយោបាយរបស់ប្រទេសកម្ពុជាយ៉ាងធ្ងន់ធ្ងរ៕