ប្រធានាធិបតីអ៊ុយក្រែន វ៉ូឡូឌីមៀ ហ្សេឡេនស្គី នៅថ្ងៃព្រហស្បតិ៍ ទី៥ តុលា នេះ បានទៅដល់ទីក្រុង Granada នៃប្រទេសអេស្ប៉ាញ។ តាមទីភ្នាក់ងារសារព័ត៌មាន Reuters នៅពេលលោក ហ្សេឡេនស្គី ជាន់ទឹកដីទីក្រុង Granada ភ្លាម ជំនួបកំពូលក៏បានចាប់ផ្ដើម។
ក្នុងជំនួបកំពូលនេះ មេដឹកនាំអឺរ៉ុប បានធានាចំពោះលោក ហ្សេឡេនស្គី នូវការគាំទ្ររយៈពេលយូរ គឺគាំទ្ររហូតមានការបិទបញ្ចប់សង្គ្រាមឈ្លានពានរបស់រុស្ស៊ី ប៉ុន្តែការសន្យារបស់មេដឹកនាំអឺរ៉ុប ធ្វើឡើងចំពេលរដ្ឋការរបស់លោក បៃដិន ប្រឈមមុខនឹងសម្ពាធរបស់ពួកសាធារណរដ្ឋឱ្យកាត់បន្ថយជំនួយទៅឱ្យអ៊ុយក្រែន ដែលលោក បៃដិន បារម្ភពីការប៉ះពាល់ជំនួយទៅឱ្យអ៊ុយក្រែន ខណៈរដ្ឋសភានៃប្រទេសមហាអំណាចនេះកំពុងជាប់គាំង ព្រោះតែពុំមានប្រធានរដ្ឋសភា ហើយបើទោះជាមានការបោះឆ្នោតជ្រើសតាំងបេក្ខជនម្នាក់មកពីសាធារណរដ្ឋសម្រាប់ប្រធានរដ្ឋសភានៅសប្ដាហ៍ក្រោយក៏ដោយ។
វេទិកាដែលមានវត្តមានប្រធានាធិបតីអ៊ុយក្រែន នៅលើទឹកដីនៃប្រទេសអេស្ប៉ាញ គឺជាវេទិកានយោបាយអឺរ៉ុប ដែលបង្កើតឡើងកាលពីឆ្នាំទៅមិញ បន្ទាប់ពីរុស្ស៊ីលើកទ័ពឈ្លានពានទឹកដីអ៊ុយក្រែន។ វេទិកានេះបង្កើតបាននូវក្របខ័ណ្ឌសហប្រតិបត្តិការដ៏ធំមួយមាន ៤០ប្រទេសនៅទូទាំងអឺរ៉ុប។
លោក ហ្សេឡេនស្គី បាននិយាយថា ប្រទេសអ៊ុយក្រែន កំពុងត្រៀមសង្គ្រាមរដូវត្រជាក់ដែលនឹងចូលមកដល់នៅប៉ុន្មានសប្ដាហ៍នេះ។ តែមេដឹកនាំអ៊ុយក្រែនរូបនេះបានថ្លែងថា អ៊ុយក្រែនត្រូវការពង្រឹងប្រព័ន្ធការពារដែនអាកាស ព្រោះអ្នកឈ្លានពានគេវាយប្រហារខ្លាំងមកលើអ៊ុយក្រែន ដោយទ័ពអាកាស និងមីស៊ីល។ តែលោកថា សមរភូមិលើដីវិញ គឺសំខាន់បំផុតដែលអ៊ុយក្រែនត្រូវការពារទឹកដីរបស់ខ្លួនផង ហើយវាយរំដោះទឹកដីមកវិញផង។ ប៉ុន្តែលោកទទូចថា តំបន់សមុទ្រខ្មៅ គឺត្រូវរួមគ្នាពង្រឹងសន្តិសុខសុវត្ថិភាព ព្រោះវាជាផ្លូវនាវាចរសមុទ្រសម្រាប់តំបន់ ក្នុងការសំដៅធានាការដឹកស្បៀងចេញពីប្រទេសផ្សេងៗទៅកាន់ទីផ្សារខាងក្រៅ។
រុស្ស៊ីបានដកខ្លួនចេញពីកិច្ចព្រមព្រៀងធានាស្បៀងអាហារពិភពលោក កាលពីខែកក្កដា ដែលធ្វើឱ្យផ្លូវនាវាសមុទ្រនៅសមុទ្រខ្មៅបាត់បង់សុវត្ថិភាពក្នុងការនាំស្បៀងទៅកាន់បណ្ដាប្រទេសនៅអាហ្វ្រិក ឬប្រទេសផ្សេងៗដែលត្រូវការស្បៀងពីប្រទេសនៅតំបន់សមុទ្រខ្មៅ ដែលរួមប្រទេសអ៊ុយក្រែន ផង។
ជំនួបកំពូលនៅប្រទេសអេស្ប៉ាញ គេសង្កេតឃើញលោកប្រធានាធិបតីបារាំង Emmanuel Macron អធិការបតីអាល្លឺម៉ង់ Olaf Scholz និងនាយករដ្ឋមន្ត្រីអង់គ្លេស Rishi Sunak ដែលពួកគាត់ចេញមុខមុនគេឡើងថ្លែងប្ដេជ្ញាបន្តជួយអ៊ុយក្រែន។
ក្រោយពីមិនទុកចិត្តចំពោះការបិទរដ្ឋាភិបាលនៅឆ្នាំ២០២៣ លោក ចូ បៃដិន ប្រធានាធិបតីអ៊ុយក្រែន លើកទូរសព្ទទៅកាន់មេដឹកនាំអឺរ៉ុប និងមេដឹកនាំជាច្រើន ដូចជានាយករដ្ឋមន្ត្រីជប៉ុន នាយករដ្ឋមន្ត្រីអូស្ត្រាលី និងប្រធានាធិបតីកូរ៉េខាងត្បូង ដោយបានស្នើឱ្យបង្កើតកិច្ចព្រមព្រៀងអន្តរជាតិមួយដ៏រឹងមាំ ដើម្បីជួយប្រទេសអ៊ុយក្រែន។
តែយ៉ាងណា លោកសង្ឃឹមថាគណបក្សសាធារណរដ្ឋនឹងមិនធ្វើឱ្យរដ្ឋាភិបាលលោកមានវិបត្តិ ដែលអាចប៉ះពាល់ជំនួយទៅឱ្យអ៊ុយក្រែន នោះទេ។ លោក បៃដិន បានថ្លែងទៅកាន់ប្រជាជនអាមេរិកថា ប្រសិនបើរដ្ឋាភិបាលរបស់លោកត្រូវបានបិទ គឺជាកំហុសរបស់គណបក្សសាធារណរដ្ឋ។
ខណៈនេះ រដ្ឋសភាសហរដ្ឋអាមេរិកកំពុងជាប់គាំងដំណើរការការងារ ដោយសារការដកតំណែងប្រធានរដ្ឋសភាពីលោក Kevin McCarthy មកពីគណបក្សសាធារណរដ្ឋ។ ការណ៍នេះ នាំឱ្យសមាជិកសភាអាមេរិកជាប់គាំង បើសភាទាំងពីរបក្សមិនអាចសម្រេចដំណោះស្រាយនូវការជ្រើសតាំងប្រធានរដ្ឋសភាថ្មីជំនួសលោក McCarthy។
អតីតប្រធានរដ្ឋសភា Kevin McCarthy ដែលត្រូវបានដកចេញពីតំណែងកាលពីថ្ងៃអង្គារ ធ្លាប់បានឆ្លងកាត់ការបោះឆ្នោតដល់ទៅ ១៥ដងកាលពីខែមករា ឆ្នាំ២០២៣ ទើបជាប់ឆ្នោតចូលកាន់តំណែងនេះ។
នៅពេលនោះ លោកត្រូវធ្វើសម្បទានជាច្រើនទៅឱ្យក្រុមសមាជិកសភាអភិរក្សនិយមដែលជំទាស់នឹងលោកនៅក្នុងជួរគណបក្សសាធារណរដ្ឋ រហូតដល់សម្រេចកែប្រែបទបញ្ជាផ្ទៃក្នុងដែលតម្រូវឱ្យសមាជិករដ្ឋសភាតែម្នាក់ប៉ុណ្ណោះ អាចស្នើឱ្យមានការបោះឆ្នោតដកតំណែងប្រធានរដ្ឋសភាពីលោក McCarthy។
គេរំពឹងថា បក្សប្រជាធិបតេយ្យ និងបក្សសាធារណរដ្ឋ នឹងពិភាក្សាជ្រើសតាំងប្រធានរដ្ឋសភាថ្មី ព្រោះបក្សទាំងពីរមានសំឡេងប្រកៀកប្រកិតគ្នាខ្លាំង។ មានន័យថា ត្រូវការសំឡេងដើម្បីឈានទៅដល់សម្រេចជ្រើសតាំងបាននូវប្រធានរដ្ឋសភាថ្មី លុះត្រាមានកិច្ចព្រមព្រៀងរវាងបក្សទាំងពីរជាមុនសិន។
ការបោះឆ្នោតសម្រាប់ប្រធានរដ្ឋសភា តម្រូវឱ្យមានសំឡេងគាំទ្រភាគច្រើនដាច់ខាតនៅក្នុងរដ្ឋសភា ដែលមានសមាជិកសរុប ៤៣៥នាក់។ គណបក្សសាធារណរដ្ឋ គឺជាអ្នកគ្រប់គ្រងរដ្ឋសភាដោយមានសមាជិក ២២១នាក់ទល់នឹងសមាជិកចំនួន ២១២នាក់នៃគណបក្សប្រជាធិបតេយ្យ។ ដូចនេះ បក្សប្រជាធិបតេយ្យទំនងនឹងដាក់លក្ខខណ្ឌមិនឱ្យឈានទៅដល់ការបិទរដ្ឋាភិបាលរបស់លោក ចូ បៃដិន នោះទេ ហើយមួយទៀត អាចបក្សប្រជាធិបតេយ្យក៏ត្រូវស្នើឱ្យបក្សសាធារណរដ្ឋមិនត្រូវរកវិធានរាំងខ្ទប់ជំនួយសម្រាប់អ៊ុយក្រែន នោះទេ។
មន្ត្រីសេតវិមាន បានឱ្យដឹងថា រដ្ឋការលោក បៃដិន ត្រូវការឱ្យសភាអនុម័តប្រថាប់ត្រាចុងក្រោយនូវទំហំសាច់ប្រាក់សរុបជាង ៥ពាន់លានដុល្លារសម្រាប់ជួយអ៊ុយក្រែន ដែលកញ្ចប់ជំនួយនេះមានទាំងជំនួយយោធា និងជំនួយស៊ីវិល ដោយត្រូវប្រើរយៈពេល ៦ខែទៅមុខទៀត។
ចំពោះជំនួយអ៊ុយក្រែន នេះ ក្រុមសមាជិកសភាមួយចំនួនមកពីបក្សសាធារណរដ្ឋ បានទាមទារឱ្យកាត់បន្ថយ ជាពិសេសបានទាមទារទៅរដ្ឋការលោក បៃដិន ផ្អាកជំនួយហិរញ្ញវត្ថុដែលត្រូវជួយបើកប្រាក់ខែឱ្យកងទ័ពអ៊ុយក្រែន។ លោក បៃដិន ទទូចថា គេមិនត្រូវកាត់បន្ថយទាំងអស់ ទោះជំនួយហិរញ្ញវត្ថុក៏ដោយ។
ជាមួយនឹងការព្រួយបារម្ភនេះ លោក បៃដិន បានទទូចដល់មេដឹកនាំអឺរ៉ុប ដែលបានជួបប្រជុំគ្នានៅប្រទេសអេស្ប៉ាញ ដោយមានវត្តមានលោកប្រធានាធិបតីអ៊ុយក្រែនផងនោះ ស្នើឱ្យខិតខំពង្រឹងជំហរ និងកម្លាំងសាមគ្គីគ្នាជួយអ៊ុយក្រែន។ ក្នុងនោះ សហភាពអឺរ៉ុប មាន ២៧ប្រទេសបានអនុម័តបន្ថែមជំនួយសម្រាប់ប្រទេសអ៊ុយក្រែន រហូតដល់ឆ្នាំ២០២៧ នូវសាច់ប្រាក់ជិត ៦០ពាន់លានដុល្លារអាមេរិក ដែលសហភាពអឺរ៉ុប បានបញ្ចេញកញ្ចប់ជំនួយជាង ៨៤ពាន់ ៨០០លានដុល្លារ ខណៈអាមេរិកបញ្ចេញជំនួយទៅឱ្យអ៊ុយក្រែន នូវសាច់ប្រាក់ ៧៦ពាន់ ៦០០លានដុល្លារចាប់តាំងពីសង្គ្រាមផ្ទុះឡើងនៅលើទឹកដីអ៊ុយក្រែន នៅខែកុម្ភៈ ឆ្នាំ២០២២៕