 នៅទីក្រុងប្រ៊ុចសែល នៃប្រទេសបែលហ្ស៊ិក ក្នុងគោលបំណងស្វែងរកជំនួយប្រព័ន្ធការពារដែនអាកាស កាំភ្លើងធំ និងគ្រាប់រំសេវបន្ថែមទៀត ដើម្បីជួយប្រទេសរបស់លោកឆ្លងកាត់រដូវរងាលើកទីពីរនៅចុងឆ្នាំ២០២៣ នេះ។){kind=link}
ប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡេនស្គី នៅថ្ងៃពុធ ទី១១ តុលា នេះ បានបំពេញទស្សនកិច្ចដ៏ភ្ញាក់ផ្អើលទៅកាន់ទីបញ្ជាការកណ្តាលរបស់អង្គការណាតូ (NATO) នៅទីក្រុងប្រ៊ុចសែល នៃប្រទេសបែលហ្ស៊ិក ក្នុងគោលបំណងស្វែងរកជំនួយប្រព័ន្ធការពារដែនអាកាស កាំភ្លើងធំ និងគ្រាប់រំសេវបន្ថែមទៀត ដើម្បីជួយប្រទេសរបស់លោកឆ្លងកាត់រដូវរងាលើកទីពីរនៅចុងឆ្នាំ២០២៣ នេះ។
បើតាមទីភ្នាក់ងារព័ត៌មាន Reuters នេះជាទស្សនកិច្ចដំបូងទៅកាន់ទីបញ្ជាការកណ្ដាលរបស់ណាតូ គិតចាប់តាំងពីសង្គ្រាមឈ្លានពានរបស់រុស្ស៊ី បានចាប់ផ្តើមកាលពីខែកុម្ភៈ ឆ្នាំ២០២២។
លោក ហ្សេឡេនស្គី បានថ្លែងទៅកាន់អ្នកសារព័ត៌មានថា រដូវរងានៅប៉ុន្មានសប្ដាហ៍ខាងមុខនេះ នឹងចូលមកដល់ហើយ ដែលលោកថាជាបញ្ហាប្រឈមដ៏ធំបំផុតរបស់អ៊ុយក្រែន។
ប្រធានាធិបតីអ៊ុយក្រែន បានថ្លែងដូចនេះនៅមុនពេលលោកត្រូវជួបពិភាក្សាជាមួយក្រុមរដ្ឋមន្ត្រីការពារជាតិមកពីអង្គការណាតូ ៣១ប្រទេស និងក្រុមរដ្ឋមន្ត្រីការពារជាតិមកពីជាង ២០ប្រទេសផ្សេងទៀតដែលផ្តល់ជំនួយយោធាឱ្យអ៊ុយក្រែន ក៏មកចូលប្រជុំនៅក្រុងប្រ៊ុចសែល ដែរ។
កិច្ចប្រជុំនេះ គេហៅថាក្រុមសម្ព័ន្ធមិត្តអ៊ុយក្រែន ឬក្រុម Ukraine Defense Contract Group។ លោក ហ្សេឡេនស្គី បានទទូចថា ក្រុមយើងកំពុងត្រៀមខ្លួនរួចរាល់ហើយ តែសម្រាប់អ៊ុយក្រែនពេលនេះត្រូវការការគាំទ្រពីប្រទេសអស់លោក និងសហគមន៍អន្តរជាតិ។
តាមមេដឹកនាំអ៊ុយក្រែនរូបនេះ ការវាយបករបស់អ៊ុយក្រែន គឺជារឿងសំខាន់ និងជាគោលដៅនៃសង្គ្រាម ប៉ុន្តែគេត្រូវដឹងថា រុស្ស៊ីជាប្រទេសភេរវកម្មដែលមានអាវុធយ៉ាងសម្បើម។ ថ្លែងបន្តពីលោក ហ្សេឡេនស្គី អគ្គលេខាធិការណាតូ លោក Jens Stoltenberg បាននិយាយថា ប្រធានាធិបតីរុស្ស៊ី លោក វ្ល៉ាឌីមៀ ពូទីន កំពុងត្រៀមលក្ខណៈសាជាថ្មីក្នុងការទាញយុទ្ធសាស្ត្ររដូវរងាជាអាវុធសម្រាប់សង្គ្រាមរបស់ខ្លួន តាមរយៈការវាយប្រហារមកលើហេដ្ឋារចនាសម្ព័ន្ធថាមពលនៅអ៊ុយក្រែន គឺអាចដូចរដូវរងាឆ្នាំទៅមិញ។
លោក Stoltenberg បន្តថា ក្រុមសម្ពន្ធភាពត្រូវតែជួយទប់ស្កាត់រុស្ស៊ី ដោយការផ្តល់ប្រព័ន្ធការពារដែនអាកាសដែលកាន់តែទំនើប និងមានសមត្ថភាពទៅឱ្យអ៊ុយក្រែន។ លោកអគ្គលេខាធិការណាតូ កាលពីពេលថ្មីៗនេះ បានទទូចថា គេត្រូវរួមគ្នាបង្ខំរុស្ស៊ី ឱ្យបញ្ចប់សង្គ្រាមជាជាងរុស្ស៊ីប្រើពេលវេលាដើម្បីអូសបន្លាយសង្គ្រាម ហើយមិនព្រមបោះបង់ការឈ្លានពាន។
នៅប៉ុន្មានថ្ងៃមកនេះ មានប្រទេសជាច្រើនបន្តចេញមុខប្រកាសផ្ដល់ជំនួយយោធាថែមទៀតទៅឱ្យអ៊ុយក្រែន មានដូចជា ប្រទេសអាល្លឺម៉ង់ ប្រទេសអង់គ្លេស ប្រទេសកាណាដា ស៊ុយអែត ហើយនិងសហភាពអឺរ៉ុប ២៧ប្រទេស។
សហភាពអឺរ៉ុប បានអនុម័តហើយនូវការពង្រីកកញ្ចប់ជំនួយមានទំហំសាច់ប្រាក់ជិត ៦០ពាន់លានដុល្លាររហូតដល់ទៅឆ្នាំ២០២៧ ហើយក្នុងគ្រាប់កាំភ្លើងធំប្រមាណមួយលានគ្រាប់ នឹងបញ្ជូនទៅឱ្យអ៊ុយក្រែន នៅចុងឆ្នាំនេះ ឬដើមឆ្នាំក្រោយ។ ប្រទេសដែលគាំទ្រអ៊ុយក្រែន ប្រយុទ្ធដើម្បីសេរីភាព និងអធិបតេយ្យភាពមាន ៥៣ប្រទេស ក្នុងនោះប្រទេសចំនួន ១០ ដែលផ្ដល់ជំនួយចាប់ពីជាង ៣ពាន់លានដុល្លារឡើងទៅមាន ១០ប្រទេស។
ប្រទេសទាំង ១០ នោះមាន៖
- សហភាពអឺរ៉ុប ២៧ប្រទេស បានផ្ដល់ទៅឱ្យអ៊ុយក្រែនទាំងជំនួយយោធា និងជំនួយមិនមែនយោធានូវទំហំសាច់ប្រាក់ ៨៤ពាន់ ៨០០លានដុល្លារ
- សហរដ្ឋអាមេរិកបានបញ្ចេញកញ្ចប់ថវិកា ៧៦ពាន់ ៦០០លានដុល្លារ
- អាល្លឺម៉ង់ ២០ពាន់ ៩០០លានដុល្លារ
- អង់គ្លេស ១៣ពាន់ ៨០០លានដុល្លារ
- ន័រវែស ៧ពាន់ ៤០០លានដុល្លារ
- ជប៉ុន ៦ពាន់ ៥០០លានដុល្លារ
- កាណាដា ៥ពាន់ ៤០០លានដុល្លារ
- ប៉ូឡូញ ៤ពាន់ ៣០០លានដុល្លារ
- ហុឡង់ដ៍ ៤ពាន់ ១០០លានដុល្លារ
- ដាណឺម៉ាក ៣ពាន់ ៨០០លានដុល្លារ។
សរុបទៅ ទំហំសាច់ប្រាក់ទាំងជំនួយយោធា និងជំនួយមិនមែនយោធាដែលអ៊ុយក្រែនទទួលបានពីប្រទេសទាំង ១០ នេះ គឺមាន ២២៧ពាន់ ៦០០លានដុល្លារអាមេរិក ដែលជំនួយនេះរាប់ពីថ្ងៃទី២៤ ខែកុម្ភៈ ឆ្នាំ២០២២ មកដល់ខែកញ្ញា ឆ្នាំ២០២៣។ មកដល់ពេលនេះ សង្គ្រាមរុស្ស៊ីឈ្លានពានអ៊ុយក្រែន ចូលដល់ខែទី២០ ហើយ៕