ពិភពលោកកាន់តែដឹងច្បាស់ថា ប្រទេសមហាអំណាចលើពិភពលោកណាខ្លះគាំទ្រកងកម្លាំងឃោរឃៅបែបភេរវកម្ម និងប្រទេសមហាអំណាចណាខ្លះចង់បោសសម្អាតក្រុមបែបភេរវកម្មនេះ។
រយៈពេលចុងក្រោយនេះ គេបានឃើញប្រទេសចិន និងរុស្ស៊ី ដែលអួតខ្លួនជាអ្នកការពារសណ្ដាប់ធ្នាប់សន្តិភាពពិភពលោក បានក្លាយជាប្រទេសដែលកំពុងចេញមុខខ្លាំងទាមទារឱ្យអ៊ីស្រាអែល បញ្ឈប់ការវាយប្រហារលើតំបន់ហ្កាហ្សានៃដែនដីប៉ាឡេស្ទីន ក្រោមហេតុផល ៣យ៉ាង ដែលប្រទេសមហាអំណាចពីរនេះបានទាមទារដូចនេះ៖
- ទី១ មិនចង់ឃើញពលរដ្ឋដែលរស់នៅលើដែនដីហ្កាហ្សាស្លាប់កាន់តែច្រើនឡើង ហើយរស់នៅយ៉ាងវេទនាដោយសារតែការវាយប្រហាររបស់កងទ័ពអ៊ីស្រាអែល។
- ទី២ បារម្ភខ្លាចពួកហាម៉ាសសម្លាប់ចំណាប់ខ្មាំងបរទេស ដែលក្រុមហាម៉ាសចាប់ពង្រត់ចេញពីទឹកដីអ៊ីស្រាអែល កាលពីពេលដែលទ័ពហាម៉ាសវាយចូលដែនដីអ៊ីស្រាអែលកាលពីថ្ងៃទី៧ តុលា។
- ទី៣ បារម្ភខ្លាចអ៊ីស្រាអែល វាយកាន់កាប់យកដែនដីហ្កាហ្សាដាក់ក្នុងដែនដីរបស់ខ្លួន ហើយបោសសម្អាតប្រជាជនប៉ាឡេស្ទីន ដែលជាអំពើប្រល័យពូជសាសន៍។ តែចិន និងរុស្ស៊ី មិនបានហៅពួកហាម៉ាសជាក្រុមភេរវកម្មនោះទេ ខណៈក្រុមបស្ចិមប្រទេសចាត់ទុកជាក្រុមភេរវកម្ម។
គោលបំណងរបស់មហាអំណាចពីរនេះ បានស្ដែងឡើងនៅឯវេទិកាអន្តរជាតិមួយ ដែលធ្វើឡើងនៅទីក្រុងគែរ ប្រទេសអេហ្ស៊ីប កាលពីថ្ងៃទី២០ ខែតុលា ដែលប្រទេសចូលរួមមានតែ ១៥ប្រទេសប៉ុណ្ណោះ ក្នុងនោះក៏មានប្រធានាធិបតីប៉ាឡេស្ទីន ផងដែរ។
នៅចំពោះមុខការចាញ់សង្គ្រាម និងបារម្ភដែលថាអ៊ីស្រាអែល អាចបើកការវាយលុកដោយកងទ័ពជើងគោកទ្រង់ទ្រាយធំ ដោយមានរថក្រោះជាង ២០០គ្រឿងបំណងវាយកាន់កាប់ដែនដីហ្កាហ្សា លោកប្រធានាធិបតីប៉ាឡេស្ទីន Mahmoud Abbas បានប្រកាសថា លោកមិនបានទទួលស្គាល់កងទ័ពនៃក្រុមហាម៉ាសជាកងទ័ពជាតិនៃប្រជាជនប៉ាឡេស្ទីន នោះទេ។
សាក្សីដែលដឹងថាមេដឹកនាំប៉ាឡេស្ទីន ថ្លែងដូចនេះ គឺលោក Antony Blinken ដែលជួបលោក Abbas នៅលើទឹកដីនៃប្រទេសហ្សកដានី។ តែនេះជាលើកដំបូងហើយដែលមេដឹកនាំប្រកាសមិនទទួលស្គាល់កងទ័ពហាម៉ាសជាទ័ពជាតិរបស់ប៉ាឡេស្ទីន ក្នុងឋានៈលោកជាប្រធានាធិបតី។
ប៉ុន្តែកាលពីសង្គ្រាមថ្ងៃទី១១ ខែឧសភា ឆ្នាំ២០២១ លោក Abbas មិនត្រូវបានគេដឹងថាលោកបានថ្លែងដូចនេះទេ។ តែលើកនេះ លោក Abbas អាចដឹងច្បាស់ណាស់ថា កងកម្លាំងហាម៉ាសដែលលួចវាយប្រហារទៅលើដែនដីអ៊ីស្រាអែល កាលពីថ្ងៃទី៧ ខែតុលា ដោយបាញ់រ៉ុក្កែត ៥ពាន់គ្រាប់ចូលទឹកដីអ៊ីស្រាអែល សម្លាប់ប្រជាជនជាង ១៤០០នាក់ គឺមិនខុសអ្វីដែលពួកបស្ចិមប្រទេសចាត់ទុកជាក្រុមភេរវកម្មនោះទេ។
ដូចនេះហើយ មើលទៅដែលលោក Abbas បានហៅកងទ័ពហាម៉ាសជាកម្លាំងក្រៅក្របខ័ណ្ឌរបស់រដ្ឋាភិបាលប៉ាឡេស្ទីន។ មានន័យថា ពួកហាម៉ាសនេះបានមកជ្រកកោន ហើយកកើតកម្លាំងនៅហ្កាហ្សា ហើយធ្វើអំពើទៅលើអ៊ីស្រាអែល ដែលមិនជាការទទួលខុសត្រូវរបស់លោកក្នុងឋានៈជាប្រធានាធិបតីនោះទេ។
តែជំហររបស់លោក Abbas គឺការពិត លោកបារម្ភខ្លាចតំបន់ហ្កាហ្សាត្រូវបានអ៊ីស្រាអែលវាយកាន់កាប់យកជាចំណុះរបស់ដែនដីអ៊ីស្រាអែល។ អ្វីដែលលោក Abbas មេដឹកនាំប៉ាឡេស្ទីន លើកឡើងដូចនេះហើយ បានជាចិន និងរុស្ស៊ី ទាមទារឱ្យអ៊ីស្រាអែលបញ្ចប់សង្គ្រាមវាយប្រហារលើដែនដីហ្កាហ្សា។
តែអ្នកវិភាគមួយចំនួនថា ចិននិងរុស្ស៊ី ក៏មិនចង់ឱ្យអ៊ីស្រាអែលវាយចូលដែនដីហ្កាហ្សា ដើម្បីរំលាយអង្គការចាត់តាំងរបស់ពួកហាម៉ាសនោះដែរ។
ចុះហេតុអ្វីបានជាក្រុមបស្ចិមប្រទេសជំទាស់សេចក្ដីព្រាងដំណោះស្រាយរុស្ស៊ី ដែលសុំក្រុមប្រឹក្សាសន្តិសុខអង្គការសហប្រជាជាតិបញ្ជាទៅអ៊ីស្រាអែល ឲ្យបញ្ចប់សង្គ្រាមវាយប្រហារពួកហាម៉ាសប៉ាឡេស្ទីន?
កាលពីថ្ងៃទី១៨ តុលា ក្រុមប្រឹក្សាសន្តិសុខអង្គការសហប្រជាជាតិ បានបើកកិច្ចប្រជុំលើកទី២ របស់ខ្លួន ដើម្បីពិនិត្យ និងអនុម័តសេចក្ដីព្រាងដំណោះស្រាយរុស្ស៊ី ដែលសុំឱ្យចេញសេចក្ដីសម្រេចបង្គាប់ទៅអ៊ីស្រាអែល បញ្ឈប់វាយប្រហារលើដែនដីហ្កាហ្សា ដោយបារម្ភពីការស្លាប់យ៉ាងរង្គាលប្រជាជនប៉ាឡេស្ទីន។ តែសហរដ្ឋអាមេរិក អង់គ្លេស បារាំង បានបោះឆ្នោតវេតូ ដែលធ្វើឱ្យសេចក្ដីព្រាងដំណោះស្រាយរុស្ស៊ី មិនអាចក្លាយជាដំណោះស្រាយបានឡើយ។
អ្នកសង្កេតការណ៍រកឃើញហេតុផលតែមួយគត់ដែលក្រុមបស្ចិមប្រទេសបោះឆ្នោតវេតូលើសំណើរបស់រុស្ស៊ី គឺដោយសារចង់ឃើញពួកហាម៉ាសត្រូវកងទ័ពអ៊ីស្រាអែល កម្ទេចឱ្យអស់នៅលើទឹកដីហ្កាហ្សា ខណៈក្រុមបស្ចិមប្រទេសដឹកនាំដោយសហរដ្ឋអាមេរិក ចាត់ទុកថាការលួចវាយប្រហាររបស់កងទ័ពហាម៉ាសលើដែនដីអ៊ីស្រាអែល កាលពីថ្ងៃទី៧ តុលា គឺជាអំពើភេរវកម្មដែលត្រូវតែបោសសម្អាត។ ដូចនេះបានជាសហរដ្ឋអាមេរិក អាល្លឺម៉ង់ អង់គ្លេស បារាំង កាណាដា អ៊ីតាលី បានប្រកាសគាំទ្រអ៊ីស្រាអែល ដែលបើកការវាយប្រហារដោយទម្លាក់គ្រាប់បែកទៅលើដែនដីហ្កាហ្សា ប៉ុន្តែក្រុមបស្ចិមប្រទេសក៏បានទាមទារឱ្យពួកហាម៉ាសដោះលែងចំណាប់ខ្មាំងទាំងអស់ជាមួយការស្នើអ៊ីស្រាអែល ពន្យារការវាយលុកដោយទ័ពថ្មើរជើង។
មកដល់ពេលនេះ ចំណាប់ខ្មាំងបរទេសដែលពួកហាម៉ាសចាប់ពង្រត់នៅហ្កាហ្សា មានជាង ២០០នាក់។ សង្គ្រាមអ៊ីស្រាអែល ដែលវាយសងសឹកនេះបានចូលដល់ថ្ងៃទី១៦ ហើយ។ ប្រជាជនប៉ាឡេស្ទីន រស់នៅតំបន់ហ្កាហ្សាភាគច្រើនបាននាំគ្នារត់ទៅកាន់ព្រំដែនប្រទេសអេហ្ស៊ីប និងប្រទេសហ្សកដានី៕