ប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡេនស្គី និយាយថា គ្មានអ្វីអាចមកបំបាក់ស្មារតីប្រយុទ្ធរបស់ប្រជាជនអ៊ុយក្រែន ក្នុងការប្រយុទ្ធប្រឆាំងនឹងសង្គ្រាមឈ្លានពានរបស់រុស្ស៊ីឡើយ។
ការថ្លែងរបស់វីរជនសង្គ្រាមនៃប្រទេសអ៊ុយក្រែនរូបនេះ មួយថ្ងៃបន្ទាប់ពីសភាសហរដ្ឋអាមេរិកអនុម័តកញ្ចប់ថវិកាបណ្ដោះអាសន្នដើម្បីបញ្ចៀសការបិទរដ្ឋាភិបាល ដោយមិនមានការបញ្ចូលជំនួយយោធាថ្មីទៀតសម្រាប់អ៊ុយក្រែននោះទេ។ នេះបើតាមការចេញផ្សាយដោយសារព័ត៌មាន StraitsTimes នៅថ្ងៃចន្ទ ទី២ ខែតុលា នេះ។
ក្នុងសុន្ទរកថាដែលត្រូវបានផ្សព្វផ្សាយកាលពីថ្ងៃចន្ទ ទី២ តុលា លោក ហ្សេឡេនស្គី បានលើកឡើងជាថ្មីពីការប្ដេជ្ញាចិត្តយកឈ្នះលើរុស្ស៊ី តែលោកមិនបានលើកឡើងអំពីការបោះឆ្នោតអនុម័តកញ្ចប់ថវិកាបណ្ដោះអាសន្ននៅក្នុងសភាសហរដ្ឋអាមេរិក ដែលពុំបានរាប់បញ្ចូលជំនួយសម្រាប់អ៊ុយក្រែននោះទេ។
ប្រធានាធិបតីអ៊ុយក្រែនរូបនេះក៏បានសង្កត់ធ្ងន់ផងដែរថា អ៊ុយក្រែននឹងបញ្ឈប់ការប្រយុទ្ធនៅថ្ងៃមួយដែលអ៊ុយក្រែនទទួលបានជ័យជម្នះលើអ្នកឈ្លានពាន។
តែជាមួយគ្នានេះ រដ្ឋមន្ត្រីការពារជាតិអ៊ុយក្រែន លោក Rustem Umerov បានអះអាងក្នុងសេចក្ដីថ្លែងការណ៍មួយថា លោកទទួលបានការធានាពីការផ្ដល់ជំនួយយោធានៅពេលអនាគតសម្រាប់អ៊ុយក្រែន។
ការអះអាងរបស់លោកដូចនេះ ក្រោយពេលលោកបានធ្វើកិច្ចសន្ទនាតាមទូរស័ព្ទជាមួយរដ្ឋមន្ត្រីការពារជាតិអាមេរិក Lloyd Austin មួយថ្ងៃក្រោយពីសភាអាមេរិកអនុម័តកញ្ចប់ថវិកាថ្មី។
បើតាមលោករដ្ឋមន្ត្រីការពារជាតិអ៊ុយក្រែន លោករដ្ឋមន្ត្រីការពារជាតិសហរដ្ឋអាមេរិក Lloyd Austin បានធានាចំពោះរូបលោកថា សេតវិមាននៅតែតាំងចិត្តគាំទ្រអ៊ុយក្រែនដែលថាកងទ័ពអ៊ុយក្រែននៅតែបន្តទទួលបានការគាំទ្រដ៏ខ្លាំងក្លានៅលើសមរភូមិ។
ស្របពេលដែលលោក Lloyd Austin បានថ្លែងដូចនេះ លោក ចូ បៃដិន ក៏បានសន្យាថា សហរដ្ឋអាមេរិកនឹងមិនបោះបង់ចោលអ៊ុយក្រែនដាច់ខាត បើទោះជារដ្ឋការរបស់លោកកំពុងប្រឈមនឹងវិបត្តិថវិកាសហព័ន្ធ ឬការឈានទៅដល់ការបិទរដ្ឋាភិបាលនៅខែវិច្ឆិកា ក៏ដោយ។
កាលពីថ្ងៃទី៣០ កញ្ញា សភាសហរដ្ឋអាមេរិកបានអនុម័តកញ្ចប់ថវិកាថ្មីសម្រាប់រដ្ឋការលោក បៃដិន ក្នុងការប្រើប្រាស់ តែសភាបានអនុម័តឱ្យរដ្ឋការលោក បៃដិន ធ្វើដំណើររហូតដល់ថ្ងៃទី១៧ ខែវិច្ឆិកា ហើយនឹងត្រូវពិនិត្យឡើងវិញ ដែលនឹងប្រឈមមុខនឹងការបិទរដ្ឋាភិបាលនាំឱ្យរដ្ឋការលោក បៃដិន ពុំមានថវិកាគ្រប់គ្រាន់រាប់ទាំងថវិកាសម្រាប់ជំនួយទៅឱ្យអ៊ុយក្រែនផងដែរ។
លោក បៃដិន បានថ្លែងថា គណបក្សសាធារណរដ្ឋគួរបញ្ឈប់ការលេងហ្គេមពាក់ព័ន្ធនឹងកញ្ចប់ថវិកានេះទៅ។ លោក បៃដិន ទទួលស្គាល់ថា បច្ចុប្បន្នគឺជាពេលបន្ទាន់ ដែលសភាត្រូវតែអនុម័តកញ្ចប់ថវិកាថ្មីមួយសម្រាប់អ៊ុយក្រែននៅប៉ុន្មានថ្ងៃ ឬសប្ដាហ៍ខាងមុខ ព្រោះអ៊ុយក្រែនកំពុងធ្វើប្រតិបត្តិការវាយបកដើម្បីដណ្ដើមទឹកដីរបស់ខ្លួនដែលរុស្ស៊ីកំពុងកាន់កាប់។
លោក បៃដិន សង្ឃឹមថានឹងមានការសម្រុះសម្រួលគ្នារវាងគណបក្សប្រជាធិបតេយ្យ និងគណបក្សសាធារណរដ្ឋ ដើម្បីអាចឱ្យរដ្ឋាភិបាលអាចបន្តដំណើរការថវិការបស់ខ្លួនដោយរាប់ទាំងថវិកាសម្រាប់ជួយប្រទេសអ៊ុយក្រែនផងដែរ។
ស្របពេលដែលលោក បៃដិន នៅតែសន្យាថាសហរដ្ឋអាមេរិកនៅតែជួយអ៊ុយក្រែនបន្តទៀត ប្រមុខការទូតអ៊ុយក្រែន បាននិយាយថា ការគាំទ្ររបស់ទីក្រុងវ៉ាស៊ីនតោន ចំពោះទីក្រុងគៀវ គឺមិនថមថយនោះទេ។
រដ្ឋមន្ត្រីការបរទេសអ៊ុយក្រែន លោក Dmytro Kuleba បាននិយាយថា ទីក្រុងគៀវ កំពុងពិភាក្សាជាមួយគណបក្សសាធារណរដ្ឋ និងគណបក្សប្រជាធិបតេយ្យនៅសភាសហរដ្ឋអាមេរិក ហើយថាភាពចម្រូងចម្រាសជុំវិញច្បាប់កញ្ចប់ថវិកាបណ្ដោះអាសន្នដែលបញ្ចៀសការបិទរដ្ឋាភិបាលអាមេរិកកាលពីថ្ងៃសៅរ៍សប្តាហ៍មុន គឺជាឧប្បត្តិហេតុមួយដែលវាពុំមែនជាវិបត្តិមានលក្ខណៈជាប្រព័ន្ធនោះទេ។
លោក Dmytro Kuleba ជឿថា សហរដ្ឋអាមេរិកនៅតែជាប្រទេសការពារប្រទេសទន់ខ្សោយដែលត្រូវគេឈ្លានពាន។ តែផ្ទុយទៅវិញ របបនៅក្រុងមូស្គូ មើលទៅកំពុងសប្បាយចិត្តព្រោះសង្ឃឹមថាសហរដ្ឋអាមេរិកបើកាត់បន្ថយជំនួយឱ្យអ៊ុយក្រែន គឺក្រុងវ៉ាស៊ីនតោនក៏ដកដៃពីអ៊ុយក្រែនដែរ។
គេថាប្រព័ន្ធឃោសនារបស់ក្រុងមូស្គូ កំពុងវាយចំអកឱ្យក្រុងគៀវ ថាម្ចាស់របស់ឯងកំពុងនឿយណាយនឹងសង្គ្រាមអ៊ុយក្រែនហើយ ទើបក្រុមសភាអាមេរិកមិនលើកឡើងអំពីជំនួយជួយអ៊ុយក្រែន។
តែសម្រាប់សេតវិមាន បានច្រានចោលការលើកឡើងរបស់ក្រុមអ្នកឃោសនាសម្រាប់វិមានក្រឹមឡាំង ដែលថាលោកខាងលិចកំពុងនឿយណាយក្នុងការផ្ដល់ជំនួយសម្រាប់អ៊ុយក្រែន គឺខុសហើយ។
ក្នុងសន្និសីទសារព័ត៌មានមួយ អ្នកនាំពាក្យសេតវិមាន អ្នកស្រី Karine Jean-Pierre បានបញ្ជាក់ថា៖ ប្រសិនបើលោក ពូទីន គិតថាលោកអាចទ្រាំទ្របានយូរជាងក្រុមសម្ព័ន្ធមិត្ត គឺលោកកំពុងគិតខុសហើយ។
អ្នកស្រីបន្ថែមថា ការគាំទ្ររបស់ក្រុមចម្រុះលោកខាងលិច គឺមានទំហំធំធេងដើម្បីជួយអ៊ុយក្រែន ប្រឆាំងនឹងការឈ្លានពានរបស់រុស្ស៊ី រហូតរុស្ស៊ីយល់ព្រមដើរចេញពីអ៊ុយក្រែន។
សហរដ្ឋអាមេរិកជាប្រទេសធំទី២ បន្ទាប់ពីសហភាពអឺរ៉ុប ដែលផ្ដល់ជំនួយយោធា និងជំនួយស៊ីវិលទៅឱ្យអ៊ុយក្រែន។
ចាប់តាំងពីសង្គ្រាមរុស្ស៊ីឈ្លានពានអ៊ុយក្រែនផ្ទុះឡើងនៅថ្ងៃទី២៤ ខែកុម្ភៈ ឆ្នាំ២០២២ សម្រាប់ក្រុងវ៉ាស៊ីនតោន បានបញ្ជូនជំនួយជាង ៧៦ពាន់ ៦០០លានដុល្លារ បន្ទាប់ពីសហភាពអឺរ៉ុប មាន ២៧ប្រទេសផ្ដល់ជំនួយទៅឱ្យអ៊ុយក្រែន មានទំហំសាច់ប្រាក់ ៨៤ពាន់ ៨០០លានដុល្លារអាមេរិក។ ប្រទេសដែលបានផ្ដល់ជំនួយទាំងជំនួយយោធា និងជំនួយស៊ីវិលទៅឱ្យអ៊ុយក្រែន មាន ៥៣ប្រទេស៕