សង្គ្រាមដែលលោក វ៉្លាឌីមៀ ពូទីន ប្រធានាធិបតីរុស្ស៊ី បញ្ជាឱ្យលើកទ័ពវាយចូលទឹកដីអ៊ុយក្រែន មកដល់ពេលនេះចូលដល់ខែទី២១ ហើយ។ នៅមុនការបង្កសង្គ្រាមវាយចូលទឹកដីអ៊ុយក្រែន លោក ពូទីន ប្រកាសថាត្រូវតែធ្វើសង្គ្រាមវាយរដ្ឋាភិបាលអ៊ុយក្រែន របស់លោកប្រធានាធិបតី វូឡូឌីមៀ ហ្សេឡេនស្គី ព្រោះតែប្រទេសអ៊ុយក្រែន ដែលស្ថិតនៅក្រោមលោក ហ្សេឡេនស្គី បានដាក់ពាក្យសុំចូលសមាជិកអង្គការយោធាណាតូ។
លោក ពូទីន និងរដ្ឋាភិបាលរបស់លោកសម្រេចថាមានតែធ្វើសង្គ្រាមវាយអ៊ុយក្រែន ទើបបញ្ឈប់រដ្ឋាភិបាលលោក ហ្សេឡេនស្គី ដែលចង់ក្លាយជាសមាជិកណាតូ ហើយម្យ៉ាងទៀត រុស្ស៊ីត្រូវវាយរំដោះប្រជាជននិយាយភាសារុស្ស៊ី នៅភាគខាងកើតក្នុងតំបន់ដុនបាស ដែលកំពុងត្រូវបានសម្លាប់ដោយកងទ័ពអ៊ុយក្រែន។
ក្នុងស្ថានភាពនេះ លោក ពូទីន បញ្ជាទ័ព ២៥ម៉ឺននាក់ និងរថក្រោះ រថពាសដែក កាំភ្លើងធំរាប់ពាន់គ្រឿង ឡោមព័ទ្ធប្រទេសអ៊ុយក្រែន រហូតអ៊ុយក្រែនបញ្ជូនទ័ពទៅប្រឈមមុខនឹងកងទ័ពរុស្ស៊ី ខណៈពួកបស្ចិមប្រទេស និងអគ្គលេខាធិការអង្គការសហប្រជាជាតិ អំពាវនាវឱ្យរុស្ស៊ីបន្ថយការដាក់សម្ពាធបង្កសង្គ្រាមវាយអ៊ុយក្រែន។
តែលោក ពូទីន កាន់តែកញ្ជ្រោលដោយព្រមានថា វាយអ៊ុយក្រែនឱ្យរលំ ទើបណាតូលែងចាប់យកអ៊ុយក្រែន ជាសមាជិករបស់ខ្លួន។
បើតាមមន្ត្រីចារកម្មរបស់អាមេរិក និងអង់គ្លេស លោក ពូទីន មានជំនឿថា ការវាយផ្ដួលរំលំរដ្ឋាភិបាលលោក ហ្សេឡេនស្គី គឺយ៉ាងយូរមួយសប្ដាហ៍ត្រូវវាយចូលក្រុងគៀវ ហើយបិទបញ្ចប់ការដឹកនាំរបស់លោក ហ្សេឡេនស្គី នៅរដ្ឋធានីមួយនេះ។ ដោយមានជំនឿដូចនេះ លោក ពូទីន ក៏បានបញ្ជាឱ្យលើកទ័ព ២៥ម៉ឺននាក់វាយចូលអ៊ុយក្រែន នៅថ្ងៃទី២៤ ខែកុម្ភៈ ឆ្នាំ២០២២។
ការបើកឆាកប្រយុទ្ធគ្នារវាងកងទ័ពនៃប្រទេសទាំងពីរក៏ចាប់ផ្ដើម ប៉ុន្តែអ៊ុយក្រែនទប់ជាប់ការវាយរុលរបស់កងទ័ពរុស្ស៊ី បើទោះជាទ័ពរុស្ស៊ី រុលចូលកាន់តែកៀកក្រុងគៀវ ក៏ដោយ ក៏លោក ហ្សេឡេនស្គី និងមេទ័ពរបស់លោកមិនបានរត់ចេញពីទីក្រុងនេះឡើយ។
នៅពេលជាមួយគ្នានេះ អាវុធបាញ់រថក្រោះរបស់អង់គ្លេស NLAW និងអាវុធបាញ់រថក្រោះអាមេរិក Javelin និងអាវុធបាញ់យន្តហោះ Stinger ត្រូវបានទ័ពអ៊ុយក្រែនប្រើប្រាស់លើសមរភូមិទៅហើយ។ អាវុធទាំងបីប្រភេទនេះហើយដែលអ៊ុយក្រែន វាយទប់បានយ៉ាងជោគជ័យនូវការរុលចូលរបស់កងទ័ពរថក្រោះរុស្ស៊ី ដែលវាយចូលរដ្ឋធានីគៀវ។
នៅថ្ងៃទី៤ មិថុនា ឆ្នាំ២០២២ រុស្ស៊ីប្រកាសដកទ័ពចេញពីភាគខាងជើងទីក្រុងគៀវ ត្រឡប់ទៅប្រមូលផ្ដុំគ្នានៅតំបន់ដុនបាស ភាគខាងកើតប្រទេស ក្រោយពីទ័ព និងរថក្រោះរុស្ស៊ី រាប់រយគ្រឿង ត្រូវទ័ពអ៊ុយក្រែនបាញ់ឆេះនៅពាសពេញផ្លូវនៅតំបន់ភាគខាងជើងក្រុងគៀវ ចម្ងាយ ៦០គីឡូម៉ែត្រ។
ការដកទ័ពរបស់រុស្ស៊ី នេះ គឺស្មើនឹងរុស្ស៊ីបាក់ទ័ពជាលើកដំបូង ព្រោះតែអស់លទ្ធភាពវាយចូលក្រុងគៀវ ដើម្បីផ្ដួលរំលំរដ្ឋាភិបាលលោក ហ្សេឡេនស្គី។ ចាប់ពីពេលនោះមក រុស្ស៊ីបន្តបាក់ទ័ពយ៉ាងអាម៉ាស់ក្នុង ២សមរភូមិទៀតនៅតំបន់ខាគៀវ ភាគឥសាន និងតំបន់ខឺសុន ភាគខាងត្បូង។ ក្នុងសភាពបែបនេះ ក្រុមអ្នកជាតិនិយមរុស្ស៊ី ចាប់ផ្ដើមបន្ទោសលោក ពូទីន ដែលបរាជ័យមិនអាចវាយចូលរដ្ឋធានីគៀវ ហើយជាពិសេសមិនអាចវាយផ្ដួលរំលំការដឹកនាំរបស់លោក ហ្សេឡេនស្គី គឺមិនដូចអ្វីដែលវិមានក្រឹមឡាំង អួតថារយៈពេលយ៉ាងយូរ ៧ថ្ងៃ វាយយកបានក្រុងគៀវ។
គេនៅចាំបានថា នៅមុនសង្គ្រាមរុស្ស៊ីបង្កទៅលើប្រទេសអ៊ុយក្រែន ការស្ទង់មតិរបស់មជ្ឈមណ្ឌល Levada ក្រុងមូស្គូ បានរកឃើញការគាំទ្រលោក ពូទីន លើកទ័ពវាយចូលអ៊ុយក្រែន ដែលមានផែនការផ្ដួលរំលំរដ្ឋាភិបាលលោក ហ្សេឡេនស្គី មានជិត ៦០%។
តែក្រោយមកទៀត នៅពេលរុស្ស៊ីបាក់ទ័ពផ្ទួនៗក្នុងឆ្នាំ២០២២ អ្នកគាំទ្រសង្គ្រាមរបស់លោក ពូទីន ចាប់ផ្ដើមធ្លាក់ចុះជាលំដាប់ រហូតនៅសល់ជិត ៤០ភាគរយ។ ជាថ្មីម្ដងទៀត កាលពីថ្ងៃទី៥ វិច្ឆិកា មជ្ឈមណ្ឌល Levada ក្រុងមូស្គូ បានធ្វើការស្ទង់មតិឡើងវិញ ដោយរកឃើញថា ការគាំទ្រសង្គ្រាមរបស់លោក ពូទីន នៅលើទឹកដីអ៊ុយក្រែន ធ្លាក់មកដល់ ៣០ភាគរយ។
តាមការស្ទង់មតិនេះ អ្នកដែលឆ្លើយថាសង្គ្រាមគួរតែបិទបញ្ចប់មានជិត ៦០ភាគរយ ហើយ ៧០% ឆ្លើយដោយភាពច្បាស់លាស់ថា លោក ពូទីន ធ្វើសង្គ្រាមមិនឈ្នះអ៊ុយក្រែន ទេ។
មកដល់ពេលនេះ សង្គ្រាមរុស្ស៊ីឈ្លានពានអ៊ុយក្រែន ដែលចូលដល់ខែទី២១ នេះ រុស្ស៊ីបាត់បង់ទ័ពជាង ៣០ម៉ឺន ៦៨០០នាក់ រថក្រោះ ៥២៩៣គ្រឿង រថពាសដែក ៩៩៧៤គ្រឿង និងកាំភ្លើងធំ ៧៤១០គ្រឿង។ អាវុធទាំងបីប្រភេទនេះ គឺជាអាវុធគាំទ្រទ័ពថ្មើរជើង។ តួលេខនេះចុះផ្សាយដោយក្រសួងការពារជាតិអ៊ុយក្រែន នៅថ្ងៃទី៧ វិច្ឆិកា នេះ។
អ្នកជំនាញយោធារបស់ពួកបស្ចិមប្រទេស មើលឃើញថា បើពិតដូចការចុះផ្សាយរបស់ក្រសួងការពារជាតិអ៊ុយក្រែន គឺរុស្ស៊ីធ្វើសង្គ្រាមលើប្រទេសអ៊ុយក្រែន បានត្រឹមតែទប់ទល់ការវាយបករបស់អ៊ុយក្រែន វិញតែប៉ុណ្ណោះ ព្រោះតែរុស្ស៊ី បាត់បង់ទ័ព និងសព្វាវុធបីប្រភេទនេះមានចំនួនច្រើនលើសលប់ ដែលធ្វើឱ្យទ័ពជើងគោករបស់រុស្ស៊ី ពុំមានលទ្ធភាពវាយឈ្នះទ័ពអ៊ុយក្រែន នោះទេ។
បើសង្គ្រាមកាន់តែអូសបន្លាយទៀត ប្រជាជនរុស្ស៊ីកាន់តែអស់ជំនឿលើការដឹកនាំរបស់លោក ពូទីន ប៉ុន្តែអ៊ុយក្រែន ដែលមានសមត្ថភាពវាយការពារទឹកដីរបស់ខ្លួន ហើយចុងក្រោយនេះវាយបកលើទ័ពរុស្ស៊ី វិញ ក៏ព្រោះតែការជួយអាវុធគ្រាប់រំសេវពីសហរដ្ឋអាមេរិក និងក្រុមបស្ចិមប្រទេស៕